លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
2024.09.27
(រូបឯកសារ) លោក ហ៊ុន សែន ប្រធានព្រឹទ្ធសភា
រូប៖ ហ្វេសប៊ុកលោក ហ៊ុន សែន
អ្នករិះគន់រដ្ឋាភិបាល និងអ្នកឃ្លាំមើលថា ប្រធានព្រឹទ្ធសភា លោក ហ៊ុន សែន បង្កើនការគំរាមកំហែងឆ្លងដែនលើអ្នកមាននិន្នាការផ្ទុយកាន់តែខ្លាំងថា ជាអំពើផ្ដាច់ការ និងរំលោភសិទ្ធិមនុស្សធ្ងន់ធ្ងរ។ ការលើកឡើងនេះ បន្ទាប់ពីលោក ហ៊ុន សែន បានប្រើប្រាស់គ្រប់វិធីសាស្ត្រដោយបញ្ជាឱ្យសមត្ថកិច្ចតាមចាប់ខ្លួនសកម្មជនបក្សប្រឆាំង និងអ្នករិះគន់រដ្ឋាភិបាលទាំងក្នុងប្រទេស និងក្រៅប្រទេស។
ប្រធានចលនាយុវជនកម្ពុជាសកលប្រចាំប្រទេសជប៉ុន អ្នកស្រី វ៉ាន់ លក្ខិណា ប្រាប់វិទ្យុអាស៊ីសេរី នៅថ្ងៃទី២៧ ខែកញ្ញាថា អាជ្ញាធររដ្ឋាភិបាលបានផ្ញើសារជេរប្រមាថ ជាពិសេស គំរាមបញ្ជូនមនុស្សទៅសម្លាប់អ្នកស្រីដល់ប្រទេសជប៉ុន ឬសម្លាប់ចោលនៅពេលត្រឡប់ទៅស្រុកខ្មែរវិញ ដើម្បីឱ្យអ្នកស្រីឈប់និយាយរិះគន់ការដឹកនាំរដ្ឋាភិបាលត្រកូល ហ៊ុន។
អ្នកស្រីស្នើសុំរដ្ឋាភិបាលជប៉ុន និងស្ថានទូតប្រទេសប្រជាធិបតេយ្យមួយចំនួនទៀត ប្រចាំនៅកម្ពុជា និងមន្ត្រីសិទ្ធិមនុស្ស ឱ្យជួយឃ្លាំមើល និងការពារសុវត្ថិភាពគ្រួសាររបស់អ្នកស្រី ដែលកំពុងរស់នៅស្រុកខ្មែរ បន្ទាប់ពីមានការគំរាមកំហែងជាបន្តបន្ទាប់។
អ្នកស្រី វ៉ាន់ លក្ខិណា៖ «ខ្ញុំគិតថា វាអាប់កិត្តិយសប្រទេសជាតិមែនទែន នៅពេលយើងប្រកាសថា ប្រទេសកម្ពុជាយើងជាប្រទេសប្រកាន់លទ្ធិប្រជាធិបតេយ្យ គឺយើងមានរូបភាពមិនអាចទទួលយកបានជាច្រើនក្នុងការគំរាមកំហែងដោយពាក្យសម្ដីផ្សេងទៅ សកម្មភាពផ្សឹងអ៊ីចឹងទៅ ចា៎! ដល់ពេលថ្នាក់ដឹកនាំចេញសារគំរាមកំហែងសឹងសម្លាប់ផ្ដាច់ពូជបែបហ្នឹង សួរថា អ្នកវិនិយោគទុន អ្នករកស៊ីធំដុំឯណា ដែលគេចង់មករកស៊ីនៅស្រុកខ្មែរ នៅពេលស្រុកខ្មែរពោរពេញដោយអំពើពុករលួយសាហាវព្រៃផ្សៃបែបនេះនោះ»។
ក្រៅពីនេះ យុវជននៅប្រទេសកូរ៉េខាងត្បូងមួយចំនួន ដែលសកម្មក្នុងការបញ្ចេញមតិរិះគន់រដ្ឋាភិបាលកម្ពុជានៅលើបណ្ដាញសង្គម ឬចេញមុខដឹកនាំបាតុករចេញធ្វើបាតុកម្មប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) កន្លងទៅ ក៏បានផ្ដាច់ទំនាក់ទំនងជាមួយឪពុកម្តាយកំពុងរស់នៅស្រុកខ្មែរដែរ ក្រោយពីអាជ្ញាធររដ្ឋាភិបាល ហ៊ុន ម៉ាណែត តាមគំរាមកំហែង និងដាក់សម្ពាធលើគ្រួសារពួកគាត់នៅប្រទេសកម្ពុជាដើម។
កាលពីពេលថ្មីៗ លោក ហ៊ុន សែន បានបញ្ជាឱ្យក្រុមការងារពិសេសរបស់លោកជាមួយអាជ្ញាធរថៃលុបបំបាត់ចោលសកម្មភាពគណបក្សប្រឆាំង ដែលកំពុងធ្វើសកម្មភាពនៅក្នុងប្រទេសថៃ។ ក្នុងសារបែកធ្លាយរបស់លោក ហ៊ុន សែន ជិត២នាទី ដែលវិទ្យុអាស៊ីសេរីទទួលបាននោះ លោកក៏បានបញ្ជាឱ្យក្រុមការងារនោះតាមចាប់សកម្មជនបក្សប្រឆាំងលោក ផន ផាន់ណា ដែលកំពុងភៀសខ្លួននៅប្រទេសថៃយកមកកម្ពុជាវិញ ឱ្យខាងតែបាន ទោះជាក្នុងតម្លៃណាក៏ដោយ។
លោក ហ៊ុន សែន៖ «អា ហួត ត្រូវទទួលខុសត្រូវទៅលើការងារនេះ ហើយត្រូវធ្វើការជាមួយនគរបាលថៃ ហើយក្រុមអាវក្រហម ក៏ត្រូវតែចូលរួម ដែលមានសហការល្អជាមួយយើងត្រូវធ្វើសកម្មភាពនេះផងដែរ។ ហើយត្រូវធ្វើសកម្មភាពដាច់ដោយឡែកពីនគរបាលថៃ និងកម្លាំង យើងផ្ទាល់ បើទោះបីជាតម្លៃណាក៏ដោយរស់ ឬស្លាប់យើងមិនដឹងទេ តែដឹងថា អាមួយហ្នឹង មិនអាចចេញទៅណា មិនឱ្យចេញទៅណាបានទេ។ ដូច្នេះ ត្រូវអនុវត្តវិធានការនេះជាបន្ទាន់ ដាច់ខាតមិនឱ្យអា ផន ផាន់ណា នេះរួចខ្លួនបានទេ សូមអនុវត្តភ្លាម»។
មន្រ្តីគណបក្សភ្លើងទៀន ដែលកំពុងភៀសខ្លួននៅប្រទេសថៃ លោក លី ម៉េងឃៀង ប្រាប់ថា លោក ផន ផាន់ណា កំពុងស្នាក់នៅកន្លែងមានសុវត្ថិភាព ដើម្បីគេចពីការប៉ុនប៉ងចាប់ខ្លួនពីសំណាក់ការបញ្ជារបស់លោក ហ៊ុន សែន។ លោកឱ្យដឹងថា ចាប់តាំងគ្រួសារលោក ថាក់ស៊ីន (Thaksin) ឡើងកាន់អំណាចមក លោក ហ៊ុន សែន បានបង្កើនសកម្មភាពគំរាមកំហែង និងបញ្ជាឱ្យដៃជើងតាមចាប់ជនភៀសខ្លួនខ្មែរដល់ទឹកដីថៃ ដើម្បីបំភិតបំភ័យអ្នករិះគន់ និងរារាំងសកម្មជននៅទីនោះ កុំឱ្យចេញមុខប្រឆាំងរដ្ឋាភិបាលលោក ហ៊ុន ម៉ាណែត។
លោក លី ម៉េងឃៀង៖ «គាត់ (ហ៊ុន សែន) បង្ហាញភាពផ្ដាច់ការ ឃោរឃៅរបស់គាត់ ឬហៅថា សារជាតិដើម ដែលគាត់ជាមេកម្មាភិបាលខ្មែរក្រហមធ្លាប់កាប់សម្លាប់មនុស្ស ធ្លាប់តែចាប់មនុស្សដាក់គុកតាមអំពើចិត្ត អ៊ីចឹងគាត់បង្ហាញអំពើឃោរឃៅរបស់គាត់ត្រឡប់មកវិញ»។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សកាន់អំណាចលោក សុខ ឥសាន ដើម្បីបកស្រាយរឿងនេះបានទេ នៅថ្ងៃទី២៧ ខែកញ្ញា។
អ្នកឃ្លាំមើល ចាត់ទុកការធ្វើទុក្ខបុកម្នេញសកម្មជនឆ្លងដែននេះថា ជាសកម្មភាពផ្ទុយពីច្បាប់ជាតិ និងអន្តរជាតិ ហើយពួគាត់ស្នើដល់មេដឹកនាំប្រជាធិបតេយ្យថា ត្រូវតែធ្វើការរួមគ្នាដាក់សម្ពាធលើរដ្ឋាភិបាលក្រុងភ្នំពេញ ដើម្បីដោះស្រាយបញ្ហាទាំងនេះជាបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
នយោបាយ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង