ខេត្តកំពង់ចាម និងខេត្តត្បូងឃ្មុំ មានតួលេខស្រ្តី ដែលរងគ្រោះដោយអំពើជួញដូរមនុស្សទៅប្រទេសចិនខ្ពស់ជាងគេ
2024.12.21

ខេត្តចំនួនបី ដែលនៅជាប់ព្រំដែនវៀតណាម មានមានស្ត្រីរងគ្រោះ ដែលត្រូវបានជនល្មើសជួញដូរទៅប្រទេសចិន មានតួលេខខ្ពស់ជាងគេ។ ក្រុមអង្គការសង្គមស៊ីវិលបានសន្និដ្ឋានថា មូលហេតុ ដែលខេត្តទាំងបីមានស្ត្រីរងគ្រោះ ដោយអំពើជួញដូរមនុស្សទៅប្រទេសចិនច្រើនជាងគេ ប្រហែលដោយសារបណ្ដាលមកពីពលរដ្ឋមានជីវភាពខ្វះខាត និងគ្មានការងារធ្វើ នៅក្នុងមូលដ្ឋាន។
សមាគមការពារសិទ្ធិមនុស្សអាដហុក (ADHOC) បានឱ្យដឹងថា ក្នុងរយៈពេលជាង ១១ខែ ឆ្នាំ២០២៤ នេះ ខេត្តកំពង់ចាម និងខេត្តត្បូងឃ្មុំ គឺជាខេត្ត ដែលមានតួលេខស្ត្រីខ្មែររងគ្រោះដោយអំពើជួញដូរមនុស្សទៅប្រទេសចិនច្រើនជាងគេ។
ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា យល់ថា ថ្វីដ្បិតតែរបាយការណ៍បង្ហាញថា ចំនួនស្ត្រី ដែលរងគ្រោះដោយអំពើជួញដូរមនុស្សទៅប្រទេសចិនក្នុងខេត្តកំពង់ចាម និងខេត្តត្បូងឃ្មុំ មានតួលេខខ្ពស់ជាងគេ ក៏ប៉ុន្តែ លោកមិនទាន់ប្រាកដថា ចំនួននេះ ពិតជាច្រើនជាងខេត្តដទៃទៀតនៅឡើយទេ។ លោកថា ខេត្តជាច្រើនទៀត ក៏អាចមានតួលេខជនរងគ្រោះ នៃអំពើជួញដូរមនុស្សប្រហាក់ប្រហែលគ្នាដែរ គ្រាន់តែពេលនេះ ក្រុមការងារនៅមិនទាន់ទទួលបានព័ត៌មានប៉ុណ្ណោះ។
លោក នី សុខា យល់ថា ស្ត្រីជាច្រើន នៅខេត្តកំពង់ចាម ខេត្តត្បូងឃ្មុំ និងបណ្ដាខេត្តខ្លះទៀត បានធ្លាក់ខ្លួនចាញ់បោកមេខ្យល់ ហើយគេនាំយកទៅជួញដូរ គឺដោយសារតែពួកគេរស់នៅប្រឈមនឹងជីវភាពខ្វះខាត និងគ្មានការងារធ្វើ។
លោក នី សុខា៖ «ពេលដែលស្ត្រីខ្មែរទៅស្រុកចិននោះ ពីដំបូង បើសិនជាគាត់ដឹងថា គេនាំគាត់ទៅជួញដូរ គឺប្រាកដជាមិនទៅទេ។ ប៉ុន្តែជាទូទៅពួកគាត់ចាញ់បោកតាមរយៈមេខ្យល់ឬក៏ជាក្រុមហ៊ុន និងអ្នកខ្លះទៀតមានបងប្អូនមកនាំទៅ។ ប៉ុន្តែនៅពេលស្ត្រីទាំងនោះទៅដល់ស្រុកចិនគឺដាច់ទំនាក់ទំនងជាមួយក្រុមគ្រួសារ ទើបចាប់ផ្ដើមដឹងខ្លួនថាចាញ់បោកគេ ក្នុងលក្ខណៈគេជួញដូរ ទៅខាងផ្លូវភេទនិងជួញដូរផ្នែកកម្លាំងពលកម្មជាដើមនោះ»។
ចាប់តាំងពីខែមករា រហូតដល់ថ្ងៃទី១៦ ខែធ្នូ ឆ្នាំ២០២៤ សមាគម អាដហុកបានធ្វើអន្តរាគមន៍ និងជួយស្ត្រី ដែលរងគ្រោះដោយអំពើជួញដូរទៅប្រទេសចិន នៅខេត្តត្បូងឃ្មុំ ចំនួន ៨ករណី ខេត្តកំពង់ចាម ៧ករណី ខេត្តព្រៃវែង ៣ករណី ខេត្តស្វារឿង ៣ករណី ខេត្តក្រចេះ ២ករណី រាជធានីភ្នំពេញ ៣ករណី និងខេត្តបន្ទាយមានជ័យ ១ករណី។
វិទ្យុអាស៊ីសេរី មិនអាចសុំការអត្ថាធិប្បាយជុំវិញបញ្ហាចំនួនស្ត្រី ដែលរងគ្រោះដោយអំពើជួញដូរមនុស្សនាំទៅប្រទេសចិន មានតួលេខខ្ពស់ជាងគេនេះ ពីអ្នកនាំពាក្យសាលាខេត្តកំពង់ចាម អ្នកស្រី សុភ័ក្ត្រ និងពីអ្នកនាំពាក្យសាលាខេត្តព្រៃវែង លោក អន ភារៈ បាននៅឡើយទេ នៅថ្ងៃទី២១ ធ្នូ។
ចំណែកអ្នកនាំពាក្យសាលាខេត្តត្បូងឃ្មុំ លោក ម៉ៅ ឌុង បដិសេធមិនធ្វើអត្ថាធិប្បាយអំពីមូលហេតុ ដែលខេត្តរបស់លោក ចំនួនស្ត្រីរងគ្រោះដោយអំពើជួញដូរមនុស្សទៅប្រទេសចិន មានតួលេខខ្ពស់ជាងគេនេះឡើយ។
លោក ម៉ៅ ឌុង៖ «អូ! ខ្ញុំអត់ទាន់ឆ្លើយតបបានទេ ចាំមើលខ្ញុំពិនិត្យមើលតួលេខឱ្យច្បាស់លាស់សិន។ អរគុណច្រើន»។
ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់ (CENTRAL) លោក ឌី ថេហូយ៉ា បានគាំទ្ររបាយការណ៍របស់សមាគមការពារសិទ្ធិមនុស្សអាដហុកនេះ។ លោកថា តាមការស្រាវជ្រាវ អង្គការរបស់លោកក៏បានរកឃើញថា ចំនួនស្ត្រីខ្មែរ ដែលរងគ្រោះដោយអំពើជួញដូរមនុស្សទៅប្រទេសចិន គឺមានតួលេខខ្ពស់ជាងគេ នៅខេត្តត្បូងឃ្មុំ ខេត្តកំពង់ចាម និងខេត្តព្រៃវែងដែរ។
លោក ឌី ថេហូយ៉ា៖ «គឺពិតជាមានច្រើនមែន នៅខេត្តត្បូងឃ្មុំ ខេត្តកំពង់ចាម ហើយនិងខេត្តព្រៃវែង។ ជាការអង្កេតរបស់ខ្ញុំយល់ថា ប្រហែលជានៅខេត្តត្បូងឃ្មុំ កំពង់ចាម ហើយនិងព្រៃវែងនេះ អាចជាតំបន់មួយ ដែលមានមេខ្យល់ ខាងជួញដូរមនុស្សធ្វើសកម្មភាពច្រើន។ មេខ្យល់នោះទៀតសោត អាចកើតចេញពីអ្នក ដែលមានគ្រួសារជនជាតិចិន ចេះភាសាចិនច្បាស់ក្នុងការទាក់ទង ព្រមទាំងមានបណ្ដាញធ្វើសកម្មភាពផង»។
អង្គការសង់ត្រាល់ ឱ្យដឹងថា រយៈពេលជាង ១១ខែ ឆ្នាំ២០២៤ លោកបានទទួលរបាយការណ៍ជុំវិញករណីជួញដូរស្ត្រីខ្មែរទៅប្រទេសចិន (China) ទៅម៉ាឡេស៊ី(Malaysia) ទៅមជ្ឈិមបូព៌ា និងអារ៉ាប់ប៊ី សាអូឌីត (Saudi Arabia) ចំនួនប្រមាណ ៥០ករណី ដែលមានជនរងគ្រោះជាង ២០០នាក់។ នៅក្នុងចំណោមជនរងគ្រោះជាង ២០០នាក់នោះ ក៏មានជនបរទេស មកពីប្រទេសឥណ្ឌូនេស៊ី (Indonesia) បង់ក្លាដេស (Banglades )ម៉ាឡេស៊ី (Malaysia) ថៃ (Thailand)ហ្វីលីពីន(Philipine) ដែលគេឆបោកតាមប្រព័ន្ធអនឡាញ យកមកជួញដូរនៅកម្ពុជាផងដែរ។
វិទ្យុអាស៊ីសេរី មិនអាចសុំការអត្ថាធិប្បាយជុំវិញស្ថានភាព នៃអំពើជួញដូរមនុស្សពីអនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងការជួញដូរមនុស្ស នៃក្រសួងមហាផ្ទៃ អ្នកស្រី ជូ ប៊ុនអេង បាននៅឡើយទេ នៅថ្ងៃទី២១ ធ្នូ។
ប៉ុន្តែ របាយការណ៍ការងារប្រយុទ្ធប្រឆាំងការជួញដូរមនុស្ស និងអំពើអាជីវកម្មផ្លូវភេទ របស់គណៈកម្មាធិការប្រយុទ្ធប្រឆាំងការជួញដូរមនុស្ស នៃក្រសួងមហាផ្ទៃ ប្រចាំខែសីហា និងទិសដៅសម្រាប់ខែកញ្ញា ឆ្នាំ២០២៤ បង្ហាញថា សមត្ថកិច្ចរបស់រដ្ឋាភិបាល បានជួយជនរងគ្រោះដោយអំពើជួញដូរមនុស្សទាំងក្នុង និងក្រៅប្រទេស សរុបចំនួន ២៧នាក់។ ក្នុងចំណោមជនរងគ្រោះទាំងនោះ គឺមកពីប្រទេសចិនចំនួន ១២នាក់។ ជាមួយនោះកម្លាំងនគរបាល និងកងរាជអាវុធហត្ថ ក៏បានបង្ក្រាបអំពើជួញដូរមនុស្ស និងអាជីវកម្មផ្លូវភេទ នៅក្នុងប្រទេសចំនួន ១៧ករណី ដោយបានជួយសង្គ្រោះជនរងគ្រោះចំនួន ៤៦នាក់ ព្រមទាំងចាប់ខ្លួនជនសង្ស័យចំនួន ២៩នាក់។ អំពើជួញដូរមនុស្ស ក្នុងរយៈពេល ៣ ទៅ ៤ខែចុងក្រោយនេះ មានការកើនឡើងចំនួន ៤ករណី បើប្រៀបធៀបទៅនឹងខែកក្កដាកន្លងទៅ។
រយៈពេលជិត ១០ឆ្នាំចុងក្រោយនេះ កម្ពុជាបានជាប់ឈ្មោះជាប្រទេសខ្វះនីតិរដ្ឋ និងសម្បូរដោយឧក្រិដ្ឋកម្មនានា ខណៈប្រទេសមហាអំណាចធំៗ កំពុងសម្លឹងឃើញថា កម្ពុជាកំពុងក្លាយជាទីតាំងរបស់ឧក្រិដ្ឋជនសម្រាប់ជួញដូរមនុស្ស ក្នុងចំណោមប្រទេសផ្សេងទៀត នៅក្នុងតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។