លោក ហ៊ុន ម៉ាណែត ផ្ដល់យន្តការបី បើកផ្លូវឲ្យជនបរទេសទិញ និងកាន់កាប់អចលនទ្រព្យនៅកម្ពុជា
2023.11.14
ទិដ្ឋភាពបុរីពិភពថ្មីនៅសង្កាត់កន្ទោក ខ័ណ្ឌដង្កោ រាជធានីភ្នំពេញ ដែលពលរដ្ឋខ្លះទិញហើយ អស់លទ្ធភាពបង់ប្រាក់រំលស់ ហើយត្រូវក្រុមហ៊ុនរឹមអូសយកវិញ។
រូបពីពលរដ្ឋ
រដ្ឋាភិបាលអាណត្តិទី៧ បានសម្រេចផ្ដល់យន្តការមួយចំនួន សម្រាប់បើកឱកាសដល់ជនបរទេស ឱ្យទិញ និងកាន់កាប់អចលនទ្រព្យនៅកម្ពុជាបាន បន្ទាប់ពីក្រុមឧកញ៉ាស្នើសុំទៅកាន់រដ្ឋាភិបាល។
ជុំវិញរឿងនេះ មន្ត្រីបក្សប្រឆាំង និងអ្នកឃ្លាំមើលសម្ដែងក្ដីបារម្ភ និងចាត់ទុកការបើកផ្លូវដល់ជនបរទេសឱ្យអាចទិញ និងកាន់កាប់អចលនទ្រព្យនៅកម្ពុជានេះថា ជាដំណោះស្រាយដោះទាល់ ដើម្បីការពារអំណាចរបស់រដ្ឋាភិបាល។
លោកនាយករដ្ឋមន្ត្រី ហ៊ុន ម៉ាណែត បានផ្ដល់យន្តការចំនួន៣ ដើម្បីបើកផ្លូវឲ្យជនបរទេស អាចទិញ និងកាន់កាប់អចលនទ្រព្យនៅប្រទេសកម្ពុជាបាន ក្រោមហេតុផល ដោះស្រាយវិស័យសំណង និងអចលនទ្រព្យ ដែលកំពុងប្រឈមនឹងបញ្ហាធ្ងន់ធ្ងរ។
ការប្រកាសរបស់លោក ហ៊ុន ម៉ាណែត នេះ ធ្វើឡើងបន្ទាប់ពីក្រុមអ្នកឧកញ៉ា ឧកញ៉ាមកពីសមាគមអ្នកអភិវឌ្ឍន៍លំនៅឋានកម្ពុជា កាលពីថ្ងៃទី២៣ ខែតុលា ឆ្នាំ២០២៣ បានស្នើដល់រដ្ឋាភិបាលឱ្យជួយ ដោះស្រាយវិបត្តិលើវិស័យសំណង់ និងវិស័យអចលនទ្រព្យ ដែលពួកគេថា កំពុងជួបវិបត្តិធ្ងន់ធ្ងរ នាពេលបច្ចុប្បន្ន។
អំឡុងពេលនោះ ក្រុមអ្នកឧកញ៉ា ឧកញ៉ា ដែលជាម្ចាស់បុរីនៅកម្ពុជា ស្នើរដ្ឋាភិបាល ជួយសម្រួលដល់ជនបរទេសឱ្យពួកគេ មានសិទ្ធិទិញដី ផ្ទះ នៅកម្ពុជា ដើម្បីជួយ សង្គ្រោះវិស័យសំណង់ និងអចលនទ្រព្យឱ្យងើបឡើងវិញ។
ក្នុងវេទិការដ្ឋាភិបាល និង ផ្នែកឯកជន កាលពីថ្ងៃទី១៣ ខែវិច្ឆិកា លោក ហ៊ុន ម៉ាណែត លើកឡើងថា ទោះបីជារដ្ឋធម្មនុញ្ញមិនអនុញ្ញាតឱ្យជនបរទេសទិញដី ផ្ទះ និងអចលនទ្រព្យនៅកម្ពុជា ក៏ពិតមែន ប៉ុន្តែមាន យន្តការចំនួន៣ ដែលផ្តល់ សិទ្ធិឱ្យជនបរទេសអាចទិញ និងកាន់កាប់អចលនទ្រព្យ ដោយមានសិទ្ធិស្ទើរតែដូចគ្នានឹងសិទ្ធិរបស់កម្មសិទ្ធិករ។
យន្តការទាំងបី នោះ រួមមាន យន្តការតាមរយៈតំណាងជាជនជាតិខ្មែរ ដែលយន្តការនេះ អនុញ្ញាតឱ្យជនបរទេសអាចទិញដីបាន តាមរយៈតំណាងជនជាតិខ្មែរ ប៉ុន្តែនៅលើប័ណ្ណកម្មសិទ្ធិ ត្រូវដាក់ឈ្មោះអ្នកតំណាងជាជនជាតិខ្មែរ ហើយដើម្បីការពារដល់អ្នកវិនិយោគបរទេសទាំងនោះ ពួកគេត្រូវតែមាន កិច្ចសន្យាធានា ជាមួយអ្នកតំណាងរបស់ខ្លួន។
យន្តការមួយទៀត គឺជាយន្តការតាមរយៈក្រុមហ៊ុនបរធនបាល ឬ ក្រុមហ៊ុន ដែលទុកចិត្ត (Trust Company) ដែលជនបរទេសអាចទិញទ្រព្យសម្បត្តិ ដោយមានក្រុមហ៊ុនបរធនបាលដើរតួជាអ្នកគ្រប់គ្រងទ្រព្យសម្បត្តិនេះ តែក្រុមហ៊ុននោះគ្មានសិទ្ធិយកទៅលក់បន្តឡើយ ដរាបណាមិនមានការ យល់ព្រមពីជនបរទេស ដែលជាម្ចាស់ទ្រព្យ។
ចំណែកយន្តការទី៣ គឺជាយន្តការវិនិយោគតំបន់ទេសចរណ៍ពិសិដ្ឋ ដែលក្នុងនោះ ម្ចាស់តំបន់ ដៃគូតំបន់ ឬទេសចរពិសេស អាចទទួលបានការលើកទឹកចិត្តជាដើម។
ក្រៅពីយន្តការទាំងបីនេះ លោក ហ៊ុន ម៉ាណែត បានលើកអនុសាសន៍ផ្ដល់យន្តការមួយបន្ថែមទៀត ក្នុងការបើកឱកាសឱ្យជនបរទេសមានសិទ្ធិកាន់កាប់ដីធ្លី និងផ្ទះ ប្រហាក់ប្រហែលនឹងសិទ្ធិកម្មសិទ្ធិរបស់ពលរដ្ឋខ្មែរនៅប្រទេសកម្ពុជាដែរ តាមវិធីឱ្យជនបរទេសជួលរយៈពេលវែង ដោយមិនចាំធ្វើវិសោធនកម្ម ឬកែរដ្ឋធម្មនុញ្ញឡើយ។
លោក ហ៊ុន ម៉ាណែត៖ «ទោះបីជាជនបរទេស មិនមានសិទ្ធិទិញដី ភូមិគ្រឹះ ផ្ទះនៅជាន់ ផ្ទាល់ ដីជាកម្មសិទ្ធិបានក៏ដោយ ជនបរទេសអាចចុះកិច្ចសន្យាជួល អចិន្ត្រៃយ៍ ជួលរយៈ ពេលវែងនូវអចលនទ្រព្យទាំងនោះ ក្នុងរយៈពេលចាប់ ពី១៥ ឆ្នាំដល់៥០ ឆ្នាំ នឹងអាចបន្តការជួលរយៈពេលដល់ ៥០ ឆ្នាំទៀត ដោយពិនិត្យ ទទួលបាននៅសិទ្ធិប្រត្យក្ស ស្ទើរតែដូចនឹងសិទ្ធិ របស់កម្មសិទ្ធិករដែរ រួមមានសិទ្ធិប្រើប្រាស់ សិទ្ធិអាស្រ័យផល សិទ្ធិផ្ទេរតាមរយៈអំណោយ កាដូ ការទិញលក់ ការទិញបន្ត និងសន្តិកម្មជាដើម»។
រយៈពេលជាង១ខែចុងក្រោយនេះ អតិថិជន របស់ក្រុមហ៊ុនបុរីពិភពថ្មី រាប់រយនាក់ បានផ្ទុះការតវ៉ា នៅពេល ដែលក្រុមហ៊ុន មិនបានទទួលទិញផ្ទះពី ពួកគេវិញ។ ការលក់ផ្ទះទៅឱ្យក្រុមហ៊ុន វិញនេះ ពលរដ្ឋអះអាងថា ពួកគេអស់ លទ្ធភាពរកប្រាក់បង់រំលស់បន្ត ដោយសារ ជួបបញ្ហាសេដ្ឋកិច្ច។
តែយ៉ាងណា ម្ចាស់ក្រុមហ៊ុនបុរីពិភពថ្មីឧកញ៉ា ហុង ពីវ ប្រកាសពីការក្ស័យធន បើសិនធ្វើតាមការ ទាមទាររបស់ អតិថិជនមួយចំនួន ក្រោមហេតុផលថា ក្រុមហ៊ុនរបស់លោក ក៏កំពុងតែជាប់ជំពាក់ បំណុលគេដែរ ។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បារម្ភថា ការផ្តល់លទ្ធភាពឱ្យជនបរទេស កាន់កាប់ ជួលផ្ទះ និងដី នៅកម្ពុជា រយៈពេលយូរ អាចធ្វើឱ្យប៉ះពាល់ ដល់បូរណភាព ទឹកដីកម្ពុជា។
លោក អ៊ុំ សំអាន យល់ថា ដើម្បីស្ដារសេដ្ឋកិច្ចកម្ពុជាឡើងវិញ រដ្ឋាភិបាលមិនរហូតដល់ចាំបាច់រៀបចំ ឬបង្កើតយន្តការផ្តល់ឱកាសឱ្យជនបរទេសអាចទិញ និងកាន់កាប់អចលនទ្រព្យនៅកម្ពុជានោះទេ រដ្ឋាភិបាលត្រូវស្ដារឡើងវិញនូវលទ្ធិប្រជាធិបតេយ្យ ការគោរពសិទ្ធិមនុស្ស និងដោះស្រាយបញ្ហាគ្រឿងញៀន រួមទាំងការជួញដូរមនុស្សជាដើម ដើម្បីឱ្យវិនិយោគិនបរទេសល្អៗ មកបណ្ដាក់ទុនរកស៊ី បង្កើតការងារសម្រាប់ពលរដ្ឋខ្មែរ។
លោក អ៊ុំ សំអាន៖ «ឱ្យជនបរទេសមានសិទ្ធិជួលរយៈពេល វែង មិនមែនជារឿងល្អ ប៉ុន្មានទេ ព្រោះគាត់ថា នឹងឱ្យជនបរទេសជួលរយៈពេល ១៥ឆ្នាំ ទៅ ៥០ឆ្នាំហើយ អាចពន្យាររហូតដល់ ៥០ឆ្នាំទៀត។ អ៊ីចឹង ៥០ឆ្នាំពីរដង វា ១០០ឆ្នាំបាត់ហើយ។ អ៊ីចឹង វាប៉ះពាល់ដល់ជនបរទេស ដូចជា វៀតណាមជាដើម ជួលដី ឬ ជួលផ្ទះនៅ តាមជាយដែនអីហ្នឹង វាអាចប៉ះពាល់ទៅដល់បូរណភាព ទឹកដីកម្ពុជាដែរ។ អាហ្នឹង យើងត្រូវពិនិត្យចំណុចហ្នឹង ជាពិសេស សម្រាប់ជនបរទេសដែលនៅជិតខាងយើងហ្នឹង»។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ព្រួយបារម្ភខ្លាចការបើកលទ្ធភាពឱ្យជនបរទេសទិញ និងកាន់កាប់ អចលនទ្រព្យ រួមទាំងអាចជួលដី និងផ្ទះ នៅកម្ពុជា ធ្វើឡើងមិនមានតម្លាភាព ដោយសាររដ្ឋាភិបាលបច្ចុប្បន្ន គិតតែពីដោះស្រាយនយោបាយ ដើម្បីការពារអំណាច ដោយមិនគិតអំពីផលប្រយោជន៍ជាតិជាសំខាន់ឡើយ។
លោកហៅយន្តការរបស់លោក ហ៊ុន ម៉ាណែត ថា ជាយន្តការដោះទាល់ តែប៉ុណ្ណោះ ហើយយន្តការនេះ លោកថា វាហាក់ផ្ទុយពីរដ្ឋធម្មនុញ្ញកម្ពុជា ដែលជាច្បាប់កំពូល របស់ជាតិ។
លោក អ៊ុំ សំអាន៖ «ហួសព្រំដែននៃរដ្ឋធម្មនុញ្ញហើយ ហើយហួសព្រំដែន នៃរដ្ឋធម្មនុញ្ញ វាចូលនឹងកម្រិតមួយលក់ អធិបតេយ្យហើយ ហើយបើសិនបណ្ដោយឱ្យជនបរទេស ជាពិសេស ជនបរទេស ដែលមានមហិច្ឆតាឈ្លានពានកម្ពុជា គេនាំគ្នាមកទិញដី ទិញធ្លី ទិញផ្ទះសម្បែងនៅពេល ស្រុកខ្មែរ ហើយថ្ងៃណាមួយ វាធ្វើវិទ្ធង្សនា ឬ អបគមន៍អីនោះ តើរដ្ឋាភិបាលកម្ពុជាគិតយ៉ាងម៉េច អានេះ វាជាក្ដីបារម្ភធំ ណាស់សម្រាប់កម្ពុជា»។
ក្រុមអ្នកតាមបញ្ហាសង្គមនៅកម្ពុជា សម្ដែងការព្រួយបារម្ភថា យន្តការរបស់លោក ហ៊ុន ម៉ាណែត ដែលបើកឱកាសឱ្យជនបរទេសកាន់កាប់ដីធ្លី និងផ្ទះនៅ ប្រទេសកម្ពុជានេះ អាចបង្កជាបញ្ហាអសន្តិសុខ និងនាំហានិភ័យដល់បូរណភាព ទឹកដីកម្ពុជានៅពេលអនាគត ស្របពេលកម្ពុជាមានប្រព័ន្ធដឹកនាំខ្សោយ បក្ខពួកនិយម និងអំពើពុករលួយជាដើម។
ក្រៅពីព្រួយបារម្ភ អ្នកតាមបញ្ហាសង្គម ក៏ជំរុញរដ្ឋាភិបាលកម្ពុជាឱ្យគោរពតាមរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ដើម្បីស្ដារលទ្ធិប្រជាធិបតេយ្យ និងការគោរពសិទ្ធិមនុស្ស ក្នុងគោលដៅផ្សះផ្សាស្មារតីជាតិខ្មែរនិងខ្មែរឡើងវិញ។
ពួកគេថា បើសិនជារដ្ឋាភិបាលធ្វើបាននោះ កម្ពុជានឹងទទួលបាន អត្ថប្រយោជន៍ យ៉ាងច្រើន ត្រឡប់មកវិញ ដូចជា ប្រព័ន្ធអនុគ្រោះពន្ធពីអឺរ៉ុបនិងសហរដ្ឋអាមេរិក ហើយមន្ត្រីធំៗរបស់រដ្ឋាភិបាលសព្វថ្ងៃអាចរួចផុតពីទណ្ឌកម្មរបស់ សហរដ្ឋអាមេរិក ខណៈវិស័យវិនិយោគទុន ក៏អាចប្រសើរឡើង ដែលធ្វើឱ្យជីវភាពប្រជាពលរដ្ឋល្អ ជាងបច្ចុប្បន្នជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
