នាយករដ្ឋមន្ត្រីប្រកាសរុះរើព្រះបរមមេរុឲ្យបានមុនចូលឆ្នាំខ្មែរ
2013.02.14
ព្រះរាជពិធីថ្វាយព្រះភ្លើងព្រះករុណា ព្រះមហាវីរក្សត្រ នៅព្រះបរមមេរុ កាលពីថ្ងៃទី៤ កុម្ភៈ ឆ្នាំ២០១៣។
យ៉ាងណាក៏ដោយ ប្រជាពលរដ្ឋត្រូវបានគេអនុញ្ញាតឲ្យចូលទស្សនាព្រះបរមមេរុ ជារៀងរាល់ថ្ងៃ ចាប់តាំងពីព្រះរាជពិធីថ្វាយព្រះភ្លើងរួចកាលពីដើមខែកុម្ភៈ មក។
លោកនាយករដ្ឋមន្ត្រី ហ៊ុន សែន បានប្រកាសជាសាធារណៈថា ព្រះបរមមេរុ ដែលបានប្រើប្រាស់សម្រាប់ព្រះរាជពិធីថ្វាយព្រះភ្លើង ព្រះបរមរតនកោដ្ឋ ឬព្រះបរមសពអតីតព្រះមហាក្សត្ររួចមកនោះ នឹងត្រូវរុះរើចេញពីទីវាលព្រះមេរុ ឲ្យបានមុនពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ ដែលកាន់តែខិតជិតចូលមកដល់។
ថ្លែងនៅក្នុងពិធីសម្ពោធដាក់ឲ្យប្រើប្រាស់អគារថ្មីនៃពុទ្ធិកសាកលវិទ្យាល័យព្រះសីហមុនីរាជា នៅវត្តស្វាយពពែ លោកនាយករដ្ឋមន្ត្រី ហ៊ុន សែន បានសរសើរដល់គណៈកម្មាធិការ និងអ្នកចូលរួមរៀបចំព្រះរាជពិធីព្រះបរមសព និងការសាងសង់ព្រះបរមមេរុ ក្នុងរយៈពេលខ្លីប្រកបដោយភាពជោគជ័យ និងលើកមុខមាត់កិត្តិយសប្រទេសជាតិ។
លោកបានបញ្ជាក់យ៉ាងច្បាស់ថា ព្រះបរមមេរុ ដែលបានប្រើប្រាស់សម្រាប់ព្រះរាជពិធីថ្វាយព្រះភ្លើងនោះ នឹងត្រូវរុះរើចេញយ៉ាងច្បាស់ណាស់ មិនអាចរក្សាទុកតាមការស្នើសុំរបស់ពលរដ្ឋបានទេ។ ប៉ុន្តែលោកមិនបានបញ្ជាក់ពីមូលហេតុនៃការរុះរើឡើយ។
លោកនាយករដ្ឋមន្ត្រី ហ៊ុន សែន៖ «ឥឡូវត្រូវរក្សាព្រះមេរុនេះ ដើម្បីប្រជាពលរដ្ឋអាចចូលទៅពិនិត្យមើល តើយើងធ្វើយ៉ាងម៉េច? ក៏ប៉ុន្តែ ព្រះមេរុនេះក៏មិនអាចទុកយូរបានដែរ ក៏មិនអាចឲ្យឆ្លងឆ្នាំខ្មែរបានដែរ បានពិភាក្សាគ្នាទាក់ទងជាមួយនឹងការរុះព្រះមេរុនេះ»។
ទាក់ទងនឹងការរុះរើព្រះបរមមេរុ នេះ សមាជិកគណៈកម្មាធិការជាតិរៀបចំព្រះរាជពិធីបុណ្យព្រះបរមសព គឺលោក ញឹក ប៊ុនឆៃ បានថ្លែងថា ទំនងជាជិតពិធីបុណ្យចូលឆ្នាំថ្មីប្រពៃណីជាតិ នឹងមានភ្លៀងធ្លាក់ ពីព្រោះសំណង់ខ្លះមិនអាចរក្សាទុកបានយូរឡើយ។
ទន្ទឹមនឹងគ្នានេះ លោកនាយករដ្ឋមន្ត្រី ហ៊ុន សែន មានប្រសាសន៍ឲ្យដឹងថា ក្នុងព្រះរាជពិធីថ្វាយព្រះភ្លើងដល់ព្រះបរមរតនកោដ្ឋ មានអព្ភូតហេតុមួយបានកើតឡើង។
លោកនាយករដ្ឋមន្ត្រី ហ៊ុន សែន៖ «មានការចាំបាច់ដើម្បីធ្វើការបកស្រាយអំពីអព្ភូតហេតុដ៏អស្ចារ្យនៅក្នុងពិធីនៃការថ្វាយព្រះភ្លើង។ ខ្ញុំករុណាខ្ញុំនិយាយដល់កន្លែងហ្នឹង ខ្ញុំករុណាខ្ញុំព្រឺក្បាល ហើយព្រឺរោមហ្មង! ព្រោះរឿងនេះរឿងអព្ភូតហេតុដ៏អស្ចារ្យ ហើយគឺចេញមកពីបារមីរបស់អតីតព្រះមហាក្សត្ររបស់យើងតែហ្មង។ ថ្វាយព្រះភ្លើង ត្រូវថ្វាយរហូតដល់ប្រាំដង។ អ៊ីចឹង លើកទី៥ ចុងក្រោយ គឺខ្ញុំករុណាខ្ញុំ សុំព្រះរាជទានទោសអធិដ្ឋានហើយ សុំព្រះរាជទានទោសចំពោះព្រះបរមសព ទូលព្រះបង្គំអស់ជម្រើសហើយ។ អ៊ីចឹងទេ គឺដុតហ្មង រុញ តែយើងត្រូវចាំ ព្រះអង្គ ទាំងព្រះករុណា មហាក្សត្រ ទាំងហ្លួង គឺពីខាងក្រោយឆៀងខាងស្ដាំ បានសេចក្ដីថាខាងត្បូង ដល់ព្រះអង្គ ទាំងពីរព្រះអង្គ និងទូលបង្គំខ្ញុំករុណាខ្ញុំជាជំនួយ ក៏ស្ថិតក្នុងទិសដូចគ្នា ដល់ខ្ញុំករុណាខ្ញុំតែម្នាក់ឯង គឺចេញត្រង់ទីព្រះបាទចំហៀងខាងឆ្វេងវិញ ខាងជើង មកខាងត្បូងវិញ ដាក់ទៅឆេះមកតែម្ដង។ អ៊ីចឹង ចុងក្រោយខ្ញុំករុណាខ្ញុំជាអ្នកថ្វាយព្រះភ្លើងនេះ ហើយដែលទីបំផុត ព្រះភ្លើងនេះបានចប់សព្វគ្រប់»។
គណៈកម្មាធិការជាតិរៀបចំព្រះរាជពិធីបុណ្យព្រះបរមសព សម្រេចសាងសង់ព្រះបរមមេរុ សម្រាប់ធ្វើព្រះរាជពិធីថ្វាយព្រះភ្លើងព្រះបរមសព នៅក្នុងបរិវេណវាលព្រះមេរុខាងជើងជាប់ព្រះបរមរាជវាំង និងនៅខាងមុខសារមន្ទីរជាតិ លើផ្ទៃដីទំហំមួយហិកតារ ដោយចំណាយថវិកាជាង ១លានដុល្លារ។
ព្រះរាជពិធីថ្វាយព្រះភ្លើង បានរៀបចំឡើងកាលពីថ្ងៃទី៤ ខែកុម្ភៈ ឆ្នាំ២០១៣ ដោយមានការចូលរួមពីថ្នាក់ដឹកនាំរដ្ឋាភិបាលកម្ពុជា មេដឹកនាំអន្តរជាតិ បណ្ដាប្រទេសជាមិត្ត មន្ត្រីអ្នកមុខអ្នកការ និងភ្ញៀវជាតិអន្តរជាតិជាច្រើនម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន