រដ្ឋាភិបាល​កម្ពុជា និង​យូនីសេ​ហ្វ ខិតខំ​ពន្លឿន​ការ​ប្រឹងប្រែង​ដើម្បី​បញ្ចប់​ភាពស្គម​ស្គាំង​របស់​កុមារ

ដោយ ម៉ៅ សុធានី
2022.10.19
Share on WhatsApp
Share on WhatsApp

រដ្ឋាភិបាល​កម្ពុជា និង​អង្គការ​យូនីសេហ្វ (UNICEF) ប្ដេជ្ញា​ពន្លឿន​ការ​ប្រឹងប្រែង​ដើម្បី​បញ្ចប់​ភាពស្គម​ស្គាំង​របស់​កុមារ​នៅ​កម្ពុជា ឲ្យ​បាន​ពាក់​កណ្តាល​ត្រឹម​ឆ្នាំ​២០២៥។ បញ្ហា​ស្គមស្គាំង​របស់​កុមារ​កាន់​តែ​មាន​សភាព​ធ្ងន់ធ្ងរ​ឡើងៗ ដែល​តម្រូវ​ឲ្យ​រដ្ឋាភិបាល​ចាំបាច់​ត្រូវ​ពិនិត្យ និង​ដោះស្រាយ​ជា​បន្ទាន់។

សេចក្តី​ប្រកាស​ព័ត៌មាន​នៅ​ថ្ងៃទី​១៨ ខែតុលា ឲ្យ​ដឹង​ថា ទោះបី​ជា​មាន​វឌ្ឍនភាព​ក្នុង​ការ​កាត់បន្ថយ​ភាព​ក្រិស​ក្រិន​តាំងពី​ឆ្នាំ​២០១៤ ក៏ដោយ ក៏​ភាពស្គម​ស្គាំង​របស់​កុមារ​នៅតែ​មិន​មាន​ភាព​ល្អ​ប្រសើរ​នោះ​ឡើយ គឺ​នៅ​មាន​កម្រិត ១០% បើ​យោង​តាម​លទ្ធផល​បឋម​នៃ​ការអង្កេត​ប្រជាសាស្ត្រ និង​សុខភាព​កម្ពុជា​ឆ្នាំ​២០២១​។ ផល​ប៉ះពាល់​ធ្ងន់ធ្ងរ​ដល់​កុមារ​ទាំងនោះ បណ្តាល​មក​ពី​ការ​រាតត្បាត​នៃ​ជំងឺ​កូវីដ​-១៩ វិបត្តិ​នៅ​អ៊ុយក្រែន និង​អតិផរណា​ឬ​ការ​ឡើង​ថ្លៃ​ទំនិញ​សព្វសារពើ។

កុមារ​មាន​បញ្ហា​ស្គមស្គាំង បណ្តាល​មក​ពី​បញ្ហា​កង្វះ​អាហារូបត្ថម្ភ​ស្រួចស្រាល់ អាច​មាន​ហានីភ័យ​ខ្ពស់​រហូត​ដល់​បាត់បង់​ជីវិត ដល់​ទៅ ១១ ដង ច្រើនជាង​កុមារ​ដែល​មាន​អាហារូបត្ថម្ភ​គ្រប់គ្រាន់ និង​ជារឿយៗ​កុមារ​ស្គមស្គាំង​ទាំងនោះ រង​ផលវិបាក​ពេញ​មួយ​ជីវិត​របស់​ពួកគេ។

ថ្លែង​ក្នុង​សិក្ខាសាលា​ក្រោម​ប្រធានបទ «​ធ្វើការ​រួមគ្នា​ដើម្បី​បញ្ចប់​ភាពស្គម​ស្គាំង​របស់​កុមារ​» ប្រធាន​ស្តីទី​យូនីសេហ្វ​ប្រចាំ​កម្ពុជា លោក​បណ្ឌិត អានៀរបាន ឆាតឺរជី (Dr. Anirban Chatterjee) សង្កត់ធ្ងន់​ថា សិទ្ធិ​ទទួល​បានការ​ធំ​លូតលាស់ និង​អភិវឌ្ឍន៍ គឺជា​សិទ្ធិ​មូលដ្ឋាន​របស់​កុមារ​។ លោក​បន្ត​ថា ចាប់ពី​មាន​ជំងឺ​រាតត្បាត​សកល​កូវីដ​១៩​មក កុមារ​ប្រឈម​ផលវិបាក​ជាច្រើន​រួមមាន កង្វះ​អាហារូបត្ថម្ភ សមត្ថភាព​ការ​សិក្សា និង​ផល​ប៉ះពាល់​ដល់​អនាគត​របស់​កុមារ។

សិក្ខាសាលា​នេះ មាន​គោលដៅ​ពន្លឿន​វឌ្ឍនភាព​របស់​កម្ពុជា តាមរយៈ​ការ​វិនិយោគ​បន្ថែម ពី​រដ្ឋាភិបាល និង​ដៃគូ​ពាក់ព័ន្ធ ក្នុង​បេសកកម្ម​រួមគ្នា ដើម្បី​បញ្ចប់​ភាពស្គម​ស្គាំង​របស់​កុមារ ដែល​ត្រូវការ​ថវិកា​បន្ថែម ចំនួន​ជាង ១៧​លាន​ដុល្លារ អាមេរិក (១៧,)

ការ​អង្កេត​ស្រាវជ្រាវ​មួយ​នៅ​កម្ពុជា ដែល​ធ្វើឡើង​ដោយ​យូនីសេហ្វ កម្មវិធី​ស្បៀងអាហារ​ពិភពលោក និង​ដៃគូ​ផ្សេងទៀត​បង្ហាញថា ចាប់ពី​ខែសីហា ឆ្នាំ​២០២០ ដល់​ខែកក្កដា ឆ្នាំ​២០២១ គេ​បាន​រក​ឃើញ​ថា កុមារ​ម្នាក់​ក្នុងចំណោម ៣ នាក់ មាន​បញ្ហា​ក្រិស​ក្រិន និង​ម្នាក់​ក្នុងចំណោម ១០ នាក់ ស្គមស្គាំង ហើយ​កុមារ​អាយុ​ក្រោម ៥ ឆ្នាំ ត្រឹមតែ ៣៥% ប៉ុណ្ណោះ ដែល​ទទួលទាន​អាហារ​ក្នុង​កម្រិត​អប្បបរមា​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។