អ្នកវិភាគ​ថា លោក ហ៊ុន ម៉ាណែត ដឹកនាំ​ប្រទេស​ដើម្បី​ការពារ​បក្ខពួក ជាជាង​លើក​កម្ពស់​ជីវភាព​ពលរដ្ឋ

ដោយ មាន ឫទ្ធិ
2023.11.20
អ្នកវិភាគ​ថា លោក ហ៊ុន ម៉ាណែត ដឹកនាំ​ប្រទេស​ដើម្បី​ការពារ​បក្ខពួក ជាជាង​លើក​កម្ពស់​ជីវភាព​ពលរដ្ឋ លោកនាយករដ្ឋមន្ត្រី ហ៊ុន ម៉ាណែត (រូបកណ្ដាលមុខគេ) ចូលរួមប្រកាសកម្មវិធីគោលនយោបាយអាទិភាព នៅថ្ងៃទី២០ វិច្ឆិកា ២០២៣។
រូប៖ ហ្វេសប៊ុកលោក ហ៊ុន ម៉ាណែត

អ្នកវិភាគ​លើកឡើង​ថា ក្រោយពី​បាន​តំណែង​ជា​នាយករដ្ឋមន្ត្រី លោក ហ៊ុន ម៉ាណែត មិន​បាន​ដឹកនាំ​រដ្ឋាភិបាល​ដើម្បី​លើកកម្ពស់​សេដ្ឋកិច្ច​ជាតិ និង​ជីវភាព​ប្រជា​ពលរដ្ឋ​នោះ​ឡើយ ផ្ទុយ​ទៅ​វិញ​លោក ហ៊ុន ម៉ាណែត គ្រាន់តែ​បន្ត​ការពារ​ផលប្រយោជន៍​បក្ខពួក និង​គ្រួសារ​ត្រកូល​ហ៊ុន​តែប៉ុណ្ណោះ​។ អ្នក​តាមដាន​ភូមិសាស្ត្រ​នយោបាយ​លើកឡើង​ថា ប្រជាពលរដ្ឋ នឹង​ប្រឈម​ជីវភាព​កាន់តែ​លំបាក បើសិនជា​រដ្ឋាភិបាល​លោក ហ៊ុន ម៉ាណែត នៅតែ​បន្ត​ពឹងផ្អែក​ប្រទេស​ចិន និង​មិន​បញ្ឈប់​ការ​រំលោភ​សិទ្ធិមនុស្ស។

គិត​រហូត​មក​ដល់​ចុង​ខែ​វិច្ឆិកា​នេះ នាយករដ្ឋមន្ត្រី​ថ្មី លោក ហ៊ុន ម៉ាណែត បាន​ឡើង​មក​ដឹកនាំ​រដ្ឋាភិបាល​បន្ត​ពី​ឪពុក​របស់​លោក​អស់​រយៈពេល​ជិត​១០០​ថ្ងៃ​មក​ហើយ។

អ្នក​អត្ថាធិប្បាយ លោក គឹម សុខ ប្រាប់​វិទ្យុ​អាស៊ីសេរី​នៅ​ថ្ងៃទី​១៩ ខែវិច្ឆិកា ថា ក្រោយពី​ឡើង​កាន់​អំណាច លោក ហ៊ុន ម៉ាណែត មិន​បាន​ធ្វើ​ការងារ​ជាក់ស្ដែង​ដើម្បី​លើកកម្ពស់​ជីវភាព​របស់​ប្រជាពលរដ្ឋ​នោះ​ឡើយ​។ លោក​បន្ត​ថា ការងារ​ដែល​នាយករដ្ឋមន្ត្រី​ថ្មី​រូប​នេះ​ធ្វើ​ភាគច្រើន​គ្រាន់តែ​ជា​ការ​រៀន​ថ្លែង​សន្ទរកថា​ឱ្យ​រត់មាត់ និង​ដើរ​ខ្ចី​លុយ​បរទេស ដើម្បី​ការពារ​អំណាច​របស់​ខ្លួន​តែប៉ុណ្ណោះ។

ប៉ុន្តែ​រឿង​ទាំងអស់​នេះ​សុទ្ធតែ​បរាជ័យ ពីព្រោះ​សុន្ទរកថា​របស់​លោក ហ៊ុន ម៉ាណែត ក៏​ប្រជាពលរដ្ឋ​មិន​ចាប់អារម្មណ៍ ចំណែកឯ​ការ​ទៅ​ខ្ចី​លុយ​បរទេស ឧទាហរណ៍​ខ្ចី​លុយ​ចិន​ជាដើម មក​ដល់​ពេល​នេះ​អត់​មាន​សញ្ញា​ថា ចិន​ឱ្យ​លុយ​ខ្ចី​នោះ​ទេ ដូច្នេះ​រដ្ឋាភិបាល ហ៊ុន ម៉ាណែត ធ្លាក់​ទៅ​ក្នុង​វិបត្តិ​យ៉ាង​ជ្រៅ ដោះស្រាយ​មិន​រួច​ទេ។ បញ្ហា​នយោបាយ​ក៏​មិន​ហ៊ាន​ដោះស្រាយ បញ្ហា​សេដ្ឋកិច្ច ទេសចរណ៍​កាន់តែ​វក់វី។

លោក គឹម សុខ បន្ត​ថា បញ្ហា​ចម្បង​ដែល​ធ្វើ​ឱ្យ​ប្រជាពលរដ្ឋ​កាន់តែ​ប្រឈម​នឹង​ជីវភាព​លំបាកលំបិន ចាប់តាំងពី​លោក​ឡើង​កាន់​អំណាច​នោះ គឺ​ដោយសារតែ​លោក ហ៊ុន ម៉ាណែត យក​គំរូ​នៃ​ការដឹកនាំ​ប្រទេស​តាម​បែប​បក្ខពួក​និយម ពុករលួយ​ជា​ប្រព័ន្ធ​តាម​ឪពុក​របស់​លោក គឺ លោក ហ៊ុន សែន។

លោក គឹម សុខ៖ «កាលណា​មិន​ដោះស្រាយ​វិបត្តិ​ការងារ វិបត្តិ​សេដ្ឋកិច្ច​នឹង​កើតមាន​កាន់តែ​ធំ ធ្លាក់​ទៅដល់​វិបត្តិ​ហិរញ្ញវត្ថុ​ទៅទៀត រីឯ​វិបត្តិ​នយោបាយ​វិញ ខ្ញុំ​មើលទៅ​គាត់​ចាំ​ស្ដាប់​តែ​ខ្យល់​ពី​ឪពុក​របស់​គាត់​សុទ្ធសាធ គ្មាន​សមត្ថភាព​ទាល់តែសោះ»

ក្រៅពី​បន្ត​រឹតត្បិត​សេរីភាព​នយោបាយ តាមរយៈ​ការ​មិន​ចេញ​លិខិត​ទុតិយតា​នៃ​ប្រកាស​ចុះបញ្ជី​គណបក្ស​ភ្លើងទៀន នៅ​ក្រសួងមហាផ្ទៃ ដើម្បី​ឱ្យ​គណបក្ស​នេះ​អាច​ចូលរួម​ប្រកួតប្រជែង​ការ​បោះឆ្នោត​ជ្រើសរើស​ក្រុមប្រឹក្សា​ខេត្ត​ក្រុង ស្រុក​ខណ្ឌ ក្នុង​ឆ្នាំ​២០២៤ ខាងមុខ​ហើយ​នោះ រដ្ឋាភិបាល​លោក ហ៊ុន ម៉ាណែត ក៏​នៅតែ​បន្ត​ធ្វើ​នយោបាយ​ការបរទេស​លំអៀង​ទៅ​ប្រទេស​ចិន​។ បន្ថែម​ពី​នេះ រដ្ឋាភិបាល​លោក ហ៊ុន ម៉ាណែត ក៏​នៅតែ​មិនទាន់​បង្ហាញ​ឱ្យ​សហគមន៍​អន្តរជាតិ​អស់ចិត្ត អំពី​ការ​អភិវឌ្ឍ​កំពង់ផែ​កងទ័ពជើងទឹក​រាម នៅក្នុង​ខេត្ត​ព្រះសីហនុ និង​កំពង់ផែ​តារា​សាគរ នៅក្នុង​ខេត្ត​កោះកុង ដែល​ត្រូវ​បាន​គេ​សង្ស័យ​ថា អាចជា​ទីតាំង​យុទ្ធសាស្ត្រ​របស់​យោធា​ចិន​ផង​ដែរ​។​

ជុំវិញ​រឿង​នេះ អ្នក​តាមដាន​ភូមិសាស្ត្រ​នយោបាយ​តំបន់​អាស៊ីអាគ្នេយ៍ និង​ប៉ាស៊ីហ្វិក លោក សេង វណ្ណលី លើកឡើង​ថា បញ្ហា​ចម្បង​ដែល​ធ្វើ​ឱ្យ​កម្ពុជា​កាន់តែ​ប្រឈម​នឹង​វិបត្តិ​សេដ្ឋកិច្ច គឺ​មិនមែន​បណ្ដាលមកពី​ផល​ប៉ះពាល់​ពី​ការ​រីក​រាលដាល​ជំងឺ​កូវីដ​១៩ និង​បញ្ហា​សង្គ្រាម​នៅ​អ៊ុយក្រែន (Ukrain) និង​តំបន់​ហ្គាហ្សា (Gaza) នោះ​ទេ​។ លោក​បន្ត​ថា មូលហេតុ​ដែល​ធ្វើ​ឱ្យ​កម្ពុជា កាន់តែ​ប្រឈម​នឹង​វិបត្តិ​សេដ្ឋកិច្ច​នោះ​គឺ បញ្ហា​អំពើពុករលួយ ការរំលោភ​សិទ្ធិមនុស្ស និង​កង្វះ​ធនធានមនុស្ស​។​

លោក សេង វណ្ណលី៖ «ថ្វីត្បិតតែ​រដ្ឋាភិបាល​ថ្មី​ហ្នឹង​ព្យាយាម​ជំ​រុះ និង​មាន​ការ​ជួយ​សម្រួល​ដល់​លំហូរ​វិនិយោគ​ពី​បរទេស ក៏ប៉ុន្តែ​ស្ថានភាព​នយោបាយ និង​ការរំលោភ​សិទ្ធិមនុស្ស ហើយនឹង​បញ្ហា​ផ្សេងៗ​ដូចជា សាយ​ប័រ​ក្រាម (Cyber Crime) ឧក្រិដ្ឋកម្ម​ឆ្លងដែន វា​រាំងស្ទះ​ដល់​ការអនុវត្ត​ផែនការ​សេដ្ឋកិច្ច​របស់​រដ្ឋាភិបាល​ថ្មី មានន័យថា​ស្ថានភាព​នៅក្នុង​ស្រុក​វា​ធ្វើ​ឱ្យ​ប៉ះពាល់​ដល់​មុខមាត់ និង​ភាព​ជឿជាក់​របស់​វិនិយោគិន​បរទេស មក​បោះទុន​នៅ​ស្រុក​ខ្មែរ»

លោក សេង វណ្ណលី បន្ថែម​ថា ដោយសារតែ​សេដ្ឋកិច្ច​កម្ពុជា​ភាគច្រើន​ពឹងផ្អែក​ទៅលើ​ការ​វិនិយោគ​របស់​ចិន​ទាំង​វិស័យ​អចលនទ្រព្យ និង​វាយនភណ្ឌ ដូច្នេះ​លោក​ថា កម្ពុជា​ក៏​នឹង​បន្ត​រង​ឥទ្ធិពល​អាក្រក់​ពី​វិបត្តិ​សេដ្ឋកិច្ច​ពី​ប្រទេស​ចិន​ផង​ដែរ។

លោក សេង វណ្ណលី៖ «ការ​ជំរុញ ការ​ទាក់ទាញ​វិនិយោគ​ពី​ចិន​គឺជា​រឿង​ដែល​សាទរ​មួយ ក៏ប៉ុន្តែ​ក៏​ត្រូវ​ប្រុងប្រយ័ត្ន យើង​មិនអាច​ប្រលែង​ឱ្យ​តែ​ប្រទេស​ចិន​តែ​ម្នាក់​ទេ យើង​ត្រូវតែ​ធ្វើ​ទំនាក់ទំនង​ប្រព័ន្ធ​វិនិយោគ ច្បាប់​ក្នុងស្រុក មានន័យថា​ការគ្រប់គ្រង​ផ្សេងៗ​ហ្នឹង​ឱ្យ​មាន​គណនេយ្យភាព ដើម្បី​ទាក់ទាញ​អ្នក​វិនិយោគ​ពី​បរទេស​ផង»

ផ្ទុយ​ពី​នាយករដ្ឋមន្ត្រី​ថ្មី​របស់​ប្រទេស​ថៃ ដែល​ដាក់ចេញ​នូវ​ផែនការ​ជាក់ស្ដែង ជួយ​ប្រជាពលរដ្ឋ​ក្រីក្រ ដូចជា​ការ​ផ្ដល់​ប្រាក់ ១​ម៉ឺន​បាត្រ (១០.០០០) ឬ​ប្រមាណ​៣​រយ​ដុល្លារ​អាមេរិក ការ​អនុគ្រោះ​ពន្យារពេល​បង់ប្រាក់​ទៅ​ធនាគារ​រយៈពេល​៣​ឆ្នាំ និង​ការ​ដាក់​កំហិត​ឱ្យ​បញ្ចុះតម្លៃ​ទំនិញ​តម្រូវ​ការ​ចាំបាច់​ប្រចាំ​ថ្ងៃ​នោះ រដ្ឋាភិបាល​លោក ហ៊ុន ម៉ាណែត មិន​បាន​យកចិត្តទុកដាក់​ជួយ​ដល់​ប្រជាពលរដ្ឋ ដែល​កាន់​តែ​មាន​ជីវភាព​លំបាកលំបិន​នោះ​ឡើយ​។ បន្ថែម​ពី​នេះ បន្ទាប់​ពី​ឡើង​កាន់​តំណែង​ជា​នាយករដ្ឋមន្ត្រី​ភ្លាមៗ រដ្ឋាភិបាល​លោក ហ៊ុន ម៉ាណែត បែរជា​ដាក់ចេញ​ផែនការ​យកពន្ធ​សព្វសារពើ​ពី​ប្រជាពលរដ្ឋ​ទៅវិញ។ លុះ​ក្រោយ​ពេល​ប្រជាពលរដ្ឋ​ផ្ទុះ​ការ​តវ៉ា​ពេញ​បណ្ដាញ​សង្គម​ហ្វេសប៊ុក ទើប​លោក ហ៊ុន ម៉ាណែត ចេញមុខ​អះអាង​ថា រដ្ឋាភិបាល​របស់​លោក​មិន​មាន​ផែនការ​យកពន្ធ ដូច​តាម​ការ​លើកឡើង​របស់​អគ្គនាយក​នៃ​អគ្គនាយកដ្ឋាន​ពន្ធដារ​លោក គង់ វិបុល នោះ​ទេ។

បើទោះបីជា​លោក ហ៊ុន ម៉ាណែត ធ្លាប់​បាន​ថ្លែង​ថា គោលនយោបាយ​អាទិភាព​របស់​រដ្ឋាភិបាល​នីតិកាល​ទី​៧ គឺ​ដើម្បី​ស្ដារ​សេដ្ឋកិច្ចជាតិ​ក្រោយពី​ការ​រីក​រាលដាល​ជំងឺ​កូវីដ​១៩​ក៏ដោយ ក៏​នៅ​ពេល​នេះ ស្ថានភាព​សេដ្ឋកិច្ច​កាន់តែ​ធ្លាក់ចុះ​ដុនដាប​ទៅវិញ​។ ថ្មីៗ​នេះ លោក ហ៊ុន ម៉ាណែត ក៏បាន​ស្នើ​ឱ្យ​គ្រឹះស្ថាន​ផ្ដល់​ប្រាក់​កម្ចី ឲ្យ​សម្រួល​ការ​សង​ប្រាក់កម្ចី​សម្រាប់​ប្រជាពលរដ្ឋ ដែល​កំពុង​ជួប​វិបត្តិ​សេដ្ឋកិច្ច។

លោក ហ៊ុន ម៉ាណែត៖ «បើ​អតិថិជន​មាន​បញ្ហា ធនាគារ ឬក៏​គ្រឹះស្ថាន​ផ្ដល់​ប្រាក់​កម្ចី​ក៏​មាន​បញ្ហា រដ្ឋាភិបាល​ក៏​មាន​បញ្ហា អ៊ីចឹង​អ្វី​ដែល​យើង​បាន​ផ្ដល់​ឱ្យ​គោលការណ៍​កាលពី​ថ្ងៃ​១៣​នេះ គឺ​សង្ឃឹមថា​ប្រតិបត្តិករ​ទាំង​ក្នុង​វិស័យ​ធនាគារ អចលនទ្រព្យ ក៏ដូចជា​វិស័យ​ផ្សេងៗ​ដែល​អាច​បាន​ផល​នោះ សូម​ធ្វើ​យ៉ាងណា គិតគូរ​វិធានការណ៍​យ៉ាងណា ដើម្បី​ជួយ​សម្រាល​បន្ត​ទៅ​ដល់​ប​ង​ប្អូន​ប្រជាពលរដ្ឋ ទៅដល់​អាជីវកម្ម​ដែល​ជា​អ្នក​ខ្ចី ទៅដល់​ប្រជាពលរដ្ឋ​ដែល​ជា​អ្នក​ខ្ចី ទៅដល់​ប្រជាពលរដ្ឋ​ដែល​ទិញ​ផ្ទះ ទៅដល់​ប្រជាពលរដ្ឋ​ដែល​ត្រូវការ​កម្ចី​ផ្សេងទៀត អ៊ីចឹង​យើង​ជួយ​គ្នា​ក្នុង​ការ​លំបាក គឺ​ពិត​ណាស់​ត្រូវការ​ប្រុងប្រយ័ត្ន ព្រោះ​មិន​ចង់ឱ្យ​ដួល​រលំ​ទាំង​ភ្នែន​ទេ»

ងាក​មក​វិស័យ​ការងារ​វិញ បើទោះបី​ជា​ប្រជាពលរដ្ឋ​កម្ពុជា​ភាគច្រើន​ស្ថិត​ក្នុង​វ័យ​ជា​យុវជន និង​ពេញកម្លាំង​ធ្វើ​ការងារ​ក្ដី ប៉ុន្តែ​រដ្ឋាភិបាល​លោក ហ៊ុន ម៉ាណែត មិន​បាន​បង្កើត​ការងារ​ឱ្យ​បាន​គ្រប់គ្រាន់​នោះ​ឡើយ។ ប្រជាពលរដ្ឋ​ដែល​គ្មាន​ការងារ​ធ្វើ និង​ប្រជាកសិករ​ដែល​ខាតបង់​ពី​ការ​ធ្វើ​ស្រែចម្ការ​ជាច្រើន​នាក់ បាន​បង្ខំចិត្ត​ភៀសខ្លួន​ទៅ​ធ្វើ​ការ​នៅ​ប្រទេស​ថៃ ហើយ​ភាគច្រើន​នៃ​អ្នកធ្វើ​ចំណាកស្រុក​ទាំងនោះ គឺ​ធ្វើ​ឡើង​ដោយ​ប្រថុយប្រថាន និង​មិន​មាន​ឯកសារ​ច្បាប់​ត្រឹមត្រូវ​នោះ​ឡើយ។

ជុំវិញ​រឿង​នេះ នាយក​ប្រតិបត្តិ​អង្គការ​សមធម៌​កម្ពុជា លោក អៀង វុទ្ធី យល់ឃើញ​ថា ក្រៅពី​រដ្ឋាភិបាល​មិនអាច​រក​ចំណូល​បាន​ច្រើន​ពី វិស័យ​ទេសចរណ៍ និង​វិស័យ​កសិកម្ម​ហើយ​នោះ ថ្នាក់ដឹកនាំ​រដ្ឋាភិបាល​គួរតែ​បើក​លំហ​ប្រជាធិបតេយ្យ និង​លើកកម្ពស់​ការគោរព​សិទ្ធិមនុស្ស ដើម្បី​ទទួល​បាន​ការ​បញ្ជាទិញ​ផលិតផល​វាយនភណ្ឌ​ឱ្យ​បាន​ច្រើន​ឡើងវិញ ពី​បណ្ដា​ប្រទេស​អឺរ៉ុប​(EU) និង​សហរដ្ឋអាមេរិក​(United States)

លោក អៀង វុទ្ធី៖ «ការ​លក់​ផលិតផល​របស់​យើង​ឱ្យ​បាន​ច្រើន​ទៅ​បណ្ដា​ប្រទេស​ទាំងអស់​ហ្នឹង​បាន​ទាល់តែ​អាច​បំពេញ​លក្ខខណ្ឌ​សិទ្ធិ​នៃ​ការចូលរួម​សកម្មភាព​នយោបាយ គណបក្ស​នយោបាយ​ជាដើម​។ អ៊ីចឹង​វា​គួរតែ​មាន​ការ​ចាប់ផ្ដើម​ពិនិត្យ​ឡើង​វិញ ថា តើ​យើង​អាច​ធ្វើការ​ជាមួយគ្នា​យ៉ាងម៉េច ជាពិសេស​គ្រប់​និន្នាការ​នយោបាយ​ហ្នឹង ដើម្បី​ឱ្យ​ប្រទេស​យើង​អាច​បំពេញ​បាន​នូវ​លក្ខខណ្ឌ​ផ្សេងៗ ជាពិសេស​ការ​ធ្វើ​ការ​រក​ស៊ី​ជាមួយ​បណ្ដា​ប្រទេស​សេរី​ទាំងអស់​នោះ»។

របាយការណ៍​របស់​ធនាគារពិភពលោក​ចេញផ្សាយ​កាលពី​ចុងខែ​តុលា រក​ឃើញ​ថា សេដ្ឋកិច្ច​កម្ពុជា​នៅតែ​ងាយ​ដួល​រលំ ដោយសារតែ​កម្ពុជា​ពឹងផ្អែក​ខ្លាំង​ទៅលើ​ទីផ្សារ​នាំចេញ និង​ប្រភព​ហិរញ្ញវត្ថុ​ពី​បរទេស​។ អ្នកវិភាគ​នយោបាយ​លើកឡើង​ថា ដើម្បី​លើកកម្ពស់​ជីវភាព​ប្រជាពលរដ្ឋ លោក ហ៊ុន ម៉ាណែត គួរតែ​បើក​លំហ​ប្រជាធិបតេយ្យ ដើម្បី​ទទួល​បាន​ការ​គាំទ្រ​ពី​បណ្ដា​ប្រទេស​នាំមុខ​ខាង​លទ្ធិប្រជាធិបតេយ្យ ជាជាង​ធ្វើ​នយោបាយ​លំអៀង​ទៅ​រក​ប្រទេស​ចិន បន្ត​រឹតត្បិត​សិទ្ធិមនុស្ស មិន​ហ៊ាន​ប្រកួតប្រជែង​នយោបាយ​ជាមួយ​គណបក្សប្រឆាំង​ដោយ​យុត្តិធម៌ ដើម្បី​រក្សា​អំណាច​របស់​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
រដ្ឋាភិបាល​កាត់​ដី​គម្រប​ព្រៃឈើ​នៅ​ខេត្ត​ព្រះសីហនុ​ជិត​៣០​ហិកតារ​ឲ្យ​ប្រពន្ធ​លោក នេត សាវឿន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។