ប្ដីស្ត្រីរងគ្រោះដោយគ្រូពេទ្យវះកាត់ដាច់ពោះវៀនសម្រេចប្ដឹងមន្ទីរសំរាកព្យាបាលបង្កបញ្ហានោះ
2022.12.01
ប្ដីលោកស្រី ឈាង ស្រីអូន គឺលោក ផេង វឿន នៅមើលថែភរិយាដែលកំពុងព្យាបាលនៅមន្ទីរពេទ្យកាល់ម៉ែត្រ។
រូប៖ ហ្វេសប៊ុកខុទ្ទកាល័យអ្នកស្រី ប៊ុន រ៉ានី ហ៊ុន សែន
ប្តីស្ត្រីជាកម្មកររោងចក្រដែលត្រូវបានគ្រូពេទ្យវះកាត់ដាច់ពោះវៀន សម្រេចប្ដឹងមន្ទីរសំរាកព្យាបាលឯកជន ដើម្បីរកយុត្តិធម៌។ ទាក់ទងករណីនេះ ក្រសួងសុខាភិបាលរកឃើញថា មន្ទីរសំរាកព្យាបាលឯកជននោះ បានធ្វេសប្រហែស ដោយបានអនុញ្ញាតឱ្យឆ្មបមិនទាន់មានជំនាញច្បាស់លាស់ធ្វើការរំលូតគភ៌ដែលអាយុ១៨សប្ដាហ៍។ ទោះយ៉ាងណា មន្ត្រីសហជីពស្នើទៅក្រសួងសុខាភិបាល គួរពិនិត្យឡើងវិញលើវិស័យនេះ និងទោសទណ្ឌលើមន្ទីរពេទ្យ និងគ្រូពេទ្យដែលធ្វេសប្រហែសនោះ។
ស្ត្រីដែលរងគ្រោះបន្តស្ថិតក្នុងបន្ទប់សង្គ្រោះបន្ទាន់ដដែល។ ចំណែកមន្ទីរសំរាកព្យាបាលដែលធ្វេសប្រហែសនោះ ត្រូវបានក្រសួងសុខាភិបាលបិទបណ្ដោះអាសន្នដើម្បីធ្វើការស៊ើបអង្កេតចាត់វិធានការបន្ត។
ប្ដីលោកស្រី ឈាង ស្រីអូន គឺលោក ផេង វឿន ដែលកំពុងតាមថែប្រពន្ធនៅមន្ទីរពេទ្យ ឱ្យវិទ្យុអាស៊ីសេរីដឹងនៅថ្ងៃទី១ ខែធ្នូ ថា ពេលនេះសាច់ញាតិរបស់លោកបានដាក់ពាក្យប្ដឹងទៅមន្ទីរសំរាកព្យាបាល ដើមអង្គ្រង ដែលបានបណ្ដែតបណ្ដោយឱ្យប្រពន្ធរបស់លោកប្រឈមគ្រោះថ្នាក់ដល់អាយុជីវិតនេះរួចហើយ។ លោកឱ្យដឹងទៀតថា ដោយលោករវល់ថែទាំប្រពន្ធក្នុងមន្ទីរពេទ្យ លោកមិនទាន់ដឹងថា សមត្ថកិច្ច ឬតុលាការ ចាត់វិធានការបែបណាលើមន្ទីរសំរាកព្យាបាលនោះនៅឡើយទេ។ បុរសជាកម្មកររោងចក្ររូបនេះ សង្ឃឹមថា តុលាការ និងស្ថាប័នពាក់ព័ន្ធ នឹងជួយរកយុត្តិធម៌ដល់ប្រពន្ធរបស់លោក។
លោក ផេង វឿន៖ «ខ្ញុំឱ្យខាងបងខ្ញុំចាត់ចែង(ដាក់ពាក្យប្ដឹង) នៅណោះហើយបង ខ្ញុំអត់ដឹងដែរ ខាងបង ខាងប៉ា គាត់ជាអ្នកចាត់ចែង ខ្ញុំអត់ដឹងទេបង សម្រាប់ខ្ញុំនិយាយអីអត់រួចហ្នង»។
លោក ផេង វឿន ឱ្យដឹងទៀតថា ពេលនេះ កាកបាទក្រហម បានជួយចេញថ្លៃព្យាបាលប្រពន្ធលោក ដែលកំពុងសង្គ្រោះនៅមន្ទីរពេទ្យកាល់ម៉ែត។ ទោះយ៉ាងណា លោកថា មុនពេលប្រពន្ធរបស់លោក ត្រូវបានសាធារណជនដឹងលឺដូចនេះ លោកបានចំណាយប្រាក់អស់ជាច្រើន និងបានចងការលុយគេ ដើម្បីជួយសង្គ្រោះប្រពន្ធ តាំងពីពេទ្យឯកជន មន្ទីរពេទ្យ រដ្ឋ និងទៅដល់ប្រទេសវៀតណាមទៀតផង។
ទាក់ទងរឿងនេះ ប្រធានសហភាពការងារកម្ពុជា លោក អាត់ ធន់ យល់ថា ករណីនេះ គឺមានការធ្វេសប្រហែស ឬការមិនយកចិត្តទុកដាក់ទាំងមន្ទីរឯកជន និងពេទ្យរដ្ឋ។ លោក អាត់ ធន់ លើកឡើងថា ករណីនេះទាក់ទងអាយុជីវិតពលរដ្ឋ ដូច្នេះលោកទាមទារ ទៅក្រសួងសុខាភិបាលដោះស្រាយបញ្ហាដោយល្អិតល្អន់ និងគ្មានអំពើពុករលួយ។
លោក អាត់ ធន់៖ «ពេទ្យនៅកន្លែងដើមអង្គ្រងថា អាចខុសបច្ចេកទេសទៅចុះ ប៉ុន្តែនៅពេលមកដល់ពេទ្យធំពេទ្យជប៉ុនអីចឹងហើយ ដែលមានឧបករណ៍គ្រប់គ្រាន់ហេតុអីមិនជួយសង្គ្រោះ ឬបញ្ជូនទៅវះកាត់នៅកាល់ម៉ែត បណ្ដោយឱ្យគ្នាទៅវិញទៅមកទៅដល់វៀតណាម ត្រឡប់មកវិញ អ៊ីចឹង ខ្ញុំគិតថា ហានិភ័យណាស់សម្រាប់គ្នាមិនដឹងថា គ្នាឈឺចាប់ប៉ុណ្ណា»។
ជុំវិញរឿងនេះវិទ្យុអាស៊ីសេរីមិនអាចសុំការឆ្លើយតប ពីអ្នកនាំពាក្យក្រសួងសុខាភិបាល អ្នកស្រីវេជ្ជបណ្ឌិត ឱ វណ្ណឌីន បានទេនៅថ្ងៃទី០១ ខែធ្នូ។ ទោះយ៉ាងណា សារព័ត៌មានក្នុងស្រុកចុះផ្សាយថ្ងៃទី០១ ខែធ្នូ ថា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ព្រមានមន្ទីរពេទ្យឯកជននោះថា ច្បាប់នឹងមិនលើកលែងទោសនោះទេ។ លោក ម៉ម ប៊ុនហេង លើកឡើងដូច្នេះ ក្នុងពេលលោកចុះទៅសួរសុខទុក្ខ ស្ត្រីរងគ្រោះនៅមន្ទីរពេទ្យកាល់ម៉ែត។
ស្ត្រីជាកម្មកររោងចក្រ ឈ្មោះ ឈាង ស្រីអូន អាយុ២២ឆ្នាំ ប្រឈមនឹងគ្រោះថ្នាក់ដល់ជីវិត ក្រោយមន្ទីរសម្រាកព្យាបាលដើមអង្គ្រង បានរំលូតគភ៌ក្នុងផ្ទៃ ដោយពេលគ្រូពេទ្យវះកាត់ធ្វើ ឱ្យដាច់ពោះវៀន និងប៉ះពាល់ស្បូនស្ត្រីរូបនេះយ៉ាងធ្ងន់ធ្ងរ។ មុនឈានដល់ការរំលូតនេះ មន្ទីរសម្រាកព្យាបាលដើមអង្គ្រង រកឃើញថា កូនក្នុងពោះរបស់លោកស្រី ឈាង ស្រីអូន អាយុ១៨សប្ដាហ៍ ឬ៥ខែ បានស្លាប់ក្នុងស្បូន។
ប្រធានសហភាពសហជីពកម្ពុជា លោក រ៉ុង ឈុន យល់ថា ក្រសួងសុខាភិបាល ត្រូវពិនិត្យមើលឡើងវិញលើវិស័យនេះ។ លោកបន្តទៀតថា ក្រសួងសុខាភិបាល ត្រូវមានការពន្យល់លើរឿងនេះឱ្យបានច្បាស់លាស់ ព្រោះរឿងនេះទាក់ទងអាយុជីវិតពលរដ្ឋ។ មេដឹកនាំសហជីពរូបនេះ យល់ថា ស្ថាប័នពាក់ព័ន្ធគួរមានវិធានការតឹងរ៉ឹង លើមន្ទីរពេទ្យ និងគ្រូពេទ្យ ដែលធ្វេសប្រហែសនេះ។
លោក រ៉ុង ឈុន៖ «ពេទ្យហ្នឹងត្រូវចូលរួមចំណែកទទួលខុសត្រូវចំពោះច្បាប់ផង ទទួលខុសត្រូវចំពោះថ្លៃចំណាយហ្នឹងផង ហើយចំពោះសប្បុរសជនគាត់ជួយផ្ដល់អីហ្នឹង គឺជារឿងមួយដោយឡែកទៀត ប៉ុន្តែ ចំពោះមុខ រដ្ឋត្រូវតែមានការទទួលខុសត្រូវ ហើយពេទ្យហ្នឹងក៏ត្រូវមានការទទួលខុសត្រូវ»។
ទាក់ទងរឿងនេះ ក្រសួងសុខាភិបាលចេញសេចក្ដីប្រកាសព័ត៌មានឱ្យដឹងថា ករណីនេះជាការធ្វេសប្រហែសរបស់មន្ទីរសម្រាកព្យាបាលដើមអង្គ្រង(ព្រៃទទឹង)។ លិខិតរបស់ក្រសួងសុខាភិបាលចុះកាលពីថ្ងៃទី៣០ ខែវិច្ឆិកា ប៉ុន្តែ ទើបត្រូវបានផ្សព្វផ្សាយនៅថ្ងៃទី០១ ខែធ្នូ ឱ្យដឹងទៀតថា មន្ទីរសម្រាកព្យាបាលនេះ បានអនុញ្ញាតឱ្យឆ្មបដែលមិនទាន់ទទួលបានការបណ្ដុះបណ្ដាលពេញលេញស្ដីពីការរំលូតគភ៌ ធ្វើការរំលូតដែលនេះជាការអនុវត្តន៍ខុសបច្ចេកទេស និងគោលការណ៍ណែនាំរបស់ក្រសួងសុខាភិបាល។
ក្រោយរកឃើញបញ្ហានេះ ក្រសួងសុខាភិបាល សម្រេចបិទបណ្ដោះអាសន្នមន្ទីរសម្រាកព្យាបាលដើមអង្គ្រង ដើម្បីបន្តនីតិវិធី ស្រាវជ្រាវតាមច្បាប់លើមន្ទីរសម្រាកព្យាបាលនោះ។ ក្រសួងសុខាភិបាល ក៏តម្រូវឱ្យមន្ទីរសម្រាកព្យាបាលដើមអង្គ្រងនេះ ទទួលខុសត្រូវចំពោះមុខច្បាប់នូវការកំហុសរបស់ខ្លួននេះដែរ។
ចំណែក ពេទ្យឆ្មប ឈ្មោះ អ៊ុង ធារិន ដែលក្រសួងរកឃើញថា ជាអ្នករំលូតគភ៌នោះ ត្រូវដាក់ទណ្ឌកម្មមិនឱ្យប្រកបវិជ្ជាជីវៈជាឆ្មបរយៈពេល២ឆ្នាំ។ ទោះយ៉ាងណា ក្រសួងសុខាភិបាលមិនបញ្ជាក់ថា ឱ្យបានច្បាស់លាស់ ពីការធ្វេសប្រហែស នេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក