សង្គមស៊ីវិលស្នើអគ្គនាយកដ្ឋានពន្ធនាគារឆ្លើយតបភាពមិនប្រក្រតីលើកញ្ញា សេង ធារី
2024.11.30
(រូបឯកសារ) កញ្ញា សេង ធារី នៅក្នុងពន្ធនាគារខេត្តព្រះវិហារ កាលពីថ្ងៃទី១៥ ខែមិថុនា ឆ្នាំ២០២២។
រូបពីពលរដ្ឋ
សង្គមស៊ីវិលស្នើអគ្គនាយកដ្ឋានពន្ធនាគារនៃក្រសួងមហាផ្ទៃ ឱ្យចាត់វិធានការច្បាប់លើមន្ត្រីពាក់ព័ន្ធ ប្រសិនបើរកឃើញភាពមិនប្រក្រតីក្នុងពន្ធនាគារ តាមបណ្ដឹងរបស់កញ្ញា សេង ធារី។ ការស្នើនេះ ធ្វើឡើងបន្ទាប់ពីមន្ត្រីអគ្គនាយកដ្ឋានពន្ធនាគារអះអាងថា ក្រុមការងារជំនាញបានចុះស៊ើបអង្កេត ទាក់ទងនឹងភាពមិនប្រក្រតី ដែលបានប្ដឹងដោយមេធាវី និងជាសកម្មជនសិទ្ធិមនុស្សខ្មែរ-អាម៉េរិកាំង កញ្ញា សេង ធារី កាលពីពេលថ្មីៗ នេះ។
សង្គមស៊ីវិលជំរុញឱ្យអគ្គនាយកដ្ឋានពន្ធនាគារនៃក្រសួងមហាផ្ទៃ ចាត់វិធានការច្បាប់ដោយគ្មានការលើកលែង ប្រសិនបើការស៊ើបអង្កេតរបស់សមត្ថកិច្ចជំនាញរកឃើញថា មន្ត្រីបានរំលោភពានសិទ្ធិអ្នកជាប់ឃុំ និងប្រព្រឹត្តអំពើពុករលួយនៅក្នុងពន្ធនាគារ ដើម្បីផ្ដល់យុត្តិធម៌ដល់អ្នករងគ្រោះ។
កាលពីដើមខែវិច្ឆិកា ឆ្នាំ២០២៤ មេធាវី និងជាសកម្មជនសិទ្ធិមនុស្សខ្មែរ-អាម៉េរិកាំង ដែលកំពុងជាប់ឃុំក្នុងពន្ធនាគារព្រៃស កញ្ញា សេង ធារី បានដាក់បណ្ដឹងទៅអគ្គនាយកដ្ឋានពន្ធនាគារ ឱ្យរកខុសត្រូវអំពីភាពមិនប្រក្រតីមួយចំនួន ដូចជា ទារុណកម្មផ្លូវកាយ និងផ្លូវចិត្ត នៅក្នុងពន្ធនាគារ «ម២»។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក ឃៀង សុណាឌីន ប្រាប់វិទ្យុអាស៊ីសេរីនៅថ្ងៃទី៣០ ខែវិច្ឆិកាថា ក្រុមការងារជំនាញបានចុះស៊ើបអង្កេត និងស្រាវជ្រាវហើយ ពាក់ព័ន្ធនឹងបណ្ដឹងរបស់កញ្ញា សេង ធារី។
លោក ឃៀង សុណាឌីន៖ «ពាក្យបណ្ដឹងជនជាប់ឃុំ សេង ច័ន្ទធារី នេះ តាមការផ្ដល់ព័ត៌មានបឋមពីនាយកដ្ឋានជំនាញ គឺក្រុមការងារបានចុះអង្កេត និងស្រាវជ្រាវបឋមរួចហើយ បានរៀបចំលទ្ធផលនៃការអង្កេតស្រាវជ្រាវជារបាយការណ៍ ដើម្បីរាយការណ៍ជូនថ្នាក់ដឹកនាំអគ្គនាយកដ្ឋានពន្ធនាគារ និងបន្តថ្នាក់ដឹកនាំក្រសួងមហាផ្ទៃ ដើម្បីពិនិត្យសម្រេចសុំគោលការណ៍។ ដោយឡែក ពាក់ព័ន្ធលទ្ធផលអង្កេតបែបណានោះ ក៏ខ្ញុំបានមិនដឹងដែរ ព្រោះវាជាការងារក្រុមការងារជំនាញចុះ។ ហេតុនេះ ចំពោះមុខ គឺយើងរង់ចាំគោលការណ៍ដឹកនាំពីក្រសួងសិន ពាក់ព័ន្ធនឹងរឿងនេះ»។
កញ្ញា សេង ធារី ត្រូវបានអាជ្ញាធរបញ្ជូនពីពន្ធនាគារខេត្តព្រះវិហារ ទៅឃុំខ្លួននៅពន្ធនាគារ «ម២» នៅរាជធានីភ្នំពេញកាលពីថ្ងៃទី២៣ ខែកញ្ញា។ ការបញ្ជូនកញ្ញាទៅឃុំខ្លួននៅភ្នំពេញ ធ្វើឡើងបន្ទាប់ពីសហរដ្ឋអាមេរិក បានជំរុញឱ្យរដ្ឋាភិបាលលោក ហ៊ុន ម៉ាណែត បើកលំហសិទ្ធិសេរីភាពពលរដ្ឋឡើងវិញ ដើម្បីធានាថា ពលរដ្ឋខ្មែរទាំងអស់ អាចចូលរួមបានដោយសេរីក្នុងដំណើរការនយោបាយ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ប្រាប់វិទ្យុអាស៊ីសេរី នៅថ្ងៃទី៣០ ខែវិច្ឆិកាថា ព័ត៌មានដែលកញ្ញា សេង ធារី បញ្ចេញពីពន្ធនាគារ គឺជាពន្លឺសំខាន់ សម្រាប់អគ្គនាយកដ្ឋានពន្ធនាគារស្រាវជ្រាវ និងបង្ហាញការពិត ដើម្បីលើកកម្ពស់គុណភាពការងាររបស់មន្ត្រី និងការប្រតិបត្តិច្បាប់ឱ្យល្អប្រសើរ ព្រមទាំងបញ្ចៀសបញ្ហារំលោភសិទ្ធិអ្នកជាប់ឃុំកុំឱ្យកើតឡើងទៀត។
លោកថា ក្រុមមន្ត្រីជំនាញនៃអគ្គនាយកដ្ឋានពន្ធនាគារ ដែលចុះស៊ើបអង្កេតករណីនេះ គួរតែស្រាវជ្រាវ និងមានវិធានការ ដោយយកចិត្តទុកដាក់ដោយហ្មត់ចត់ និងធានាឱ្យបានតម្លាភាព ព្រោះបញ្ហាមិនប្រក្រតីមួយចំនួន រួមទាំងបញ្ហាអំពើពុករលួយ មិនងាយស្រាវជ្រាវទេ ប្រសិនបើអ្នកប្រព្រឹត្តនិងអ្នកសូកស៊ុមគ្រលុំគ្នា។
លោក នី សុខា៖ «បើសិនជារកឃើញភាពមិនប្រក្រតីនៃការប្រព្រឹត្តអំពើពុករលួយនោះ នេះជាបទល្មើសព្រហ្មទណ្ឌ អ្នកដែលប្រព្រឹត្តបទល្មើសពុករលួយ អ្នកដែលស៊ីសំណូក និងអ្នកដែលសូក ត្រូវតែទទួលរងការផ្ដន្ទាទោសទៅតាមផ្លូវច្បាប់ កុំឱ្យមានការលើកលែង ពីព្រោះបើសិនមានការលើកលែងចំពោះបញ្ហាទាំងអស់នេះ វាជះឥទ្ធិពលមិនល្អមកដល់សង្គមយើង ដល់យុត្តិធម៌នៅក្នុងបញ្ហាសង្គមយើង។ នេះជារឿងមួយដែលអង្គភាពប្រចាំអំពើត្រូវតែមានការចូលរួមសហការដែរ ប្រសិនបើមានពាក់ព័ន្ធនឹងទៅបញ្ហាអំពើពុករលួយ»។
ចំណែកឯនាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វិទ្យុអាស៊ីសេរីនៅថ្ងៃទី៣០ ខែវិច្ឆិកាថា ប្រសិនបើរកឃើញភាពមិនប្រក្រតីដូចបណ្ដឹងរបស់កញ្ញា សេង ធារី មែន អគ្គនាយកដ្ឋានពន្ធនាគារ ត្រូវចាត់វិធានការតាមផ្លូវច្បាប់ ដើម្បីផ្ដល់យុត្តិធម៌ដល់ភាគីពាក់ព័ន្ធ។ លើសពីនេះទៀត លោកស្នើឱ្យមានការធានាសុវត្ថិភាពដល់អ្នកជាប់ឃុំ ដើម្បីពួកគាត់ហ៊ានដាក់បណ្ដឹង អំពីភាពមិនប្រក្រតី ដែលកើតមានឡើងនៅក្នុងពន្ធនាគារ។
លោក អំ សំអាត៖ «យើងចង់ឃើញការស៊ើបអង្កេតប្រកបដោយតម្លាភាព និងយុត្តិធម៌ក្នុងការស្វែងរកការពិត និងការផ្ដល់នូវយុត្តិធម៌ទៅដល់ភាគីពាក់ព័ន្ធ ជាពិសេស បើសិនជាមានករណីឬក៏បញ្ហាកើតឡើងដែលមានការរំលោភពានសិទ្ធិជាប់ឃុំ ហើយនឹងភាពមិនប្រក្រតីនៅពន្ធនាគារណាមួយមែន។ អាហ្នឹងត្រូវតែអនុវត្តតាមនីតិវិធីតាមផ្លូវច្បាប់ ដើម្បីផ្ដល់យុត្តិធម៌ដល់ជនជាប់ឃុំ ក៏ដូចជាការពង្រឹងនៅក្នុងការអនុវត្តច្បាប់ និងគ្រប់គ្រងនៅក្នុងពន្ធនាគារឱ្យល្អប្រសើរ»។
គិតចាប់តាំងពីខែមិថុនា ឆ្នាំ២០២២ ដល់ខែវិច្ឆិកាឆ្នាំ២០២៤ មេធាវីនិងជាអ្នកជំនាញវិទ្យាសាស្ត្រនយោបាយអន្តរជាតិ កញ្ញា សេង ធារី ជាប់ពន្ធនាគារជាង ២ឆ្នាំហើយ។ ការកាត់សេចក្ដីឱ្យកញ្ញា សេង ធារី មានទោសបែបនេះ ត្រូវបានក្រុមសង្គមស៊ីវិលជាតិ និងសហគមន៍អន្តរជាតិសេរីប្រជាធិបតេយ្យ រួមមានអង្គការសហប្រជាជាតិ សហភាពអឺរ៉ុប និងសហរដ្ឋអាមេរិកជាដើម ចាត់ទុកថា ជាចំណាត់ការធ្វើទុក្ខបុកម្នេញផ្នែកនយោបាយ។
កាលពីថ្ងៃទី២៨ ខែវិច្ឆិកា សភាអឺរ៉ុបបានអំពាវនាវឱ្យអាជ្ញាធរកម្ពុជាដោះលែងរាល់អ្នកទោសនយោបាយ សកម្មជន អ្នកកាសែត អ្នកការពារសិទ្ធិមនុស្ស និងតួអង្គសង្គមស៊ីវិលដទៃទៀត ដែលត្រូវបានចោទប្រកាន់ក្រោមបទចោទ ដែលមានចរិតនយោបាយ។ សភាអឺរ៉ុបបានជំរុញសហភាពអឺរ៉ុប និងរដ្ឋសមាជិករបស់ខ្លួន ឱ្យចាត់វិធានការជាបន្ទាន់ និងប្រកបដោយប្រសិទ្ធភាព ដាក់ទណ្ឌកម្មជាក់លាក់លើក្រុមមនុស្សទាំងឡាយណា ដែលទទួលខុសត្រូវលើការរឹតត្បិតផ្នែកនយោបាយ និងដាក់សម្ពាធលើរដ្ឋាភិបាលកម្ពុជា រហូតទាល់តែអ្នកទោសនយោបាយទាំងអស់ត្រូវបានដោះលែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»