រដ្ឋាភិបាលអះអាងថា ទទួលបានប្រាក់បរិច្ចាគជាង ២៦លានដុល្លារសម្រាប់ «មូលនិធិក្រវាត់ព្រំដែន»
2024.10.22
លោកនាយករដ្ឋមន្ត្រី ហ៊ុន ម៉ាណែត ចូលរួមកម្មវិធីបិទការប្រកួតកីឡាយុទ្ធគុនចម្រុះខ្មែរបុរាណលើកទី១ កាលពីថ្ងៃទី២០ តុលា ២០២៤។
រូប៖ ហ្វេសប៊ុកលោក ហ៊ុន ម៉ាណែត
បន្ទាប់ពីរៃអង្គាសប្រាក់ពីប្រជាពលរដ្ឋ ក្រុមមន្ត្រី និងក្រុមឧកញ៉ា សម្រាប់ “មូលនិធិកសាងហេដ្ឋារចនាសម្ព័ន្ធព្រំដែន” អស់រយៈពេលជិត ២ខែមកនេះ រដ្ឋាភិបាលបានប្រកាសឈប់ទទួលការបរិច្ចាគ នៅថ្ងៃទី៣១ ខែតុលា ខាងមុខនេះហើយ។ អ្នកឃ្លាំមើលយល់ឃើញថា ប្រាក់ដែលបានរៃអង្គាស យកមកអភិវឌ្ឍហេដ្ឋារចនាសម្ព័ន្ធព្រំដែននេះ មិនគ្រប់គ្រាន់សម្រាប់យកទៅអភិវឌ្ឍនោះទេ ប៉ុន្តែការបរិច្ចាគទាំងនោះគឺជាទឹកចិត្តរបស់ប្រជាពលរដ្ឋ ខណៈរដ្ឋាភិបាល គ្មានសមត្ថភាពដើម្បីអភិវឌ្ឍតំបន់ព្រំដែនឡើយ។
សេចក្ដីប្រកាសព័ត៌មានរបស់ខុទ្ទកាល័យនាយករដ្ឋមន្ត្រី បានប្រកាសបញ្ចប់ការទទួលថវិកាសម្រាប់ «មូលនិធិកសាងហេដ្ឋារចនាសម្ព័ន្ធតាមព្រំដែន» នៅថ្ងៃទី៣១ ខែតុលា ឆ្នាំ២០២៤។ សេចក្ដីប្រកាសបញ្ជាក់ថា រយៈពេលរៃអង្គាសជិត ២ខែមកនេះ មានប្រជាពលរដ្ឋខ្មែរ ចំនួនជិត ៧០ម៉ឺននាក់ បានចូលរួមបរិច្ចាគ ដោយទទួលបានទឹកប្រាក់សរុបជាង ២៦លានដុល្លារ (២៦.៣៣២.៨៨៣) ហើយវិភាគទាននេះ នឹងត្រូវយកទៅប្រើប្រាស់ក្នុងការកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ឃើញថា ទឹកប្រាក់ដែលរដ្ឋាភិបាលរៃអង្គាសបាននេះ មិនគ្រប់គ្រាន់ដើម្បីកសាងផ្លូវក្រវាត់ព្រំដែនឡើយ។ លោក មែន ណាត លើកឡើងថា ការរៃអង្គាសថវិកានេះ ធ្វើឡើងដើម្បីស្អំចិត្តប្រជាពលរដ្ឋ ដែលប្រឆាំងនឹងការដាក់ខេត្តទាំង៤ របស់កម្ពុជា អភិវឌ្ឍរួមគ្នាជាមួយវៀតណាម តែប៉ុណ្ណោះ ខណៈរដ្ឋាភិបាលរបស់បក្សកាន់អំណាច គ្មានសមត្ថភាពអភិវឌ្ឍសេដ្ឋកិច្ចតំបន់ព្រំដែននោះទេ ក្រៅតែពីការបង្កើតបនល្បែងកាស៊ីណូ ដែលបង្កឱ្យមានអំពើឧក្រិដ្ឋកម្ម និងចាប់ជំរិត នៅតាមព្រំដែន។
លោក ម៉ែន ណាត៖ «តាមពិតទៅការអភិវឌ្ឍព្រំដែន វាគួរណាស់តែធ្វើឡើងជាគោលនយោបាយ។ រដ្ឋាភិបាលដាក់គោលនយោបាយចេញជាផ្លូវការ ហើយរដ្ឋាភិបាលត្រូវមានកញ្ចប់ថវិកាទៅអភិវឌ្ឍព្រំដែន ដូចជាការពង្រីកធ្វើផ្លូវថ្នល់ ការអូសខ្សែភ្លើងបង្គោលភ្លើងដល់ព្រំដែន ការលើកទឹកចិត្តប្រជាពលរដ្ឋនៅតាមព្រំដែនហ្នឹងឱ្យមានស្មារតីស្រឡាញ់ជាតិ ឱ្យមានជីវភាពសមរម្យជាងសព្វថ្ងៃហ្នឹង»។
លោក ហ៊ុន ម៉ាណែត បានប្រកាសបង្កើត «មូលនិធិកសាងហេដ្ឋារចនាសម្ព័ន្ធតាមព្រំដែន» កាលពីថ្ងៃទី២២ ខែសីហា ចំខួបមួយឆ្នាំ ពេលលោកឡើងកាន់អំណាច នៃការផ្ទេរអំណាចតពូជពីឪពុកទៅកូន។ មូលនិធិនេះ មានការចូលរួមបរិច្ចាគ ពីសំណាក់ប្រជាពលរដ្ឋ ព្រះសង្ឃ មន្ត្រីរាជការ ឧកញ៉ា និងឈ្មួញពាណិជ្ជករ ជាដើម។ បន្ទាប់ពីរៃអង្គាសបានជិត ១ខែ ឪនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន បានសម្រេចដកខ្លួនចេញពីតំបន់ត្រីកោណអភិវឌ្ឍន៍ CVL កាលពីថ្ងៃទី២០ ខែកញ្ញា បន្ទាប់ពីប្រជាពលរដ្ឋទាំងក្នុង និងក្រៅប្រទេសសម្ដែងការមិនពេញចិត្ត និងធ្វើបាតុកម្មប្រឆាំង។ ទោះជាយ៉ាងណា លោក ហ៊ុន សែន អះអាងថា ការដកខ្លួនចេញពីតំបន់ត្រីកោណអភិវឌ្ឍន៍ CVL នេះ គឺជាការដកអាវុធពីក្រុមអ្នកប្រឆាំង ដែលលោកថា យកបញ្ហានេះ យកមកវាយប្រហាររដ្ឋាភិបាល។
ជុំវិញរឿងនេះ អ្នកសិក្សាកិច្ចការសង្គម និងនយោបាយ លោក ប៉ោ មករា យល់ឃើញថា ការអភិវឌ្ឍនៅតាមព្រំដែន គឺត្រូវការការចូលរួមស្មារតី និងឧត្ដមគតិពីប្រជាពលរដ្ឋ និងរដ្ឋាភិបាល។ លោកបន្តថា រដ្ឋាភិបាលគួរបង្កើតគណៈកម្មការមួយដាច់ដោយឡែក ដើម្បីសិក្សា និងជំរុញការអភិវឌ្ឍនៅតាមព្រំដែន ជាពិសេសនៅតំបន់ត្រីកោណអភិវឌ្ឍ CLV។
លោក ប៉ោ មករា៖ «គំនិតខ្ញុំ ការកសាងហេដ្ឋារចនាសម្ព័ន្ធព្រំដែននេះ គួរតែមានគណៈកម្មការមួយដោយឡែកមួយទៀត ជាគណៈកម្មការមួយដែលកើតចេញពីប្រភពចម្រុះ ដែលអាចផ្ដល់ការទុកចិត្តទៅដល់មហាជន ពីព្រោះរឿងនេះ វាជារឿងជាតិទាំងមូល វាមិនមែនជារឿងក្រុមបក្សប្រឆាំង ក្រុមសង្គមស៊ីវិល ក្រុមរដ្ឋាភិបាល (ឬ)ក្រុមណាមួយទេ។ អ៊ីចឹង ដើម្បីឱ្យទទួលដឹង ទទួលឮ ឱ្យមានការចូលរួមទាំងអស់គ្នា វាត្រូវតែមានគណៈកម្មការរួមមួយ ដើម្បីឱ្យមានការពេញចិត្ត ពេញថ្លើមទាំងអស់គ្នា»។
អ្នកឃ្លាំមើលជំរុញឱ្យរដ្ឋាភិបាល អភិវឌ្ឍតំបន់ព្រំដែន ជាពិសេសតំបន់ត្រីកោណអភិវឌ្ឍ CLV ដោយខ្លួនឯង និងផ្ដោតទៅលើសេដ្ឋកិច្ច សុខាភិបាល និងការអប់រំ ដោយមិនពឹងផ្អែកលើការរៃអង្គាសពីពលរដ្ឋ ឬពឹងផ្អែកលើការវិនិយោគបង្កើតបនល្បែងកាស៊ីណូនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
នយោបាយ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- កម្ពុជា និងចិនប្ដេជ្ញាបន្តរឹតចំណងមិត្តភាពដើម្បីកសាងជោគវាសនាប្រទេសជាតិរួមគ្នា
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- លោក រ៉ុង ឈុន ស្នើតុលាការឱ្យទម្លាក់ការចោទប្រកាន់ និងអនុញ្ញាតឱ្យលោកធ្វើនយោបាយពេញលេញឡើងវិញ