អាជ្ញាធរមណ្ឌលគិរីរារាំងពលរដ្ឋមិនឱ្យចូលរួមវគ្គបណ្ដុះបណ្ដាលរបស់សមាគមអាដហុក
2023.09.16
អ្នកសម្របសម្រួលសមាគមអាដហុក ខេត្តមណ្ឌលគិរី លោក ប៊ី វ៉ាន់នី ជួបមន្ត្រីប៉ុស្តិ៍ឃុំចុងផ្លាស់ ស្រុកកែវសីមា ខេត្តមណ្ឌលគិរី កាលពីថ្ងៃទី១៥ កញ្ញា ២០២៣។
Photo Provided
មន្ត្រីសមាគមការពារសិទ្ធិមនុស្សអាដហុក(ADHOC) ខេត្តមណ្ឌលគិរីថា ការរារាំងរបស់អាជ្ញាធរ ដែលមិនឲ្យបើកវគ្គបណ្ដុះបណ្ដាលពលរដ្ឋនៅតាមមូលដ្ឋាន ជាការរំលោភលើសិទ្ធិទទួលបានព័ត៌មានរបស់ពលរដ្ឋ និងបង្កការលំបាកដល់ការអនុវត្តគម្រោងផ្សេងៗ របស់អង្គការសង្គមស៊ីវិល។ ការលើកឡើងនេះ ក្រោយពីមេប៉ុស្តិ៍នគរបាលរដ្ឋបាលឃុំចុងផ្លាស់ ស្រុកកែវសីមា រារាំងមិនឲ្យមន្ត្រីសមាគមអាដហុក បើកវគ្គផ្សព្វផ្សាយស្តីពីការការពារ និងការទប់ស្កាត់ការរៀបការវ័យក្មេង ។
អ្នកសម្របសម្រួលសមាគមអាដហុក ខេត្តមណ្ឌលគិរី លោក ប៊ី វ៉ាន់នី មានប្រសាសន៍ថា មុនចុះបើកវគ្គផ្សព្វផ្សាយស្តីពីការការពារ និងការទប់ស្កាត់ការរៀបការវ័យក្មេងនៅភូមិអូរកាប៉ាយ ឃុំចុងផ្លាស់ ស្រុកកែវសីមា លោកបានទាក់ទងទៅជំទប់ទីមួយឃុំចុងផ្លាស់ រួចស្រេចទៅហើយ ។ក៏ប៉ុន្តែប្រជាការពារភូមិនៅតែរារាំងលោក និងសហការីមិនឲ្យអនុវត្តគម្រោងនេះ ដោយលើកឡើងថា មិនឱ្យប្រជាពលរដ្ឋចូលរួមជាមួយអង្គការអាដហុកទេ ព្រោះអង្គការអាដហុកជាអង្គការខុសច្បាប់ និងមិនមានការអនុញ្ញាតពីមេប៉ុស្តិ៍នគរបាលរដ្ឋបាលឃុំចុងផ្លាស់។
លោក ប៊ី វ៉ាន់នី៖ «ចង់និយាយថា អ្វីដែលយើងបានជូនដំណឹងទៅខាងជំទប់ទី១ អ្នកទទួលខុសត្រូវជំនួសមេឃុំហ្នឹង មេប៉ុស្តិ៍ប្រាប់ថា គាត់អត់បានប្រាប់ គាត់ប្រាប់មេប៉ុស្តិ៍អីចឹងទៅ។ ហើយអ៊ីចឹងហើយបានយើងឃើញ អត់មានទី១ យើងធ្វើការងារស្របទៅតាមច្បាប់ និងសេចក្ដីណែនាំរបស់ក្រសួងមហាផ្ទៃ នៅពេលអាជ្ញាធរមូលដ្ឋាន គាត់បែរជាធ្វើការងារទៅតាមបទបញ្ជាទៅវិញ គាត់អត់ធ្វើការងារគោរពទៅតាមច្បាប់ទេ»។
លោក ប៊ី វ៉ាន់នី បន្ថែម នៅពេលអាជ្ញាធររារាំងបែបនេះ គឺបណ្ដាលប៉ះពាល់ដល់ពេលវេលា ថវិកា និងលទ្ធផល នៃការអនុវត្តគម្រោងរបស់អង្គការសង្គមស៊ីវិល ដែលបានចុះបញ្ជីជាមួយក្រសួងមហាផ្ទៃ ជាពិសេសប៉ះពាល់ដល់សិទ្ធិសេរីភាពជាមូលដ្ឋានរបស់ពលរដ្ឋ។
លោក ប៊ី វ៉ាន់នី៖ «អ៊ីចឹងកាលណាគាត់ធ្វើបែបហ្នឹងគឺ ជាការរារាំង ឬក៏ការបង្អាក់ដំណើរក្នុងការអនុវត្តគម្រោងរបស់អង្គការ អ៊ិន ជី អូ(NGOសង្គមស៊ីវិល) ក៏ដូចជា អង្គការអាដហុកដែរ ហើយវាបានធ្វើឲ្យប៉ះពាល់ដល់សិទ្ធិប្រជាពលរដ្ឋក្នុងការចូលរួម សិទ្ធិជួបជុំ សិទ្ធិទទួលបានព័ត៌មានជាដើមហ្នឹងឯង។ អ៊ីចឹងការធ្វើបែបហ្នឹង គឺការគំរាមកំហែងទៅលើប្រជាពលរដ្ឋ»។
ការលើកឡើងនេះ ក្រោយពីប្រជាការពារភូមិអូរកាប៉ាយលោក យល់ នឿន កាលពីថ្ងៃទី១៥ កញ្ញា បានរារាំងពលរដ្ឋ មិនឲ្យចូលរួមវគ្គបណ្ដុះបណ្ដាល ស្ដីពីការការពារ និងការទប់ស្កាត់ការរៀបការវ័យក្មេង ដែលរៀបចំដោយសមាគមអាដហុក។ ការរារាំងនេះ ដោយអាជ្ញាធរចោទប្រកាន់ថា អង្គការអាដហុក ជាអង្គការខុសច្បាប់ ហើយមិនមានការអនុញ្ញាត និងមានការបញ្ជាពីមេប៉ុស្តិ៍នគរបាលរដ្ឋបាលឃុំចុងផ្លាស់។ លុះដល់រសៀលថ្ងៃដដែលនោះ អ្នកសម្របសម្រួលសមាគមអាដហុក លោក ប៊ី វ៉ាន់នី បានទៅជួបមេប៉ុស្តិ៍នគរបាលរដ្ឋបាលឃុំចុងផ្លាស់ លោក ចាន់ សុផារី ហើយបានបង្ហាញលិខិតទទួលស្គាល់សមាគមអាដហុក និងគម្រោង ដែលត្រូវបង្រៀនដល់ពលរដ្ឋ។ បន្ទាប់មក មេប៉ុស្តិ៍នគរបាលរដ្ឋបាលឃុំចុងផ្លាស់ ក៏បានឯកភាព និងប្រាប់ទៅពលរដ្ឋឲ្យពលរដ្ឋចូលរួមជាមួយសមាគមអាដហុកវិញ ដោយមេប៉ុស្តិ៍រូបនោះលើកឡើងថា មូលហេតុដែលរារាំងបែបនោះ គឺដើម្បីការពារសុវត្ថិភាពក្នុងមូលដ្ឋាន ហើយគាត់ក៏មិនបានទទួលព័ត៌មាននៃការអនុវត្តគម្រោងនេះ ពីមេឃុំចុងផ្លាស់។
វិទ្យុអាស៊ីសេរីនៅពុំទាន់អាចទាក់ទងមេប៉ុស្តិ៍នគរបាលរដ្ឋបាលឃុំចុងផ្លាស់លោក ចាន់ សុផារី ដើម្បីសុំការបកស្រាយបន្ថែមជុំវិញបញ្ហានេះ បាននៅឡើយទេ នៅថ្ងៃទី១៦ កញ្ញា។
បើទោះបីជាបែបនេះក្ដី អ្នកសម្របសម្រួលសមាគមអាដហុក លោក ប៊ី វ៉ាន់នី អះអាងថា អាជ្ញាធរនៅតែថតរូបលោក និងសហការីដដែល មុនពេលឲ្យពលរដ្ឋចូលរួមវគ្គបណ្ដុះបណ្ដាល។
មន្ត្រីអង្គការសង្គមស៊ីវិលរូបនេះ ទទូចឲ្យអាជ្ញាធររដ្ឋមន្ត្រីក្រសួងមហាផ្ទៃលោក ស សុខា ណែនាំដល់មន្ត្រីថ្នាក់ក្រោមជាតិ ឲ្យអនុវត្តតាមគោលការណ៍ច្បាប់ ដើម្បីឲ្យមន្ត្រីអង្គការសង្គមស៊ីវិល អនុវត្តគ្រោងរបស់ខ្លួនដោយគ្មានការរារាំង និងគ្មានការហាមឃាត់ពីអាជ្ញាធរមូលដ្ឋាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
សិទ្ធិមនុស្ស
