ពលរដ្ឋរស់នៅបាត់ដំបងបារម្ភពីសុខភាពដោយការបង្ហូរទឹកស្អុយចេញពីមន្ទីរពេទ្យខេត្តចូលស្ទឹងសង្កែ
2023.02.02
ស្ទឹងសង្កែ ត្រង់ចំណុចភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង កាលពីឆ្នាំ២០១៦។
RFA File
ប្រជាពលរដ្ឋភាគច្រើន ដែលរស់នៅតាមដងស្ទឹងសង្កែខេត្តបាត់ដំបង បារម្ភពីសុខភាពដោយសារតែការបង្ហូរទឹកស្អុយចេញពីមន្ទីរពេទ្យខេត្តចូលស្ទឹងសង្កែ ដោយគ្មានការចម្រោះឱ្យបានត្រឹមត្រូវ។ សកម្មជនបរិស្ថាននិងសង្គមស៊ីវិលថា អាជ្ញាធរពាក់ព័ន្ធគួរតែដោះស្រាយបញ្ហានេះជាបន្ទាន់។
ប្រជាពលរដ្ឋ និងសកម្មជនបរិស្ថានលើកឡើងថា បញ្ហាបង្ហូរទឹកស្អុយចូលស្ទឹងសង្កែខេត្តបាត់ដំបងប៉ះពាល់បរិស្ថាន និងសុខភាពប្រជាពលរដ្ឋ ដែលធ្វើកសិកម្ម និងការនេសាទត្រីនៅទីនោះជាញឹកញាប់។ ពួកគេបារម្ភថា បើសិនជាអាជ្ញាធរមិនបញ្ឈប់ការបង្ហូរទឹកស្អុយចូលស្ទឹងទេនោះ ធ្វើឱ្យពួកគាត់ពិបាកក្នុងការយកទឹកប្រើប្រាស់ប្រចាំថ្ងៃ ដូចជា ការស្រោចស្រពដំណាំ និងការចិញ្ចឹមជ្រូក មាន់ទា ជាដើម។
ពលរដ្ឋរស់នៅភូមិរំចេក១ សង្កាត់រតនៈ ក្រុងបាត់ដំបង លោក កែវ យឿន ដែលមានផ្ទះមិនឆ្ងាយពីស្ទឹងសង្កែនោះទេ លោកតែងតែប្រើប្រាស់ទឹកស្ទឹងមួយនេះជាប្រចាំ ប៉ុន្តែលោកមិនសូវចាប់អារម្មណ៍ពីផលប៉ះពាល់លើការបង្ហូរទឹកលូចេញពីមន្ទីរពេទ្យនោះទេ ដោយសារតែមិនយល់ដឹងពីផលប៉ះពាល់។ ទោះយ៉ាងណា លោកស្នើឱ្យអាជ្ញាធរពាក់ព័ន្ធគួរតែរៀបចំចម្រោះទឹកស្អុយឱ្យបានត្រឹមត្រូវមុនការបង្ហូរចូលស្ទឹង ដោយមិនគួរឱ្យមានការបង្ហូរទឹកស្អុយចូលស្ទឹងយ៉ាងអនាធិបតេយ្យដោយគ្មានការចម្រោះនោះទេ។
លោក កែវ យឿន៖ «មិនដឹងថាម៉េចទេ ប៉ុន្តែចង់ឱ្យ (អាជ្ញាធរ) រកកន្លែងណាបង្វែរទិស ទៅកន្លែងណាដែលឱ្យបានល្អទៅ[ការបង្ហូរទឹកល្អទៅកន្លែង»។
កាលពីឆ្នាំ២០២០ យុវជនស្ម័គ្រចិត្តស្រលាញ់បរិស្ថាន និងព្រះសង្ឃនៃចលនាមាតាធម្មជាតិធ្លាប់រិះគន់ថា ការបង្ហូរទឹកកខ្វក់ចេញពីមន្ទីរពេទ្យចូលស្ទឹងសង្កែខេត្តបាត់ដំបងនេះ មិនបានឆ្លងកាត់ការចម្រោះត្រឹមត្រូវនោះទេ។ សកម្មជនបរិស្ថានថា បញ្ហានេះនឹងធ្វើឲ្យប៉ះពាល់ដល់សុខភាពពលរដ្ឋធ្ងន់ធ្ងរ។ បើទោះបីជា យុវជនទាំងនេះ បានលើកឡើងអស់រយៈពេល ៤ឆ្នាំមកហើយក្ដី ក៏មិនឃើញមានអាជ្ញាធរដោះស្រាយបញ្ហានេះនៅឡើយ។
គេសង្កេតឃើញថា ក្រោយពីមានការរិះគន់ពីពលរដ្ឋមកលើអាជ្ញាធរ និងអ្នកគ្រប់គ្រង់មន្ទីរពេទ្យខេត្តជុំវិញ ការបង្ហូរទឹកស្អុយចូលស្ទឹងកន្លងទៅ បច្ចុប្បន្នខាងមន្ទីរពេទ្យបានឈប់បង្ហូរទឹកលូនៅពេលថ្ងៃ ប៉ុន្តែបែរជាបង្ហូរនៅពេលយប់វិញម្ដង។ បញ្ហាទឹកស្អុយដែលពោរពេញដោយមេរោគនេះ មានទាំងក្លិនស្អុយខ្លាំង ហើយសម្បូរដោយសំរាមប្លាស្ទិកអណ្ដែតតាមស្ទឹង ដែលធ្វើឱ្យត្រីមកស៊ីកាក់សំណល់ទាំងនោះ ស្របពេលដែលពលរដ្ឋមួយចំនួននាំគ្នានេសាទត្រីនៅទីនោះយកទៅបរិភោគប្រចាំថ្ងៃ ហើយគេបារម្ភថា ប្រជាពលរដ្ឋដែលបរិភោគត្រីទាំងនោះនឹងប៉ះពាល់សុខភាព។
ពលរដ្ឋម្នាក់ទៀត លោក វ៉ាន់ ប៊ុនធឿន រស់នៅភូមិរំចេក១ សង្កាត់រតនៈ ថ្លែងថា កន្លងទៅប្រជាពលរដ្ឋនៅសង្កាត់នេះបានស្នើឱ្យអាជ្ញាធរ និងអ្នកគ្រប់គ្រង់មន្ទីរពេទ្យបញ្ឈប់បង្ហូរទឹកស្អុយចេញពីមន្ទីរពេទ្យចូលស្ទឹងម្ដងរួចមកហើយ ប៉ុន្តែអាជ្ញាធរមិនដោះស្រាយនោះទេ។ លោកថា បច្ចុប្បន្នពលរដ្ឋ រួមនឹងរូបលោក ដែលរស់នៅជាប់នឹងដងស្ទឹងសង្កែមិនសូវហ៊ានប្រើប្រាស់ទឹកស្ទឹងដូចមុនទេ ព្រោះទឹកមិនស្អាត ដូច្នេះលោកប្រើប្រាស់ទឹកសម្រាប់តែស្រោចដំណាំ និងចិញ្ចឹមជ្រូកជាដើម។
លោក វ៉ាន់ ប៊ុនធឿន៖ «ព្រួយបារម្ភដែរព្រោះរឿងនេះគ្រោះថ្នាក់បំផុតសម្រាប់ប្រជាពលរដ្ឋយើងដែលបងប្អូនយើងរស់នៅក្រោមមន្ទីរពេទ្យ [ក្បែរ] ខ្លាចលោគាត់ខូចសុខភាពដោយសារតែគាត់បង្ហូរ [កាក់សំណល់ពីពេទ្យ] មិនដឹងថា ទឹកអីខ្លះ ប៉ុន្តែដឹងថាទឹកមិនល្អ។ បើអាចសម្រួលបាន ចង់ឱ្យអាជ្ញាធរគាត់មានកន្លែងណាបង្ហូរទៅអាងស្ទះកន្លែងណាផ្សេងក្រៅពីបង្ហូរចូលក្នុងស្ទឹងសង្កែ»។
ពលរដ្ឋរាប់ពាន់គ្រួសារដែលរស់នៅជុំវិញស្ទឹងមួយនេះ កំពុងប្រើប្រាស់ទឹកស្ទឹង ដើម្បីស្រោចស្រព បន្លែ ហើយពួកគាត់យកបន្លែទាំងនោះទៅលក់នៅទីផ្សារ ដូចជាបន្ថែត្រកួន ត្រសក់ ម្ទេស និងស្ពៃជាដើម។
វិទ្យុអាស៊ីសេរីមិនអាចទាក់ទងអភិបាលខេត្តបាត់ដំបង លោក សុខ លូ និងអនុប្រធានមន្ទីរសុខាភិបាល លោក ស៊ូ សានិត ដើម្បីបកស្រាយជុំវិញរឿងនេះបានទេនៅថ្ងៃទី១ ខែកុម្ភៈ ដោយហៅទូរស័ព្ទចូលជាច្រើនដងតែគ្មានអ្នកទទួល។
ដោយឡែក ជំទប់ទី២ ឃុំព្រែកនរិន្ទ ស្រុកឯកភ្នំ ខេត្តបាត់ដំបងលោក សុខ សុភ័ក្ដិ បានអះអាងថា ប្រជាកសិកររាប់ម៉ឺនគ្រួសារនៅក្នុងស្រុកឯកភ្នំ ពឹងអាស្រ័យលើទឹកស្ទឹងសង្កែទាំងស្រុងសម្រាប់ធ្វើកសិកម្ម ទាំងរដូវប្រាំង និងវស្សា ស្ទើរតែមិនមានទឹកគ្រប់គ្រាន់យកមកប្រើប្រាស់។ ដូច្នេះលោកបារម្ភពីការបង្ហូរទឹកស្អុយចូលស្ទឹងសង្កែនេះ អាចបង្កផលប៉ះពាល់ដល់ពលរដ្ឋដែលនៅខាងក្រោមដងស្ទឹង។
លោក សុខ សុភ័ក្ដិ៖ «ខ្ញុំបារម្ភលូទឹកស្អុយបង្ហូរមកស្ទឹងសង្កែហ្នឹង ដោយសារតែនៅស្ទឹងសង្កែហ្នឹងប្រជាពលរដ្ឋរាប់លាននាក់អាស្រ័យផល ហើយប្រើប្រាស់នៅហ្នឹង។ ពីមុនឮសូរថាបង្វែងទៅខាងណេះ ខាងណោះម្ដងទៅហើយ ប៉ុន្តែអាការបង្វែងនោះហាក់ដូចគ្មានប្រសិទ្ធភាពអ្វីទេ។ ឃើញតែហូរមកតែស្ទឹងសង្កែដដែល ហូរតាមលូ អ៊ីចឹងហើយសូមសំណូមពររដ្ឋបាលខេត្ត ឬស្ថាប័នដែលពាក់ព័ន្ធជាពិសេសក្រសួងបរិស្ថានមេត្តាពិនិត្យឡើងវិញដើម្បីជួយដល់សុខុមាលភាពប្រជាពលរដ្ឋ»។
នៅក្នុងវីដេអូខ្លីរបស់ក្រុមយុវជនមាតាធម្មជាតិបានបង្ហាញកាលឆ្នាំ២០២០ ថា ទឹកលូដែលចេញពីមន្ទីរពេទ្យនេះ ពួកគេបានយកទៅធ្វើពិសោធន៍នៅវិទ្យាស្ថានប៉ាស្ទ័រ ដែលលទ្ធផលបង្ហាញថា មានបាក់តេរី និងមេរោគជាច្រើន ហើយអ្វីដែលគួរឲ្យព្រួយបារម្ភផងនោះទឹកនេះបានហូរទៅកាន់ស្រែចម្ការដែលជាកត្តា បង្កហានិភ័យដល់ប្រជាកសិករនៅទីនោះ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី សង្កេតឃើញថា បញ្ហាការបង្ហូរទឹកស្អុយចូលស្ទឹងសង្កែនេះ មានមកជាយូរហើយ ប៉ុន្តែអាជ្ញាធរមិនមានវិធានការដោះស្រាយនោះទេ លោកទទូចឱ្យអាជ្ញាធរគួរតែទប់ស្កាត់ ដោយបណ្ដោះទឹកស្អុយទាំងនោះទៅកន្លែងចម្រោះ និងកន្លែងមានសុវត្ថិភាពដែលមិនបង្កគ្រោះថ្នាក់ដល់ប្រជាពលរដ្ឋ និងតំបន់ទេសចរណ៍តាមដងស្ទឹង។
លោក យិន ម៉េងលី៖ «កាលណាបើមានប៉ះពាល់ដល់សុខភាពរបស់ពួកគាត់ ហើយបើសិនជាក្លាយជាមានជំងឺដង្កាត់អ្វីមួយឡើង វាធ្វើឱ្យប៉ះពាល់ដល់សេដ្ឋកិច្ចរបស់គាត់ ព្រោះគាត់ត្រូវចំណាយលុយទិញថ្នាំពេទ្យ ចំណាយលុយទៅពេទ្យ ហ្នឹងធ្វើឱ្យកាន់តែជីវភាពរបស់គាត់ប្រឈមមួយកម្រិតទៀត។ អ៊ីចឹងអាជ្ញាធរគប្បីតែធ្វើការរំដោះទឹកហ្នឹងវិញ បង្វែរទឹកស្អុយ ទឹកស្អុយដែលហូរចូលស្ទឹងសង្កែ ទៅរកមុខទឹកផ្សេង ទៅរកវាល់ស្រែផ្សេងទៀត»។
ចំណែកសកម្មជនបរិស្ថាននៃចលនាមេត្តាធម្មជាតិ ដែលធ្លាប់ចេញវីដេអូទាមទារឱ្យអាជ្ញាធរខេត្តបាត់ដំបងទប់ស្កាតការបង្ហូរទឹកលូចេញពីមន្ទីរពេទ្យកាលឆ្នាំ២០២០ លោក លី ចាន់ដារ៉ាវុធ មានប្រសាសន៍ថា បញ្ហានេះមិនពិបាកទប់ស្កាត់នោះទេ បើសិនជាអាជ្ញាធរពាក់ព័ន្ធចង់ដោះស្រាយ។ លោកកត់សម្គាល់ថា ការដែលដោះស្រាយមិនចេញដោយសារអាជ្ញាធរគ្មានឆន្ទៈដោះស្រាយ និងកិបកេងប្រវ័ញ្ចលុយរដ្ឋទៅប្រើប្រាស់ខុសគោលដៅ។
លោក លី ចាន់ដារ៉ាវុធ៖ «ទី១ ខ្ញុំអាចនិយាយថា ជាកត្តាឆន្ទៈ ដែលយើងមិនដែលឃើញគេមានឆន្ទៈក្នុងសាងសង់ប្រព័ន្ធចម្រោះទឹកស្អុយមួយដែលវាមានសមត្ថភាពគ្រប់គ្រាន់ក្នុងការចម្រោះទឹកហ្នឹង ហើយមិនមែនតែខេត្តបាត់ដំបងទេខេត្តផ្សេងៗ ក៏មានដែរ។ ទី២ ខ្ញុំយល់ថា អាចមកពីកត្តាអំពើពុករលួយដែរ ខ្ញុំឃើញថាការចាយថវិកាកន្លងមក យើងឆ្ងល់ដែរនៅពេលទម្លាក់ថវិការាប់ ម៉ឺនដុល្លារទៅតាមខេត្តនីមួយៗ ហ្នឹង ប៉ុន្តែយើងឃើញថា មិនមានការសាងសង់ប្រព័ន្ធចម្រោះទឹក បើទោះបីជាខេត្តមួយចំនួនដែលជាខេត្តទេសចរណ៍ទទួលបានចំណូលរាប់លាន់ដុល្លារពីទេសចរណ៍ក៏ដោយ ទឹកស្អុយទៅតែបង្ហូរចូលទន្លេ ចូលសមុទ្រ និងស្ទឹង»។
នៅថ្ងៃទី២៤ ខែមករា កន្លងទៅនេះ អង្គភាពអ្នកនាំពាក្យរដ្ឋាភិបាលបានរៀបចំសន្និសីទសារព័ត៌មានស្ដីពី «ភាពជោគជ័យក្នុងរយៈពេលឆ្នាំកន្លងមក របស់រដ្ឋបាលខេត្តបាត់ដំបង» ហើយក្នុងនោះបានបង្ហាញថា ខេត្តមួយនេះបានជាប់ក្នុងបញ្ជី «បណ្ដាញទីក្រុងឆ្លាតអាស៊ាន» ដែលមានសណ្ដាប់ធ្នាប់ទីក្រុងល្អ ទាក់ទាញភ្ញៀវទេសចរណ៍ ហើយមានផែនការរៀបចំទីលានចាក់សំរាមដែលមានផ្ទៃដី២០,៨ហិតការ ដើម្បីគ្រប់គ្រងសំរាមឱ្យបានល្អនៅពេលអនាគត។ ប៉ុន្តែអាជ្ញាធរហាក់មិនឃើញមានផែនការរៀបចំការបង្ហូរទឹកស្អុយចេញពីទីក្រុងឱ្យបានត្រឹមនោះទេ។
ប្រជាពលរដ្ឋ និងសកម្មជនបរិស្ថានអះអាងស្រដៀងគ្នាថា បញ្ហាទឹកស្អុយ ឬការបង្ហូរទឹកលូដោយគ្មានការចម្រោះឱ្យបានត្រឹមត្រូវនេះបានកើតឡើងគ្រប់ទីកន្លែង ជាពិសេសតំបន់ទេសចរណ៍ដែលមានសមុទ្រ ទន្លេ និងស្ទឹងជាដើម។ ទោះជាយ៉ាងណា ពលរដ្ឋទទូចឱ្យអាជ្ញាធរពាក់ព័ន្ធពង្រឹងការអនុវត្តច្បាប់ និងការពារបរិស្ថានស្អាត ដើម្បីសុខុមាលភាពពលរដ្ឋ និងរក្សាទីក្រុងស្អាតដើម្បីទទួលប្រាក់ចំណូលតាមរយៈវិស័យទេសចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត