លោក សយ សាត មានបំណងចង់បួសវិញក្រោយពីអាជ្ញាធរនិងមន្ត្រីសង្ឃចាប់ផ្សឹកទាំងបង្ខំ
2023.03.11
អតីតព្រះសង្ឃ លោក សយ សាយ (រូបកណ្ដាលបង់កកន្សែងពណ៌ផ្កាឈូក) ដែលត្រូវអាជ្ញាធរបាត់ដំបងចាប់ផ្សឹកដោយបង្ខំ កាលពីថ្ងៃទី១០ មីនា ២០២៣។
រូប៖ ពលរដ្ឋផ្ដល់ឱ្យ
លោក សយ សាត ដែលត្រូវអាជ្ញាធរនិងមន្ត្រីសង្ឃខេត្តបាត់ដំបង ចាប់ផ្សឹកទាំងបង្ខំ បានប្ដេជ្ញាចិត្តថា លោកនឹងមិនចុះចាញ់ការគំរាមកំហែងនិងការកៀបសង្កត់ពីអាជ្ញាធរ ក្នុងការធ្វើសកម្មភាពផ្សេងៗដើម្បីស្វែងរកយុត្តិធម៌ជូនសង្គមឡើយ។ ការលើកឡើងនេះ ក្រោយពីលោក សយ សាត បានបាត់ដំណឹងអស់រយៈពេលជាច្រើនម៉ោង បន្ទាប់ពីត្រូវបានស្នងការនគរបាលខេត្តបាត់ដំបងដោះលែងវិញនៅរសៀលថ្ងៃទី១០ មីនា។
លោក សយ សាត ត្រូវបានសមត្ថកិច្ចស្នងការនគរបាលខេត្តបាត់ដំបងដោះលែងនៅម៉ោង៤រសៀលថ្ងៃទី១០មីនា ហើយដោយសារគ្មានផ្ទះសាច់ញាតិនៅក្នុងខេត្តបាត់ដំបង លោកក៏បានធ្វើដំណើរតាមរថយន្តឈ្នួលទៅផ្ទះក្មួយស្រីនៅឯស្រុកឧដុង្គ ខេត្តកំពង់ស្ពឺ។ លុះមកដល់ព្រឹកថ្ងៃទី១១ មីនា លោកក៏បានធ្វើដំណើរមកជួបអ្នកធ្វើធម្មយាត្រាផ្សេងទៀតនៅខេត្តបាត់ដំបងវិញ ដែលកំពុងរង់ចាំដំណឹងពីលោក។ លោក សយ សាត លើកឡើងថា មូលហេតុលោកបាត់ដំណឹងក្រោយពីត្រូវដោះលែង ដោយសារអាជ្ញាធរបានដកហូតទូរសព្ទរបស់លោកទុក។
លោក សយ សាត ប្រាប់វិទ្យុអាស៊ីសេរីនៅថ្ងៃទី១១ មីនាថា ថ្វីត្បិតនៅពេលនេះ លោកក្លាយជាគ្រហស្ថវិញក្ដី ប៉ុន្តែលោកនៅតែរក្សាសីល១០ និងមិនទទួលទានអាហារពេលល្ងាចឡើយរហូតលោកត្រូវអស់ជីវិត។ លោកបន្តថា ទៅថ្ងៃមុខ លោកមានជម្រើសពីរដែលត្រូវធ្វើបន្តសម្រាប់ជួយរកយុត្តិធម៌សង្គម ទី១ ព្យាយាមស្នើសុំបួសជាព្រះសង្ឃវិញ រួចបន្តធ្វើធម្មយាត្រាឱ្យបានចប់ដូចការគ្រោងទុក ទីពីរ បើពុំអាចបួសជាព្រះសង្ឃវិញទេ លោកប្រឡូកក្នុងឆាកនយោបាយដោយចូលរួមជាមួយគណបក្សនយោបាយណាមួយ។
លោក សយ សាត៖ «ខ្ញុំនឹងចូលគណបក្សណាដែលមានប្រជាប្រិយភាព មានការគាំទ្រ ហើយស្រលាញ់ពលរដ្ឋ មានគោលនយោបាយច្បាស់លាស់ ហើយស្ថាបនិកជាអ្នកស្មោះត្រង់នឹងពលរដ្ឋ ស្រលាញ់ពលរដ្ឋ ធ្វើទៅតាមលទ្ធិប្រជាធិបតេយ្យពិតប្រាកដ»។
អតីតព្រះសង្ឃ សយ សាត បានចាប់ផ្ដើមធ្វើធម្មយាត្រាចេញពីភ្នំពេញទៅព្រំដែនថៃ តាំងពីថ្ងៃទី១មីនា ដើម្បីផ្សព្វផ្សាយមេត្តាធម៌ សុំឱ្យសង្គមមានយុត្តិធម៌ ប៉ុន្តែលោកត្រូវបានអាជ្ញាធរខេត្តបាត់ដំបងចាប់ខ្លួននៅពេលធ្វើដំណើរទៅដល់ស្រុកមោងឫស្សី ដោយចោទប្រកាន់ពីបទធ្វើសកម្មភាពបម្រើឱ្យគណបក្សនយោបាយប្រឆាំង រួមទាំងកោះហៅអ្នកចូលរួមធ្វើធម្មយាត្រាចំនួន៤នាក់ទៀត ទៅសួរនាំនៅអធិការនគរបាលស្រុកមោងឫស្សី។
អ្នកសម្របសម្រួលអង្គការលីកាដូ (Licadho) ប្រចាំខេត្តបាត់ដំបង លោក អ៊ិន គង់ជិត បានលើកឡើងថា ការធ្វើធម្មយាត្រារបស់អតីតព្រះសង្ឃ សយ សាត ជាទង្វើស្របច្បាប់ ដោយសារជាការអនុវត្តតាមសិទ្ធិសេរីភាពសម្ដែងមតិ និងសិទ្ធិសេរីភាពនៃការដើរហើរ ក្នុងគោលបំណង ដើម្បីផ្សព្វផ្សាយឱ្យប្រជាពលរដ្ឋនិងដឹកនាំនយោបាយទាំងអស់ ប្រតិបត្តិតាមសីលធម៌ខ្មែរឡើងវិញ។
លោក អ៊ិន គង់ជិត៖ «សម្ដែងមតិនេះ លោកចង់ផ្សព្វផ្សាយមេត្តាធម៌ ផ្សព្វផ្សាយសីលធម៌ ដល់អ្នកដឹកនាំ ឱ្យមានការប្រតិបត្តិសីលធម៌ឡើងវិញ។ អ្នកដឹកនាំ ក៏ដូចជាប្រជាពលរដ្ឋទាំងអស់ ឱ្យទ្រទ្រង់ទៅលើសីលធម៌ នៃសង្គមខ្មែរយើង ដែលធ្លាប់មានប្រពៃណីល្អតាំងពីបុរាណមក»។
លោក សយ សាត អាយុ៧២ឆ្នាំ បានបួសជាលើកទី២ អំឡុងឆ្នាំ២០២២ នៅវត្តភ្នំផ្លោច ក្នុងឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ប៉ុន្តែត្រូវបានព្រះចៅអធិការវត្ត បណ្ដេញចេញពីវត្ត កាលពីថ្ងៃទី៩ ខែកុម្ភៈ ក្រោយចូលរួមធម្មយាត្រាលើកកម្ពស់សីលធម៌សង្គមជាមួយសមាគមគ្រូបង្រៀនកម្ពុជាឯករាជ្យ។ អតីតព្រះសង្ឃ សយ សាត ធ្លាប់បានបួសជាសង្ឃម្ដងរួចហើយអំឡុងឆ្នាំ២០០២ និងបានទ្រទ្រង់ភេទជាសង្ឃបានប្រហែល៥វស្សា រួចក៏លាចាកសិក្ខាបទវិញ ដើម្បីធ្វើសកម្មភាពការពារព្រៃឈើ ក្រោយមានការចូលរុករាននិងកាប់ទន្ទ្រានដីព្រៃមាតាធម្មជាតិនៅស្រុកឱវ៉ាល់ និងការចូលរួមការពារធនធានធម្មជាតិនៅតំបន់អារ៉ែងក្នុងខេត្តកោះកុងអស់ជាច្រើនឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត
អត្ថបទពេញនិយម
សិទ្ធិមនុស្ស
- ក្រុមប្រជាកសិករ និងសកម្មជនសង្គមយល់ឃើញថា លោក ថេង សាវឿន និងសហការីទទួលកំហុសដោយសារការរងសម្ពាធ
- សាលាដំបូងខេត្តរតនគិរី ដោះលែងលោក ថេង សាវឿន និងសហការី ២នាក់ ឱ្យនៅក្រៅឃុំបណ្ដោះអាសន្ន
- កូដករណាហ្គាវើលដ៍ជំរុញឱ្យរដ្ឋាភិបាលលុបចោលច្បាប់បាតុកម្មសន្តិវិធី បើមិនចង់ឃើញការធ្វើកូដកម្ម