អ្នកផ្ទុក​មេរោគ​អេដស៍នៅ​ឃុំរកា ខ្វះស្បៀងអាហារ និងស្នើសុំ​អាជ្ញាធរឱ្យជួយ

ដោយ ឡេង ម៉ាលី
2022.07.21
Share on WhatsApp
Share on WhatsApp
អ្នកផ្ទុក​មេរោគ​អេដស៍នៅ​ឃុំរកា ខ្វះស្បៀងអាហារ និងស្នើសុំ​អាជ្ញាធរឱ្យជួយ (រូបឯកសារ) មណ្ឌលសុខភាព រកា ក្នុង​ស្រុកសង្កែ ខេត្តបាត់ដំបង កាល​ពីថ្ងៃទី២៩ ខែមករា ឆ្នាំ២០១៧។
RFA

ពលរដ្ឋ​ផ្ទុក​មេរោគ​អេដស៍​នៅ​ឃុំ​រកា ស្រុកសង្កែ ខេត្ត​បាត់ដំបង ខ្វះខាត​ស្បៀង​អាហារ និង​ស្នើ​ដល់​អាជ្ញាធរ​ពាក់ព័ន្ធ​ឱ្យ​ផ្តល់​ស្បៀង​ដល់​ពួក​គាត់។ ការ​ស្នើសុំ​នេះ ធ្វើ​ឡើង​បន្ទាប់​ពី​ពលរដ្ឋ​ផ្ទុក​មេរោគ​អេដស៍ ធ្លាក់​​ខ្លួន​ឈឺ និង​គ្មាន​លទ្ធភាព​ទៅ​ធ្វើ​ការ​ប្រកប​របរ​រក​ប្រាក់​ចំណូល​ដោះ​ស្រាយ​ជីវភាព​គ្រួសារ។ សង្គម​ស៊ីវិល​យល់​ឃើញ​ថា រដ្ឋាភិបាល​គួរ​តែ បង្កើន​ការ​យក​ចិត្ត​ទុក​ដាក់​សុខភាព​ពលរដ្ឋ និង​ដោះ​ស្រាយ​បញ្ហា​ខ្វះ​ស្បៀង​ឱ្យ​ទាន់​ពេល​វេលា​ជូន​ដល់​អ្នក​ផ្ទុក​មេរោគ​អេដស៍​ទាំង​នោះ។

ពលរដ្ឋ​ផ្ទុក​មេរោគ​អេដស៍​នៅ​ឃុំ​រកា លើក​ឡើង​ថា កត្តា​ខ្វះ​ស្បៀង​អាហារ​នេះ ដោយសារ​ពួក​គាត់​មាន​វ័យ​កាន់​តែ​ចាស់ និង​មាន​សភាព​ទ្រុឌទ្រោម ឈឹ​សន្លាក់ ជា​ហេតុ​ធ្វើ​ឱ្យ​ពួក​គាត់​មិន​អាច​ប្រក​បរបរ​ចិញ្ចឹម​ជីវិត​បាន។ អ្នក​ផ្ទុក​មេរោគ​អេដស៍​សោកស្តាយ ដែល​អង្គការ​ធ្លាប់​ជួយ​ឧបត្ថម្ភ​កន្លង​មក​ផុត​អាណត្តិ ហើយ​ក៏​អំពាវនាវ​ដល់​រដ្ឋាភិបាល និង​អង្គការ​នានាៗ ជួយ​ដល់​ពួក​គាត់។

អ្នកផ្ទុកមេរោគ​អេដស៍​នៅ ឃុំរកា អាយុ ៦៥ឆ្នាំ បាន​ប្រាប់​វិទ្យុ​អាស៊ី​សេរី​ថា លោក​ស្រី​ជួប​ទុក្ខ​លំបាក​ច្រើន ព្រោះ​បន្ទុកសមាជិក​គ្រួសារ​មាន​ចំនួន​ច្រើន ហើយវ័យគាត់តែជរាឈឺ។ លោកស្រីអះអាងថា លោក​ស្រី តាំង​ពី​ធ្លាក់​ខ្លួនឈឺមក​ដើរទៅណាមកណាមិន​រួច​នោះ​ទេ ហើយក្នុងខ្លួនមានអាការៈ​ឈឺ​ចាប់​ពេញ​ខ្លួន ដោយ​ពុំ​អាចធ្វើ​ការងារ​អ្វី​បាន​ឡើយ។ លោកស្រីស្នើ​ដល់​អាជ្ញាធរ​ពាក់ព័ន្ធ​ជួយ​ដល់​ពួក​គាត់ ព្រោះ​កំពុង​ជួប​ទុក្ខ​លំបាក​គ្មាន​ស្បៀង​ហូប​ចុក​ប្រចាំ​ថ្ងៃ​នោះ​ទេ៖ «ដូច​ថា រឿង​ពេទ្យ រឿង​អី រឿង​ថ្នាំ​អី​អត់​មាន​អី​ពិបាក ពិបាក​ខាង​ជំងឺ ឈឺ ឈឺដូចចាស់ប្រហែលខ្ញុំ ចាស់​ជរា​អាយុ ៥០ ៦០ ជាង​អីអ៊ីចឹងលោកគ្រូ ឈឺហើយ​ខ្ញុំ​នេះ​ហើយ ដើរលែង​រួចហើយខ្ញុំន៎ ចាស់ៗ ៣ ៤នាក់ ប៉ុន្តែ ប្តី​ខ្ញុំ​ស្លាប់​បាត់​ហើយ នៅ​ចៅ ២នាក់ ហើយ​និង​ខ្ញុំ។ សព្វថ្ងៃ​ធំៗ អស់​ហើយ ក្រមុំ​កំលោះ​អស់​ហើយ ប៉ុន្តែ គ្នា​ធ្វើ​ការ​អ្វី​ធ្ងន់​មិន​ចង់​បាន​ដែរ​ហ្នឹង ឈឺ​ដៃ​ឈឺ​ជើង​ទៅ ដូច​ខ្ញុំ​ដើរ​មិន​រួច​អី​មិន​រួច​អ៊ីចឹង​ទៅ ចាស់ៗ និយាយ​ទៅ​ចាស់​ទៅ​ទាំង​អស់​ហ្នឹង ហើយ​ណា​មួយ​ទៀត​ទៅ អ្នក​ខ្លះ​ទៅ គាត់​មាន​អី ទោះ​បី​ថា គាត់​គ្មាន​ស្រូវ គ្មាន​អង្ករ គ្មាន​អ្វី​ពិសា​អ៊ីចឹង​ទៅ គាត់​យ៉ាប់​ទៅ»

ទាក់ទង​នឹង​បញ្ហា​នេះ មេឃុំ​រកា លោកស្រី ហ៊ឹម ពៅ ប្រាប់​វិទ្យុ​អាស៊ី​សេរី​ថ្ងៃ ២០ កក្កដា​ថា រដ្ឋបាល​ឃុំ​តែងតែ​យក​ចិត្ត​ទុក​ដាក់​ចំពោះ​អ្នក​ផ្ទុក​មេរោគ​អេដស៍ និង​ផ្តល់​ថ្នាំ​ពន្យា​រជីវិត​ដល់​ពលរដ្ឋ ហើយ​រដ្ឋា​ភិ​បាល​គឺ​ផ្គត់ផ្គង់​ថ្នាំ​ទាំង​ស្រុង​ដោយ​ឥត​គិត​ថ្លៃ ចាប់​តាំង​ពី​ចុង​ឆ្នាំ២០១៤។ លោកស្រី​បន្ត​ថា ផ្តល់​ភាព​ងាយ​ស្រួល​ក្នុង​ការ​ផ្តល់​ថ្នាំ​លេប​ដល់​អ្នកជំងឺ និង​ចេញ​សោហ៊ុយ ការ​ធ្វើ​ដំណើរ​ដល់​អ្នក​ជំងឺ​នៅ​ឆ្ងាយ។ លោកស្រី​បន្ថែម​ថា រដ្ឋាភិបាល​ឧបត្ថម្ភ​ប្រាក់​ដល់​អ្នក​ជំងឺ និង​ផ្តល់​ប​ណ្ណ​ក្រីក្រអោយ​ប្រើប្រាស់​ផង​ដែរ។ លោកស្រី​ថ្លែង​ថា​កន្លង​មក អ្នក​ស្រីតែងប្រកាស​ប្រាប់​អ្នកជំងឺភូមិ​រកា​ថា បើ​នរណា​ខ្វះ​ខាត​ស្បៀង​អាហារ​ខ្លាំង​ត្រូវ​ទៅ​ជួប​មន្ត្រីឃុំ​របស់លោក​ស្រី​ ដើម្បី ​ចាត់ចែង​ជូន​ទៅតាម​លទ្ធភាព។ លោកស្រីបញ្ជាក់​ថា ខាងឃុំ និង​គ្រូពេទ្យ​ក៏តែង អប់រំ​ផ្សព្វផ្សាយ​ជាប្រចាំ​ ដល់​ពលរដ្ឋ​ក្នុងឃុំ​​រកាថា ​កុំ​ឱ្យ​ព្រួយបារម្ភ​អំពី​ជំងឺ និង​​លេប​ថ្នាំ​ឱ្យ​ទៀង​ទាត់៖ «ការ​ពិត​ទៅ​ខាង​ឃុំរកា​ខ្ញុំ​ ការ​រើសអើង គឺ​អន់​ជាង​ ថយ​ជាង​មុន​ចា៎ មិន​សូវ​រើសអើងទេ។ ប៉ុន្តែ​សំខាន់ ​ការ​ដែល​គាត់​វគ្គ​មុន​តាម​ភូមិ​ខ្ញុំ​អាច​ផ្តល់​អំណោយ​ឱ្យ​មួយ​ចំនូន​ផង​ដែរ​ចា៎។ ហើយ​កាល​ខែ​មុន ខែ​មុន​បោះ​ឆ្នោត ខ្ញុំ​បាន​ចែក​អំណោយ​ខ្លះ កាក​បាទ​បាន​ចែក ហើយ​ខាង​លោក ក៏​បាន​ជួយ​ចែក​ដល់​អ្នក​អត់ៗ ខ្វះខាត​ស្បៀង​មួយ​ចំនួន​ផង​ដែរ​ចា៎ ហើយ​មួយ​វិញ​ទៀត បើ​ពួក​គាត់​ខ្វះខាត​ស្បៀង​ អាច​មក​ជួប​ពួក​ខ្ញុំ​នៅ​សាលា​ឃុំ»

វិទ្យុអាស៊ីសេរី​មិន​អាច​ទាក់ទង​ប្រធាន​មន្ទីរពេទ្យ​រកា លោក អេង សំណាង ដើម្បី​អត្ថធិប្បាយ​ជុំវិញ​រឿង​នេះ​បាន​ទេ នៅ​ថ្ងៃ​ទី២០ កក្កដា ដោយសារ​លោក​ថា រវល់។

ជុំវិញ​រឿង​នេះ មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក ខេត្តបាត់ដំបង លោក យិន ម៉េងលី មាន​ប្រសាសន៍ថា រដ្ឋាភិបាល​មាន​តួនាទី​សំខាន់​ក្នុង​ការ​គ្រប់គ្រង និង​ការ​ធ្វើ​ឱ្យ​ពលរដ្ឋ​គ្រប់​រូប​មាន​សន្តិសុខ សុវត្ថិភាព និង​សុខុមាលភាព​របស់​ពលរដ្ឋ។ លោក​យល់​ឃើញ​ថា ពលរដ្ឋ ដែល​ផ្ទុក​មេ​រោគ​អេដស៍ គឺ​ងាយ​រងគ្រោះ​បំផុត ហើយ​ការ​យក​ចិត្ត​ទុក​ដាក់​របស់​អាជ្ញាធរ​ជា​រឿង​សំខាន់៖ «ត្រូវ​តែ​បង្កើន​ការ​យក​ចិត្ត​ទុក​ដាក់​លើ​ពួក​គាត់ ហើយ​ពួក​គាត់ ដែល​មាន​ផ្ទុក​មេរោគ​អេដស៍​ហ្នឹង គឺ​ពួក​គាត់​ឥឡូវ ក៏​កាន់​តែ​វ័យ​ចាស់ៗ ជរា​ហើយ។ អ៊ីចឹង​ធ្វើ​អី​ក៏​លែង​កើត សុខភាព​ក៏​កាន់​តែ​ទ្រុឌទ្រោម ហើយ​បើ​សិន​ជា​ខ្វះ​នូវ​ចំណី​អាហារ​ថែម​ទៀត ធ្វើ​ឱ្យ​សុខភាព​កាន់​តែ​ទ្រុឌទ្រោម​ថែម​ទៀត។ ត្រង់​នេះ​ហើយ ដែល​រាជរដ្ឋាភិបាល ក៏​ដូច​ជា​អាជ្ញាធរ​ដែរ ត្រូវ​បង្កើន​យក​ចិត្ត​ទុក​ដាក់ ចំពោះ​ពួក​គាត់ ឱ្យ​​បាន​ខ្លាំងក្លា​ជាង​ប្រជាពលរដ្ឋ​ដទៃ​ទៀត ដែល​គេ​មាន​សុខភាព​ល្អ មិន​មាន​ជំងឺ​ឈឺ​ស្កាត់​អី​ហើយ ឬ​ក៏​ផ្ទុក​ជំងឺ​អេដស៍ ដែល​មាន​លក្ខណៈ​ទ្រង់ទ្រាយ​ធំ​ដូចនៅក្នុង​ឃុំរកា​នេះ គឺ​ថា រដ្ឋាភិបាល ក៏​ដូច​អាជ្ញាធរ​ដែរ តាម​រយៈ​កាក​បាទ​ក្រហម​អាច​ជួយ​ដែរ ពីព្រោះ​អាច​ផ្តល់​នូវស្បៀង​អាហារ ឬ​ម្ហូប​អាហារ​អ្វីៗ ផ្សេងៗ ទៀត​ឱ្យ​ពួក​គាត់ ដើម្បី​ជួយ​បញ្ហា​សុខភាព​ពួក​គាត់​ឱ្យ​មាន​ភាព​ប្រសើរ​ឡើង»

មនុស្ស​ក្មេង​ចាស់​ប្រុស​ស្រីក្នុង​ឃុំ រកា​សរុប ៣២៥នាក់ ក្នុង​នោះ​ក្មេង​មាន​ចំនួន ៦៨នាក់ បាន​រក​ឃើញ​មាន​ផ្ទុក​មេរោគ​អេដស៍ ដោយ​បុរស​ម្នាក់​ជា​គ្រូពេទ្យ​ប្រចាំ​ភូមិ​ឈ្មោះ ​ញ៉ែម ជ្រិ​ន ​បាន​ចម្លង​មេរោគ​អេដស៍​តាម​រយៈ​ការ​ប្រើ​ម្ជុល ១ ដដែលៗ ចាក់​ថ្នាំ​រួមគ្នា ដល់​ប្រជាជន​ក្នុង​ភូមិរកា​កាល​ពី​ចុង​ឆ្នាំ ២០១៤។ សោកនាដកម្ម​ដ៏​សែន​ឈឺ​ចាប់​នេះ បាន​បន្សល់​ទុក​អ្នក​ផ្ទុក​មេរោគ​អេដស៍​សម្រាប់​អ្នកឃុំ​រកា​ទាំង​មូល ទោះ​ជា​គ្រូពេទ្យ ​ញ៉ែម ជ្រិន ត្រូវ​បាន​តុលាការ​កំពូល​កាត់​ទោស​ឱ្យ​ជាប់​គុក ២៥ឆ្នាំ កាល​ពី​ថ្ងៃទី៤ ខែតុលា ឆ្នាំ២០១៩ ។

មេឃុំ​រការ អ្នក​ស្រី ស៊ឹម ពៅ ឱ្យ​ដឹង​ថា គិតត្រឹម​ថ្ងៃ​ទី២០ កក្កដា អ្នក​ស្លាប់​ដោយសារ​មេរោគ​អេដស៍​បាន​កើនឡើង​ដល់ ៤៩នាក់​ហើយ ក្នុង​ចំណោម​អ្នក​ផ្ទុក​មេរោគ​អេដស៍​ចំនួន ៣២៥នាក់។ អ្នក​ស្រី​បន្ត​ថា បច្ចុប្បន្ន​ មាន​អ្នក​មេរោគ​អេដស៍​ចំនួន ២៦២នាក់ ក្នុង​នោះ​ស្រី ១៥២នាក់ និង​ក្មេង​ដែល​ផ្ទុក​មេរោគ​អេដស៍​មាន ៣៥នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។