ជនជាតិដើមសួយនៅខេត្តកំពង់ស្ពឺជាង ៣០០គ្រួសារ ត្អូញអំពីការធ្លាក់ចុះប្រាក់ចំណូលធ្ងន់ធ្ងរ ដោយសារបាត់ព្រៃសហគមន៍
2024.09.12
(រូបថតឯកសារ) ទិដ្ឋភាពជនជាតិដើមភាគតិចសួយ ខេត្តកំពង់ស្ពឺធ្វើពិធីបុណ្យភូមិ កាលពីខែកញ្ញា ឆ្នាំ២០២៣។
រូបពីពលរដ្ឋសហគមន៍សួយ
ជនជាតិដើមភាគតិចសួយជាង ៣០០គ្រួសារ រស់នៅក្នុងខេត្តកំពង់ស្ពឺ ត្អូញត្អែរអំពីការធ្លាក់ចុះប្រាក់ចំណូលធ្ងន់ធ្ងរ ធ្វើឱ្យជីវភាពគ្រួសាររបស់ពួកគាត់ធ្លាក់ខ្លួនក្រីក្រ ដោយសារបាត់បង់ព្រៃឈើ និងមិនអាចចូលទៅអាស្រ័យផល ក្នុងតំបន់ព្រៃសមូហភាពសហគមន៍ភ្នំវិហារ។
ជនជាតិដើមភាគតិចទាំងនោះ រស់នៅភូមិជំនាប់ និងភូមិដំបងវេញ ឃុំសង្កែសាទប ស្រុកឱរ៉ាល់ ព្រមានលើកគ្នាតវ៉ា ដើម្បីតស៊ូមតិជាថ្មីទៀត ប្រសិនបើអាជ្ញាធរនៅតែពន្យារពេល មិនចុះបញ្ជីដីសមូហភាពភ្នំវិហារ ដែលជាតំបន់ប្រវត្តិសាស្ត្រជនជាតិដើមសួយតាំងពីបុរាណកាលមក។
ប្រជាសហគមន៍អះអាងថា ការពន្យារពេលមិនចុះបញ្ជីដីសមូហភាពជិត ១០ឆ្នាំកន្លងទៅនេះ ផ្ដល់ឱកាសឱ្យក្រុមហ៊ុនឯកជន និងបុគ្គលមានលុយមានអំណាចចូលទៅឈូសឆាយ កាប់ទន្ទ្រានព្រៃឈើ និងរំលោភយកដីព្រៃសហគមន៍ជាបន្តបន្ទាប់ ប៉ះពាល់ដល់ប្រភពចំណូលរបស់សហគមន៍។
សមាជិកសហគមន៍លោក ទូច ខ្លុំ ប្រាប់វិទ្យុអាស៊ីសេរី នៅថ្ងៃទី១២ កញ្ញាថា ពេលនេះអ្នកភូមិមិនអាចចូលទៅអាស្រ័យផល ក្នុងដីសហគមន៍ភ្នំវិហារបានទេ ព្រោះអាជ្ញាធររារាំង ធ្វើឱ្យពួកគាត់ជួបការលំបាក គ្មានព្រៃអាស្រ័យផល និងខ្វះខាតដីបង្កបង្កើនផលជាច្រើនឆ្នាំមកហើយ។
លោកថា អ្នកភូមិភាគច្រើនធ្លាក់ខ្លួនក្រីក្រតោកយ៉ាក ដោយសារបាត់បង់ដីចម្ការវិលជុំ និងដើមឈើធំៗ ដែលពួកគាត់មានទម្លាប់ពឹងផ្អែកលើធនធានធម្មជាតិ បែបប្រពៃណី។
លោក ទូច ខ្លុំ៖ «មានក៏មានតែម្ដុំហ្នឹង ប៉ុន្តែដល់គេយកអស់ទៅយើងវិលជុំអ៊ីចឹងយកម៉េចកើត។ ព្រោះបំណងរបស់គាត់គាត់ចង់តែទុកព្រៃឈើឲ្យកូនចៅមើល ប៉ុន្តែគេកាប់អស់អញ្ចឹងគឺគាត់ពិបាកចិត្តហួសពីការស្មាននឹងនិយាយទៅម្នាក់ៗ»។
ដីព្រៃសមូហភាពសហគមន៍ភ្នំវិហារមានផ្ទៃដីជាង ១ពាន់ ៦រយហិកតារ (១.៦៦០) ឋិតក្នុងភូមិចំនួន២ គឺភូមិជំនាប់ និងភូមិដំបងវេញ ឃុំសង្កែសាទប ស្រុកឱរ៉ាល់ ដែលអ្នកភូមិបានស្នើសុំចុះបញ្ជីសមូហភាពកាលពីឆ្នាំ២០១៦ ក៏ប៉ុន្តែមកទល់ពេលនេះអាជ្ញាធរមិនទាន់សម្រេចបែបណានៅឡើយទេ។
អ្នកភូមិថា ព្រៃស្រោងនៅតំបន់នោះមួយផ្នែកធំ ត្រូវបានរដ្ឋាភិបាលវិនិយោគឱ្យក្រុមហ៊ុនឯកជន និងបុគ្គលមានលុយមានអំណាចជាច្រើនរាប់ម៉ឺនហិកតារ ធ្វើឱ្យបាត់បង់កន្លែងរកអនុផលព្រៃឈើរបស់ជនជាតិដើមភាគតិចសួយជាបន្តបន្ទាប់។
តំណាងសហគមន៍ លោកស្រី កែប អឹម ថ្លែងថា ជនជាតិដើមភាគតិចសួយមានទម្លាប់រកអនុផលព្រៃឈើ រួមមាន រកផ្សិត រកថ្នាំបុរាណ រកអុស និងបេះបន្លែផ្លែឈើ តាំងពីបុរាណកាលមក ក៏ប៉ុន្តែមុខរបរទាំងនេះ កំពុងប្រឈមបាត់បង់ទាំងស្រុង ដោយសារតែខ្សត់ព្រៃស្រោង។
លោកស្រីថា ពេលនេះ ជនជាតិដើមសួយ ២ភូមិ ភាគច្រើនខ្វះខាតដីធ្វើកសិកម្មចិញ្ចឹមជីវិត។
លោកស្រី កែប អឹម៖ «ចាស៎ ខ្វះ បើគេប្រុងកាត់យកអស់ហើយ ព្រោះចម្ការពីដើមរបស់ខ្ញុំ ធ្វើវិលជុំហ្នឹង លី យ៉ុងផាត់ គេយកអស់ហើយ។ អត់មានទេ! អត់ទទេគត់ហ្មង! ដូចខ្ញុំអីអត់អាលីងហ្មងវេទនាខ្លាំងអត់ដីនៅ ណាមួយម៉ែចាស់ហើយអត់មានដីនៅទើបឲ្យខ្ញុំចេះតែស្នើទៅថ្នាក់លើទៅក្រែងបានដាំស្រូវខ្លះ»។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីអភិបាលខេត្តកំពង់ស្ពឺ លោក ជាម ច័ន្ទសោភ័ណ បាននៅឡើយទេ នៅថ្ងៃទី១២ កញ្ញា ដោយសារទូរស័ព្ទហៅចូលតែគ្មានអ្នកលើក។
ក៏ប៉ុន្តែ មេឃុំសង្កែសាទប លោក ណន សារុន ប្រាប់វិទ្យុអាស៊ីថា ថ្មីៗ នេះ ក្រសួងអភិវឌ្ឍន៍ជនបទ បានចុះមក កំណត់អត្តសញ្ញាណជនជាតិដើមភាគតិចសួយរួចហើយ ដើម្បីបំពេញលក្ខខណ្ឌចុះបញ្ជីដីសមូហភាពសហគមន៍ភ្នំវិហារ។
លោកបន្ថែមថា ព្រៃឈើនៅតំបន់នោះ ហ៊ុមព័ទ្ធដោយតំបន់ភ្នំ ហើយអាជ្ញាធរ និងក្រុមហ៊ុនឯកជន កំពុងប្រឹងប្រែងការពារព្រៃឈើបន្សល់ចុងក្រោយ ដើម្បីទាក់ទាញភ្ញៀវទេសចរ មិនអនុញ្ញាតឱ្យមានការកាប់ទន្ទ្រានឡើយ។
លោក ណន សារុន៖ «បើអត់កាន់កាប់ ហើយត្រូវ ក៏វាដោះល្អ ហើយដើមឈើធំៗ ឥឡូវ ត្រូវគេកាប់អស់ បើក្រុមហ៊ុនមិនជួយការពារ យើងយើងជួយការពារ ខ្ញុំមិនគាំទ្រតាំងពីនយោបាយរបស់ឃុំមកម៉្លេះ។ ប៉ុន្តែ គ្រាន់ថា ដីយើងមិនទាន់បានចុះបញ្ជីជាផ្លូវការ»។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក លោក ប៉ែន ប៊ុណ្ណារ៍ សង្កេតឃើញថា អំពើពុករលួយ ធ្វើឱ្យអាជ្ញាធរខិលខូចមួយចំនួន យកលេសដោះសា ដើម្បីពន្យារពេលចុះបញ្ជីដីសមូហភាព ធ្វើឱ្យប្រជាសហគមន៍ជួបការលំបាកច្រើន ផ្នែកជីវភាព និងការបាត់បង់ទំហំព្រៃឈើ។
លោក ប៉ែន ប៊ុណ្ណា៍៖ «បើនិយាយមែនទែនទៅ វាជាកំហុសមួយរបស់អាជ្ញាធរ ដែលមិនបានការពារព្រៃឈើ ដែលក្នុងនោះបង្កប់អំពើពុករលួយ ដែលធ្វើឲ្យមានការកាប់ព្រៃឈើយ៉ាងអនាធិបតេយ្យ មកទល់ពេលនេះ ទោះបីមានការកែត្រូវទម្រង់រដ្ឋាភិបាលថ្មី ក៏ការទទួលខុសត្រូវ ចំពោះការបាត់បង់ព្រៃឈើ អត់ទាន់ដាក់បន្ទុកទៅលើមន្ត្រីយុត្តិធម៌ណាម្នាក់ច្បាស់ទេ»។
ប្រជាសហគមន៍បន្ថែមថា ព្រៃអភិរក្សនេះ ជាជង្រុកអនុផលព្រៃឈើសំបូរបែបរបស់ជនជាតិដើមសួយ និងជាកន្លែងគោរពបូជាអារក្សអ្នកតាភ្នំ ដោយមានទឹកអូរធម្មជាតិសំបូរត្រី ទឹកផុសចេញពីល្អាងភ្នំ និងព្រៃជំនឿ ដែលអ្នកស្រុកធ្វើពិធីសែនព្រេនជារៀងរាល់ឆ្នាំ។
ពួកគាត់ទទូចឱ្យរដ្ឋាភិបាល បោះបង្គោលព្រំដី កំណត់ដីសមូហភាពសហគមន៍ភ្នំវិហារ ដើម្បីទប់ស្កាត់ការលួចឈូសឆាយ និងកាប់ទន្ទ្រានពីសំណាក់ក្រុមហ៊ុនឯកជន ព្រមទាំងអ្នកមានលុយមានអំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ