អាជ្ញាធរវៀតណាមសួរនាំ និងឃ្លាំមើលព្រះសង្ឃខ្មែរក្រោមដែលនិមន្តពីអូស្ត្រាលីដើម្បីមើលថែញោមប្រុសឈឺធ្ងន់
2024.07.23
ព្រះសង្ឃខ្មែរក្រោមព្រះនាម រ៉ាន លី (ស្ដាំ) ដែលនិមន្តមកពីវត្តពុទ្ធមណ្ឌលខ្មែរក្រោម ក្រុងអាដឺឡែដ (Adelaide) នៅប្រទេសអូស្ត្រាលី ទៅលេងស្រុកកំណើត នៅកម្ពុជា។
រូប៖ ផ្ដល់ឱ្យ
អាជ្ញាធរវៀតណាមបានសាកសួរ និងឃ្លាំមើលព្រះសង្ឃខ្មែរក្រោមមួយអង្គទើបនិមន្តមកពីប្រទេសអូស្ត្រាលី ដើម្បីមើលថែញោមប្រុសដែលកំពុងឈឺធ្ងន់។ តំណាងរាស្ត្រអូស្ត្រាលី និងអ្នកការពារសិទ្ធិមនុស្សចាត់ទុកថា សកម្មភាពរបស់អាជ្ញាធរវៀតណាមនេះគឺជាការរំលោភលើសេរីភាពជាមូលដ្ឋានរបស់ពលរដ្ឋ។
ព្រះសង្ឃខ្មែរក្រោមព្រះនាម រ៉ាន លី ដែលនិមន្តមកពីវត្តពុទ្ធមណ្ឌលខ្មែរក្រោម ក្រុងអាដឺឡែដ (Adelaide) នៅប្រទេសអូស្ត្រាលី អះអាងថា អាជ្ញាធរវៀតណាមខេត្តឃ្លាំង ឬវៀតណាមហៅថា សុកត្រាំង (Soc Trang) បានឃ្លាំមើលព្រះអង្គ និងកោះហៅបងប្អូនរបស់ព្រះអង្គទៅសួរនាំអំពីព្រះអង្គជិត ១០ដង ហើយ ចាប់តាំងពីព្រះអង្គបាននិមន្តមកដល់ផ្ទះនៅកម្ពុជាក្រោម កាលពីថ្ងៃទី១៣ កក្កដា មក។
ព្រះតេជព្រះគុណ រ៉ាន លី មានថេរដីកាថា ព្រះអង្គបាននិមន្តមកពីប្រទេសអូស្ត្រាលីដើម្បីមកលេងញោមប្រុសរបស់ព្រះអង្គដែលកំពុងឈឺធ្ងន់ ហើយនៅពេលដែលព្រះអង្គមកដល់ស្រុកកំណើតក៏ត្រូវបានអាជ្ញាធរខេត្តឃ្លាំងកោះហៅទៅសួរនាំ។ ទោះជាយ៉ាងណាក្រោយពីព្រះអង្គបដិសេធមិនទៅតាមការកោះហៅរបស់អាជ្ញាធរមក អាជ្ញាធរបានកោះហៅបងប្អូនរបស់ព្រះអង្គជារៀងរាល់ថ្ងៃ និងដាក់កងកម្លាំងឃ្លាំមើលព្រះអង្គថែមទៀត។
ព្រះតេជព្រះគុណ រ៉ាន លី បន្តថា អាជ្ញាធរខេត្តឃ្លាំងក៏តាមដានព្រះអង្គនៅពេលព្រះអង្គធ្វើដំណើរដើម្បីទៅសុខទុក្ខសួរសាច់ញាតិ នៅក្នុងភូមិ និងទីកន្លែងផ្សេងៗ។ ព្រះអង្គចាត់ទុកសកម្មភាពរបស់អាជ្ញាធរជាការរំលោភលើសិទ្ធិសេរីភាពរបស់ព្រះអង្គ។
ព្រះតេជព្រះគុណ រ៉ាន លី៖ «នៅហ្នឹងផ្ទះក៏គេចាំនៅក្បែរៗហ្នឹងដល់ពេលយើង ចេញទៅក៏គេតាមដំណើរទៅមិនថាយើងមិនថាយប់មិនថាថ្ងៃ មិនថាជិតមិនថាឆ្ងាយគេតាមដំណើរទៅដូចជារំខានយើងច្រើន យើងទៅផ្ទះញាតិញោមគឺញាតិញោមភ័យខ្លាចមិនសូវចង់ហ៊ានទទួលយើងទេ គឺថាគាត់ភ័យភិតខ្លាំងណាស់គឺថាយើងទៅមានមនុស្សតាមដានយ៉ាងច្រើន អ៊ីចឹងហើយ២៤ម៉ោងហើយពីថ្ងៃទីមួយដល់ថ្ងៃទី០៩គឺមានមុខពួកហ្នឹងទាំងអស់»។
សមាជិកសភាអូស្ត្រាលីដើមកំណើតខ្មែរ លោក តាក់ ម៉េងហ៊ាង លើកឡើងថា នេះមិនមែនជាលើកទីមួយនោះទេដែលអាជ្ញាធរវៀតណាមធ្វើទុក្ខបុកម្នេញទៅលើពលរដ្ឋ និងសកម្មជនសិទ្ធិមនុស្សខ្មែរក្រោមដែលទៅលេងស្រុកកំណើតនៅកម្ពុជាក្រោម។ លោកថាព្រះតេជព្រះគុណ រ៉ាន លី អាចស្នើសុំជំនួយពីស្ថានទូត ឬកុងស៊ុលប្រទេសអូស្ត្រាលីប្រចាំប្រទេសវៀតណាម។
លោក តាក់ ម៉េងហ៊ាង៖ «នេះគឺជាក្ដីកង្វល់មួយបើទោះជាការដែលហៅប្រជាជននៅក្នុងភូមិទៅសួរពីជំនួបជាមួយអ្នកទៅពីក្រៅប្រទេសក៏ដោយ ក៏ប៉ុន្តែក៏ជាក្ដីបារម្ភនូវការរឹតបណ្ដឹងការជួបជុំ នូវការអបអរ ឬមួយគ្រាន់តែការសួរសុខទុក្ខញោមរបស់លោកនៅក្នុងករណីនេះគឺជារឿងមួយដែលគួរឱ្យសោកស្ដាយ»។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពីស្ថានទូតវៀតណាមប្រចាំនៅកម្ពុជាបានទេ នៅថ្ងៃទី២២ ខែកក្កដា។
ចំណែកអនុប្រធានសមាគមខ្មែរកម្ពុជាក្រោមដើម្បីសិទ្ធិមនុស្សនិងអភិវឌ្ឍន៍ លោកបណ្ឌិត សឺន ជុំជួន មានប្រសាសន៍ថា ករណីនេះគឺជាការរំលោភសិទ្ធិរបស់អាជ្ញាធរវៀតណាមទៅលើជនជាតិដើមខ្មែរក្រោម ដោយមិនឱ្យប្រើប្រាស់សេរីភាពជាមូលដ្ឋានរបស់ពួកគេទៅលេងស្រុកកំណើត។
បណ្ឌិត សឺន ជុំជួន៖ «គ្មានរឿងអីមួយដែលចាំបាច់ដែលព្រះអង្គត្រូវតែបង្ហាញអវត្តមានចំពោះអាជ្ញាធរមូលដ្ឋាន ឬក៏មន្ត្រីនគរបាលមូលដ្ឋានអីទេ អត់មានកាតព្វកិច្ចហ្នឹងទេ អ៊ីចឹងអ្វីដែលជាការបង្ខិតបង្ខំ ឬការសួរនាំឱ្យព្រះសង្ឃ ឬពលរដ្ឋខ្មែរដែលមកពីក្រៅប្រទេសនេះទៅលេងនូវស្រុកកំណើតហើយត្រូវមានការរាយការណ៍អីជាដើមវាអត់មានក្នុងគោលការណ៍ច្បាប់»។
មុននិមន្តទៅគង់នៅប្រទេសអូស្រ្តាលី ព្រះតេជព្រះគុណ រ៉ាន លី គឺជាព្រះសង្ឃមួយអង្គក្នុងចំណោមព្រះសង្ឃប្រមាណ២០០ អង្គផ្សេងទៀតនៅខេត្តព្រះត្រពាំងដែលធ្លាប់បាន និងខេត្តឃ្លាំងចេញមុខតវ៉ា នឹងការគាបសង្កត់របស់អាជ្ញាធរវៀតណាមមិនឱ្យរៀនអក្សរសាស្ត្រខ្មែរក្នុងឆ្នាំ២០០៧។ ព្រះអង្គ រ៉ាន លី បានភៀសព្រះកាយមកប្រទេសអូស្ត្រាលីក្នុងឆ្នាំដដែលនេះ ខណៈដែលព្រះសង្ឃផ្សេងទៀតត្រូវអាជ្ញាធរវៀតណាមបានចាប់ផ្សឹក និងគេចខ្លួនមកប្រទេសកម្ពុជា និងសុំសិទ្ធិជ្រកកោនក្នុងប្រទេសទីបី។
អាជ្ញាធរវៀតណាមនៅបន្តធ្វើទុកបុកម្នេញមកលើជនជាតិដើមខ្មែរក្រោម ហើយគិតមកទល់ពេលនេះ មានព្រះសង្ឃ សកម្មជន និងពលរដ្ឋខ្មែរក្រោមចំនួន ១៣ អង្គនាក់ហើយត្រូវបានអាជ្ញាធរវៀតណាមចាប់ដាក់ពន្ធនាគារ។ ខ្មែរក្រោមអះអាងថា ការកាត់ទោស ការចាប់ខ្លួន និងការធ្វើទុក្ខបុកម្នេញមកលើព្រះសង្ឃ និងសកម្មជនខ្មែរក្រោមទាំងអស់ នៅពេលនេះ ដោយសារតែអាជ្ញាធរវៀតណាមមិនសប្បាយចិត្តចំពោះសកម្មភាពផ្សព្វផ្សាយសៀវភៅប្រវត្តិសាស្ត្រ សិទ្ធិមនុស្ស សិទ្ធិជនជាតិដើម និងការបោះពុម្ពអាវយឺតដែលមានទង់ជាតិខ្មែរក្រោមចែកចាយទៅឱ្យពលរដ្ឋខ្មែរក្រោម និងការធ្វើរូបសំណាកឧកញ៉ា សឺន គុយ ដាក់តាំងដើម្បីឱ្យពលរដ្ឋខ្មែរក្រោមគោរពបូជាជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី