អ្នក​បញ្ជា​ទិញ​ជិត ២០​ស្ថាប័ន ស្នើ​ឱ្យ​រដ្ឋាភិបាល​លុបចោល​សវនកម្ម​លើ​អង្គការ​សង់ត្រាល់

ក្រុមហ៊ុន​បញ្ជា​ទិញ​សម្លៀកបំពាក់ និង​ស្បែកជើង​ពី​កម្ពុជា​ម៉ាក​ល្បីៗ​ជិត ២០​ម៉ាក ស្នើ​ឱ្យ​រដ្ឋាភិបាល​លុបចោល​សវនកម្ម​ទៅលើ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស​ហៅ​កាត់​ថា​«​សង់​ត្រា​ល់​»​ជាបន្ទាន់​។ ការ​ស្នើ​នេះ ធ្វើឡើង​បន្ទាប់ ពី​អាជ្ញាធរ​សវនកម្ម​ជាតិ (NAA) កាល​ពី​ខែកក្កដា កន្លង​ទៅ បាន​ចុះ​ធ្វើ​សវនកម្ម លើ​អង្គការ​សង់ត្រាល់​តា​ម​សំណើ​របស់​ក្រសួង​មហាផ្ទៃ។

ក្រុមហ៊ុន​បញ្ជា​ទិញ​សម្លៀកបំពាក់ និង​ស្បែកជើង​ពី​កម្ពុជា​ចំនួន ១៨​ម៉ាក បាន​អំពាវនាវ​ឱ្យ​រដ្ឋាភិបាល​លោក ហ៊ុន ម៉ាណែត លុបចោល​សវនកម្ម​លើ​សង់ត្រាល់ និង​ត្រូវ​ដក​ចំណាត់ការ​ទាំងឡាយ ដែល​ប៉ះពាល់​ដល់​លំហ​សង្គម​ស៊ីវិល និង​សិទ្ធិ សេរីភាព​បញ្ចេញ​មតិ។

ក្រុមហ៊ុន​បញ្ជា​ទិញ​សម្លៀកបំពាក់ ស្បែកជើង និង​ទំនិញ​ម៉ាក​ល្បី​ទាំង ១៨ ម៉ាក ក្នុង​នោះ Adidas Puma Under Armour VF Corporation​និង​AEO Inc ជាដើម។

ក្នុង​សេចក្ដីថ្លែងការណ៍​ក្រុមហ៊ុន​បញ្ជា​ទិញ​សម្លៀកបំពាក់ ស្បែកជើង និង​ទំនិញ នៅ​ថ្ងៃទី​១០ ខែកញ្ញា ដោយ​សម្ដែង​ការ​ព្រួយបារម្ភ​ចំពោះ​ដំណើរការ​ស៊ើប​អង្កេត​របស់​ក្រសួង​មហាផ្ទៃ​លើ​អង្គការ​សង់ត្រាល់ ទាក់ទង​នឹង​របាយការណ៍ របស់​អង្គការ​សង់ត្រាល់ ដែល​ចំណងជើង​ថា «​ឧបសគ្គ​រារាំង​ភាព​ជា​តំណាង​សេរីភាព​សហជីព​ក្នុង​ប្រទេស​កម្ពុជា»។

ក្រុមហ៊ុន​បញ្ជា​ទិញ​ក៏​ទាមទារ​ឱ្យ​រដ្ឋាភិបាល​កម្ពុ​ជាដក​ចំណាត់ការ​ទាំងឡាយ ដែល​ប៉ះពាល់​ដល់​លំហ​សង្គម​ស៊ីវិល និង​សិទ្ធិ​សេរីភាព​បញ្ចេញមតិ រួម​ទាំង​ទម្លាក់​ចោល បណ្ដឹង​ព្រហ្មទណ្ឌ ដែល​ចោទប្រកាន់​លើ​អ្នកគ្រប់គ្រង​កម្មវិធី​ការងារ នៃ​អង្គការ សង់ត្រាល់​លោក ឃុន ថារ៉ូ ផង​ដែរ។

ពួកគេ​ថា លំហ​សង្គម​ស៊ីវិល និង​សិទ្ធិ​សេរីភាព​ក្នុង​ការ​បញ្ចេញមតិ គឺជា​ធាតុ​គន្លឹះ ដែល​ធ្វើ​ឱ្យ​ប្រទេស​កម្ពុជា​ជា​ដៃគូ​ដ៏​សំខាន់​ផ្នែក​ផ្គត់ផ្គង់ សម្រាប់​ឧស្សាហកម្ម​សម្លៀកបំពាក់ និង​ស្បែក​ជើង។

ឆ្លើយតប​នឹង​រឿង​នេះ អ្នកនាំពាក្យ​ក្រសួង​មហាផ្ទៃ​លោក ទូច សុឃៈ ប្រាប់​វិទ្យុ​អាស៊ីសេរី នៅ​ថ្ងៃ​ទី១០ ខែ​កញ្ញា ថា ការ​អនុវត្ត​របស់​ក្រសួង គឺ​បន្ទាប់ពី​មាន​បណ្ដឹង​របស់​ភាគី​ពាក់ព័ន្ធ ដែល​ក្រសួង​ពិនិត្យ​ឃើញ​មាន​ទឡ្ហីករណ៍​សមស្រប​តាមច្បាប់ និង​ផ្អែក​ទៅ​លើ​លក្ខន្តិកៈ​របស់​អង្គការ សមាគម ដែល​តម្កល់​នៅ​ក្រសួង​មហាផ្ទៃ។

លោក​ថា វិធានការ​របស់​ក្រសួង​នេះ មិនមែន​ជា​ការបំពាន​សិទ្ធិ​សេរីភាព​របស់​អង្គការ សមាគម​ឡើយ ផ្ទុយទៅវិញ លោក​ថា ជា​ការ​ពង្រឹង​ការអនុវត្ត​ច្បាប់ និង​លើកកម្ពស់​សកម្មភាព​របស់​អង្គការ​សង្គម​ស៊ីវិល​នៅ​ប្រទេស​កម្ពុជា។

លោក ទូច សុឃៈ៖ «អ្វី​ដែល​សម្រប​ច្បាប់ យើង​គាំទ្រ យើង​ការពារ​អ្វី​ដែល​មិន​សមស្រប​តាមច្បាប់ យើង​គ្រាន់តែ​អនុវត្ត​ទៅ​តាម​ច្បាប់ ដើម្បី​សមាសភាព​ចំពោះ​មុខ​មុខ​ច្បាប់​ទាំងអស់គ្នា»។

តែ​យ៉ាងណា ការ​ធ្វើ​សវនកម្ម​«​សន្តិសុខ​ជាតិ​»​លើ​អង្គការ​សង់ត្រាល់​នេះ ក្រោយ​ពី​ក្រុម​សហជីព ដែល​មាន​និន្នាការ​គាំទ្រ​រដ្ឋាភិបាល​បាន​ដាក់​ពាក្យ​បណ្តឹង​ទៅ​ក្រសួង​មហាផ្ទៃ បន្ទាប់ពី​អង្គការ​សង់ត្រាល់ បាន​ចេញ​របាយការណ៍​មួយ ដែល​មាន​ចំណងជើង​ថា «​ឧបសគ្គ​រារាំង​ភាព​ជា​តំណាង​៖ សេរីភាព​សហជីព​ក្នុង​ប្រទេស​កម្ពុជា»។

អនុប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​កាត់​ថា ស៊ីខៅឌូ (CCAWDU) លោក អាត់ ធន់ ប្រាប់​វិទ្យុ​អាស៊ីសេរី​នៅ​ថ្ងៃទី​១០ ខែកញ្ញា ថា ករណីនេះ នឹង​ធ្វើ​ឱ្យ​ប៉ះពាល់​ដល់​កេរ្តិ៍ឈ្មោះ​ប្រទេស​កម្ពុជា ប្រសិនបើ​ក្រុមហ៊ុន បញ្ជា​ទិញ​រកឃើញ​ថា មាន​ការ​គំរាមកំហែង យាយី​លើ​អង្គការ​ពាក់ព័ន្ធ​នឹង​ការងារ និង​សិទ្ធិ​សេរីភាព​សហជីព។

លោក អាត់ ធន់៖ «ករណី​កញ្ញា ឈឹម ស៊ីថរ ផ្សេងៗ​ខ្ញុំ​គិតថា គេ​មាន​ការ​បារម្ភ ព្រោះ​ករណី​លោក ម៉ម រិទ្ធី ដែល​ត្រូវ​បាន​ចាប់​នេះ ដោយសារតែ​គាត់​ធ្វើ​ការងារ​សហជីព ហើយ​ករណី​កញ្ញា ឈឹម ស៊ីថរ ដោយសារតែ​ករណី​ការងារ​សហជីព​។ ករណី​សង់ត្រាល់ ចេញ​របាយការណ៍​ពាក់ព័ន្ធ​ទៅ​នឹង​ការ​រឹតត្បិត​សហជីព​។ អ៊ីចឹង ទាំងអស់​នេះ សុទ្ធតែ​ផល​ប៉ះពាល់​ដែល​អាច​ប៉ះពាល់​ទៅដល់​កេរ្តិ៍ឈ្មោះ​កម្ពុជា ដែល​អាច​គេ​បារម្ភ​អំពី​ការ​រឹតត្បិត​សហជីព និង​ការបំពាន​សិទ្ធិ​សេរីភាព​កម្មករ»។

កាលពី​ខែកក្កដា​កន្លងទៅ សមាគម​សម្លៀកបំពាក់ និង​ស្បែកជើង អាមេរិក (AAFA) និង​សមាគម​ការងារ​យុត្តិធម៌ (FLA) រួមមាន​អ្នកទិញ​អាមេរិក អឺរ៉ុប និង កាណាដា បាន​ចេញ​សេចក្ដីថ្លែងការណ៍ ដោយ​អំពាវនាវ​ឱ្យ​រដ្ឋាភិបាល​កម្ពុជា​បញ្ឈប់​ការ​ធ្វើទុក្ខបុកម្នេញ និង​រំលោភ​សិទ្ធិ​សេរីភាព​បញ្ចេញមតិ ព្រមទាំង​លុបចោល​ដំណើរ​សវនកម្ម​ប្រឆាំង​អង្គការ​សង់ត្រាល់​ជាបន្ទាន់ ដោយ​ថា ការ​ធ្វើ​នេះ គឺ​មិន​ត្រឹមតែ​រំលោភ​កាតព្វកិច្ច​គោរព​សិទ្ធិមនុស្ស​របស់​កម្ពុជា​ខ្លួនឯង​នោះ​ទេ ប៉ុន្ដែ​ក៏​ប៉ះពាល់​ដល់​តម្លៃ និង​កេរ្ដិ៍​ឈ្មោះ​របស់​ប្រទេស​ជា​សមាជិក​ដទៃ​ទៀត ដែល​បាន​ប្រើ​ឈ្មោះ​កម្ពុជា​នៅ​លើ​ម៉ាក​ផលិតផល​របស់​ខ្លួន៕