សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
2024.10.01
អ្នកសារព័ត៌មានឯករាជ្យ លោក ម៉ិច ដារ៉ា (ឆ្វេង) ទទួលពានរង្វាន់ ពីរដ្ឋមន្ត្រីការបរទេសសហរដ្ឋអាមេរិក លោក អែនតូនី ប្លីងខិន (Antony Blinken) នៅសហរដ្ឋអាមេរិក កាលពីថ្ងៃទី១៥ ខែមិថុនា ឆ្នាំ២០២៣។
រូប៖ ហ្វេសប៊ុកលោក ម៉ិច ដារ៉ា
សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់ទទួលពានរង្វាន់ពីរដ្ឋាភិបាលអាមេរិកគឺលោក ម៉ិច ដារ៉ា នៅរសៀលថ្ងៃទី៣០ ខែកញ្ញានេះ ក្នុងស្រុកស្រែអំបិល ខេត្តកោះកុង។ មកដល់ពេលនេះ គ្រួសាររបស់លោកមិនទាន់ដឹងថា លោក ម៉ិច ដារ៉ា ត្រូវសមត្ថកិច្ចបញ្ជូនទៅឃុំនៅកន្លែងណានៅឡើយទេ។
សង្គមស៊ីវិលស្នើឱ្យអាជ្ញាធរផ្ដល់ព័ត៌មានដល់គ្រួសារពាក់ព័ន្ធនឹងហេតុផលនៃការចាប់ខ្លួន និងកន្លែងឃុំខ្លួនលោក ម៉ិច ដារ៉ា ឱ្យស្របតាមច្បាប់ ដើម្បីកុំឱ្យគ្រួសាររបស់លោកព្រួយបារម្ភ។
អ្នកសារព័ត៌មានឯករាជ្យ លោក ម៉ិច ដារ៉ា ត្រូវបានសមត្ថកិច្ចចាប់ខ្លួន នៅរសៀល ថ្ងៃចន្ទ ទី៣០ កញ្ញានេះ អំឡុងពេលលោកឈប់រថយន្តនៅបញ្ជរបង់ប្រាក់ នៅលើផ្លូវ ល្បឿនលឿន ក្នុងស្រុកស្រែអំបិល ខេត្តកោះកុង។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (Licadho) លោក អំ សំអាត ប្រាប់វិទ្យុអាស៊ីសេរីនៅល្ងាចថ្ងៃទី៣០ ខែកញ្ញា ថា លោក ម៉ិច ដារ៉ា បានផ្ញើសារពីការចាប់ខ្លួនលោកមកកាន់អង្គការលីកាដូ នៅមុនពេលទូរស័ព្ទរបស់លោកត្រូវបានដកហូត។
តាមការឱ្យដឹងរបស់លោក អំ សំអាត មកដល់ពេលនេះ អង្គការលីកាដូមិនទាន់ដឹងថា សមត្ថកិច្ចបញ្ជូនលោក ម៉ិច ដារ៉ា ទៅទីណានិងចោទប្រកាន់អ្នកសារព័ត៌មានរូបនេះ ពីរឿងអ្វីឡើយ។
លោក អំ សំអាត៖ «អង្គការលីកាដូកំពុងតែធ្វើការងាររឿងនេះបន្ត។ អង្គការសង្គមស៊ីវិលសូមឱ្យអាជ្ញាធរ បង្ហាញមូលហេតុនៃការចាប់ខ្លួន ក៏ដូចជាកន្លែងនៃការឃាត់ខ្លួនឬ ឃុំខ្លួនលោក ម៉ិច ដារ៉ា ដើម្បីឱ្យក្រុមគ្រួសាររបស់លោក ម៉ិច ដារ៉ា ហ្នឹង បានដឹងផង ដើម្បីកុំឱ្យមានការព្រួយបារម្ភអំពីសុវត្តិភាពរបស់លោក ម៉ិច ដារ៉ា»។
មុនពេលចាប់ខ្លួនលោក ម៉ិច ដារ៉ា បានបង្ហោះរូបភាពពីរសន្លឹកលើទំព័រហ្វេសប៊ុករបស់លោកអំពីទិដ្ឋភាពនៅបាភ្នំ ក្នុងខេត្តព្រៃវែង ដើម្បីប្រៀបធៀបគ្នា។
រូបភាពមួយសន្លឹកលោកថា ជា«បាភ្នំពីដើម» ដែលមានសភាពធម្មជាតិល្អបំព្រង គ្មានការបំផ្លាញ និងមួយសន្លឹកទៀតជា«បាភ្នំឥឡូវ» ដែលមានទិដ្ឋភាពឈូសភ្នំ ជាប់រូបឡានដឹកដីធ្វើឱ្យខូចភ្នំយ៉ាងដំណំ ហើយលោក ម៉ិច ដារ៉ា សរសេរខ្លីលើរូបភាពថា «ការអភិវឌ្ឍដ៏អស្ចារ្យ»។
ប៉ុន្តែការបង្ហោះនេះ ត្រូវបានរដ្ឋបាលស្រុកបាភ្នំច្រានចោល និងចោទលោក ម៉ិច ដារ៉ា ថា ផ្សព្វផ្សាយព័ត៌មានក្លែងក្លាយ ហើយរដ្ឋបាលស្រុកបាភ្នំនៅក្នុងវីដេអូជិត ៤នាទី បានស្នើឱ្យក្រសួងព័ត៌មានចាត់វិធានការផ្លូវច្បាប់ចំពោះលោក ម៉ិច ដារ៉ា។
វីដេអូរបស់រដ្ឋបាលស្រុកបាភ្នំ ត្រូវបានក្រសួងព័ត៌មាន អង្គភាពអ្នកនាំពាក្យរដ្ឋាភិបាល និងទំព័រហេ្វសប៊ុកមួយចំនួនទៀតរបស់រដ្ឋាភិបាល និងគណបក្ស ប្រជាជនកម្ពុជា យកមកផ្សព្វផ្សាយបន្តលើបណ្ដាញសង្គមហ្វេសប៊ុករបស់ខ្លួនព្រោងព្រាត។
វិទ្យុអាស៊ីសេរីមិនទាន់អាចសុំការបំភ្លឺ ទាក់ទងនឹងការចាប់ខ្លួនលោក ម៉ិច ដារ៉ា ពី អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី និងប្រធានក្រុមអ្នកនាំពាក្យរដ្ឋាភិបាលលោក ប៉ែន បូណា រួមទាំងអភិបាលខេត្តកោះកុងអ្នកស្រី មិថុនា ភូថង បាននៅឡើយទេ នៅថ្ងៃទី៣០ ខែកញ្ញា។
ប៉ុន្តែលោក អេង ហ៊ី ប្រាប់ទៅសារព័ត៌មានខេមបូចានៅថ្ងៃទី៣០ ខែកញ្ញា ថា ការចាប់ខ្លួននេះ ធ្វើឡើងតាមដីកាចាប់ខ្លួន ប៉ុន្តែលោកមិនបានបញ្ជាក់ថា នរណា ជាដើមបណ្តឹង និងថាតើអ្នកសារព័ត៌មានរូបនេះត្រូវបានបញ្ជូនទៅកន្លែងណានោះទេ។
បណ្ដាញព័ត៌មានខេមបូចា ដែលដកស្រង់សម្ដីរបស់សាច់ញាតិលោក ម៉ិច ដារ៉ា ឱ្យដឹងថា អាជ្ញាធរចាប់ខ្លួនលោកដោយមានដីកា ប៉ុន្តែពួកគាត់មិនបានឃើញដីកានោះទេ។ សមាជិកគ្រួសារដែលស្ថិតក្នុងរថយន្តជាមួយលោក ម៉ិច ដារ៉ា បាននិយាយថា នៅពេលដែលរថយន្តកំពុងតម្រង់ជួរនៅបញ្ជរបង់ប្រាក់ កម្លាំងអាវុធហត្ថបានមកដល់ ដោយមានរថយន្ត៦គ្រឿងក្នុងនោះមួយគ្រឿងជារថយន្ត កងរាជអាវុធហត្ថ និង៥គ្រឿងទៀត ជារថយន្តស៊ីវិល។
វិទ្យុអាស៊ីសេរីមិនទាន់អាចទាក់ទងគ្រួសារលោក ម៉ិច ដារ៉ា បាននៅឡើយទេ នៅថ្ងៃទី៣០ ខែកញ្ញា។ លោក ម៉ិច ដារ៉ា ធ្លាប់ជាអ្នកសារព័ត៌មាននៅស្ថាប័នសារព័ត៌មានឯករាជ្យមួយចំនួន ដូចជា សារព័ត៌មាន ឌឹ ខេមបូឌា ដេលី (The Cambodia Daily) សារព័ត៌មានភ្នំពេញប៉ុស្តិ៍ និងវិទ្យុសំឡេងប្រជាធិបតេយ្យ (VOD) ។
លោក ម៉ិច ដារ៉ា ជា អ្នកសារព័ត៌មានកម្ពុជា ដែលរាយការណ៍យ៉ាងសកម្ម ពីការជួញដូរមនុស្ស និងការឆបោកតាមប្រព័ន្ធអនឡាញនៅក្នុងប្រទេសកម្ពុជា និងនៅក្នុងឆ្នាំ២០២៣ លោកបានឈ្នះពានរង្វាន់របស់ក្រសួងការបរទេស នៃសហរដ្ឋអាមេរិក ស្ដីពីការរាយការណ៍នៃអំពើជួញដូរមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី