ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
2024.09.25
លោក ឌឿន សុវណ្ណ ជារដ្ឋលេខាធិការក្រសួងមហាផ្ទៃ និងជាឪពុកលោក ឌឿន ឧត្តមសេនីយ៍ ដែលតុលាការអូស្ត្រាលី កាត់ទោសឲ្យជាប់គុក ១២ឆ្នាំ រឿងបើកឡានក្នុងលឿនបំពានភ្លើងស្តុបក្រហម ហើយបុកប្តីប្រពន្ធមួយគូស្លាប់ កាលពីព្រលប់ថ្ងៃទី១៥ ខែឧសភា ឆ្នាំ២០២៣។
រូប៖ ហ្វេសប៊ុកគណបក្សប្រជាជនកម្ពុជាឃុំព្រៃស្នៀត ខេត្តព្រៃវែង/2023-08-12
អគ្គលេខាធិការដ្ឋានក្រសួងមហាផ្ទៃ ចេញសេចក្ដីបញ្ជាក់ព័ត៌មាន កាលពីថ្ងៃទី២៤ កញ្ញាថា កូនប្រុសរបស់មន្ត្រីជាន់ខ្ពស់ក្រសួងមហាផ្ទៃ ដែលត្រូវបានតុលាការអូស្ត្រាលី កាត់ទោសឲ្យជាប់គុក ១២ឆ្នាំ និង ៩ខែ ដោយសារបើកឡានបុកមនុស្សស្លាប់ចំនួនពីរនាក់នោះ មានឈ្មោះថា ឌឿន ឧត្ដមសេនីយ៍ និងពុំមែនជាមន្ត្រីស្ថិតក្នុងក្របខ័ណ្ឌ នៃអគ្គលេខាធិការដ្ឋានក្រសួងមហាផ្ទៃឡើយ។ ចំណែកឈ្មោះ ឌឿន ឧត្ដម វិញ អគ្គលេខាធិការដ្ឋានក្រសួងមហាផ្ទៃ អះអាងថា ជារូបវន្តបុគ្គលផ្សេង ដែលមានតួនាទីជាអនុប្រធាននាយកដ្ឋានសរុប និងស្ថិតិនៃអគ្គលេខាធិការដ្ឋាន ហើយកំពុងបំពេញការងារជាធម្មតា។
វីឌីអូស្ដីអំពីលោក ឌឿន ឧត្ដមសេនីយ៍ (ស្ដាំ) ក្នុងករណីបើកឡានបំពានភ្លើងក្រហម ហើយបង្កគ្រោះថ្នាក់ចរាចរណ៍សម្លាប់ប្ដីប្រពន្ធជនជាតិនេប៉ាល់ វ័យក្មេងមួយគូ នៅប្រទេសអូស្ត្រាលី កាលពីព្រលប់ថ្ងៃទី១៥ ខែឧសភា ឆ្នាំ២០២៣។
ទោះជាយ៉ាងណាក្ដី អគ្គលេខាធិការដ្ឋានក្រសួងមហាផ្ទៃ ពុំបានបញ្ជាក់លម្អិតអំពីប្រវត្តិលោក ឌឿន ឧត្ដមសេនីយ៍ ឬទំនាក់ទំនងរវាងបុរសទាំងពីរនេះឡើយ ដោយព្យាយាមការពារកិត្តិយស សេចក្ដីថ្លៃថ្នូររបស់កូនប្រុសរដ្ឋលេខាធិការក្រសួងមហាផ្ទៃ និងស្ថាប័នរបស់ខ្លួន។
ការចេញសេចក្ដីបញ្ជាក់ព័ត៌មាននេះ គឺបន្ទាប់ពីវិទ្យុអាស៊ីសេរី និងបណ្ដាញសារព័ត៌មានអូស្ត្រាលី បានចុះផ្សាយថា បុរសដែលតុលាការអូស្ត្រាលីកាត់ទោសឲ្យ ជាប់គុកជាង ១២ឆ្នាំ ដោយសារបើកឡានបុកមនុស្សស្លាប់ពីរនាក់នោះ មានឈ្មោះថា ឌឿន ឧត្តម។ កន្លងមក វិទ្យុអាស៊ីសេរី បានព្យាយាមទាក់ទងក្រុមអ្នកនាំពាក្យក្រសួងមហាផ្ទៃ រួមទាំងអ្នកនាំពាក្យរងក្រសួងមហាផ្ទៃលោក ទូច សុឃៈ ដើម្បីសុំបញ្ជាក់បន្ថែមជុំវិញរឿងនេះ ប៉ុន្តែ ពុំមានអ្នកទទួលទូរស័ព្ទ និងឆ្លើយតបសំណួរតាម បណ្ដាញសង្គមតេឡេក្រាម (Telegram) នោះទេ។
កេរ្តិ៍ឈ្មោះរបស់លោក ឌឿន សុវណ្ណ ចាប់ផ្ដើមល្បីសុះសាយឡើងវិញ ក្នុងរយៈពេលប៉ុន្មានថ្ងៃចុងក្រោយនេះ ក្រោយពីកូនប្រុសពៅរបស់លោក ឈ្មោះ ឌឿន ឧត្ដមសេនីយ៍ ត្រូវបានតុលាការអូស្ត្រាលី កាលពីថ្ងៃទី២០ ខែកញ្ញា កាត់ទោសឲ្យជាប់ពន្ធនាគារជាង ១២ឆ្នាំពាក់ព័ន្ធនឹងករណីបើកឡានក្នុងល្បឿនលឿនបំពានភ្លើងស្តុបក្រហម ហើយបណ្ដាលឲ្យបុកប្ដីប្រពន្ធមួយគូស្លាប់ នៅទីក្រុងម៉ែលប៊ន (Melbourne)។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ