សង្គមស៊ីវិលលើកឡើងថា ការជួញដូរមនុស្សនៅកម្ពុជា មានប្រព័ន្ធបណ្ដាញទាំងក្នុងស្រុក និងក្រៅស្រុក
2024.09.14
ក្រុមគ្រួសាររបស់អ្នកនារីរងគ្រោះចាញ់បោករៀបការទៅប្រទេសចិន យំឱបគ្នានៅពេលដែលកូនស្រីរបស់គាត់ត្រូវជួយសង្គ្រោះឱ្យវិលត្រឡប់មកស្រុកកំណើតជួបជុំគ្រួសារវិញ។
រូប៖ សមាគមអាដហុក
កម្ពុជាបានធ្វើបត្យាប័ន បញ្ជូនសមាជិកក្រុមឧក្រិដ្ឋជន ជនជាតិចិន ម្នាក់ ដែលបង្ខំស្ត្រីខ្មែរ ឱ្យធ្វើអំពើពេស្យាចារ ឬរកស៊ីផ្លូវភេទខុសច្បាប់ ក្រោមការល្បួងពួកគេឱ្យទៅធ្វើការនៅប្រទេសចិន តាមរយៈកម្មវិធីណាត់ជួបលើប្រព័ន្ធអនឡាញ កាលពីខែសីហា ឆ្នាំ២០២៤។
មន្ត្រីសង្គមស៊ីវិល សង្កេតឃើញថា ការជួញដូរមនុស្សនៅកម្ពុជា ធ្វើឡើងមានលក្ខណៈជាប្រព័ន្ធ ដោយក្រុមឧក្រិដ្ឋជនមានបណ្ដាញក្រោមរូបភាពជាក្រុមហ៊ុន ឬមេខ្យល់ ល្បួងពលរដ្ឋនៅក្នុងស្រុក ហើយនាំពួកគេទៅក្រៅប្រទេសដើម្បីជួញដូរ ដោយបង្ខំឱ្យធ្វើការខុសច្បាប់ ឬរកស៊ីផ្លូវភេទ។
អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ប្រាប់វិទ្យុអាស៊ីសេរី នៅថ្ងៃទី១៤ ខែកញ្ញា ថា ការបង្ក្រាបករណីជួញដូរមនុស្សទៅប្រទេសចិន មានការលំបាក និងស្មុគស្មាញ ពីព្រោះឧក្រិដ្ឋជន បានធ្វើសកម្មភាពនៅតាមទីតាំងច្រើនកន្លែង និងបង្កប់នៅក្នុងអាជីវកម្មមានដូចជា ក្រុមហ៊ុន និងកាស៊ីណូ ជាដើម។
អ្នកស្រី ជូ ប៊ុនអេង៖ «វា (ឧក្រិដ្ឋជន) មកកម្ពុជា ឬទៅឯណាហ្នឹង វាទាក់ទងនឹងបណ្ដាញរបស់ជនល្មើស។ វាមានគ្នានៅឯណា វាទៅកន្លែងហ្នឹង។ បើវារត់ចូលកម្ពុជា នៅមិនសុខ វារត់ចេញទៅវិញទៅ។ អ៊ីចឹង រាល់ថ្ងៃនេះ គឺជ្រួលច្រាល់អ៊ីចឹងឯង។ ប៉ុន្តែបើនិយាយថា មកតែកម្ពុជា គឺខ្ញុំសូមបដិសេធទាំងស្រុងហើយ គឺថាមិនមែនទេ ព្រោះនៅពេលដែលយើងទៅជួបគ្នា ប្រទេសណាក៏ត្អូញត្អែរដូចតែគ្នាទេ»។
អ្នកស្រីបន្តថា ទម្រង់នៃអំពើជួញដូរមនុស្ស ទៅប្រទេសចិន មានច្រើនរូបភាព មានដូចជា ការបោកបញ្ឆោតពលរដ្ឋខ្មែរ នៅតាមភូមិ ឱ្យទៅធ្វើការតាមរយៈមេខ្យល់ ដោយប្រាប់ថា នឹងទទួលបានប្រាក់ខែខ្ពស់ ការបញ្ឆោតរៀបការជាមួយបុរសជនជាតិចិន ដោយមានមេអណ្ដើកជាអ្នកណែនាំ និងធានាយកទៅរស់នៅប្រទេសចិនជាដើម។
ការលើកឡើងរបស់មន្ត្រីជាន់ខ្ពស់កម្ពុជានេះ ធ្វើឡើងបន្ទាប់ពីកម្ពុជាបានធ្វើបត្យាប័ន បញ្ជូនសមាជិកក្រុមឧក្រិដ្ឋជនជនជាតិចិនម្នាក់ ដែលគេស្គាល់ឈ្មោះថា លូ (Lu) ដែលបង្ខំស្ត្រីខ្មែរឱ្យធ្វើអំពើពេស្យាចារ ឬរកស៊ីផ្លូវភេទខុសច្បាប់ ក្រោមការល្បួងពួកគេឱ្យទៅធ្វើការនៅប្រទេសចិន តាមរយៈកម្មវិធីណាត់ជួបលើប្រព័ន្ធអនឡាញ កាលពីខែសីហា ឆ្នាំ២០២៤។
ទីភ្នាក់ងារព័ត៌មានរដ្ឋចិនXinhuaបានផ្សាយកាលពីថ្ងៃទី៩ ខែកញ្ញាថា អាជ្ញាធរចិនបានបញ្ជាក់ថា ឧក្រិដ្ឋជនរូបនេះ ត្រូវបានសមត្ថកិច្ចចិន ក្នុងខេត្តហូណាន (Hunan) តាមប្រមាញ់ចាប់ខ្លួនជាលក្ខណៈអន្តរជាតិ បន្ទាប់ពីរូបគេបានរត់គេចខ្លួនចូលប្រទេសកម្ពុជា អស់រយៈពេលជិតមួយឆ្នាំ ក្រោយពេលសមត្ថកិច្ចចិន បានបើកការបង្ក្រាបសំបុករបស់ពួកគេ កាលពីអំឡុងខែកញ្ញា ឆ្នាំ២០២៣ ដោយចាប់បានឧក្រិដ្ឋជនចំនួន ១០នាក់ និងរត់គេចខ្លួនម្នាក់ រហូតដល់ថ្ងៃទី១៥ ខែហា ឆ្នាំ២០២៤ ទើបសមត្ថកិច្ចកម្ពុជាចាប់ខ្លួនបាននៅទីក្រុងភ្នំពេញ និងបានបញ្ជូនខ្លួនឱ្យសមត្ថកិច្ចចិន កាលពីថ្ងៃទី២៨ ខែសីហា។
កាលពីពេលកន្លងទៅ ជនរងគ្រោះបានរៀបរាប់ថា ស្ត្រីខ្មែរភាគច្រើន ដែលចាញ់បោកទៅចិន បានទទួលរងទារុណកម្មទាំងផ្លូវចិត្ត និងរាងកាយរហូតបាក់ស្មារតី និងខ្លះទៀតបានធ្វើអត្តឃាត ក៏មាន។ នៅក្នុងនោះ ជនរងគ្រោះខ្លះ ត្រូវគេឃុំឃាំង វាយដំ បង្អត់អាហារ ហើយកាន់តែធ្ងន់ធ្ងរទៀតនោះ ពួកគេត្រូវបានគេបង្ខំឱ្យស៊ីឈ្នួលពពោះ និងខ្លះទៀត ត្រូវលក់បន្ត ពីមនុស្សម្នាក់ទៅមនុស្សម្នាក់ទៀត។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ថ្លែងថា ខ្សែបណ្ដាញក្រុមឧក្រិដ្ឋជន ដែលនៅក្នុងប្រទេសកម្ពុជា មានមួយចំនួន គឺជាក្រុមហ៊ុននាំពលករទៅក្រៅប្រទេសដែលមានចុះបញ្ជីត្រឹមត្រូវ ឬជាក្រុមហ៊ុនលួចលាក់ខុសច្បាប់។ លោក នី សុខា បញ្ជាក់ទៀតថា ក្នុងរយៈពេល ៧ខែ នៃឆ្នាំ២០២៤ នេះ មានករណីជួញដូរមនុស្សតែមួយប៉ុណ្ណោះ ដែលត្រូវបានបញ្ជូនទៅតុលាការ ហើយមកទល់ពេលនេះមិនទាន់មានលទ្ធផលផ្លូវការនៅឡើយ។
លោក នី សុខា៖ «ប្រសិនបើអ្នកដែលរកស៊ីអំពើមិនត្រឹមត្រូវ ដែលគេហៅថាអំពើមិនសុចរិតហ្នឹង ប្រព្រឹត្តបទល្មើសហ្នឹង ត្រូវបានរួចផុតពីសំណាញ់ច្បាប់ មិនត្រូវបានមានការផ្ដន្ទាទោស ខ្ញុំគិតថារឿងហ្នឹង មានការលំបាកនៅក្នុងការទប់ស្កាត់ដូចជា ក្នុងការបង្ក្រាប ឬក៏កាត់បន្ថយអំពើជួញដូរហ្នឹង»។
ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅថា ច្រាក់ (CHRAC) លោក រស់ សុដ្ឋា ថ្លែងថា ករណីឧក្រិដ្ឋជនជួញដូរមនុស្ស អាចមានបណ្ដាញ និងបក្ខពួកផ្សេងទៀត កំពុងសំងំធ្វើសកម្មភាពឆបោកនៅក្នុងប្រទេសកម្ពុជា ព្រោះឧក្រិដ្ឋជន ដែលរត់គេចខ្លួន បានជ្រើសយកទឹកដីកម្ពុជា ធ្វើជាកន្លែងលាក់ខ្លួន។ លោកស្នើឱ្យ រដ្ឋាភិបាលគួរបង្កើនការផ្សព្វផ្សាយ និងអប់រំពលរដ្ឋ ឱ្យយល់ដឹងពីបញ្ហាប្រឈម នៅពេលធ្វើចំណាកស្រុកទៅក្រៅប្រទេស ទាំងប្រថុយប្រថាននោះ។
លោក រស់ សុដ្ឋា៖ «ហើយរដ្ឋាភិបាលក៏ត្រូវមានកាតព្វកិច្ចមួយដែល គឺត្រៀមលក្ខណៈជួយអន្តរាគមន៍ទៅក្នុងប្រទេសទាំងនោះដែរ ដូចជា នៅប្រទេសចិនជាដើម ដូចជាទូតខ្មែរប្រចាំនៅសាធារណរដ្ឋចិន ត្រូវតែតាមសភាពការណ៍ហ្នឹងឱ្យជាប់ ហើយត្រូវតែជួយអន្តរាគមន៍ប្រជាពលរដ្ឋរបស់ខ្លួន»។
ក្នុងឆ្នាំ២០២៣ កម្ពុជាបានបង្ក្រាបអំពើជួញដូរមនុស្ស និងអំពើជួញដូរផ្លូវភេទសរុបចំនួន ១៣៨ករណី ដោយឃាត់ខ្លួនជនសង្ស័យបញ្ជូនទៅតុលាការចំនួន ១៦០នាក់។ ក្នុងនោះ សមត្ថកិច្ចកម្ពុជា បានសង្គ្រោះជនរងគ្រោះពីអំពើជួញដូរមនុស្សពីប្រទេសចិន (China) ថៃ (Thai) ឡាវ (Lao) ម៉ាឡេស៊ី (Malaysia) និងប្រទេសផ្សេងៗ ទៀតបានចំនួន ៤២៤នាក់ ក្នុងនោះមានស្ត្រីចំនួន ២៩៧នាក់។
ចំណែករបាយការណ៍ផ្នែកការងារស្ត្រី របស់សមាគមការពារសិទ្ធិមនុស្សអាដហុក វិញ គឺនៅរយៈពេល ៧ខែ ក្នុងឆ្នាំ២០២៤ អាដហុកបានជួយពលរដ្ឋខ្មែរ ពីអំពើជួញដូរមនុស្សចំនួន ៤៤ករណី ដែលជនរងគ្រោះសរុបចំនួន ៧៧នាក់ ក្នុងនោះមានស្ត្រី ៦៣នាក់។ ជនរងគ្រោះដោយអំពើជួញដូរមនុស្សនេះ គឺសង្គ្រោះពីប្រទេសចិន (China) ចំនួន ៤៨ភាគរយ ពីប្រទេសអារ៉ាប៊ីសាអ៊ូឌីត (Saudi Arabia) ៤០ភាគរយ និងសង្គ្រោះពីប្រទេសម៉ាឡេស៊ី (Malaysia) ចំនួន ១២ភាគរយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី