ជន​ជាតិ​វៀតណាម​យ៉ាងតិច ៨នាក់ ចាញ់​បោក​ជន​ជាតិ​ចិន​នាំ​ទៅ​ធ្វើការងារ​​ឆបោក​តាម​អនឡាញ​នៅ​ភ្នំ​បូក​គោ

ដោយ ខាន់ លក្ខិណា
2024.12.21
ជន​ជាតិ​វៀតណាម​យ៉ាងតិច ៨នាក់ ចាញ់​បោក​ជន​ជាតិ​ចិន​នាំ​ទៅ​ធ្វើការងារ​​ឆបោក​តាម​អនឡាញ​នៅ​ភ្នំ​បូក​គោ ការរត់គេច​ចេញពីភ្នំបូកគោ
Rebel Pepper/RFA

មន្ត្រី​សិទ្ធិ​មនុស្ស ជំរុញ​ឱ្យ​រដ្ឋាភិបាល យក​ចិត្ត​ទុក​ដាក់​ដោះស្រាយ​អំពើ​បោក​តាម​ប្រព័ន្ធ​អនឡាញ​ដែល​កំពុង​ធ្វើ​ឱ្យ​ប៉ះពាល់​ដល់​មុខ​មាត់​ប្រទេស​កម្ពុជា​លើ​ឆាក​អន្តរជាតិ។ ការ​លើក​ឡើង​នេះ ធ្វើ​ឡើង​បន្ទាប់​ពី​បុរស​ជន​ជាតិ​វៀតណាម​មួយ​ចំនួន​បាន​រត់​គេច​រួច​ចេញ​ពី​មជ្ឈមណ្ឌល​ឆបោក​អនឡាញ​មួយ​កន្លែង នៅ​លើ​ភ្នំ​បូក​គោ ខេត្ត​កំពត ក្រោយ​ទទួល​រង​ទារុណ​កម្ម​ពី​ពួក​ឧក្រិដ្ឋជន​ឆបោក។

ជន​ជាតិ​វៀតណាម​ម្នាក់ ក្នុង​ចំណោម​អ្នក​រងគ្រោះ​ផ្សេង​ទៀត លើក​ឡើង​ថា កាល​ពី​ អំឡុង​ខែ​តុលា និង​ខែ​វិច្ឆិកា លោក និង​ជន​ជាតិ​វៀតណាម​មួយ​ចំនួន​ទៀត  បាន​ធ្លាក់​ក្នុង​អន្ទាក់​ការងារ​ជា​អ្នក​ឆបោក​តាម​អនឡាញ នៅ​មជ្ឈមណ្ឌល​ឆបោក​មួយ​កន្លែង​របស់​ជន​ជាតិ​ចិន ដែល​មាន​ទីតាំង​នៅ​លើ​កំពូល​ភ្នំ​បូកគោ​ប្រទេស​កម្ពុជា។

បុរស​ជន​ជាតិ​វៀតណាម​ឈ្មោះ ទូ អាន់ ទូ (Tu Anh Tu) បាន​ឱ្យ​វិទ្យុ​អាស៊ី​សេរី​ដឹង​ថា មុន​ទទួល​បាន​សេរីភាព ទៅ​ដល់​ប្រទេស​វៀតណាម​វិញ លោក និង​ជន​ជាតិ​វៀតណាម ៧នាក់​ផ្សេង​ទៀត ត្រូវ​បាន​គេ​វាយ​ដំ​យ៉ាង​ដំណំ ដោយ​ដំបង​ឆក់​កាល​ពី​អំឡុង​ខែវិច្ឆិកា។ បុរស​ជន​ជាតិ​វៀតណាម​រូប​នេះ​ថា ពួក​គេ​អាច​រួច​ខ្លួន​ពី​ការ​ជាប់​ឃុំ​ក្នុង​ផ្ទះ ដោយសារ​ពួកគេ​អាច​ទាក់ទង​នគរបាល​កម្ពុជា ឱ្យ​ជួយ​ធ្វើ​អន្តរាគមន៍​សង្គ្រោះ។

លោក Tu Anh Tuរៀប​រាប់​ថា ដំបូង​លោក​បាន​ទទួល​ការងារ​បណ្ដោះអាសន្ន​មួយ នៅ​ម្ដុំ​តំបន់​សេដ្ឋកិច្ច​ពិសេស ក្នុង​ក្រុង​បាវិត ខេត្ត​ស្វាយរៀង ហើយ​នៅ​ទី​នោះ លោក​ត្រូវ​បាន​គេ​ដាក់​ឱ្យ​ស្នាក់នៅ​ជាមួយ​កម្មករ​វៀតណាម ៧នាក់​ផ្សេង​ទៀត ដែល​មាន​សន្តិសុខ​យាម​កាម​យ៉ាង​ហ្មត់ចត់។ លោក​បាន​ប្រាប់​វិទ្យុ​អាស៊ី​សេរី កាល​ពី​សប្ដាហ៍​មុន​ថា «ការងារ​ភាគ​ច្រើន​នៅ​ក្នុង​តំបន់​នោះ គឺ​ខុស​ច្បាប់។ ប៉ុន្តែ ក៏​មាន​ការងារ​ស្រប​ច្បាប់​ខ្លះ​ដែរ ដូច​ជា ជាង​កាត់​សក់ និង​ចុងភៅ​ជា​ដើម» ហើយ​លោក​ថា «មនុស្ស​ជា​ច្រើន​ដែល​ធ្វើការ​នៅ​ទី​នោះ ត្រូវ​បាន​ជួញដូរ​ជា​ច្រើន​ដង»

បន្ទាប់​មក​នៅ​ថ្ងៃទី២៤ ខែតុលា ក្រុម​តូច​របស់​លោក និង​កម្មករ​ជិត ១០០នាក់​ផ្សេង​ទៀត ត្រូវ​បាន​ដឹក​ជញ្ជូន​តាម​ឡាន​ក្រុង ពី​ក្រុង​បាវិត​ទៅ​កាន់​ភ្នំ​បូក​គោ។ ទៅ​ដល់​ភ្នំ​បូក​គោ ក្រុម​តូច​របស់​លោក ដែល​មាន​គ្នា ៨នាក់ ត្រូវ​បាន​បង្ហាត់​ឱ្យ​ប្រើ​បណ្ដាញ​សង្គមTelegram, WhatsApp, Facebook និង​បណ្ដាញ​សង្គម​ផ្សេង​ទៀត ដើម្បី​ព្យាយាម​ធ្វើ​អំពើ​បោកប្រាស់ ដែល​ភាគ​ច្រើន​បញ្ចុះបញ្ចូល​មនុស្ស​ ឱ្យ​វិនិយោគ​ក្នុង​សហគ្រាស​ក្លែងក្លាយ។

កាល​ពី​ដើម​ឆ្នាំ​នេះ រដ្ឋាភិបាល​បាន​ប្រកាស​ថា ភ្នំ​បូកគោ ជា​តំបន់​សេដ្ឋកិច្ច​ពិសេស​មួយ ក្នុង​ចំណោម​តំបន់​សេដ្ឋកិច្ច​ពិសេស​ចំនួន២២ ក្នុង​ប្រទេស​កម្ពុជា។ រដ្ឋាភិបាល​បាន​បន្ធូរបន្ថយ​ពន្ធ និង​អត្ថប្រយោជន៍​ផ្សេង​ទៀត នៅ​ក្នុង​តំបន់​សេដ្ឋកិច្ច​ពិសេស​ទាំង​នេះ ដើម្បី​លើក​ទឹក​ចិត្ត​ដល់​អ្នក​វិនិយោគ។ ផ្ទុយ​ទៅ​វិញ បែរជា​លេច​ភាព​ល្បីល្បាញ​ថា ភ្នំ​បូកគោ​ក្លាយ​ជា​មជ្ឈមណ្ឌល​បោកប្រាស់​តាម​អនឡាញ ដែល​ត្រួតត្រា​ដោយ​ជន​ជាតិ​ចិន។

នាយក​ទទួល​បន្ទុក​កិច្ចការ​ទូទៅ នៃ​អង្គការ​ការពារ​សិទ្ធិ​មនុស្ស លីកាដូ លោក អំ សំអាត ប្រាប់​វិទ្យុ​អាស៊ី​សេរី​នៅ​ថ្ងៃ​ទី២១ ខែធ្នូ​ថា អំពើ​ឆបោក​តាម​ប្រព័ន្ធ​អនឡាញ ពាក់ព័ន្ធ​ទៅ​នឹង​ជន​បរទេស​មែន ប៉ុន្តែ កើត​ឡើង​នៅ​ក្នុង​ប្រទេស​កម្ពុជា ដែល​មាន​ការ​ផ្សព្វផ្សាយ​លើ​បណ្ដាញ​ព័ត៌មាន​អន្តរជាតិ​ជា​ហូរហែ។ លោក​ថា នេះ​គឺ​ជា​បញ្ហា​ក្ដៅ​គួរ​ឱ្យ​បារម្ភ ពីព្រោះ​រដ្ឋាភិបាល​បរទេស​មួយ​ចំនួន ថែម​ទាំង​ហាម​ពលរដ្ឋ​របស់​គេ មិន​ឱ្យ​ធ្វើ​ដំណើរ​មក​ប្រទេស​កម្ពុជា​ផង។

លោក អំ សំអាត ថា បញ្ហា​ឆបោក​តាម​ប្រព័ន្ធ​អនឡាញ គឺ​ជា​បទ​ល្មើស​ទំនើប​កម្ម​ថ្មី ដូច្នេះ ទាមទារ​ឱ្យ​មាន​ការ​ហ្វឹកហ្វឺន​សមត្ថកិច្ច​បច្ចេកទេស តាម​ឱ្យ​ទាន់​ភាព​ទំនើប នៃ​ឧក្រិដ្ឋកម្ម ទើប​អាច​កំណត់​អត្ត​សញ្ញាណ​ឧក្រិដ្ឋ​ជន​បាន។ លោក​ថា ដើម្បី​ដោះស្រាយ​បញ្ហា​នេះ​ឱ្យ​មាន​ប្រសិទ្ធភាព ទាមទារ​រដ្ឋាភិបាល​ឱ្យ​អនុវត្ត​ឱ្យ​ហ្មត់ចត់ នូវ​ការ​ប្ដេជ្ញា​ចិត្ត​ប្រកប​ដោយ​ឆន្ទៈ ដោយ​ការ​បង្កើន​កិច្ចប្រតិបត្តិការ​ជា​អន្តរជាតិ ព្រម​ទាំង​កម្ចាត់​អំពើ​ពុករលួយ ដោយ​គ្មាន​ការ​លើកលែង និង​ជា​ពិសេស ការ​ពិនិត្យ​ឱ្យ​បាន​ច្បាស់លាស់ លើ​រំហូរ​ចូល​នៃ​ជន​បរទេស​មក​ក្នុង​ប្រទេស​កម្ពុជា។

លោក អំ សំអាត៖ «ប្រទេស​កម្ពុជា​យើង​នៅ​តែ​ជាប់​ចំណាត់​ថ្នាក់​លេខ៣ របស់​សហរដ្ឋ​អាមេរិក ទាក់ទង​នឹង​ការ​ជួញ​ដូរ​មនុស្ស​ហ្នឹង។ អ៊ីចឹង បញ្ហា​ការ​ឆបោក​តាម​ប្រព័ន្ធ​អនឡាញ​ហ្នឹង គឺ​វា​ប៉ះពាល់​ច្រើន​សម្រាប់​កម្ពុជា​យើង។ ទី១ ទាក់ទង​នឹង​បញ្ហា​ជាមួយ​ភ្ញៀវ​ទេសចរណ៍​អន្តរជាតិ ដែល​គេ​មក​គេ​ទេសចរណ៍​នៅ​ប្រទេស​កម្ពុជា​យើង។ អ៊ីចឹង គឺ​វា​ធ្វើ​ឱ្យ​ប៉ះពាល់​ភ្ញៀវ​ទេសចរណ៍​អន្តរជាតិ។ ទី២ ប៉ះពាល់​ទៅ​ដល់​ការ​វិនិយោគ។ ទី៣ វា​ធ្វើ​ឱ្យ​ប៉ះពាល់​សន្តិសុខ សណ្ដាប់​ធ្នាប់​សង្គម​របស់​កម្ពុជា​យើង»

វិទ្យុ​អាស៊ី​សេរី​មិន​ទាន់​អាច​ទាក់ទង​អភិបាល​ខេត្ត​កំពត​លោក ម៉ៅ ធនិន និង​អនុប្រធាន​អចិន្ត្រៃយ៍​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស អ្នកស្រី ជូ ប៊ុនអេង ដើម្បី​សុំ​បំភ្លឺ​ជុំវិញ​រឿង​នេះ បាន​នៅ​ឡើយ​ទេ ខណៈ​អ្នក​នាំ​ពាក្យ​រង នៃ​ក្រសួង​មហាផ្ទៃ​លោក ទូច សុឃៈ ក៏​មិន​ទាន់​បាន​ឆ្លើយ​នឹង​សំណួរ​របស់​វិទ្យុ​អាស៊ី​សេរី ដែល​ផ្ញើ​សុំ​ការ​បំភ្លឺ​ពី​លោក តាម​ប្រព័ន្ធ​តេឡេក្រាម​ដែរ នៅ​ថ្ងៃ​ទី២១ ខែធ្នូ។

ក្នុង​រយៈពេល​ចុង​ក្រោយ​នេះ ជន​បរទេស​ដូច​ជា​វៀតណាម និង​ឥណ្ឌា ជា​ដើម ត្រូវ​បាន​ពួក​ឧក្រិដ្ឋជន​បោក​បញ្ឆោត​ឱ្យ​ទៅ​ធ្វើការ​ខុស​ច្បាប់​នៅ​ប្រទេស​កម្ពុជា។ របាយការណ៍​របស់​អង្គការ​សហប្រជាជាតិ កាល​ពី​ឆ្នាំ​មុន បាន​ប៉ាន់​ប្រមាណ​ថា នៅ​កម្ពុជា​មនុស្ស​ប្រមាណ ១០ម៉ឺន​នាក់ ត្រូវ​បាន​ឧក្រិដ្ឋជន​ជួញ​ដូរ​និង​ដាក់​ឃុំ ហើយ​ធ្វើ​ទារុណកម្ម បង្ខំ​ឱ្យ​ធ្វើការ​បោកប្រាស់​តាម​អ៊ីនធឺណិត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
លោក ហ៊ុន សែន និង​លោក សេង សារី បន្ត​ឆ្លើយឆ្លង​គ្នា​លើ​បណ្ដាញ​សង្គម​ពាក់ព័ន្ធ​សារ​បែក​ធ្លាយ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។