អ្នកឃ្លាំមើលរិះគន់ការរំលោភសិទ្ធិមនុស្សក្រោមការដឹកនាំរបស់លោក ហ៊ុន ម៉ាណែត ក្នុងរយៈពេល១០ខែ
2024.07.06
កិច្ចប្រជុំគណៈរដ្ឋមន្ត្រីរបស់លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី៥ កក្កដា ២០២៤។
រូប៖ ហ្វេសប៊ុកលោក ហ៊ុន ម៉ាណែត
អ្នកឃ្លាំមើលរិះគន់រដ្ឋាភិបាលដឹកនាំដោយលោក ហ៊ុន ម៉ាណែត ក្នុងរយៈពេល១០ខែកន្លងមកនេះ កំពុងបន្តរឹតត្បិតសិទ្ធិសេរីភាពជាមូលដ្ឋាន ធ្វើទុក្ខបុកម្នេញដល់សកម្មជនសិទ្ធិមនុស្ស នយោបាយ និងបើកឱកាសឲ្យជនល្មើសប្រព្រឹត្តអំពើឆបោកពលរដ្ឋរាប់ពាន់នាក់។ ការរិះគន់នេះ ធ្វើឡើងបន្ទាប់ពីនាយករដ្ឋមន្ត្រី លោក ហ៊ុន ម៉ាណែត សរសើរពីជោគជ័យរបស់រដ្ឋាភិបាលក្រោមការដឹកនាំរបស់លោក ក្នុងរយៈពេល១០ខែកន្លងមកនេះ។
អ្នកឃ្លាំមើល រិះគន់រដ្ឋាភិបាលក្រោមការដឹកនាំដោយលោកនាយករដ្ឋមន្ត្រី ហ៊ុន ម៉ាណែត រយៈពេល១០ខែកន្លងទៅនេះ កំពុងបន្តរំលោភសិទ្ធិមនុស្សធ្ងន់ធ្ងរ និងផ្ដល់ឱកាសឲ្យជនទុច្ចរិតប្រព្រឹត្តអំពើឆបោកពលរដ្ឋរាប់ពាន់នាក់។
អ្នកអត្ថាធិប្បាយនយោបាយ លោក គឹម សុខ សង្កេតឃើញថា កម្ពុជាមានអំពើពុករលួយធ្ងន់ធ្ងរតាមរយៈការភ្ជាប់បណ្ដាញចាក់ស្រេះ នៃគ្រួសារត្រកូលហ៊ុន ការបើកដៃឲ្យមានឧក្រិដ្ឋកម្មឆបោកលើពលរដ្ឋ និងការធ្វើទុក្ខបុកម្នេញ លើអ្នកការពារសិទ្ធិមនុស្ស សកម្មជនបរិស្ថាន និងសកម្មជននយោបាយជាដើម ។ លោក គឹម សុខ លើកឡើងថា សហគមន៍អន្តរជាតិ អាចនឹងដាក់ទណ្ឌកម្មបន្ថែមទៀតលើកម្ពុជា ដូចជាការដាក់ចូលក្នុងបញ្ជីខ្មៅ ទាក់ទងនឹងបញ្ហាលាងលុយកខ្វក់ និងការដកប្រព័ន្ធអនុគ្រោះពន្ធជាដើម។ «»
ការរិះគន់នេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត នៅថ្ងៃទី៥ ខែកក្កដា បានដឹកនាំកិច្ចប្រជុំពេញអង្គគណៈរដ្ឋមន្ត្រី នៅទីស្ដីការគណៈរដ្ឋមន្ត្រី។ នៅក្នុងកិច្ចប្រជុំនោះ លោក ហ៊ុន ម៉ាណែត បានសរសើរដល់រដ្ឋាភិបាល ក្រោមការដឹកនាំរបស់លោក ក្នុងរយៈពេល១០ខែកន្លងមកនេះថា បានសម្រេចសមិទ្ធផលធំៗ និងមានវឌ្ឍនភាពច្រើនលើការដ្ឋានការកែទម្រង់ និងទិសដៅការងារផ្សេងទៀត។ ក្រៅពីនេះ លោក ហ៊ុន ម៉ាណែត បានបង្ហាញពីយុទ្ធសាស្ត្របញ្ចកោណដំណាក់កាលទី១ និងវិធានគន្លឹះចំនួន៥ «មនុស្ស ផ្លូវ ទឹក ភ្លៀង និងបច្ចេកវិទ្យា» កំពុងអនុវត្ត និងផ្ដល់ផលប្រយោជន៍ដល់សង្គមជាតិ។ នេះ បើតាមអង្គភាពអ្នកនាំពាក្យរដ្ឋាភិបាល បានចេញសេចក្ដីប្រកាសព័ត៌មានពីលទ្ធផល នៃកិច្ចប្រជុំពេញអង្គគណៈរដ្ឋមន្ត្រី នៅរសៀលថ្ងៃទី៥ កក្កដា។
វិទ្យុអាស៊ីសេរី នៅមិនទាន់អាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការបកស្រាយបន្ថែមជុំវិញការរិះគន់នេះ បាននៅឡើយទេ នៅថ្ងៃទី៥ ខែកក្កដា។
ទោះជា លោក ហ៊ុន ម៉ាណែត អួតសរសើរពីជោគជ័យ ដែលរដ្ឋាភិបាលរបស់លោកបានសម្រេចក្នុងរយៈពេល១០ខែ យ៉ាងណាក៏ដោយ ក៏គេសង្កេតឃើញរឿងអយុត្តិធម៌សង្គមកើតចេញពីអ្នកមានលុយមានអំណាច ការបំផ្លិចបំផ្លាញធនធានធម្មជាតិ និងការរំលោភបំពានដីធ្លីពលរដ្ឋនៅតែបន្តកើតឡើងជាបន្តបន្ទាប់។
ក្នុងនោះករណីវិវាទដីធ្លីរ៉ាំរ៉ៃនៅកម្ពុជា ហាក់បីដូចជាស្ងប់ស្ងាត់មួយរយៈ ក្រោមការដឹកនាំដោយអតីតនាយករដ្ឋមន្ត្រី លោក ហ៊ុន សែន ក្នុងអំឡុងពេលត្រួសត្រាយផ្លូវឲ្យកូនប្រុសច្បងរបស់លោក គឺលោក ហ៊ុន ម៉ាណែត បានឡើងកាន់ដំណែងជានាយករដ្ឋមន្ត្រី ដោយការប្រើប្រាស់ប្រព័ន្ធតុលាការស្ថិតក្រោមការបង្គាប់បញ្ជារបស់លោកចាប់ចង និងចោទប្រកាន់ខ្លួនពលរដ្ឋ ដែលហ៊ានងើបតវ៉ាស្វែងរកដំណោះស្រាយ ដូចករណីពលរដ្ឋនៅតំបន់បឹងតាមោក និងសហគមន៍ពលរដ្ឋមានទំនាស់ដីធ្លី ខេត្តកោះកុងជាដើម ។ ជាងនេះ នៅមុន និងក្រោយពេលផ្ទេរអំណាចពីឪពុក ទៅកូនរបស់លោក ហ៊ុន សែន ក៏មានការចាប់ខ្លួនសកម្មជននយោបាយបក្សប្រឆាំងជាច្រើននាក់ដាក់គុកផងដែរ។
ថ្មីៗនេះ រដ្ឋាភិបាលក្រោមការដឹកនាំរបស់លោក ហ៊ុន ម៉ាណែត បានរំលោភសិទ្ធិមនុស្សធ្ងន់ធ្ងរមួយផ្សេងទៀត ដោយតុលាការបានកាត់ទោសសកម្មជនចលនាមាតាធម្មជាតិចំនួន១០នាក់ ឱ្យជាប់ពន្ធនាគារ ចន្លោះពី ៦ ទៅ ៨ឆ្នាំ ពីបទ «រួមគំនិតក្បត់ និងប្រមាថព្រះមហាក្សត្រ»។
ការរំលោភសិទ្ធិមនុស្ស និងនយោបាយធ្ងន់ធ្ងរបែបនេះហើយ ទើបសហគមន៍អន្តរជាតិ មានសហភាពអឺរ៉ុបសហភាពអឺរ៉ុបព្រមានដកហូតប្រព័ន្ធអនុគ្រោះពន្ធបន្ថែមទៀតពីរដ្ឋាភិបាលកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
នយោបាយ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- អ្នកប្រើប្រាស់បណ្ដាញសង្គមថា គ្រួសារ ហ៊ុន សែន ជាគ្រួសារនាំគ្រោះដល់ប្រទេសជាតិ
- គណបក្សកម្លាំងជាតិ នឹងធ្វើសមាជវិសាមញ្ញ នៅថ្ងៃទី១៥ ខែកញ្ញា