រមណីយដ្ឋានទេសចរណ៍ផ្ទះតាម៉ុក មិនសូវមានភ្ញៀវទេសចរចូលទស្សនាដូចមុន
2024.09.29
រូបភាព ផ្លាកសញ្ញាចូលទៅ រមណីយដ្ឋានទេសចរណ៍ផ្ទះតាម៉ុក កាលពីថ្ងៃទី២៥ ខែកញ្ញា ឆ្នាំ២០២៤។
រូបភាពពលរដ្ឋផ្ដល់ឱ្យ
រមណីយដ្ឋានទេសចរណ៍ ប្រវត្តិសាស្ត្រ ផ្ទះតាម៉ុក មិនសូវមានភ្ញៀវទេសចរចូលទស្សនាដូចមុននោះទេ។ ពលរដ្ឋនៅតំបន់នោះ លើកឡើងថា ដោយសារកត្តាសេដ្ឋកិច្ចទើបធ្វើឲ្យ ភ្ញៀវទេសចរជាតិ និងអន្តរជាតិ លែងចាប់អារម្មណ៍ចូលទស្សនា តំបន់ប្រវត្តិសាស្ត្រមួយនេះទៀត។ សង្គមស៊ីវិល យល់ឃើញថា រដ្ឋាភិបាលគួរតែរៀបចំសោភ័ណភាព ហើយកែលម្អផ្នែកនយោបាយ លុបបំបាត់អំពើពុករលួយ ដើម្បីទាក់ទាញភ្ញៀវទេសចរមកវិញ។
រមណីយដ្ឋានទេសចរណ៍ប្រវត្តិសាស្ត្រមួយកន្លែងដែលគេស្គាល់ថាជាផ្ទះតាម៉ុក មានទីតាំងជាប់ព្រំដែនកម្ពុជា -ថៃ និងជាអតីតទីតាំងប្រជុំកងទ័ពរបស់មេដឹកនាំខ្មែរក្រហម ស្ថិតនៅឃុំអន្លង់វែង ស្រុកអន្លង់វែង ខេត្តឧត្ដរមានជ័យ។ ពលរដ្ឋរស់នៅតំបន់នោះ រៀបរាប់ថា ចាប់តាំងពីបោះឆ្នោតអាណត្តិទី៧រួចមក ភ្ញៀវទេសចរជាតិ និងអន្តរជាតិ ហាក់មិនសូវមកចូលទស្សនាតំបន់ប្រវត្តិសាស្ត្រមួយនេះទៀតឡើយ ចំណែកអ្នករកស៊ីលក់វត្ថុអនុស្សាវរីយតាមដងផ្លូវចូលទៅ ក្នុងរមណីយដ្ឋាននេះវិញ បាននាំគ្នាបិទទ្វាផ្ទះចោលលែងរកស៊ីថែមទៀត។
យុវជនម្នាក់ដែលជាអ្នកសំអាត ក្នុងបរិវេណរមណីយដ្ឋានទេសចរណ៍ផ្ទះតាម៉ុក យុវជន វុន ដាវីត រៀបរាប់ប្រាប់វិទ្យុអាស៊ីសេរី នៅថ្ងៃទី២៧ ខែកញ្ញាថា បច្ចុប្បន្នមិនសូវមានភ្ញៀវចូលទស្សនានៅតំបន់រមណីយដ្ឋានទេសចរណ៍ផ្ទះតាម៉ុកនោះទេ ដោយក្នុងមួយថ្ងៃមានភ្ញៀវទេសចរជាតិ ២ ទៅ ៣ឡានប៉ុណ្ណោះដែលចូលទស្សនា ចំណែកយុវជនសិស្សនិស្សិតវិញ យូរៗពួកគាត់មកទស្សនាម្ដង។
យុវជន វុន ដាវីត៖ «ទាំងភ្ញៀវជាតិ និងភ្ញៀវអន្តរជាតិ ធ្លាក់ចុះរហូត បរទេសភាគច្រើនមគ្គទេសក៍គេនាំទៅមើលប្រាសាទធំៗ មកតើសិស្សសាលាមកសិក្សាពីប្រវត្តិសាស្ត្រ មកពីខេត្តសៀមរាប ខេត្តឧត្ដរមានជ័យ សាលាខ្លះគេសហការឲ្យមកសាលាខ្លះអត់អ៊ីចឹងទៅ»។
អ្នកលក់សំបុត្រចូលទស្សនារមណីយដ្ឋានទេសចរណ៍ផ្ទះតាម៉ុក គឺលោក ហង្ស រី ឲ្យដឹងដែរថា លោកធ្វើការងារជាអ្នកលក់សំបុត្រនៅរមណីយដ្ឋានជាង១៥ឆ្នាំមកហើយ ។ លោកថា ចាប់តាំងពីបោះឆ្នោតអាណត្តិទី៧រួចមក រមណីយដ្ឋានទេសចរណ៍ផ្ទះតាម៉ុក លែងមានភ្ញៀវជាតិ និងអន្តរជាតិ ចូលទស្សនាកុះករដូចមុនឡើយ។ លោកយល់ថា បញ្ហាសេដ្ឋកិច្ចសកលទើបធ្វើឲ្យពលរដ្ឋលែងមកទស្សនា និងចង់សិក្សាពីតំបន់ប្រវត្តិសាស្ត្រមួយនេះ។
លោក ហង្ស រី៖ «អត់ទាំងអស់ អត់ទាំងភ្ញៀវខ្មែរក៏អត់ដែរ មួយថ្ងៃមានភ្ញៀវ២ទៅ៣ឡាន មនុស្សជាង១០នាក់ សូមអំពាវនាវឲ្យបងប្អូនប្រជាពលរដ្ឋមកចូលទស្សនាឲ្យបានច្រើនៗ គ្រប់រដូវគ្រប់ខែ គាត់ដូចគ្មានថវិកាដែរឥឡូវ ពិបាកណាស់ស្រុកខ្មែរឥឡូវ»។
ជុំវិញរឿងនេះ វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងទេសចរណ៍ លោក តុប សុភ័ក និងអភិបាលខេត្តឧត្ដរមានជ័យ លោក ប៉ែន កុសល្យ ដើម្បីសុំការអត្ថាធិប្បាយបានទេ នៅថ្ងៃទី២៧ ខែកញ្ញា។
របាយការណ៍ក្រសួងទេសចរណ៍ ចេញផ្សាយកាលពីខែមេសា បង្ហាញថា កម្ពុជាទទួលភ្ញៀវទេសចរអន្តរជាតិចំនួនជាង ១លាន ៥សែននាក់(១,៥៨ លាននាក់) នៅក្នុងត្រីមាសទី១ ឆ្នាំ២០២៤ កើនឡើង ២២,៥ ភាគរយ ពីចំនួនជិត ១លាន ៣សែននាក់ (១,២៩ លាននាក់) ក្នុងអំឡុងពេលដូចគ្នាក្នុងឆ្នាំ២០២៣។
ទាក់ទិនបញ្ហានេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ឃើញថា ដោយសារវិបត្តិសេដ្ឋកិច្ច និងមិនមានភាពទាក់ទាញទើបធ្វើឲ្យប្រជាពលរដ្ឋនៅក្នុងស្រុក និងភ្ញៀវអន្តរជាតិមិនចូលទស្សនា តំបន់ទេសចរណ៍នានា លើសពីនោះ ក៏មានជាប់ពាក់ព័ន្ធផ្នែកនយោបាយខ្លះផងដែរ។ លោកថា ដើម្បីមានឲ្យភ្ញៀវទេសចរមកកម្សាន្ត និងទស្សនាច្រើន រដ្ឋាភិបាលគួរតែរៀបចំសោភ័ណភាព កែលម្អផ្នែកនយោបាយ លុបបំបាត់អំពើពុករលួយ និងបង្ក្រាបបទល្មើសនានាឲ្យបានល្អប្រសើរជាមុនសិន។
លោក យង់ គឹមអេង៖ «រដ្ឋាភិបាលក៏គាត់ខំប្រឹងទប់ស្កាត់រឿងទាំងអស់នេះដែរ ប៉ុន្តែយើងមិនទាន់ទាក់ទាញ ភ្ញៀវទេសចរទាំងអស់នេះមកវិញ ប៉ុន្តែយើងខំប្រឹងប្រែងធ្វើថែមទៀត ដើម្បីបានភ្ញៀវទេសចរមកវិញ ហើយត្រូវប្រយុទ្ធប្រឆាំងជាមួយរឿងទាំងនេះបានជោគជ័យខ្លាំង ហើយយើងលែងមានករណីបែបនឹងកើតឡើងតទៅទៀត»។
រមណីយដ្ឋានទេសចរណ៍ផ្ទះតាម៉ុកមានផ្ទៃដីជាង ១ហិកតារ (១,៦១) និងមានផ្ទះចំនួន៤ខ្នង ហើយខាងក្រោយផ្ទះមានបឹងដែលមានទំហំជាង ៤រយហិកតារ(៤១៧) ហៅបឹង អន្លង់វែង ឬបឹងអូរជីក ដែលស្គាល់ថា ជាផ្ទះ និងជាទីតាំងប្រជុំកងទ័ពសម្រាប់រៀបចំផែនការវាយប្រយុទ្ធផ្នែកខាងយោធារបស់តាម៉ុក។ តាម៉ុកមានឈ្មោះពិត ឈ្មោះ ឈិត ជឿន ជាអ្នកខេត្តតាកែវ លោកជាអតីតសមាជិកអចិន្ត្រៃយ៍របស់គណៈមជ្ឈិមបក្សខ្មែរក្រហម ក្នុងរបបកម្ពុជាប្រជាធិបតេយ្យ គាត់ក៏ជាមេទ័ពកំពូលរបស់ខ្មែរក្រហម១រូប។ តាម៉ុកត្រូវបានរដ្ឋាភិបាលកម្ពុជា ចាប់ខ្លួនកាលពីថ្ងៃទី៦ ខែមិនា ឆ្នាំ១៩៩៩ បន្ទាប់មកលោកបានស្លាប់នៅថ្ងៃទី២១ ខែកក្កដា ឆ្នាំ២០០៦ នៅក្នុងមន្ទីរពេទ្យយោធារាជធានីភ្នំពេញ ។ ហើយក្រុមគ្រួសារ និងសាច់ញាតិ បានយកសពរបស់គាត់យកទៅបញ្ចុះនៅវត្តធម្មារាមឬវត្តស្រះឈូក ស្ថិតនៅភូមិស្រះឈូក ឃុំត្រពាំងព្រៃ ស្រុកអន្លង់វែង ខេត្តឧត្តរមានជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សេដ្ឋកិច្ច
