តុលាការបដិសេធបណ្ដឹងសុំនៅក្រៅឃុំរបស់អ្នកសារព័ត៌មានឯករាជ្យលោក ម៉ិច ដារ៉ា
2024.10.19
លោក មុិច ដារ៉ា អ្នកសារព័ត៌មានឯករាជ្យ ដែលជាប់ឃុំក្នុងពន្ធនាគារ។
រូប៖ ហ្វេសប៊ុកលោក ម៉ិច ដារ៉ា
សាលាដំបូងរាជធានីភ្នំពេញ ច្រានចោលសំណើសុំនៅក្រៅឃុំរបស់អ្នកសារព័ត៌មានឯករាជ្យលោក មុិច ដារ៉ា ទោះបីជាលោកកំពុងមានបញ្ហាសុខភាពក៏ដោយ។ សង្គមស៊ីវិលសោកស្ដាយ ហើយថា ការបន្តឃុំខ្លួនលោក ម៉ិច ដារ៉ា នេះ នឹងធ្វើឱ្យរដ្ឋាភិបាលរងការរិះគន់បន្ថែមទៀតពីសហគមន៍អន្តរជាតិ។
សហមេធាវីការពារក្ដីឱ្យលោក ម៉ិច ដារ៉ា គឺលោក រឹម បូរ៉ា ប្រាប់វិទ្យុអាស៊ីសេរី នៅថ្ងៃទី១៩ ខែតុលាថា លោកនឹងជួបពិភាក្សាជាមួយកូនក្ដីទៀត ទាក់ទងនឹងការ បដិសេធ របស់សាលាដំបូងរាជធានីភ្នំពេញកាលពីថ្ងៃទី១៨ ខែតុលា។
លោក រឹម បូរ៉ា៖ «ខ្ញុំអត់ដឹងថា គាត់លើកហេតុអី ដោយសារតែគាត់ព្យាយាមស្នើសុំដីកាសម្រេចគាត់អត់ឱ្យ គាត់ឱ្យតែលិខិតជូនដំណឹងមួយសន្លឹកមក។ អាហ្នឹងអ៊ីចឹង មិនដឹងគាត់សំអាងលើអីខាងចៅក្រមស៊ើបសួរ»។
ឯកអគ្គរាជទូតអូស្ត្រាលីប្រចាំនៅកម្ពុជាលោក ដឺរិក យីប (Derek Yip) បាន បង្ហោះសារនៅលើបណ្ដាញសង្គម អិច (X) កាលពីថ្ងៃទី១៨ ខែតុលា ថា ក្នុងជំនួបជាមួយលោក ហ៊ុន ម៉ាណែត ថ្មីៗ នេះ លោកបានពិភាក្សាអំពីទំនាក់ទំនងរវាងប្រទេសទាំងពីរ និងការអភិវឌ្ឍ ពាណិជ្ជកម្ម ការវិនិយោគ សិទ្ធិមនុស្ស សន្តិសុខ ក្នុងតំបន់ ព្រមទាំងកិច្ចសហប្រតិបត្តិការលើវិស័យការពារជាតិ និងការផ្លាស់ប្តូរថាមពល។
រីឯជំនួបជាមួយទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី វិញ ឯកអគ្គរាជទូតអូស្ត្រាលី ស្នើឱ្យមានការប្រកួតប្រជែង នយោបាយដោយសេរី សង្គមស៊ីវិលចម្រុះ និងប្រព័ន្ធផ្សព្វផ្សាយឯករាជ្យ ដែលមានសារសំខាន់ ចំពោះលទ្ធិប្រជាធិបតេយ្យ និងការអភិវឌ្ឍនៅកម្ពុជា។
ស្ថានទូតអូស្ត្រាលីសរសេរលើហ្វេសប៊ុក កាលពីថ្ងៃទី១៨ ខែតុលា ថា ក្នុងជំនួបនោះ លោក ដឺរិក យីប ក៏បានលើកពីកង្វល់លើលំហពលរដ្ឋកាន់តែរួមតូច ការចាប់ពិរុទ្ធ ការគាបសង្កត់ឆ្លងដែន និងការចាប់ខ្លួនអ្នកកាសែត លោក ម៉ិច ដារ៉ា។
កាលពីថ្ងៃទី១ ខែតុលា សាលាដំបូងរាជធានីភ្នំពេញបានចោទប្រកាន់លោក ម៉ិច ដារ៉ា ពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា ៤៩៤ និង៤៩៥ នៃក្រមព្រហ្មទណ្ឌ ចំពោះការបង្ហោះរូបភាពនៅលើបណ្ដាញសង្គមរបស់លោក។
ការចោទប្រកាន់ និងឃុំខ្លួនលោក ម៉ិច ដារ៉ា នេះ ធ្វើឡើងក្រោយពីរសប្ដាហ៍ ដែល សហរដ្ឋអាមេរិក បានដាក់ទណ្ឌកម្មបង្កកទ្រព្យសម្បត្តិលោក លី យ៉ុងផាត់ និង សម្ព័ន្ធអាជីវកម្មរបស់លោក ពាក់ព័ន្ធនឹងអំពើជួញដូរមនុស្ស និងពលកម្មដោយបង្ខំ ក្នុងជំនួញឆបោកតាមអនឡាញ និងរូបិយប័ណ្ណគ្រីបតូ (Cryptocurrency)។
ការខិតខំរបស់លោកចំពោះការរាយការណ៍ពីការជួយដូរមនុស្សត្រូវបាន ក្រសួងការបរទេសសហរដ្ឋអាមេរិកផ្ដល់ពាន ម្ចាស់ពានរង្វាន់ គឺ «ជាវីរបុរសរបាយការណ៍ពីការជួញដូរមនុស្សឆ្នាំ២០២៣ (2023 Trafficking in Persons Report Hero)។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ (LICAHDO) លោក អំ សំអាត សោកស្ដាយចំពោះការសម្រេចរបស់សាលាដំបូងរាជធានីភ្នំពេញ ដែលមិនអនុញ្ញាតឱ្យលោក ម៉ិច ដារ៉ា នៅក្រៅឃុំបណ្ដោះអាសន្ន ខណៈលោក ម៉ិច ដារ៉ា កំពុងមានបញ្ហាសុខភាពផ្លូវកាយនិងផ្លូវ ចិត្ត។ លោកថា ការចាប់ និងឃុំខ្លួនលោក ម៉ិច ដារ៉ា នេះ មិនបានចំណេញអ្វីឡើយ ផ្ទុយទៅវិញ មានតែធ្វើឱ្យរដ្ឋាភិបាលរងការរិះគន់ពីសហគមន៍ជាតិ និងអន្តរជាតិ បន្ថែមទៀត។
លោក អំ សំអាត៖«បញ្ហាសុខភាពផ្លូវកាយផ្លូវចិត្តរបស់លោក ម៉ិច ដារ៉ា គាត់មានតាំងពីមិនទាន់ជាប់ពន្ធនាគារទៀត។ ការជាប់ពន្ធនាគារនេះបន្ថែមឱ្យសុខភាពផ្លូវកាយផ្លូវចិត្តរបស់គាត់កាន់តែធ្ងន់ធ្ងរបន្ថែមទៅទៀត។ បើយើងនិយាយអំពីលក្ខខណ្ឌនៃការស្នើនៅក្រៅឃុំបណ្ដោះអាសន្នហ្នឹង គួរណាសមហេតុផលក្នុងការអនុញ្ញាតតាមនីតិវិធីក្រមព្រហ្មទណ្ឌ»។
ក្រោយពីមានការចាប់ និងឃុំខ្លួននេះ សហគមន៍ជាតិនិងអន្តរជាតិ បានថ្កោលទោសរដ្ឋាភិបាលលោក ហ៊ុន ម៉ាណែត និងទាមទារឱ្យអាជ្ញាធរដោះលែងអ្នកសារព័ត៌មានឯករាជ្យ លោក ម៉ិច ដារ៉ា ដោយគ្មានលក្ខខណ្ឌ។
អ្នកឃ្លាំមើលបារម្ភថា ប្រសិនបើរដ្ឋាភិបាលកម្ពុជា នៅតែអះអាងថា ការចាប់ខ្លួន លោក ម៉ិច ដារ៉ា ព្រមទាំងសកម្មជនសង្គម និងអ្នកនយោបាយ គឺជាការអនុវត្ត ច្បាប់ដ៏ត្រឹមត្រូវ ដោយពុំខ្វល់ពីការរំលោភសិទ្ធិមនុស្ស នឹងធ្វើឱ្យបណ្ដាប្រទេស លោកសេរី បន្តដាក់ទណ្ឌកម្មបន្ថែមទៀតមកលើកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
សិទ្ធិមនុស្ស
