ពលរដ្ឋ​មួយ​ចំនួន​បារម្ភ​​​ខ្លាច​ឆ្លង​ជំងឺ​អុតស្វា ក្រោយ​ពី​ក្រសួង​សុខាភិបាល​ឃាត់​ខ្លួន​​ជន​បរទេស​សង្ស័យ​​ឆ្លង​ជំងឺ​នេះម្នាក់

ដោយ ឡេង ម៉ាលី
2022.07.26
Share on WhatsApp
Share on WhatsApp
ពលរដ្ឋ​មួយ​ចំនួន​បារម្ភ​​​ខ្លាច​ឆ្លង​ជំងឺ​អុតស្វា ក្រោយ​ពី​ក្រសួង​សុខាភិបាល​ឃាត់​ខ្លួន​​ជន​បរទេស​សង្ស័យ​​ឆ្លង​ជំងឺ​នេះម្នាក់ ប័ណ្ណផ្សព្វផ្សាយរបស់​នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល ស្ដីអំពីជំងឺអតុស្វា (Monkeypox).
នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល

ប្រជាពលរដ្ឋ​មួយ​ចំនួន​ព្រួយបារម្ភ​ពី​សុវត្ថិភាព​សមាជិក​គ្រួសារ និង​ជីវភាព​រស់នៅ​ប្រចាំថ្ងៃ​របស់​ពួក​គាត់ បើ​សិន​ជំងឺ​អុតស្វា រីក​រាល​ដាល​នៅ​កម្ពុជា។ ក្ដី​កង្វល់​របស់​ប្រជាពលរដ្ឋ​បែប​នេះ កើត​ឡើង​បន្ទាប់​ពី​ជនជាតិ​នីហ្សេរីយ៉ា​ម្នាក់​ត្រូវ​បាន​ក្រសួង​សុខាភិបាល​ចាប់​ខ្លួន​ដោយ​សង្ស័យ​ថា បាន​ឆ្លង​ជំងឺ​អុតស្វា​អាហ្វ្រិក (Monkeypox) កំពុងស្នាក់នៅ​កម្ពុជា។ មន្ត្រី​សង្គម​ស៊ីវិល​ថា  រដ្ឋាភិបាល​ត្រូវ​រឹត​បន្តឹង និង​ទប់​ស្កាត់​នៅ​ការ​ឆ្លង​ដែន​ចេញ​ចូល​នៅ​តាម​ព្រំដែន និង​យក​ចិត្ត​ទុក​ដាក់​ខ្ពស់​តាម​ដាន​បញ្ហា​ជំងឺ​អុតស្វា​នេះ ។

ប្រជាពលរដ្ឋ និង​មន្ត្រី​សង្គម​ស៊ីវិល​ព្រួយបារម្ភ​ថា បញ្ហា​អ្នក​ជំងឺ​អុតស្វា​ជន​ជាតិ​នីហ្សេរីយ៉ា​ចូល​កម្ពុជា​ឆ្លងដែន​ចូល​មក​កម្ពុជា និង​ធ្វើ​ឱ្យ​ប៉ះពាល់​ដល់​វិស័យ​ទេសចរណ៍  សេដ្ឋកិច្ច និង​ការ​រស់នៅ​របស់​ពលរដ្ឋ​ថែម​ទៀត។ ពលរដ្ឋ​យល់​ថា វិបត្តិកូវីត១៩ ទើប​ធូរ​ស្រាល ក៏​ចូល​ដល់​វិបត្តិ​ប្រេង និង​ទំនិញ​លើ​ទីផ្សារ​មាន​តម្លៃ​ថ្លៃ ប្រសិន​បើ​មាន​ការ​ផ្ទុះ​នូវ​ជំងឺ​អុតស្វា​នេះ​ទៀត គឺ​ពួក​គាត់ និង​ប្រឈម​ជីវភាព​ខ្វះខាត​កាន់​តែ​ធ្ងន់ធ្ងរ។ ពួកគាត់​ស្នើ​ដល់​រដ្ឋាភិបាល និង​ក្រសួង​សុខាភិបាល​មាន​ចំណាត់​ការ​ឱ្យ​បាន​ម៉ឺងម៉ាត់ ក្នុង​ការ​ទប់ស្កាត់​ឱ្យ​មាន​ប្រសិទ្ធភាព ចំពោះ​បញ្ហា​នេះ។

ពលរដ្ឋ​ម្នាក់​រស់នៅ​ក្រុងប៉ោយប៉ែត ខេត្តបន្ទាយមានជ័យ លោក ឆៃ ថន ថ្លែង​ ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៥ កក្កដា​ថា លោក និងគ្រួសារទើបបានងើបរួចពីទុក្ខលំបាកក្រោយពីកូវីត១៩ និង​ទើប​មាន​ការ​បើក​ច្រក​ព្រំដែន​អន្តរជាតិ​ប៉ោយប៉ែត​បាន ២ខែ ឥឡូវ​ក្រសួង​សុខាភិបាល​បាន​រក​ឃើញ អ្នក​ជំងឺ​អុតស្វាយ (Monkeypox) ម្នាក់​នៅ​រាជធានី​ភ្នំពេញ គឺ​លោក​ព្រួយ​បារម្ភ​ជា​ខ្លាំង។ លោក​បន្ត​ថា លោក​ព្រួយ​បារម្ភ​ទៅ​លើ​សុវត្ថិភាព​គ្រួសារ​ផង និង​បញ្ហា​រស់​នៅ​ប្រចាំ​ថ្ងៃ​បើ​មាន​អ្វី​ប្រែប្រួល ដោយ​ការ​ឆ្លង​ជំងឺ​នេះ។

ស្រដៀង​គ្នា​នេះ​ដែរ ពលរដ្ឋ​ម្នាក់ទៀត​រស់​ជា​អ្នក​រត់​រ៉ឺម៉ក​នៅ​ខេត្ត​កំពង់ស្ពឺ លោក ថៃ សុផាត ថ្លែង​ថា ក្រោយ​កូវីដ១៩ ប្រទេស​មិន​ទាន់​ដំណើរ​ការ​ស្រួល ហើយ​តម្លៃ​ប្រេង​សាំង និង​ទំនិញ​នៅ​លើ​ទីផ្សារ​មាន​តម្លៃ​ខ្ពស់ ធ្វើ​ឱ្យ​លោក និង​ពលរដ្ឋ​ដទៃ​ទៀត​ជួប​នូវ​បញ្ហា​ប្រឈម​ជីវភាព​ប្រចាំ​ថ្ងៃ​សឹង​តែ​គ្រប់​គ្នា។ លោក ថៃ សុផាត បន្ត​ថា លោក​ព្រួយ​បារម្ភ​ច្រើន ព្រោះ​លោក​ប្រកប​មុខ​របរ​បែប​នេះ គឺ​ជួប​ជាមួយ​មនុស្ស​ធ្វើ​ដំណើរ​ជា​ច្រើន និង​មិន​អាច​កំណត់​អត្តសញ្ញាណ​ថា អ្នក​ណា​មាន​ជំងឺ​អ្វី​ឡើយ។ លោក បន្ថែម​ថា កត្តា​ជីវភាព គឺ​ទោះ​ចង់ ឬ​មិន​ចង់ ក៏​ត្រូវ​តែ​ធ្វើ ដើម្បី​ការ​រស់​នៅ​ប្រចាំ​ថ្ងៃ៖ «បើ​សិន​ជា​មាន​ការ​ផ្ទុះ​ឡើង​នូវ​ជំងឺ​ហ្នឹង នៅ​ប្រទេស​កម្ពុជា​មែន វា​ជា​ទុក្ខ​កង្វល់​ធំ​ណាស់ សម្រាប់​ខ្ញុំ មិន​មែន​តែ​ខ្ញុំ​ម្នាក់​ទេ គឺ​ពលរដ្ឋ​ខ្មែរ ក៏​ដូច​ជា កម្មករ​ខ្មែរ​ទាំង​អស់​ហ្នឹង គឺ​គាត់​មាន​ការ​លំបាក​ខ្លាំង​ណាស់។ យើង​ឃើញ​ថា រយៈ​ពេល​កន្លង​មក នៅ​ក្នុង​ការ​បិទ​ប្រទេស នៅ​ក្នុង​គ្រា​មាន​អាសន្ន​ដោយ​សារ​ជំងឺ​កូវីដ១៩ ហ្នឹង គឺ​ធ្វើ​ឱ្យ​ពួក​ខ្ញុំ​ទាំង​អស់​គ្នា​ហ្នឹង ដែល​ជា​កម្មករ​ក្រៅ​ប្រព័ន្ធ ក៏​ដូច​ជា ពលរដ្ឋ​មួយ​ចំនួន​ហ្នឹង ស្ទើរ​តែ​ដាច់​ខ្យល់​ម្តងៗ ទៅ​ហើយ ដោយសារ​យើង​អត់​អាច​រក​ចំណូល​បាន ហើយ​យើង​ត្រូវ​ចំណាយ​ច្រើន។ ទោះ​ជា​មិន​មាន​ការ​បិទ​ប្រទេស​ក៏​ដោយ យើង​គិត​ថា ប្រជាពលរដ្ឋ​គាត់​ខ្លាច​ក្នុង​ការ​ដើរ​ហើរ អ៊ីចឹង​កម្មវិធី​អ្វី​ផ្សេងៗ ត្រូវ​បាន​បិទ។ ដូច​ពី​មុន សម្រាប់​ខ្ញុំ​ដែល​ជា​កម្មករ​ក្រៅ​ប្រព័ន្ធ ក៏ដូចជា​កម្មករ​ទូទៅ អាច​ប្រឈម​បញ្ហា​ខ្លាំង។ យើង​ឃើញ​ថា​ឥឡូវ​ហ្នឹង សាំង​ឡើង​ថ្លៃ ទំនិញ​ផ្សេងៗ ក៏​ឡើង​ថ្លៃ រាល់​ថ្ងៃ​ហ្នឹង​រក​សឹងតែ​មួយ​ថ្ងៃ មិន​គ្រប់ និង​មួយ​ថ្ងៃ​ផង ពេលខ្លះ​ទៅ​ចំណាយ​ខ្ពស់​ជាង​ចំណូល​ទៀត វា​ធ្វើ​ឱ្យ​ពិបាក»

ដោយឡែក ពលរដ្ឋ​ដែល​ជា​អ្នក​រត់​កង់​បី​នៅ​ខេត្ត​កំពត លោក មាស វាសនា ​ឯណោះ​វិញ លោក ប្រាប់​វិទ្យុ​អាស៊ី​សេរី​ថា លោក​មាន​ការ​បារម្ភ​ខ្លាំង ព្រោះ​សេដ្ឋកិច្ច​គ្រួសារ​លោក​សព្វថ្ងៃ សឹងតែ​មិន​គ្រប់​សម្រាប់​ការ​ហូប​ចុក​ប្រចាំ​ថ្ងៃ​ទេ។ លោក​បារម្ភ​ថា ប្រសិនបើ​រដ្ឋាភិបាល បិទ​ប្រទេស​ទៀត​នឹង​ធ្វើ​ឱ្យ​គ្រួសារ​លោក​កាន់​តែ​មាន​ជីវភាព​ដុនដាប៖ «បាទ​បារម្ភ​ខ្លាំង​បង! សាំង​ក៏​ឡើង​ថ្លៃ ឥឡូវ ធ្លាប់​បាន ៤ម៉ឺន​រៀល ៥ម៉ឺន​រៀល ដល់​ឥឡូវ​បាន​តែ ២ម៉ឺន​រៀល ទិញ​ម្ហូប​អស់ ១ម៉ឺន​រៀល ព្រួយ​បារម្ភ​ខ្លាំង មិន​ដឹង​ដោះ​ស្រាយ​តាម​វិធី​ណា​ទេ​បង។ អ្នក​ប្រកប​មុខ​របរ​កង់​បី​ដូច​ខ្ញុំ​ហ្នឹង នៅ​ក្រៅ​ប្រព័ន្ធ អត់​មាន​ប្រាក់ខែ អត់​មាន​ប្រាក់​អ្វី សង្ឃឹម​លើ​ជីវភាព​រត់​កង់​បី​អ៊ីចឹង​ ហើយ​ដល់​ពេល​អុតស្វា​មួយ​សា​ទៀត គេ​បិទ​មួយ​សារ​ទៀត ច្បាស់​ជា​ដាច់​ខ្យល់​ហើយ ឆ្នាំង​បាយ​ផ្កាប់​ហើយ​បង​អើយ។ បាទ​បើ​បិទ​ខ្ទប់​ទៀត គឺ​និយាយ​ឱ្យ​ចំ​គឺ ដូច​មនុស្ស​ជាប់​គុក ហើយ​មនុស្ស​អត់​បាយ​ហូប​អ៊ីចឹង​បង ព្រោះ​រាល់​ថ្ងៃ​រក​បាន​តក់ៗ​គ្រាន់​ចិញ្ចឹម​ក្រពះ»

ក្ដី​បារម្ភ​របស់​ប្រជាពលរដ្ឋ​នេះ ធ្វើ​ឡើង​បន្ទាប់​ពី​ក្រសួង​សុខាភិបាល​ឃាត់ខ្លួន​ជន​បរទេស​ម្នាក់ កាល​ពី​ថ្ងៃ​ទី២៣ កក្កដា ដោយ​សង្ស័យ​ថា ឆ្លង​ជំងឺ​អុតស្វា​អាហ្វ្រិក (Monkeypox)

រដ្ឋលេខាធិការ​ក្រសួង​សុខាភិបាល អ្នកស្រី ឱ វណ្ណឌីន បាន​ចេញ​វីឌីអូ​បញ្ជាក់​ពី​ស្ថានភាព​ជំងឺ​របស់​ជន​ជាតិ​នីហ្សេរីយ៉ា (Nigeria) ថា មាន​សភាព​ធម្មតា និង​ទទួល​បាន​ការ​ថែទាំ និង​យក​ចិត្ត​ទុក​ដាក់​ពី​ក្រុម​គ្រូ​ពេទ្យ។ អ្នកស្រី  ឱ វណ្ណឌីន អះអាង​ថា ចំពោះ​អ្នក​ដែល​បាន​ប៉ះពាល់​ជាមួយ​អ្នក​ជំងឺ​ចំនួន ៥ នាក់ ត្រូវ​បាន​ស្នាក់នៅ​ដាច់​ដោយ​ឡែក​នៅ​គេហដ្ឋាន​របស់​ពួក​គាត់។ អ្នកស្រី ឱ វណ្ណឌីន បញ្ជាក់​ថា នៅ​ពេល​បុគ្គល​ណា ដែល​មិន​ទាន់​មាន​រោគ​សញ្ញា​ដូច​ការ​សង្ស័យ គឺ​មិន​ទាន់​មាន​តម្រូវការ​ធ្វើ​តេស្ត វិភាគ​នៅ​មន្ទីរ​ពិសោធន៍​ទេ និង​ឱ្យ​នៅ​ដាច់​ដោយ​ឡែក​ពី​ក្រុម​គ្រួសារ។ អ្នកស្រី​បញ្ជាក់​បន្ថែម​ថា ជំងឺ​អុតស្វា នេះ​គឺ​មិន​ឆ្លង ឆ្លង​លឿន​រហ័ស​ដូច ជំងឺ​កូវីដ១៩ នោះ​ទេ គឺ​ជំងឺ​កូវីដ​ឆ្លង​តាម​ផ្លូវ​ដង្ហើម ប៉ុន្តែ​ជំងឺ​អុតស្វា អាច​ឆ្លង​បាន​តាមរយៈ​ការ​ ប៉ះពាល់​ជាមួយ​អ្នក​ជំងឺ និង​ចៀសវាង​ប្រើប្រាស់​សម្ភារៈ​ជាមួយ​អ្នក​ជំងឺ ឬ​អ្នក​ដែល​សង្ស័យ​ឆ្លង​ជំងឺ​នេះ។

ជុំវិញ​រឿង​នេះ ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គឹមអេង យល់​ឃើញ​ថា លោក​សោក​ស្ដាយ ចំពោះ​ទង្វើ​របស់​ជនជាតិ​នីហ្សេរីយ៉ា រត់​គេច​ពី​ថៃ​ចូល​មក​កម្ពុជា​នេះ។ លោក​បន្ត​ថា ជំងឺ​អុតស្វា គឺ​ជា​ការ​ព្រួយ​បារម្ភ​មួយ និង​ត្រូវ​តាម​ដាន​យក​ចិត្ត​ទុក​ដាក់ ដើម្បី​ផ្តល់​ជា​ក្តី​សង្ឃឹម​ដល់​ពលរដ្ឋ ព្រោះ​ពួក​គាត់​ជួប​បញ្ហា​កន្លង​មក​ច្រើន ពាក់ព័ន្ធ​វិបត្តិ​កូវីដ១៩ បញ្ហា​សេដ្ឋកិច្ច និង​ទំនិញ​លើ​ទីផ្សារ​ឡើង​ថ្លៃ៖ «បើ​សិន​ជា​យើង​មិន​អាច​ទប់​ស្កាត់​បាន ធ្វើ​ឱ្យ​វា​មាន​បញ្ហា ឬ​ក៏​អាច និង​រីក​រាល​ដាល អា​ហ្នឹង គឺ​ជា​បញ្ហា​ធំ​ណាស់​បាទ។ ប្រទេស​កម្ពុជា គួរតែ​បង្កើន​ការ​គ្រប់គ្រង ការ​យាមកា​នៅ​តាម​ច្រក​ព្រំដែន​អោយ​បាន​តឹងរ៉ឹង កុំ​ឱ្យ​មាន​ការ​ចេញ​ចូល ឬ​ក៏​អាច​លួច​ចូល​បាន​ដោយ​ខុស​ច្បាប់ ឬ​ដោយ​ប្រការ​ណាមួយ ហើយ​ម្យ៉ាង​វិញ​ទៀត គួរតែ​មាន​ការ​រឹត​បន្តឹង​ផង​ដែរ កុំ​ឱ្យ​អាជ្ញាធរ ដែល​បុគ្គល​ខ្លះ ដែល​ជ្រៀត​ជ្រក​យក​តួនាទី​នោះ ដើម្បី​ពុក​រលួយ​នាំ​មនុស្ស​ចូល​ហូរហែ​ហ្នឹង គួរតែ​មាន​ការ​ចាត់​វិធានការ​ឱ្យ​តឹងរ៉ឹង​ដែរ​បាទ»

កន្លង​មក​ក្រសួង​សុខាភិបាល​បាន​ចេញ​សេចក្ដី​ប្រកាស​ព័ត៌មាន ក្រោយ​ពី​ទទួល​បាន​ដំណឹង​ក្រសួង​សុខាភិបាល​ថៃ អំពី​លទ្ធភាព​គេច​ខ្លួន​របស់​ជនជាតិ​នីហ្សេរីយ៉ា ដែល​មាន​ផ្ទុក​ជំងឺ​អុតស្វា (Monkeypox) ហើយ​បាន​ឆ្លងដែន​ចូល​មក​កម្ពុជា កាល​ពី​ថ្ងៃ​ទី២២ កក្កដា។ ក្រសួង​សុខាភិបាល និង​សមត្ថកិច្ច​ធ្វើ​ការ​ស្រាវជ្រាវ និង​ឃាត់​ខ្លួន​ជនជាតិ​នីហ្សេរីយ៉ា​ឈ្មោះ អូសម៉ុង ស៊ីហាហ្ស៊ីរីម (OSMOND CHIHAZARIM) នៅ​ខណ្ឌចំការមន រាជធានី​ភ្នំពេញ ថ្ងៃទី២៣ កក្កដា។ បច្ចុប្បន្ន អ្នក​ជំងឺ​នេះ​ត្រូវ​បាន​ដាក់​ឱ្យ​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ-សូវៀត ហើយ​ក្រសួង​អំពាវ​អោយ​អ្នក​ពាក់ព័ន្ធ​ជា​មួយ​ជន​ជាតិ​នីហ្សេរីយ៉ា​នេះ ដាក់​ខ្លួន​ដោយ​ឡែក និង​ស្វែង​រក​ការ​ពិនិត្យ​សុខភាព​ដែល​នៅ​ជិត ឬ​ទាក់ទង​ទៅ​កាន់​លេខ ១១៥។

កាលពីយប់ថ្ងៃទី២២ ខែកក្កដា ក្រសួង​សុខាភិបាល​ថៃ បាន​ប្រកាស​ពី​ការ​បាត់​ខ្លួន​អ្នក​ជំងឺ​នីហ្សេរីយ៉ា លោក អូសម៉ុង ស៊ីហាហ្ស៊ីរីម (OSMOND CHIHAZARIM) ជា​អ្នកទេសចរ ហើយ​បាន​ធ្វើ​រោគ​វិនិច្ឆ័យ​ឃើញ​មាន​វិជ្ជមាន​វីរុស​អុតស្វា (Monkeypox) ដោយ​គាត់​មាន​ប្រវត្តិ​ធ្វើ​ដំណើរ​នៅ​កោះ​ភូកេត (Phuket) ប្រទេស​ថៃ។

ជនជាតិ​នីហ្សេរីយ៉ា អូសម៉ុង ស៊ីហាហ្ស៊ីរីម (OSMOND CHIHAZARIM) បាន​លួច​ឆ្លងដែន​មក​កម្ពុជា តាម​ព្រំដែន​ខេត្តស្រះកែវ។ ទោះ​ជា​យ៉ាង​ណា​ក្ដី ពលរដ្ឋ និង​អង្គការ​សង្គម​ស៊ីវិល​ជំរុញ ដល់​អាជ្ញាធរ​ពាក់ព័ន្ធ​ឱ្យ​ពង្រឹង​ការ​ទប់​ស្កាត់ និង​អង្កេត​យ៉ាង​តឹងរ៉ឹង​នៅ​តាម​ព្រំដែន និង​កន្លែង​ដែល​អ្នក​ជំងឺ​បាន​ឆ្លង​កាត់ និង​ឈប់​សម្រាក​កំឡុង​ពេល​ឆ្លង​មក​កម្ពុជា ដើម្បី​ចៀសវាង​ការ​ឆ្លង​ក្នុង​សហគមន៍​បន្ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។