ពលរដ្ឋនៅបឹងតាមោកចោទប្រកាន់អាជ្ញាធរខណ្ឌព្រែកព្នៅថា ប្រើហិង្សា និងបំផ្លាញតូបពួកគាត់
2023.12.20
លោកស្រី គង់ តឿ ពលរដ្ឋរងគ្រោះនៅបឹងតាមោក និងកម្លាំងសន្តិសុខរាជធានីភ្នំពេញប្រទាញប្រទង់ និងរុញច្រានគ្នា ក្នុងពេលរារាំងការតវ៉ារបស់ពលរដ្ឋរឿងដីធ្លី នៅបឹងតាមោក កាលពីថ្ងៃទី១៩ ខែធ្នូ ឆ្នាំ២០២៣។
រូបពីពលរដ្ឋ
ពលរដ្ឋនៅបឹងតាមោកអះអាងថា អាជ្ញាធរខណ្ឌព្រែកព្នៅ ប្រើហិង្សាលើពួកគាត់ ដែលហ៊ានចេញមុខតវ៉ាមិនឱ្យអាជ្ញាធររុះរើតូបលក់ឥវ៉ាន់។ មន្ត្រីសង្គមស៊ីវិលថាសកម្មភាពរបស់អាជ្ញាធរដែលបានបំផ្លាញតូប និងបានប្រើអំពើហិង្សាលើពលរដ្ឋ គឺជាការរំលោភសិទ្ធិជាមូលដ្ឋាន។
ប្រជាពលរដ្ឋរស់នៅជាប់បឹងតាមោក ស្ថិតក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ កាលពីរសៀលថ្ងៃទី១៩ ខែធ្នូ បានប៉ះទង្គិចគ្នាដោយហិង្សាជាមួយអាជ្ញាធរខណ្ឌព្រែកព្នៅ បណ្ដាលឱ្យពលរដ្ឋមួយចំនួនរងរបួសស្រាល ក្នុងពេលក្រុមអាជ្ញាធរជិត ២០នាក់ បានចុះទៅរុះរើផ្ទះ និងតូបមួយកន្លែងដែលលក់ដូររបស់របរតិចតួចតាមចិញ្ចើមថ្នល់ ដើម្បីបានប្រាក់ចិញ្ចឹមជីវិត។
ក្រោយមានអំពើហិង្សា អាជ្ញាធរខណ្ឌព្រែកព្នៅបានចេញលិខិតសាជាថ្មីឱ្យម្ចាស់តូបរុះរើមុនរយៈពេលបីថ្ងៃមុនពេលដែលអាជ្ញាធរចុះរុះរើម្ដងទៀត។ ទោះជាយ៉ាងណា ប្រជាពលរដ្ឋអាស្រ័យផលពីបឹងតាមោកអះអាងថាពួកគាត់នឹងរួមគ្នាការពារ ទោះបីជាពួកគាត់អាចប្រឈមនឹងការចាប់ខ្លួន និងរងអំពើហិង្សាពីអាជ្ញាធរទៀតក៏ដោយ។
ពលរដ្ឋរងគ្រោះនៅបឹងតាមោក លោកស្រី គង់ តឿ លើកឡើងថា អាជ្ញាធរបានបំផ្លាញតូបលោកស្រី ដែលទើបនឹងសាងសង់សម្រាប់ផ្កាឈូក ខ្ចង ខ្ចៅ ដើម្បីចិញ្ចឹមគ្រួសារដែលមានជន ពិការ និងចាស់ជរាក្នុងបន្ទុក។ លោកស្រី គង់ តឿ ចាត់ទុកសកម្មភាពរបស់អាជ្ញាធរថា ជាអំពើឃោរឃៅ និងប្រើប្រាស់វិធីសាស្ត្រគ្រប់បែបយ៉ាងដើម្បីដេញពលរដ្ឋចេញ ដើម្បីកាត់ដីឱ្យអ្នកមានលុយមានអំណាច។
លោកស្រី គង់ តឿ៖ «មើលនេះ ដៃខ្ញុំទទឹកអស់ក្បាលជង្គង់ អូសខ្ញុំរហូត។ ខ្ញុំយល់ថា អាជ្ញាធរខណ្ឌព្រែកព្នៅរំលោភសិទ្ធិឃោរឃៅជាទីបំផុត គ្មានចិត្តបេះដូងខ្មែរសុទ្ធមិនមែនឈាមខ្មែរ ចង់លើសអា ពត ទៀត។ មិនអ៊ីចឹងមិនមែនគាត់មកធ្វើបាបប្រជាពលរដ្ឋឃើញខ្វិនឃើញខ្វង់ទាំងអស់»។
ពលរដ្ឋរងគ្រោះនៅបឹងតាមោកម្នាក់ទៀត លោកស្រី វ៉ន ផា លើកឡើងថា អាជ្ញាធរខណ្ឌព្រែកព្នៅបានប្រើហិង្សាលើពួកគាត់ដែលជាស្ត្រី ដែលចេញមុខតវ៉ាការពារតូបដែលជាមុខរបរចិញ្ចឹមជីវិតរបស់ពួកគាត់ប៉ុណ្ណោះ។ លោកស្រី វ៉ន ផា បន្តថារដ្ឋាភិបាលតែងតែលំអៀងទៅកាន់អ្នកមានលុយមានអំណាច ដែលអាចទទួលបានដីរាប់សិបហិកតារ ប៉ុន្តែរដ្ឋាភិបាលបែរជាបណ្ដេញពលរដ្ឋក្រីក្រចេញពីលំនៅឋានទៅវិញ។
លោកស្រី វ៉ន ផា៖ «ហេតុអ្វីក៏ប្រជាពលរដ្ឋខ្មែរធ្វើលើទឹកដីខ្មែរអត់បាន ហេតុអីក៏ខាងអាជ្ញាធរខណ្ឌមកបណ្ដេញពួកខ្ញុំមិនឱ្យពួកខ្ញុំធ្វើតូបលក់ដូរគ្រាន់តែចិញ្ចឹមជីវិតនេះ លក់ដូរតាមដងផ្លូវតាមតូបបន្តិចបន្តួចនេះ ហេតុអីក៏គាត់មិនឱ្យធ្វើបើបានលុប៣ពាន់ហិកតារលុបអស់»។
ជាមួយគ្នានេះ តំណាងពលរដ្ឋបឹងតាមោក លោកស្រី ស៊ា ដាវី លើកឡើងថា អាជ្ញាធរខណ្ឌព្រែកព្នៅនៅព្រឹកថ្ងៃទី២០ ធ្នូនេះ បានយកលិខិតជូនដំណឹងឱ្យគ្រួសារលោកស្រី គង់ តឿ រុះរើតូបរបស់ពួកគាត់ក្នុងរយៈពេលបីថ្ងៃ។ លោកស្រី ស៊ា ដាវី ថាប្រសិនអាជ្ញាធរខណ្ឌព្រែកព្នៅចុះមករុះរើម្ដងទៀត សហគមន៍នឹងរួមកម្លាំងគ្នាការពារតូបរបស់ពួកគាត់ ទោះប្រឈមនឹងរងអំពើហិង្សា ឬចាប់ខ្លួនក្ដី។
លោកស្រី ស៊ា ដាវី៖ «ព្រោះអីពួកបងមិនដឹងពឹងខាងណា បើអាជ្ញាធរខណ្ឌក្រុងសង្កាត់អ្នកចុះមកចាត់ការ បកធ្វើបាប មិនដឹងប្ដឹងនរណា មានតែកម្លាំងប្រជាពលរដ្ឋការពារផ្ទះសម្បែងហ្នឹងឯង ការពារទៅសាមគ្គីគ្នាការពារបានប៉ុន្មានយកប៉ុណ្ណឹង»។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពីអភិបាលរាជធានីភ្នំពេញ លោក ឃួង ស្រេង និងអភិបាលខណ្ឌព្រែកព្នៅ លោក ធឹម សំអាន បានទេនៅថ្ងៃទី២០ ធ្នូ។
ទាក់ទិនរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌល សិទ្ធិមនុស្សកម្ពុជា (CCHR) លោក វណ្ណ សុផាត ថ្លែងថា សកម្មភាពរបស់អាជ្ញាធរនេះគឺរំលោភសិទ្ធិលំនៅឋាន និងសិទ្ធិមូលដ្ឋានរបស់ពលរដ្ឋដែលរស់នៅលើដីតាំងពីមុនក្រុមហ៊ុន ដែលទទួលបានដីទៅទៀត។
លោក វណ្ណ សុផាត៖ «ឥឡូវចោទប្រកាន់ថាពួកគាត់រស់នៅដោយលើដីសាធារណៈរបស់រដ្ឋ ចុះបើដីសាធារណៈរបស់រដ្ឋអាចធ្វើអនុប្រយោគទៅជាដីឯកជន ហើយទៅឱ្យក្រុមហ៊ុនឯកជនឱ្យអ្នកមានអំណាច ឱ្យទៅសែស្រឡាយបក្សពួកអ្នកមានអំណាចបាន ប៉ុន្តែប្រជាពលរដ្ឋបែរឱ្យមិនសួរថាអាហ្នឹងមកពីហេតុអ្វី»។
ក្នុងពេលអាជ្ញាធររកវិធីគ្រប់បែបយ៉ាង ដើម្បីបណ្ដេញពលរដ្ឋចេញពីតំបន់បឹងតាមោកនោះ អតីតលោកនាយករដ្ឋមន្ត្រី ហ៊ុន សែន ចេញអនុក្រឹត្យបានកាត់ផ្ទៃបឹងតាមោកចំនួន ៧៧ដង ដែលមានទំហំជាង ២ពាន់ ៤រយហិកតា (២.៤០៤) នៃទំហំសរុប (៣.២៣៩) ហិកតារ ដោយបានកាត់ឱ្យទៅ សែស្រឡាយរបស់លោក និងមន្ត្រីជាន់ខ្ពស់របស់លោក នៅក្នុងជួរបក្សប្រជាជនកម្ពុជា ព្រមទាំងមន្ត្រីជាន់ខ្ពស់នៃកងរាជអាវុធហត្ថ និងអ្នកជំនួញជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
