ពលរដ្ឋ និងសង្គមស៊ីវិលចង់ឃើញរដ្ឋាភិបាលរកអ្នកកាត់តរូបនារីម្នាក់ជាន់ព្រះកេសព្រះនៅប្រាសាទអង្គរវត្តមកអនុវត្តតាមនីតិវិធី
2024.04.01
ទេសចរមកទស្សនាប្រាសាទអង្គរវត្ត។
រូប៖ ក្រសួងព័ត៌មាន
ពលរដ្ឋ និងមន្ត្រីសង្គមស៊ីវិលជំរុញដល់ក្រសួងស្ថាប័នមានសមត្ថកិច្ចពន្លឿននីតិវិធីស៊ើបអង្កេតអ្នកដែលកាត់តរូបស្ត្រីកាន់ទង់ជាតិថៃម្នាក់លើកជើងជាន់ព្រះកេសព្រះនៅប្រាសាទអង្គរវត្តយកមកផ្ដន្ទាទោសតាមផ្លូវច្បាប់។ អាជ្ញាធរជាតិអប្សរា ចាត់ទុកការកាត់តរូបភាពស្ត្រីជាន់ព្រះកេសព្រះ នៅមុខប្រាសាទអង្គរវត្ត ថា ជាការញុះញង់ឱ្យមានការរើសអើងពូជសាសន៍ និងបម្រើផលប្រយោជន៍នយោបាយអាក្រក់ បង្កឱ្យប៉ះពាល់វប្បធម៌ជាតិ។
ពលរដ្ឋ និងមន្ត្រីសង្គមស៊ីវិលយល់ឃើញថា រូបភាពកាត់ត ឬបង្កើតឡើងដោយបញ្ញាសិប្បនិម្មិត (AI) ដែលស្ត្រីកាន់ទង់ជាតិថៃម្នាក់លើកជើងជាន់ព្រះកេសព្រះនៅទីតាំងប្រាសាទអង្គរវត្ត បានធ្វើឱ្យប៉ះពាល់ដល់កិត្យានុភាពវប្បធម៌ខ្មែរធ្ងន់ធ្ងរ។ ពួកគេជំរុញដល់ក្រសួងស្ថាប័នមានសមត្ថកិច្ចទប់ស្កាត់បញ្ហានេះ និងស្វែងរកអ្នកដែលកាត់តរូបភាពបំផ្លើសពីការពិតយកមកអនុវត្តទោស ដើម្បីព្រមានដល់បុគ្គលផ្សេងទៀតដែលមានបំណងធ្វើសកម្មភាពប៉ះពាល់ដល់វប្បធម៌ជាតិ។
ពលរដ្ឋម្នាក់រស់នៅខេត្តសៀមរាបលោក ហាន ប៊ុនហ៊ាង ប្រាប់វិទ្យុអាស៊ីសេរីនៅថ្ងៃទី៣១ ខែ មីនា ថា ខេត្តសៀមរាបជាទឹកដីដ៏ពិសិដ្ឋ ហើយរូបចម្លាក់ក្បាច់ក្បូរប្រាសាទដែលបុព្វបុរសខ្មែរបន្សល់ទុកដល់កូនចៅគ្រប់ជំនាន់គឺមានតម្លៃមិនអាចកាត់ថ្លៃបាន ហើយពុំគួរមានបុគ្គលណាមួយធ្វើសកម្មភាពបន្ទាបតម្លៃ មើលងាយប្រមាថវប្បធម៌នៃដួងព្រលឹងជាតិខ្មែរនោះទេ។ លោកទាមទារដល់ក្រសួងវប្បធម៌ និងអាជ្ញាធរពាក់ព័ន្ធចាត់វិធានការ ស៊ើបអង្កេតលើអ្នកដែលកាត់រូបស្ត្រីជាន់លើព្រះកេសព្រះ ដើម្បីយកមកអនុវត្តទោសឱ្យបានធ្ងន់ធ្ងរតាមច្បាប់។
លោក ហាន ប៊ុនហ៊ាង៖ «គួរណាតែរដ្ឋាភិបាល ឬក្រសួងពាក់ព័ន្ធដូចជាក្រសួងវិចិត្រសិល្ប ផ្ទាល់តែម្ដងគួរតែចាត់វិធានការក្ដៅចំពោះប្រទេសដទៃ ឬអ្នកដែលកាត់តប៉ះពាល់ដល់ប្រពៃណីវប្បធម៌ជាតិខ្មែរយើងដែលមិនអាចកាត់ថ្លៃបានមួយនេះ វាគួរតែចាត់វិធានការ ឱ្យតឹងរ៉ឹងបំផុតសម្រាប់ជនបរទេសមួយណាក៏ដោយ ឬអ្នកកាត់តរូបភាពណាមួយក៏ដោយគឺមិនអាចអត់ឱនឱ្យបានឡើយ»។
ចំណែក ប្រធានសមាគមសម្ពន្ធនិស្សិតបញ្ញវន្តខ្មែរ (KSILA) លោក កើត សារ៉ាយ សាទរចំពោះចំណាត់ការរបស់ក្រសួងវប្បធម៌ដែលបញ្ចេញប្រតិកម្ម និងស្វែងរកអ្នកកាត់តរូបដែលបង្កផលប៉ះពាល់ដល់វប្បធម៌ជាតិ។ ប៉ុន្តែ លោក យល់ថា ក្រសួងវប្បធម៌គួរណាតែបង្កើនការអប់រំផ្សព្វផ្សាយវប្បធម៌ដល់ពលរដ្ឋឱ្យបានទូលំទូលាយ និងទប់ស្កាត់បញ្ហាការចែកចាយរូបភាពមិនពិត ជាជាងចេញមុខដោះស្រាយពេលមានបញ្ហាកើតឡើង។
លោក កើត សារ៉ាយ៖ «សាមីក្រសួងពាក់ព័ន្ធក៏ត្រូវតែពិនិត្យឱ្យបានជាក់លាក់ជាងនេះ បន្ថែមទៀតលើបណ្ដាញសង្គម ដើម្បីធ្វើឱ្យប្រាកដថា ការផ្សព្វផ្សាយក្នុងបណ្ដាញសង្គមស្ថិតក្នុងកម្រិតមួយដែលក្រសួងអាចគ្រប់គ្រងបាន ឬទៅកែតម្រូវមុនបញ្ហាទាំងអស់ហ្នឹងត្រូវបានចែករំលែកជាសាធារណៈទូលំទូលាយ។ វាក៏ជារឿងមួយដែលកម្ពុជាខ្លួនឯងលើកតម្លៃវប្បធម៌ សីលធម៌ឱ្យខ្លាំងជាងនេះទៅទៀត ដើម្បីធ្វើយ៉ាងណា ឱ្យជនជាតិខ្មែរគ្រប់រូបចាប់ផ្ដើមមានឆន្ទៈខ្លាំងក្លាចូលរួមយ៉ាងសកម្មក្នុងការលើកកម្ពស់ និងចូលរួមទប់ស្កាត់ជាមួយសាមីក្រសួង»។
រូបភាពមួយសន្លឹកដែលត្រូវបានគេចែកចាយតៗគ្នាតាមបណ្ដាញសង្គមហ្វេសប៊ុកលើគណនីឈ្មោះ ការពិត (fact) កាលពីថ្ងៃទី៣០ ខែមីនា បង្ហាញពីរូបភាពស្ត្រីម្នាក់កាន់ទង់ជាតិនៃប្រទេសថៃ និងបានលើកជើងជាន់ព្រះកេសព្រះស្ថិតនៅទីតាំងប្រាសាទអង្គរ ដោយបានភ្ជាប់អក្សរថៃដែលមានន័យថា រស់នៅក្រោមជើងសៀមជារៀងរហូត បានធ្វើឱ្យសាធារណជនមួយចំនួនចូលបញ្ចេញប្រតិកម្មខឹងសម្បារ។
ទោះជាយ៉ាងណាម្ចាស់ហ្វេសប៊ុក ឈ្មោះ ការពិត-fact បានលុបរូបភាពចោលវិញកាលពីរសៀលថ្ងៃទី៣១ ខែមីនា បន្ទាប់ពីមានការរិះគន់ ហើយក្រសួងវប្បធម៌ និងវិចិត្រសិល្បប្រកាសស្វែងរកអ្នកដែលបង្ហោះរូបនោះ ដើម្បីឱ្យទទួលខុសត្រូវតាមផ្លូវច្បាប់។
អាជ្ញាធរជាតិអប្សរានៅថ្ងៃទី៣១ ខែមីនា ចាត់ទុកការកាត់តរូបភាពបង្ហាញពីនារីម្នាក់ជាន់ព្រះកេសព្រះ នៅមុខប្រាសាទអង្គរវត្ត គឺជាការញុះញង់ឱ្យមានការរើសអើងពូជសាសន៍ បម្រើផលប្រយោជន៍នយោបាយអាក្រក់ និងបង្កផលប៉ះពាល់ដល់ទំនាក់ទំនងជាមួយប្រទេសជិតខាង។ អាជ្ញាធរជាតិអប្សរា អំពាវនាវដល់សាធារណជន កុំបន្តចែករំលែកនូវរូបភាពកាត់តខាងលើ ដែលមានចរិតលក្ខណៈអុជអាល និងជាន់ពន្លិចជាតិខ្លួនឯង។ ទន្ទឹមនឹងនេះ អាជ្ញាធរជាតិអប្សរាអះអាងថា នឹង សហការជាមួយសមត្ថកិច្ចពាក់ព័ន្ធ ដើម្បីស្រាវជ្រាវស្វែងរកមុខអ្នកបង្កើតរូបភាពកាត់តឱ្យមកទទួលខុសត្រូវចំពោះមុខច្បាប់។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងវប្បធម៌ និងវិចិត្រសិល្ប លោក ឡុង ប៉ុណ្ណាស៊ីរីវត្ថ និងអ្នកនាំពាក្យអាជ្ញាធរជាតិអប្សរាលោក ឡុង កុសល ដើម្បីសាកសួរបន្ថែមជុំវិញរឿងនេះបានទេនៅថ្ងៃទី៣១ ខែមីនា។
មន្ត្រីសង្គមស៊ីវិលមើលឃើញថា ជម្លោះវប្បធម៌រវាងកម្ពុជា និងថៃនៅតែបន្តកើតមានមិនចេះចប់មិនហើយ ដោយសារតែកត្តាមានក្រុមជ្រុលនិយមមួយចំនួននៃប្រទេសទាំងពីរបន្តបង្កើតព័ត៌មានមិនពិតបង្ខូចកេរ្តិ៍ឈ្មោះដល់វប្បធម៌។ មន្ត្រីសង្គមស៊ីវិល និងពលរដ្ឋចង់ឃើញរដ្ឋាភិបាលលើកកម្ពស់កិត្យានុភាពវប្បធម៌ខ្មែរឱ្យបានទូលំទូលាយលើឆាកអន្តរជាតិ និងចាត់វិធានការចំពោះជនទាំងឡាយណាដែលបង្កការប្រមាថដល់វប្បធម៌ជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់