សាលាឧទ្ធរណ៍ភ្នំពេញបដិសេធសំណើសុំនៅក្រៅឃុំរបស់កញ្ញា ឈឹម ស៊ីថរ
2023.02.14
កញ្ញា ឈឹម ស៊ីថរ (ដើរមុខ) ពេលមកចូលរួមសវនាការ កាលពីថ្ងៃទី២៨ ខែធ្នូ ២០២២។
រូប៖ ពលរដ្ឋផ្ដល់ឱ្យ
សាលាឧទ្ធរណ៍រាជធានីភ្នំពេញបដិសេធសំណើនៅក្រៅឃុំរបស់កញ្ញា ឈឹម ស៊ីថរ ទុកជាបានការតាមការសម្រេចរបស់តុលាការជាន់ទាបដដែល។
ការសម្រេចនេះធ្វើឡើងបន្ទាប់ពីតុលាការបើកសវនាការជំនុំជម្រះក្ដីសុំនៅក្រៅឃុំបណ្ដោះអាសន្នតាមសំណើរបស់មេធាវីការពារក្ដី កញ្ញា ឈឹម ស៊ីថរ នៅព្រឹកថ្ងៃទី១៣ កុម្ភៈ។ ក្រុមកូដករចាត់ទុកការសម្រេចរបស់តុលាការថា ជារឿងអយុត្តិធម៌ និងមិនឈរលើគោលការណ៍ប្រជាធិបតេយ្យ។
ចៅក្រមសាលាឧទ្ធរណ៍ រាជធានីភ្នំពេញ ផ្ដល់សំអាងថា ការសម្រេចឱ្យ កញ្ញា ឈឹម ស៊ីថរ បន្តជាប់ឃុំ គឺដើម្បីតាមដានលើសំណុំរឿងនេះ និងរង់ចាំការជំនុំជម្រះពីតុលាការម្ដងទៀត។
ទោះបីជា កញ្ញា ឈឹម ស៊ីថរ មិនអនុញ្ញាតឱ្យនៅក្រៅឃុំក្ដី ក៏កញ្ញា មិនតក់ស្លុតនឹងការសម្រេចរបស់តុលាការនេះឡើយ ។ ខណៈពេលសមត្ថកិច្ចដឹក កញ្ញា ឈឹម ស៊ីថរ ត្រឡប់ទៅពន្ធនាគារព្រៃស (ម២) វិញ កញ្ញាញញឹមបែរទៅរកក្រុមកូដករ ដែលឈរត្រៀបត្រានៅខាងមុខ សាលាឧទ្ធរណ៍បញ្ជាក់ពីភាពស្វាហាប់ និងឆន្ទៈមនសិការរបស់កញ្ញា។
ជុំវិញរឿងនេះ ប្រធានសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា មានប្រសាសន៍ថា កញ្ញា ឈឹម ស៊ីថរ មិនបានប្រព្រឹត្តខុសច្បាប់នោះទេ ដូច្នេះតុលាការគួរតែដោះលែងកញ្ញាឱ្យនៅក្រៅឃុំ បណ្ដោះអាសន្នតាមការស្នើសុំរបស់មេធាវីការពារក្ដីកញ្ញា ឈឹម ស៊ីថរ ពីព្រោះតាមច្បាប់ កញ្ញាគ្មានទោសអ្វីឡើយ។ លោកបញ្ជាក់ថា ដោយសារតុលាការមិនបានប្រាប់ពីបម្រាបដល់កញ្ញា ដូច្នេះការចាប់ចងនេះ គឺជារឿងអយុត្តិធម៌ ហើយតុលាការគួរតែកាត់ក្ដីដោយអព្យាក្រឹត្យ។
លោក រស់ សុដ្ឋា៖ «បើកាលណាយើងធ្វើអ៊ីចឹង វាគេហៅថា ប្រទេសមួយស្តង់ដារពីរហើយ ដល់អ៊ីចឹងទៅការអនុវត្តនីតិវិធីអត់ជាក់លាក់ ដូច្នេះគិតថា គួរតែបាននៅក្រៅឃុំខុសពីនីតិវិធីច្បាប់ បើយើងមើលទាំងអស់គ្នាទៅតាមអង្គនៃច្បាប់ បើសិនជាមានការភាពត្រឹមត្រូវវាលុះត្រាបង្ហាញឱ្យឃើញថា តុលាការមានកិច្ចព្រមព្រៀងជាលាយលក្ខណ៍អក្សរជាមួយ ឈឹម ស៊ីថរ បើសិនអត់ហើយឃើញភាពមិនប្រក្រតីក្នុងការអនុវត្តច្បាប់ ទាក់ទងដូចករណីដូចប្អូនស្រី ឈឹម ស៊ីថរ ហ្នឹងបាទ»។
សវនាការនៅព្រឹកថ្ងៃទី១៣ កុម្ភៈ ខុសពីរាល់ដងដោយមានការប្ដូរទីតាំងពីមហាវិថីសម្ដេច សុធារស សង្កាត់ជ័យជំនះ ខណ្ឌដូនពេញ មកផ្លូវលោកតាក្រហមក ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ ក្បែរអគារសាលាយុត្តិធម៌វិញ។ ថ្វីដ្បិតតែមានការផ្លាស់ប្ដូរទីតាំងក៏ដោយ ក៏ក្រុមកូដករណាហ្គា វើលដ៍ជាង ៥០នាក់ និងអង្គការសង្គមស៊ីវិលមួយចំនួន នៅឃ្លាំមើលពីក្រៅរបង និងស្រែកផ្ដល់កម្លាំងចិត្តឱ្យកញ្ញា ឈឹម ស៊ីថរ ដែរ។
តំណាងកូដករម្នាក់ គឺលោកស្រី រី សុវណ្ណឌី ថ្លែងថា លោកស្រីសោកស្ដាយដែលតុលាការមិនឱ្យ កញ្ញា ឈឹម ស៊ីថរ នៅក្រៅឃុំ។ លោកស្រីបន្តថា ការសម្រេចបែបនេះ មិនយុត្តិធម៌សម្រាប់កញ្ញាឡើយ ពីតុលាការមិនបានប្រាប់ពីបម្រាប ដែលហាមឃាត់នោះទេ។
លោកស្រី រី សុវណ្ណឌី៖ «សូមឱ្យសាធារណជនទាំងអស់ជួយតាមដាន ពីព្រោះឥឡូវនេះ វានៅក្នុងករណី វានៅអត់ទាន់ច្បាស់ គេកាត់ក្ដីយើងម៉េចទេ។ ប៉ុន្តែ បើមានការចូលរួមពីមហាជនផ្សេងច្រើន អ៊ីចឹងការឈឺឆ្អាលទាំងអស់ហ្នឹង វាធ្វើឱ្យការកាត់ក្ដី ក៏អាចជួយឱ្យមានភាពយុត្តិធម៌ជាងដូចរាល់ថ្ងៃហ្នឹងដែរ»។
កញ្ញា ឈឹម ស៊ីថរ និងសមាជិកសហជីពផ្សេងទៀត ត្រូវបានដោះលែងឱ្យនៅក្រៅឃុំ កាលពីខែមីនា ឆ្នាំ២០២២ ប៉ុន្តែសមាជិកសហជីព អះអាងថា ពួកគាត់មិនបានទទួលការជូនដំណឹង និងដីកាដាក់ឱ្យស្ថិតក្រោមការត្រួតពិនិត្យតាមផ្លូវតុលាការឡើយ។ សមត្ថកិច្ចចាប់ខ្លួនកញ្ញា ឈឹម ស៊ីថរ ជាលើកទីពីរ កាលពីខែវិច្ឆិកា ឆ្នាំ២០២២ បញ្ជូនទៅពន្ធនាគារព្រៃសវិញ ក្រោយពី កញ្ញា វិលត្រឡប់មកពីការចូលរួមកិច្ចប្រជុំនៅប្រទេសអូស្ត្រាលី (Australia) ក្រោមបទចោទល្មើសបម្រាប ពីការត្រួតពិនិត្យរបស់តុលាការ។ ប៉ុន្តែមេធាវី និងកញ្ញា ឈឹម ស៊ីថរ អះអាងថា ខ្លួនមិនដឹងពីបម្រាមរបស់តុលាការឡើយ។ ចំណែកឯកូដករប្រមាណ ១០នាក់ទៀត កំពុងជាប់បណ្ដឹងនៅតុលាការជាបន្តបន្ទាប់ ។
ក្រុមកូដករលើកឡើងថា ការណ៍ដែលតុលាការមិនព្រមដាក់ឱ្យកញ្ញា ឈឹម ស៊ីថរ នៅក្រៅឃុំ គឺដោយសារចង់បង្ខំកម្មករទាំងនោះ ឱ្យទទួលយកសំណងរួចបញ្ចប់រឿងជាមួយថៅកែក្រុមហ៊ុនណាហ្គាវើលដ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត