កម្ពុជានឹងជួបវិបត្តិទេសចរណ៍រយៈពេលយូរ «បើរដ្ឋាភិបាលមិនអាចទប់ស្កាត់ឧក្រិដ្ឋកម្មជួញដូរមនុស្ស និងឆបោក»
2024.10.28
អគ្គស្នងការនគរបាលជាតិ លោក ស ថេត ចូលរួមកិច្ចប្រជុំគណៈរដ្ឋមន្ត្រី កាលពីថ្ងៃទី២៥ តុលា ២០២៤។
រូប៖ ហ្វេសប៊ុកលោក ស ថេត
អ្នកឃ្លាំមើលព្រមានថា វិស័យទេសចរណ៍នៅប្រទេសកម្ពុជា នឹងរងផលប៉ះពាល់រយៈពេលយូរ បើរដ្ឋាភិបាលលោក ហ៊ុន ម៉ាណែត មិនអាចទប់ស្កាត់បទល្មើសជួញដូរមនុស្ស និងឆបោកតាមអនឡាញ ហើយនៅតែព្យាយាមបដិសេធការចុះផ្សាយរបស់បណ្ដាញព័ត៌មានអន្តរជាតិ អំពីការរីករាលដាលនូវអំពើឧក្រិដ្ឋកម្មនៅកម្ពុជា។
ការព្រមាននេះ កើតឡើងបន្ទាប់ពីក្រសួងទេសចរណ៍ និងក្រសួងពាក់ព័ន្ធបន្តបដិសេធចំពោះការចុះផ្សាយព័ត៌មានរបស់ទូរទស្សន៍កូរ៉េ អំពីករណីពលរដ្ឋកូរ៉េ ត្រូវបានបង្ខាំងឱ្យធ្វើការខុសច្បាប់ និងត្រូវបានចាប់ជំរិតនៅកម្ពុជា។
អ្នកឃ្លាំមើលចាត់ទុកការបដិសេធភ្លាមៗ របស់ក្រសួងទេសចរណ៍ និងក្រសួង ពាក់ព័ន្ធ ដោយខ្វះការស៊ើបអង្កេតឱ្យបានហ្មត់ចត់ ពាក់ព័ន្ធការរីកសុះសាយនៃព័ត៌មានឧក្រិដ្ឋកម្មជួញដូរមនុស្ស និងអំពើឆបោក ថាជាការឆ្លើយតបខុសឆ្គងដែលធ្វើឱ្យប៉ះពាល់ដល់វិស័យទេសចរណ៍ និងកេរ្តិ៍ឈ្មោះប្រទេសកម្ពុជានៅលើពិភពលោក។
អ្នកជំនាញច្បាប់ និងអភិបាលកិច្ចបែបប្រជាធិបតេយ្យលោក វ៉ន ចាន់ឡូត ប្រាប់វិទ្យុអាស៊ីសេរីនៅថ្ងៃទី២៧ ខែតុលា ថា រដ្ឋាភិបាលលោក ហ៊ុន ម៉ាណែត ត្រូវហ៊ានទទួលស្គាល់ការពិតចំពោះរឿងឧក្រិដ្ឋកម្ម ដែលកើតឡើងនៅកម្ពុជាបច្ចុប្បន្ន ជាជាងចេះតែឆ្លើយច្រានចោល ក្នុងលេសដោះស្រាយយករួចខ្លួន ហើយគួរណាស់បង្ហាញស្មារតីសហការឱ្យមុតមាំជាមួយភាគីកូរ៉េខាងត្បូង ដើម្បីបញ្ជាក់អំពីភាពត្រឹមត្រូវនៃប្រតិបត្តិការងារដឹកនាំជាតិ។
លោក វ៉ន ចាន់ឡូត ចាត់ទុកវប្បធម៌ចេះតែឆ្លើយតបបដិសេធបែបនេះ របស់រដ្ឋាភិបាលត្រកូលហ៊ុនថា កាន់តែធ្វើឱ្យកម្ពុជាខាតបង់ ពីព្រោះជនបរទេសនៃបណ្ដាប្រទេសជាមិត្តទាំងឡាយជឿជាក់លើព័ត៌មានអន្តរជាតិល្បីៗ។
លោកថា មិត្តភក្តិបរទេសនៅជុំវិញពិភពលោក មិនជឿលើការបកស្រាយបដិសេធរបស់ភាគីលោក ហ៊ុន ម៉ាណែត ឡើយ ដោយសារទំហំឧក្រិដ្ឋកម្មជួញដូរមនុស្ស និងការឆបោកនៅកម្ពុជា នៅតែមានកំណើនផ្សព្វផ្សាយមិនស្រកអន់ទេ។
លោក វ៉ន ចាន់ឡូត៖ «ពាក់ព័ន្ធទៅនឹងអសុវត្ថិភាពរបស់កម្ពុជា ដែលមិនអាចធានាបានអំពីការជឿទុកចិត្តសុវត្ថិភាពមួយសម្រាប់អ្នកទេសចរឬក៏គេ មានការជឿទុកចិត្តនោះទាប ដូច្នេះ គឺនឹងធ្វើឱ្យកំណើនទេសចរ មិនត្រឹមតែមិនកើនទេ ហើយវាអាចកាន់តែធ្វើឱ្យប៉ះពាល់»។
ការអះអាងនេះ ធ្វើឡើងបន្ទាប់ពីក្រសួងទេសចរណ៍នៅថ្ងៃទី២៥ ខែតុលា បានចេញសេចក្ដីប្រកាសបដិសេធចំពោះការចុះផ្សាយព័ត៌មានរបស់ទូរទស្សន៍កូរ៉េខាងត្បូង អំពីករណីពលរដ្ឋកូរ៉េត្រូវបានចាប់ជំរិតបង្ខាំងឱ្យធ្វើការខុសច្បាប់នៅកម្ពុជា។ រដ្ឋាភិបាលលោក ហ៊ុន ម៉ាណែត បានទាមទារឱ្យទូរទស្សន៍កូរ៉េខាងត្បូងកែព័ត៌មានឡើងវិញផង។
ក្រសួងទេសចរណ៍ថា ការផ្សាយរបស់ទូរទស្សន៍សាធារណរដ្ឋកូរ៉េ ឬកូរ៉េខាងត្បូង គឺជាព័ត៌មានមិនពិត ហើយថា ព័ត៌មានចោទប្រកាន់នេះ ធ្វើឱ្យមានការភាន់ច្រឡំពីសាធារណមតិជាតិនិងអន្តរជាតិមកលើកម្ពុជា ខណៈក្រសួងមហាផ្ទៃក៏បានបដិសេធ អំពីការបណ្ដែតបណ្ដោយរបស់រដ្ឋាភិបាល ដែលបង្កឱ្យមានការជួញដូរមនុស្ស ការបង្ខាំងមនុស្សដោយខុសច្បាប់ ការធ្វើទារុណកម្មលើពលករបរទេស និងការបង្ខំឱ្យធ្វើការពាក់ព័ន្ធនឹង Call Center ខុសច្បាប់ជាដើម។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការសិក្សាស្រាវជ្រាវ លោក សេក សុជាតិ ថា កម្ពុជាគួរធ្វើការត្រិះរិះពិចារណាឱ្យបានដិតដល់ ពីព្រោះបញ្ហាទាំងអស់នេះ ពាក់ព័ន្ធនឹងការរកឃើញរបស់បណ្ដាញសារព័ត៌មានអន្តរជាតិ។ លោកថា រដ្ឋាភិបាល គួរធ្វើការបកស្រាយបែបវិទ្យាសាស្ត្រ និងសហការជាមួយសហគមន៍អន្តរជាតិ ដើម្បីបោសសំអាតបទល្មើសជួញដូរមនុស្ស និងឆបោកតាមអនឡាញឱ្យមានប្រសិទ្ធភាព ពីព្រោះប៉ុន្មានឆ្នាំចុងក្រោយនេះ លោកសង្កេតឃើញភ្ញៀវទេសចរមកកម្ពុជាធ្លាក់ចុះខ្លាំង។
លោក សេក សុជាតិ៖ «មានសិក្សាស្រាវជ្រាវទៅវាឃើញមានចំណុចអវិជ្ជមានទាំងអស់ហ្នឹង កើតមានចំពោះជនជាតិរបស់ពួកគាត់ ដូច្នេះហើយ ពួកគាត់ត្រូវធ្វើការផ្សព្វផ្សាយដើម្បីកុំឱ្យមានបញ្ហាហ្នឹង រាលដាលទៅដល់អ្នកផ្សេងទៀត ដែលមានបំណងចង់មកធ្វើការឬក៏ចង់មកបន្តក់ទុនទៅកម្ពុជាជាដើម។ ដូច្នេះ នេះជាហានិភ័យមួយធំណាស់នៅក្នុងស្ថានភាពដែលកម្ពុជាកំពុងជួបប្រទះ ដោយខិតខំធ្វើការបកស្រាយ ក៏ប៉ុន្តែការបកស្រាយទាំងអស់ គួរតែឈរលើគោលការណ៍វិទ្យាសាស្ត្រ ដើម្បីធានាថា គ្រប់យ៉ាងទាំងអស់ មានការគ្រប់គ្រងបានត្រឹមត្រូវបានច្បាស់លាស់»។
ប៉ុន្មានឆ្នាំចុងក្រោយនេះ បញ្ហាជួញដូរមនុស្សបង្ខាំងមនុស្ស ការឆបោកតាមប្រព័ន្ធអនឡាញ និងចាប់ជំរិតមនុស្សទារប្រាក់នៅប្រទេសកម្ពុជា ត្រូវបាន សារព័ត៌មានអន្តរជាតិ ចុះផ្សាយព្រោងព្រាត ដែលធ្វើឱ្យអ្នកទេសចរអន្តរជាតិ មិនហ៊ានមកលេងកម្ពុជា ខណៈរដ្ឋាភិបាលត្រកូលហ៊ុន ត្រូវអ្នកឃ្លាំមើលអះអាងថា ធ្លាក់ក្នុងបរាជ័យនៃនយោបាយទប់ស្កាត់បទល្មើសឧក្រិដ្ឋ។
អ្នកឃ្លាំមើលលើកឡើងថា ដើម្បីស្ដារវិស័យទេសចរណ៍កម្ពុជា គឺទាល់តែរដ្ឋាភិបាល ត្រកូលហ៊ុនហ៊ានដាក់ចេញកំណែទម្រង់ស្ដារប្រជាធិបតេយ្យ និងរួមគ្នាកម្ចាត់ឧក្រិដ្ឋកម្មឱ្យធានាបានសន្តិសុខ និងយុត្តិធម៌សង្គម ក្នុងគោលដៅស្ដារមុខមាត់កម្ពុជា នៅលើឆាកអន្តរជាតិឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
សេដ្ឋកិច្ច
