អ្នកច្បាប់ស្នើតុលាការអនុញ្ញាតអ្នកកាសែតអាចយកព័ត៌មានក្នុងសវនាការលោក កឹម សុខា
2024.02.09
លោក កឹម សុខា ប្រធានគណបក្សសង្គ្រោះជាតិ រៀបចេញពីផ្ទះទៅស្ដាប់សាលក្រមសាលាដំបូងរាជធានីភ្នំពេញ នៅថ្ងៃទី៣ មីនា ២០២៣។
រូប៖ ពលរដ្ឋផ្តល់ឱ្យ
អ្នកជំនាញច្បាប់ និងអ្នកសារព័ត៌មានថា ការរឹតត្បិតអ្នកសារព័ត៌មានមិនឱ្យចូលស្ដាប់លើសំណុំរឿងលោក កឹម សុខា នឹងប៉ះពាល់ដល់សិទ្ធិជំនុំជម្រះដោយយុត្តិធម៌។ ពួកគាត់ថា លោក កឹម សុខា គឺជាអ្នកនយោបាយសំខាន់ម្នាក់ដែលសាធារណជនចង់ដឹងពីដំណើរការកាត់ក្ដីរបស់លោក។
អ្នកជំនាញច្បាប់ និងអ្នកសារព័ត៌មានស្នើសាលាឧទ្ធរណ៍ភ្នំពេញបង្កភាពងាយស្រួលដល់អ្នកសារព័ត៌មានយកព្រឹត្តិការណ៍ដែលកើតឡើងក្នុងសវនាការលើបណ្ដឹងជំទាស់របស់មេដឹកនាំបក្សប្រឆាំងលោក កឹម សុខា លើសំណុំរឿងក្បត់ជាតិ។
ការស្នើនេះ ក្រោយពីអាជ្ញាធរក្រុងភ្នំពេញ រឹតត្បិតមកលើអ្នកសារព័ត៌មាន និងសកម្មជនបក្សប្រឆាំងមិនឱ្យចូលយកព័ត៌មាន ឬឈរគាំទ្រនៅមុខសាលាឧទ្ធរណ៍ភ្នំពេញចំនួនពីរដងរួចមកហើយ។ ជាក់ស្ដែងនៅថ្ងៃសវនាការលោក កឹម សុខា កាលពីថ្ងៃទី៨ កុម្ភៈ មានអាជ្ញាធរពង្រាយកម្លាំង សន្តិសុខ និងប៉ូលិសជាច្រើននាក់ បិទគ្រប់ច្រកចូលសាលាឧទ្ធរណ៍ ហើយរួមទាំងបង្កប់ដោយជនស៊ីវិលឱ្យតាមថតរូប និងឃ្លាំមើល អ្នកសារព័ត៌មាន និងក្រុមសកម្មជនបក្សប្រឆាំង។
អ្នកជំនាញផ្នែកច្បាប់ លោកបណ្ឌិត សឺន ជុំជួន លើកឡើងថា នៅក្នុងកតិកាសញ្ញាស្ដីពីសិទ្ធិអន្តរជាតិ និងរដ្ឋធម្មនុញ្ញបានចែងថា ការជំនុំជម្រះជាសាធារណៈគឺជាផ្នែកដ៏សំខាន់នៃសិទ្ធិទទួលបានការជំនុំជម្រះដោយយុត្តិធម៌។ លោកបណ្ឌិត សឺន ជុំជួន បន្តថា សវនាការលើអង្គសេចក្ដីលើករណី លោក កឹម សុខា គឺជាសវនាការជាសាធារណៈ ដូចច្នេះលោកយល់ថា តុលាការគួរបង្កភាពងាយស្រួលដល់អ្នកសារព័ត៌មានក្នុងការរាយការណ៍ព័ត៌មាននេះទៅកាន់សាធារណជនផ្សេងទៀតដែលមិនបានចូលស្ដាប់។
លោកបណ្ឌិត សឺន ជុំជួន បន្តថា លោក កឹម សុខា គឺជាអ្នកនយោបាយសំខាន់មួយរូបក្នុងក្រសែភ្នែកពលរដ្ឋខ្មែរ ហើយលោកជឿថា សាធារណជននឹងចង់ដឹងពីដំណើរការកាត់ក្ដីលើមេដឹកនាំបក្សប្រឆាំងរូបនេះ។ លោកបណ្ឌិត សឺន ជុំជួន យល់ថា ការផ្ដល់ឱ្យអ្នកសារព័ត៌មាន និងសាធារណជនចូលរួមស្ដាប់នឹងមិនបង្កការរំខានដល់ដំណើរការជំនុំជម្រះក្ដីនោះដែរ។
លោកបណ្ឌិត សឺន ជុំជួន៖ «គេចង់ឃើញ ចង់ដឹង ចង់ស្ដាប់ ចង់យល់អំពីនីតិវិធីដំណើរការរឿងរបស់គាត់មិនមែនធម្មតាអី ដល់២៧ឆ្នាំ អ៊ីចឹងគេចង់ដឹងណាស់ ពិសេសអ្នកសារព័ត៌មាន គឺមានតួនាទីយ៉ាងសំខាន់ក្នុងការចូលរួមចំណែកផ្ដល់យុត្តិធម៌ដល់ជនជាប់ចោទផងដែរ នៅក្នុងការសង្កេតថាសវនាការហ្នឹងមិនបានដំណើរការត្រូវនីតិវិធី មិនមានតម្លាភាពអីជាដើម»។
អ្នកសារព័ត៌មានមួយរូប ថ្លែងក្នុងលក្ខខណ្ឌមិនបញ្ចេញឈ្មោះថា សាលាឧទ្ធរណ៍បានរឹតត្បិតអ្នកសារព័ត៌មាន ទោះបីជាអ្នកសារព័ត៌មានមួយចំនួនបានចុះឈ្មោះ ក៏មន្ត្រីតុលាការថា មិនមានកន្លែងអង្គុយគ្រប់គ្រាន់ដែរ។ លោកថា ការរឹតត្បិតបែបនេះបានធ្វើអ្នកសារព័ត៌មានមិនអាចរាយការណ៍ពីការលើកឡើងរបស់តំណាងអយ្យការ និងចៅក្រម ទៅកាន់លោក កឹម សុខា នោះទេ។
អ្នកសារព័ត៌មានថ្លែងលាក់ឈ្មោះ៖ «ការប៉ះពាល់មួយចំនួនដល់ការធ្វើសេចក្ដីរាយការណ៍ព័ត៌មាន ដោយសារតែយើងអត់បានចូល អត់បានស្ដាប់នូវអ្វីដែលជាការដេញដោលសួរនៅសវនាការ អ៊ីចឹងទៅ ការរាយការណ៍ព័ត៌មានផ្អែកតែទៅលើមន្ត្រីសង្គមស៊ីវិលខ្លះ ដែលគាត់ចូលរួម និងសហមេធាវីរបស់លោក កឹម សុខា។ ធម្មតាខ្ញុំចង់ឱ្យមានការបើកទូលាយសម្រាប់អ្នកកាសែតឱ្យគាត់ធ្វើសេចក្ដីរាយការណ៍គ្រប់ជ្រុងពីសម្ដីរបស់ចៅក្រម ឬភាគីប្ដឹងផ្ដល់គ្នា»។
វិទ្យុអាស៊ីសេរីមិនអាចសុំការអត្ថាធិប្បាយពីអ្នកនាំពាក្យសាលាឧទ្ធរណ៍ លោក ឃុន លាងម៉េង ជុំវិញសំណុំរឿងរបស់លោក កឹម សុខា បានទេ នៅថ្ងៃទី៩ ខែកុម្ភៈ។
សាលាដំបូងរាជធានីភ្នំពេញកាលពីថ្ងៃទី៣ ខែកុម្ភៈ ឆ្នាំ២០២៣ បានផ្ដន្ទាទោសលោក កឹម សុខា ដាក់ពន្ធនាគាររយៈពេល ២៧ឆ្នាំ ពីបទសន្ទិដ្ឋិភាពជាមួយបរទេស ឬឃុបឃិតត្រូវរ៉ូវគ្នាជាមួយបរទេស ដែលត្រូវបានចោទប្រកាន់តាំងពីឆ្នាំ២០១៧។ តុលាការបានដាក់បម្រាមមិនឱ្យលោក កឹម សុខា ធ្វើនយោបាយ មិនឱ្យចេញពីផ្ទះ មិនអនុញ្ញាតឱ្យជួបបរទេស លើកលែងតែមានការអនុញ្ញាតពីតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី