មន្ត្រីបក្សភ្លើងទៀនខេត្តកំពង់ឆ្នាំងចោទអាជ្ញាធរថា យឺតយ៉ាវដោះដូរក្រុមប្រឹក្សាជាប់ឆ្នោត
2023.03.29
ក្រុមការងារគណបក្សភ្លេីងទៀនខេត្តកំពង់ឆ្នាំង កាលពីថ្ងៃទី២៥ មីនា ២០២៣។
រូប៖ បក្សភ្លើងទៀន កំពង់ឆ្នាំង
មន្ត្រីគណបក្សភ្លើងទៀនខេត្តកំពង់ឆ្នាំង ចោទអាជ្ញាធរថា យឺតយ៉ាវក្នុងការទទួលសំណើសុំ ដោះដូរ ក្រុមប្រឹក្សាឃុំជាប់ឆ្នោត មកពីបក្សភ្លើងទៀននៅក្នុងឃុំចំនួន២។ ពួកគាត់ថា ទោះបីបេក្ខជនទាំងនោះបានលុបឈ្មោះចេញពីបញ្ជីសមាជិកបក្សភ្លើងទៀន ហើយក៏ដោយ ក៏ពុំមានអាជ្ញាធរណាអើពើនោះឡើយ។ រីឯអាជ្ញាធរឃុំ ឆ្លើយតបថា នៅចាំការសម្រេច ពីថ្នាក់លើជាមុនសិន។
បេក្ខជនក្រុមប្រឹក្សាឃុំជាប់ឆ្នោតមកពីបក្សភ្លើងទៀន ចំនួន២ឃុំ រួមមានឃុំដារ និងឃុំផ្លូវទូក ស្រុកកំពង់លែង ខេត្តកំពង់ឆ្នាំង ត្រូវសមាជិកបក្សបញ្ឈប់ពីក្រុមប្រឹក្សាឃុំដោយសារតែមិនមានគោលការណ៍បក្សភ្លើងទៀន ហើយនឹងដាក់បេក្ខជនថ្មីជំនួស។ តែយ៉ាងណា មន្ត្រីគណបក្សភ្លើងទៀនអះអាងថា ពួកគាត់បានដាក់ពាក្យស្នើសុំដោះដូរបេក្ខជនទាំងនោះ ទៅអាជ្ញាធរមូលដ្ឋាន ជិតមួយខែមកហើយ ប៉ុន្តែពុំមានអាជ្ញាធរណាអើពើទទួលសំណើនោះឡើយ។
លេខាធិការបក្សភ្លើងទៀនប្រចាំខេត្តកំពង់ឆ្នាំលោក លោក សួន ពិសិត ប្រាប់វិទ្យុអាស៊ីសេរីនៅថ្ងៃទី២៨ ខែមីនាថា លោកខកចិត្តជាខ្លាំងចំពោះអាជ្ញាធរឃុំ ផ្លូវទូក និងឃុំដារ ស្រុកកំពង់លែង ដែលមិនអើពើសហការទទួលដំណើរដោះដូរបេក្ខជនក្រុមប្រឹក្សាបក្សភ្លើងទៀនកាលពីថ្មីៗនេះ ហើយលើកហេតុផលថា ចាំការសម្រេចពីថ្នាក់លើជាមុនសិន។
លោក សួន ពិសិត៖ «សូមឱ្យលោកមេឃុំៗទាំង២នឹង គឺសូមជួយពន្លឿនពីនីតិវិធីក្នុងការផ្លាស់ប្ដូរនឹងឱ្យស្របទៅតាមបទបញ្ជា និងនីតិវិធី និងសេចក្ដីនានារបស់ក្រសួងមហាផ្ទៃ ឱ្យបានលឿន ទៅតាមកាលវេលា និងពេលកំណត់ ដែលសេចក្ដីណែនាំរបស់ក្រសួងបានដាក់ជូន។
ជុំវិញរឿងនេះ មេឃុំផ្លូវទូក លោក ប៉ាត់ គន ប្រាប់វិទ្យុអាស៊ីសេរីថា លោកពិតជាបានទទួលសំណើឱ្យដោះដូរក្រុមប្រឹក្សាឃុំមកពីបក្សភ្លើងទៀនមែន ក៏ប៉ុន្តែ លោកមិនអាចចុះហត្ថលេខាយល់ព្រមបានភ្លាមៗនោះទេ បើពុំមានការអនុញ្ញាតពីអភិបាលស្រុកកំពង់លែង លោក លោក យ៉ែម លក្ខិណា ជាមុនទេនោះ។ ទោះជាយ៉ាងណា លោកថា អាជ្ញាធរស្រុក កំពុងតែពិនិត្យលើឯកសារទាំងនោះដើម្បីធ្វើការសម្រេចដោះដូរក្នុងពេលឆាប់ៗ។
លោក ប៉ាត់ គន៖ «មិនមែនខ្ញុំ ខ្ញុំក្រោមគេ ខ្ញុំម៉េចដឹងបង។ សំខាន់ឱ្យតែស្រុកគេ ពិនិត្យទៅថា កើត ខ្ញុំអត់ថា អីទេបងទី១។ ទី២នោះថា កំហុសរបស់បុគ្គលម្នាក់នោះ គាត់អត់មានខុសអី»។
វិទ្យុអាស៊ីសេរីមិនអាចទាក់ទងអភិបាលស្រុកកំពង់លែង លោក យ៉ែម លក្ខិណា ដើម្បីបកស្រាយជុំវិញរឿងនេះបន្ថែមបានទេ នៅថ្ងៃទី២៨ ខែមីនា ដោយហៅទូរស័ព្ទចូលតែពុំមានអ្នកទទួល។ ចំណែក មេឃុំដារ ស្រុកកំពង់លែង ឆ្លើយយ៉ាងខ្លីថា លោកពុំបានទទួលឯកសារ ឬសំណើណាមួយដែលពាក់ព័ន្ធនឹងការដោះដូរក្រុមប្រឹក្សាបក្សភ្លើងទៀននោះទេ។
ដោយឡែក មន្ត្រីបក្សភ្លើងទៀនប្រចាំខេត្តកំពង់ឆ្នាំងលើកឡើងថា អាជ្ញាធរមូលដ្ឋានមិនអើពើនិងសំណើសុំដោះដូរក្រុមប្រឹក្សាឃុំនេះ គឺជាការរើសអើងនយោបាយ ព្រោះ ពួកគាត់បានព្យាយាមដាក់ពាក្យតាមសាលាឃុំទាំងនោះជាយូរមកហើយ។ ដូចជា ឃុំផ្លូវទូក ដាក់ពីថ្ងៃទី០៧ ខែមីនា ចំណែកឃុំដារ ដាក់នៅថ្ងៃទី២៧ មីនា ក៏ប៉ុន្តែពុំឃើញអាជ្ញាធរដោះស្រាយលើសំណើនេះទេ។
លោក សួន ពិសិត អះអាង មូលហេតុដែលបក្សភ្លើងទៀនសម្រេចបញ្ឈប់សមាជិកក្រុមប្រឹក្សាឃុំទាំង២រូបនោះដោយសារតែ ពួកគាត់ដើរផ្ទុយនឹងលក្ខខណ្ឌបក្សភ្លើងទៀន ដូចជាការមិនចូលរួមប្រជុំប្រចាំខែ ការមិនចូលរួមសកម្មភាពនយោបាយតាមរយៈវេទិកាសាធារណៈ និងការមិនបង់ប្រាក់កាតព្វកិច្ចប្រចាំខែជាដើម។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា លើកឡើងថា ការដោះដូរក្រុមប្រឹក្សាឃុំរបស់គណបក្សនីមួយៗ គឺជាសិទ្ធិ និងជាកិច្ចការផ្ទៃក្នុងរបស់បក្សនីមួយៗ ដូច្នេះអាជ្ញាធរពាក់ព័ន្ធ ពុំអាចបដិសេធ ឬជំទាស់បាននោះទេ។ លោកបន្តថា ការផ្លាស់ប្ដូរនេះ មិនថា តែក្រុមប្រឹក្សា ឬឃុំសង្កាត់នោះទេ ចំណែកតំណាងរាស្ត្រក៏អាចធ្វើការដោះដូរបើសិនជាមានកំហុស។
លោក នី សុខា៖ «អាជ្ញាធរជាទូទៅត្រូវតែអនុវត្តទៅតាមអ្វីដែលជាការស្នើសុំរបស់គណបក្សនយោបាយសាមី ព្រោះអាហ្នឹងយើងមិនអាចទៅលូកលាន់ នៅក្នុងកិច្ចការងារផ្ទៃក្នុងរបស់គណបក្សនយោបាយមួយបានទេ។ អ៊ីចឹង អាជ្ញាធរត្រូវតែសម្របសម្រួល ជាពិសេសទាក់ទងបញ្ហារៀបចំសមាសភាពក្រុមប្រឹក្សាឃុំសង្កាត់ហ្នឹង គឺជាការប្រកាសសមាសភាពក្រុមប្រឹក្សាឃុំសង្កាត់ គឺថាក្រសួងមហាផ្ទៃ គឺជាអ្នកទទួលខុសត្រូវក្នុងការចាត់ចែងការងារទាំងអស់ហ្នឹង»។
អ្នកវិភាគនយោបាយ និងមន្ត្រីបក្សប្រឆាំងមើលឃើញថា ការអូសបន្លាយរបស់មន្ត្រីអាជ្ញាធរតាមមូលដ្ឋាន ដែលមិនព្រមទទួលសំណើដោះដូរក្រុបប្រឹក្សាឃុំ មកពីបក្សភ្លើងទៀននេះ គឺគ្រាន់តែចង់បង្កនូវបរិយាកាសស្មុគស្មាញដល់បក្សប្រឆាំងមួយនេះតែប៉ុណ្ណោះ ។ មន្ត្រីបក្សភ្លើងទៀន ទទូចឱ្យអាជ្ញាធរពាក់ព័ន្ធគួរតែដោះស្រាយបញ្ហាទាំងនោះឱ្យបានឆាប់ ដើម្បីងាយស្រួលក្នុងការរៀបចំដាក់បេក្ខជនថ្មី ឱ្យបានមុនការបោះឆ្នោតជាតិនៅថ្ងៃទី២៣ ខែកក្កដា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត
អត្ថបទពេញនិយម
នយោបាយ
- លោក រ៉ុង ឈុន អំពាវនាវដល់អ្នកគាំទ្រគណបក្សភ្លើងទៀន កុំឱ្យតក់ស្លុត ឬរាថយ ទោះជាក្រុមប្រឹក្សាធម្មនុញ្ញមិនឱ្យគណបក្សនេះចូលរួមការបោះឆ្នោតខាងមុខ
- លោក ហ៊ុន សែន រងការរិះគន់រឿងជេរប្រមាថសកម្មជនសិទ្ធិមនុស្សកញ្ញា សេង ធារី
- លោក ហ៊ុន សែន ប្រកាសបន្តដឹកនាំនយោបាយដដែល ទោះលោកមិនធ្វើជានាយករដ្ឋមន្ត្រីនៅពេលខាងមុខក្ដី
- ក្រុមប្រឹក្សាធម្មនុញ្ញសម្រេចមិនឱ្យគណបក្សភ្លើងទៀនចូលប្រកួតការបោះឆ្នោតដូច គ.ជ.ប ដែរ
- គណបក្សភ្លើងទៀន គ្រោងប្រមូលផ្ដុំសមាជិកបក្ស ១ម៉ឺននាក់ តស៊ូមតិនៅទីលានប្រជាធិបតេយ្យ