អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
2024.09.29
ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក សុខ ចិន្តាសោភា ថ្លែងនៅមហាសន្និបាតអង្គការសហប្រជាជាតិ លើកទី៧៩ នៅទីក្រុងញូវយ៉ក (New York City) សហរដ្ឋអាមេរិក កាលពីថ្ងៃទី ២៨ ខែកញ្ញា ឆ្នាំ២០២៤។
រូប៖ ហ្វេសប៊ុកក្រសួងការបរទេសកម្ពុជា
រដ្ឋមន្ត្រីក្រសួងការបរទេស លោក សុខ ចិន្តាសោភា ប្រាប់ពិភពលោកថា កម្ពុជាគាំទ្រលើគោលការណ៍មិនទុកនរណាម្នាក់ចោល ហើយកម្ពុជាគឺជាប្រទេសប្រកាន់យកការគោរពសិទ្ធិមនុស្ស និងមាននីតិរដ្ឋ។ ទោះជាយ៉ាងណា អ្នកឃ្លាំមើលសង្គមថា ការលើកឡើងរបស់ លោក សុខ ចិន្តាសោភា គឺជាការអួតអាងខុសពីការពិត។
ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក សុខ ចិន្តាសោភា កាលពីថ្ងៃទី ២៨ ខែកញ្ញា ថ្លែងនៅមហាសន្និបាតអង្គការសហប្រជាជាតិ លើកទី៧៩ នៅទីក្រុងញូវយ៉ក (New York City) សហរដ្ឋអាមេរិក ថា រដ្ឋាភិបាលបានអនុវត្តយុទ្ធសាស្ត្របញ្ចកោណ ដែលមានគោលបំណងកសាងកម្ពុជាអោយទៅជាសង្គមដែលមានភាពយុត្តិធម៌ និងរស់រវើក ដែលអាចកសាងសន្តិភាពបានយូរអង្វែង ស្ថិរភាពនយោបាយ អភិបាលកិច្ចល្អ និងការគោរពនីតិរដ្ឋ។ លោកអះអាងថាដើម្បីសម្រេចគោលដៅនេះ កម្ពុជាបានបាន ផ្ដល់អាទិភាពខ្ពស់លើការកសាងធនធានមនុស្ស ការអភិវឌ្ឍន៍សេដ្ឋកិច្ចអោយបានស៊ីជម្រៅ និងច្រើនប្រភេទដូចជាការដឹកជញ្ជូន និងថាមពល និងការពន្លឿនការអភិវឌ្ឍប្រព័ន្ធរដ្ឋាភិបាល សេដ្ឋកិច្ច និងសង្គមឌីជីថលជាដើម។
លោក សុខ ចិន្តាសោភា៖ «ឥឡូវនេះខ្ញុំសូមនិយាយអំពីប្រធានបទ ការមិនទុកនរណាម្នាក់ចោល ដោយសារតែអតីតកាលដ៏ខ្មៅងងឹតរបស់កម្ពុជា។ យើងជឿជាក់ថា សន្តិភាពគឺជាតម្រូវការជាមុនដ៏សំខាន់សម្រាប់ការអភិវឌ្ឍ ជាពិសេសការអភិវឌ្ឍន៍ដែលមាននិរន្តរភាព និងរួមបញ្ចូលមនុស្សទាំងអស់គ្នា។ ប្រទេសកម្ពុជាមើលឃើញថាការសម្រេចបាននូវការអភិវឌ្ឍប្រកបដោយចិរភាព និងសេចក្ដីថ្លៃថ្នូររបស់មនុស្សសម្រាប់បុគ្គលគ្រប់រូបគឺជាភាពចាំបាច់ដាច់ខាត»។
ទោះជាយ៉ាងណា អ្នកតាមដានភូមិសាស្ត្រនយោបាយនៅតំបន់អាស៊ីប៉ាស៊ីហ្វិក លោក សេង វ៉ាន់លី លើកឡើងថា ប្រទេសមួយចំនួនដែលរងការរិះគន់ពីអន្តរជាតិថា ជាប្រទេសផ្ដាច់ការ ឬរំលោភសិទ្ធិមនុស្សជាដើមនោះ នឹងមិនលើកឡើងពីចំណុចខ្វះខាតរបស់ខ្លួននៅលើវេទិកាអន្តរជាតិនោះទេ។ លោកថា ប្រទេសទាំងនោះ រួមទាំងកម្ពុជាផងដែរចូលចិត្តអួត ពីការអភិវឌ្ឍ និងអះអាងថា ខ្លួនប្រកាន់ជំហរអព្យាក្រឹត្យ។
លោក សេង វ៉ាន់លី៖ «ឃើញថា កម្រមានប្រទេសណាដែលមានរបបនយោបាយផ្ដាច់ការ ឬក៏ទូទាំងពិភពលោកដែលមានមេដឹកនាំប្រទេសផ្ដាច់ការ ឬផ្ដាច់ការនិយម រំលោភសិទ្ធិប្រជាពលរដ្ឋ និងលំហប្រជាធិបតេយ្យដើរថយក្រោយហ្នឹង គឺគេកម្រនិយាយអំពីបញ្ហាផ្ទាល់ខ្លួនណាស់ គេច្រើនតែនិយាយជាវោហារសាស្ត្រដើម្បីធ្វើយ៉ាងណាឱ្យបង្កើតរូបភាពថា ប្រទេសខ្លួនប្រកាន់ខ្ជាប់នូវគោលការណ៍ប្រជាធិបតេយ្យ ការគោរពសិទ្ធិមនុស្ស និងការអភិវឌ្ឍប្រកបដោយបរិយាបន្ន»។
ចំណែក ប្រធានសមាគមខ្មែរនៅប្រទេសអូស្ត្រាលី លោក ជា យូហ៊ន មានប្រសាសន៍ថា ការដែល លោក សុខ ចិន្តាសោភា ថ្លែងប្រាប់ពិភពលោកថា ប្រទេសកម្ពុជាមាន យុត្តិធម៌ អភិបាលកិច្ចល្អ និងការគោរពនីតិរដ្ឋគឺជាការភូតភរទាំងដែលពិភពលោកមិនជឿនោះទេ។ លោកថា ចាប់តាំងពីរដ្ឋាភិបាលលោក ហ៊ុន ម៉ាណែត ឡើងកាន់ដំណែងមក រដ្ឋាភិបាលលោកបានរំលោភសិទ្ធិមនុស្សមិនខុសពីឪពុកលោក គឺលោក ហ៊ុន សែន ដោយបានចាប់ខ្លួនសកម្មជនបរិស្ថាន សកម្មជនសង្គម និងមន្ត្រីបក្សប្រឆាំងជាបន្តបន្ទាប់។
លោក ជា យូហ៊ន៖ «ការពិតហ្នឹងយើងឃើញហើយ ប្រព័ន្ធយុត្តិធម៌នៅក្នុងប្រទេសកម្ពុជាយើង គឺគ្មានយុត្តិធម៌សោះហើយ ហើយយុត្តិធម៌ហ្នឹងសម្រេចនៅលើបបូរមាត់ លោក ហ៊ុន សែន ឬលោក ហ៊ុន ម៉ាណែត ដែលនិយាយហ្នឹង លោក ហ៊ុន សែន និយាយថា យ៉ាងម៉េចគឺតុលាការកាត់តែអ៊ីចឹង ហើយមិនដែលឃើញតុលាការកាត់ពួកគណបក្សនយោបាយ គណបក្សប្រឆាំងឱ្យរួចខ្លួនម្ដងទេ ដូច្នេះយុត្តិធម៌នៅក្នុងប្រទេសកម្ពុជាគឺគ្មាន»។
បណ្ដាប្រទេសជាច្រើននៅលើពិភពលោក នៅកិច្ចប្រជុំដំណើរការពិនិត្យជាសកលតាមកាលកំណត់ហៅកាត់ថា (UPR) របស់អង្គការសហប្រជាជាតិ នៅថ្ងៃទី៨ ខែឧសភា កន្លងទៅបានរិះគន់មកលើរដ្ឋាភិបាលប្រទេសកម្ពុជាថា បានរំលោភសិទ្ធិមនុស្សធ្ងន់ធ្ងរ ហើយសិទ្ធិសេរីភាពកាន់តែធ្លាក់ចុះពីមួយឆ្នាំទៅមួយឆ្នាំ។ បណ្ដាប្រទេសទាំងនោះក៏ទាមទាររដ្ឋាភិបាលដោះលែងអ្នកទោសមនសិការជាពិសេសមេដឹកនាំបក្សប្រឆាំង លោក កឹម សុខា ។ បន្ថែមពីនេះ ពួកគេក៏ស្នើឱ្យរដ្ឋាភិបាលកម្ពុជាធានាឱ្យបាននូវការបោះឆ្នោតដោយត្រឹមត្រូវ សេរី និងយុត្តិធម៌ ព្រមទាំងធ្វើកំណែទម្រង់ប្រព័ន្ធតុលាការឱ្យមានភាពឯករាជ្យ និងមិនលំអៀង ស្របតាមស្តង់ដារអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី