សហគមន៍ខេត្តព្រះវិហាររកឃើញឈើប្រណិតជាង ២០០ដើមត្រូវកាប់បំផ្លាញក្នុងព្រៃព្រះរការ
2024.09.12
បទល្មើសព្រៃឈើ ក្នុងដែនជម្រកសត្វព្រៃព្រះរការ ដែលប្រជាសហគមន៍រកឃើញ កាលពីថ្ងៃទី៥ កញ្ញា ២០២៤។
ប្រជាសហគមន៍ជនជាតិដើមភាគតិចកួយរស់នៅឃុំប្រមេរុ ស្រុកត្បែងមានជ័យ ខេត្តព្រះវិហារ ប្រទះឃើញបទល្មើសជាង ២០០ដើម(២១៣)ជាថ្មីទៀត ឋិតក្នុងតំបន់ដែនជម្រកសត្វព្រៃព្រះរការ។
ប្រជាសហគមន៍បានចេញសេចក្តីប្រកាសព័ត៌មានស្ដីពីការរកឃើញបទល្មើសព្រៃឈើទាំងនេះ ដែលចេញផ្សាយនៅថ្ងៃទី១១ ខែកញ្ញា ឱ្យដឹងថា ពួកគាត់ប្រទះឃើញដើមឈើតូចធំ ព្រមទាំងទីកន្លែងបោះតង់របស់ក្រុមអ្នកអារឈើ ម៉ាស៊ីនអារឈើ និងសម្ភារៈអារឈើជាដើម ឋិតនៅចំណុចក្បាលអូរដាច់កន្ទប ក្នុងដែនជម្រកសត្វព្រៃព្រះរការ។
តំណាងសហគមន៍ការពារព្រៃព្រះរកា លោក ខាក់ ភារិទ្ធម៉ាស៊ី ប្រាប់វិទ្យុអាស៊ីសេរីនៅថ្ងៃទី១១ កញ្ញា ថា បទល្មើសព្រៃឈើក្នុងតំបន់អភិរក្សនេះ នៅតែបន្តកើតមានច្រើន ក្នុងពេលដែលក្រសួងបរិស្ថាន បន្តរឹតត្បិតសិទ្ធិសេរីភាពសហគមន៍មិនឱ្យល្បាតព្រៃ និងការពារព្រៃឈើ។
លោកសង្កត់ធ្ងន់ថា ក្រសួងបរិស្ថានគ្មានឆន្ទៈ បង្កើតយន្តការតាមដានការអនុវត្តច្បាប់របស់មន្ត្រីមូលដ្ឋាន និងដាក់ទោសទណ្ឌលើពួកគេ ប្រសិនបើរកឃើញថា មន្ត្រីទាំងនោះមានជាប់ពាក់ព័ន្ធនឹងការស៊ីសំណូកជាមួយឈ្មួញខិលខូច។
លោក ខាក់ ភារិទ្ធិម៉ាស៊ី៖ «សម្រាប់ខ្ញុំ ខ្ញុំព្រួយបារម្ភមែនទែនពួកហ្នឹងដែលរឹតត្បិតមិនឲ្យសហគមន៍មូលដ្ឋាន យុវជនឬក្រុមនិស្សិត ព្រះសង្ឃចូលរួមក្នុងការការពារ មើលទៅជោគវាសនារបស់ព្រះរការគិតថា ដប់ឆ្នាំខាងមុខប្រហែលសល់តែឈ្មោះទេ»។
ប្រជាសហគមន៍បន្ថែមថា ឈើដែលរងការកាប់បំផ្លាញមានមុខកាត់ចាប់ពីជាង ៣ តឹក រហូតដល់ជាង ១ ម៉ែត្រ ដែលជាប្រភេទឈើផ្តៀក ឈើទាល ស្ទៀង កកោះ និងគគីរ ជាដើម ដែលពួកគាត់រកឃើញ ត្រឹមតែ១ថ្ងៃ កាលពីថ្ងៃទី០៥ ខែកញ្ញា។ ជាមួយគ្នានេះ ក្នុងពេលចុះល្បាត ប្រជាសហគមន៍ បានជួបប្រទះដោយចៃដន្យ ជាមួយក្រុមមន្ត្រីបរិស្ថាន និងទាហានមួយក្រុម ហើយមន្ត្រីទាំងនោះ បានរារាំង និងហាមឃាត់ពួកគាត់ មិនឱ្យបន្តដំណើរទៅមុខទៀត។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីប្រធានដែនជម្រកសត្វព្រៃព្រះរការ លោក យ៉ាប់ ប៊ុនសឿន បាននៅឡើយទេ នៅថ្ងៃទី១១ កញ្ញា។
ប្រជាសហគមន៍ចាត់ទុកបទល្មើសព្រៃឈើនៅតំបន់នោះ ឆ្លុះបញ្ចាំងពីកង្វះសមត្ថភាព ក្នុងការការពារព្រៃឈើ ពីសំណាក់ក្រសួងបរិស្ថាន និងអាជ្ញាធរពាក់ព័ន្ធ បង្កប៉ះពាល់យ៉ាងធ្ងន់ធ្ងរ លើជីវភាពពលរដ្ឋ និងទំនៀមទម្លាប់របស់ជនជាតិដើមភាគតិចកួយ។
ពួកគាត់ទទូចឱ្យរដ្ឋមន្ត្រីក្រសួងបរិស្ថាន លោក អ៊ាង សុផល្លែត ចុះពិនិត្យបទល្មើសព្រៃឈើដោយផ្ទាល់ ចៀសវាងចាំស្រង់តែរបាយការណ៍ពីមន្ត្រីថ្នាក់ក្រោមបំភ្លៃការពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ