ក្រុមហ៊ុនបុរីពិភពថ្មីអះអាងថា នឹងក្ស័យធនបើខ្លួនធ្វើតាមការទាមទាររបស់អតិថិជន
2023.11.12
ប្រធានក្រុមហ៊ុនពិភពថ្មី លោក ហុង ពីង (ស្ដាំ) និងអតីតនាយករដ្ឋមន្ត្រី លោក ហ៊ុន សែន។
រូប៖ ហ្វេសប៊ុកលោក ហុង ពីវ
ក្រុមហ៊ុនបុរីពិភពថ្មី ប្រកាសពីការក្ស័យធន និងធ្វើឲ្យប៉ះពាល់ដល់អតិថិជនទាំងអស់ ប្រសិនបើធ្វើតាមការទាមទាររបស់អតិថិជនមួយចំនួន។ ប៉ុន្តែអតិថិជនថា ការលើកឡើងនោះគ្រាន់តែជាលេសរបស់ក្រុមហ៊ុនប៉ុណ្ណោះ។
ការប្រកាសការប្រឈមភាពក្ស័យធននេះ ធ្វើឡើងបន្ទាប់ពីម្ចាស់ផ្ទះបុរីពិភពថ្មី បានចេញតវ៉ាទាមទារឲ្យ ក្រុមហ៊ុនទិញផ្ទះរបស់ពួកគេវិញ នៅចំនួនពី៥០ភាគរយ។ នេះបើតាមសេចក្ដីប្រកាសរបស់ក្រុមហ៊ុនបុរីពិភពថ្មី ដែលបានចុះផ្សាយកាលនៅថ្ងៃទី៨ ខែវិច្ឆិកា។ ដោយក្រុមហ៊ុនព្រួយបារម្ភ បន្ទាប់ពីក្រុមហ៊ុនទទួលទិញផ្ទះពីអតិថិជន ជាង៤រយល្វែង អស់លុយជាង៥លានដុល្លារ គិតត្រឹមរយៈពេល៧ថ្ងៃ។
អតិថិជនដែលបានទិញផ្ទះពីបុរីពិភពថ្មី លោកស្រី ខែក ភីរិន ប្រាប់វិទ្យុអាស៊ីសេរី នៅថ្ងៃទី១១ ខែវិច្ឆិកា ថា លោកស្រីបានបង់រំលស់ផ្ទះនៅបុរីមួយនេះអស់រយៈពេលជាង៣ឆ្នាំមកហើយ ប៉ុន្តែបច្ចុប្បន្នលោកស្រីកំពុងជួបបញ្ហាសេដ្ឋកិច្ចទើបសម្រេចលក់ផ្ទះឲ្យទៅក្រុមហ៊ុនវិញ ។ លោកស្រីថា គាត់អង្គុយយំជារៀងរាល់ថ្ងៃ នៅពេលដែលក្រុមហ៊ុនបដិសេធ មិនចង់ទិញផ្ទះពីពួកគេវិញ។
លោកស្រី ខែក ភីរិន៖ «យកលុយយើងហើយគាត់មិនឱ្យយើងទៀត មិនឱ្យយើងនៅទៀត មានតែធ្វើអ៊ីចឹង មានតែបង្ហោះឱ្យរដ្ឋាភិបាលគាត់ឃើញ ដើម្បីឱ្យរដ្ឋាភិបាលគាត់ចេញមុខមកជួយដោះស្រាយឱ្យពួកយើង ព្រោះសុខៗមកចាក់សោផ្ទះ ហើយគេ[ក្រុមហ៊ុន]ប្រកាសឱ្យយើងរើអីវ៉ាន់ចេញ បើមិនចេញ គេមានវិធានការស្អីគេអ៊ីចឹងហា៎! ពីមុនខ្ញុំខ្លាច ពួកបុរីសម្លុតខ្ញុំ ខ្ញុំចេះតែយំដល់ឥឡូវខ្ញុំលែងយំហើយ ខ្ញុំតស៊ូឱ្យដល់ទីបំផុត»។
រីឯលោកស្រី ថន សម្បត្តិ ដែលបានទិញផ្ទះអស់ជាង៧ (៧៥.០០០)ម៉ឺនដុល្លារ ឱ្យដឹងដែរថា បើក្រុមហ៊ុនប្រកាសបែបនេះ វាហាក់បោកប្រាស់អតិថិជនរបស់ខ្លួន ដែលបានទិញផ្ទះ របស់ក្រុមហ៊ុនកន្លងមក ដោយសារក្រុមហ៊ុនបានសន្យាទិញផ្ទះពីអតិថិជនវិញនៅពេលដែលម្ចាស់ផ្ទះចង់លក់ ។ លោកស្រីស្នើទៅរដ្ឋាភិបាលឲ្យគិតគូរដោះស្រាយឲ្យប្រជាពលរដ្ឋ ប្រសើរជាងបណ្ដោយឲ្យក្រុមហ៊ុនធ្វើបាបប្រជាពលរដ្ឋបែបនេះ ស្របពេលប្រជាពលរដ្ឋមិនអាចរកប្រាក់ចំណូលបានដូចពីពេលមុន។
លោកស្រី ថន សម្បត្តិ៖ «គាត់ថាទូកធំ ក្ដោងធំ សម្រាប់គាត់ គាត់ទទួលទិញពីភ្ញៀវ ពីអតិថិជនហើយ ក៏គាត់ក៏នៅតែរក្សាទ្រព្យគាត់បានអ៊ីចឹងណា៎។ ចង់និយាយថា គាត់នៅមានផ្ទះមានយកទៅលក់ពេលក្រោយ តែសម្រាប់អតិថិជន គាត់ក្ស័យធនគឺអត់មានអ្វីទេ ចង់មានន័យថា ផ្ទះក៏អត់អ្វីក៏អត់អ៊ីចឹង ឥឡូវយើងរកអត់បានទេ រកអត់បានតឹង ចាស៎! អស់ហើយ។ ខ្ញុំអ្នកធ្វើការផង អ្នករកស៊ីផង ការងារឯកជនតិចតួចទេ ហើយយើងមានចំណូលរកស៊ីបន្ថែម ប៉ុន្តែពេលនេះរកស៊ីអត់សូវបាន»។
អតិថិជនទាំងនេះអះអាងទៀតថា ក្រុមហ៊ុនបុរីពិភពថ្មីបានសន្យាថា នឹងទិញ ផ្ទះពីពួកគេវិញក្នុងតម្លៃ៥០ភាគរយ នៃចំនួនប្រាក់ដែលបានបង់ឲ្យក្រុមហ៊ុន ប៉ុន្តែមកដល់ពេលនេះ បែរជាក្រុមហ៊ុនមិនគោរពតាមពាក្យសន្យារបស់ខ្លួន។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេនៅថ្ងៃទី១១ ខែវិច្ឆិកា នេះ ដោយទូរស័ព្ទចូលគ្មានអ្នកទទួល។
ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ឃើញថា ក្នុងស្ថានភាពនេះទាំងក្រុមហ៊ុន និងអតិថិជនកំពុងតែជួបការលំបាកទាំងអស់គ្នា ប៉ុន្តែលោកថា ខាងក្រុមហ៊ុនហាក់មានប្រៀបជាង ពីព្រោះអតិថិជនបាត់បង់ផ្ទះ និងប្រាក់ថែមទៀត ប្រសិនបើក្រុមហ៊ុនរឹបអូសផ្ទះរបស់ពួកគេ។ លោកបន្ថែមថា រដ្ឋាភិបាលគួរចេញមុខរកដំណោះស្រាយ ដល់ប្រជាពលរដ្ឋ ដែលជាជនរងគ្រោះទាំងអស់នោះ ប្រសើរជាងអូសបន្លាយបញ្ហាឲ្យនៅបន្ត។
លោក យង់ គិមអេង៖ «អ៊ីចឹង! ខ្ញុំថារឿងអស់ហ្នឹងគឺត្រូវការចាំបាច់ឱ្យមានអន្តរាគមន៍ពីរដ្ឋ នៅក្នុងការទប់ទល់កុំឱ្យប្រជាពលរដ្ឋខាតបង់ខ្លាំង ហើយកុំឱ្យក្រុមហ៊ុនវាដួលរលំ ដើម្បីរក្សាលំនឹងនៅក្នុងកម្រិតណាមួយ។ បើសិនតែថា រដ្ឋអស់លទ្ធភាពនឹងទប់ទល់ហើយហ្នឹងមិនដឹងធ្វើយ៉ាងម៉េច។ យើងឃើញថា ក្រុមហ៊ុនអចលនទ្រព្យដូចនៅចិននៅអីក៏មានការដួលរលំ កាលណានេះគឺវាប៉ះពាល់ជារួមច្រើន»។
រយៈពេលប្រមាណជាង១ខែចុងក្រោយនេះ អតិថិជនរបស់ក្រុមហ៊ុនបុរីពិភពថ្មីរាប់រយនាក់ បានផ្ទុះការតវ៉ា នៅពេលដែលក្រុមហ៊ុនមិនបានទទួលទិញផ្ទះពីប្រជាពលរដ្ឋវិញ ដោយចោទថា ក្រុមហ៊ុន មិនបានគោរពតាមពាក្យសន្យារបស់ខ្លួននៅពេលដែលពួកគេទៅទិញផ្ទះពីបុរីដំបូង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
នយោបាយ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- អ្នកប្រើប្រាស់បណ្ដាញសង្គមថា គ្រួសារ ហ៊ុន សែន ជាគ្រួសារនាំគ្រោះដល់ប្រទេសជាតិ
- គណបក្សកម្លាំងជាតិ នឹងធ្វើសមាជវិសាមញ្ញ នៅថ្ងៃទី១៥ ខែកញ្ញា