លោក ហ៊ុន សែន ប្រកាសបញ្ចប់ការចូលរួមក្នុងគម្រោងតំបន់ត្រីកោណអភិវឌ្ឍន៍កម្ពុជា ឡាវ វៀតណាម ហៅកាត់ថា CLV-DTA ហើយ
2024.09.20
លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា។
រូប៖ ហ្វេសប៊ុកលោក ហ៊ុន សែន/2024-08-30
មេដឹកនាំកំពូលនៅកម្ពុជាលោក ហ៊ុន សែន ប្រកាសថា កម្ពុជាសម្រេចបញ្ចប់ការចូលរួមក្នុងគម្រោងតំបន់ត្រីកោណអភិវឌ្ឍន៍កម្ពុជា ឡាវ វៀតណាម ហៅកាត់ថា CLV-DTA ហើយ។ ការប្រកាសនេះ ធ្វើឡើងតាមរយៈបណ្ដាញសង្គមហ្វេសប៊ុកផ្លូវការរបស់លោក កាលពីយប់ថ្ងៃទី២០ កញ្ញានេះ។
ប្រធានព្រឹទ្ធសភា និងជាប្រធានគណបក្សប្រជាជនកម្ពុជាលោក ហ៊ុន សែន ចេញមុខប្រកាសជំនួសកូនប្រុសរបស់លោក គឺលោក ហ៊ុន ម៉ាណែត ដែលជានាយករដ្ឋមន្ត្រីថា កម្ពុជាបញ្ចប់ការចូលរួមក្នុងតំបន់ត្រីកោណអភិវឌ្ឍន៍ CLV ចាប់ពីថ្ងៃទី២០ ខែកញ្ញា ឆ្នាំ២០២៤ តទៅ។ លោកបញ្ជាក់ថា រដ្ឋាភិបាលបានជូនដំណឹងជាផ្លូវការទៅប្រទេសវៀតណាម និងប្រទេសឡាវរួចហើយ។
លោក ហ៊ុន សែន អះអាងថា ការសម្រេចចិត្តនេះ ផ្អែកទៅលើកង្វល់របស់ពលរដ្ឋលើបញ្ហាទឹកដី និងភាពចាំបាច់ខាងនយោបាយ។ ប៉ុន្តែ លោកនៅតែបន្តចោទប្រកាន់ពលរដ្ឋ ដែលប្រឆាំងនឹងគម្រោង CLV នេះថា ជាក្រុមជ្រុលនិយម ហើយលោកអះអាងថា ពួកគេនឹងលែងមានលទ្ធភាពប្រើប្រាស់រឿង CLV នេះ ដើម្បីនិយាយប្រាប់ពលរដ្ឋតទៅទៀត។ លោក ហ៊ុន សែន សង្កត់ធ្ងន់ថា ជោគជ័យរបស់បក្សប្រជាជនកម្ពុជា ស្ថិតលើរដ្ឋាភិបាលចេះដោះស្រាយកង្វល់ពលរដ្ឋ និងចេះដកអាវុធចេញពីដៃសត្រូវ។
ការសម្រេចចិត្តដ៏គួរឱ្យភ្ញាក់ផ្អើលរបស់រដ្ឋាភិបាលនៃក្រុមគ្រួសារត្រកូលហ៊ុននេះ កើតមានឡើងក្រោយពីមានពលរដ្ឋជាច្រើនបានបញ្ចេញមតិមិនគាំទ្រគម្រោង CLV។ ជាមួយគ្នានេះ ពលរដ្ឋខ្មែរនៅតាមប្រទេសជាច្រើន ដូចជា កូរ៉េខាងត្បូង ជប៉ុន អូស្ត្រាលី និងសហរដ្ឋអាមេរិក ជាដើម បាននាំគ្នាធ្វើបាតុកម្មជាបន្តបន្ទាប់ប្រឆាំងនឹងគម្រោង CLV នេះ ជាពិសេស មហាបាតុកម្មនៅកូរ៉េខាងត្បូងចំនួនពីរលើក ដែលមានអ្នកចូលរួមរាប់ម៉ឺននាក់។
ប្រធានគណៈកម្មការនាយកនៃចលនាប្រជាធិបតេយ្យរួបរួមជាតិប្រចាំប្រទេសកូរ៉េខាងត្បូង លោក ស សុខេម សាទរចំពោះការសម្រេចចិត្តដកកម្ពុជាចេញពីគម្រោង CLV។ ប៉ុន្តែ លោកថា លោក ហ៊ុន សែន ត្រូវដោះលែងអ្នកដែលអាជ្ញាធរបានចាប់ខ្លួនដោយសារការបញ្ចេញមតិរឿង CLV ហើយនិងត្រួតពិនិត្យមើលឡើងវិញនូវគម្រោង ឬកិច្ចសន្យានានាជាមួយក្រុមហ៊ុនវៀតណាមនៅខេត្តភាគឥសាន នោះទើបបង្ហាញថា លោកមានឆន្ទៈដោះស្រាយបញ្ហានេះពិតប្រាកដ។
លោក ស សុខេម៖ «លោក ហ៊ុន សែន យើងចង់ដឹងថា គាត់ធ្វើនេះដោយឆន្ទៈពិតប្រាកដ ឬអត់ យើងអាចមើលថា តើគាត់បោះជំហានទៅមុខដល់ចំណុចសើរើដីសម្បទានសេដ្ឋកិច្ចឱ្យក្រុមហ៊ុនវៀតណាមដែរ ឬទេ? បើអត់ទេ គឺគាត់មុខតែមិនទាន់ស្មោះត្រង់ទេ គាត់ធ្វើដើម្បីបន្លប់ចិត្តប្រជាពលរដ្ឋ ឬក៏មានគម្រោងអ្វីផ្សេង»។
ជុំវិញរឿងនេះដែរ អ្នកអត្ថាធិប្បាយនយោបាយ លោក គឹម សុខ យល់ថា ការប្រកាសដកខ្លួនចេញពីគម្រោង CLV នៅពេលនេះ ទំនងជាលោក ហ៊ុន សែន ខ្លាចចរន្តប្រឆាំងនឹងគម្រោង CLV រីកធំឡើង ដែលគំរាមកំហែងដល់អំណាចក្រុមគ្រួសាររបស់លោក មិនមែនជាការចេះដោះស្រាយកង្វល់ពលរដ្ឋនោះទេ។
លោក គឹម សុខ៖ «លោក ហ៊ុន សែន ខ្លាចមហាជន ប្រជាពលរដ្ឋតវ៉ាឱ្យក្រុមគ្រួសារហ៊ុនចុះចេញពីអំណាច ស្របពេលដែលស្ថានការណ៍នយោបាយរងសម្ពាធពីសហគមន៍អន្តរជាតិកាន់តែរឹតករដ្ឋាភិបាលលោក ហ៊ុន ម៉ាណែត។ បើលោក ហ៊ុន សែន គណបក្សប្រជាជនកម្ពុជា ពិតជាចេះស្ដាប់កង្វល់ និងដោះស្រាយកង្វល់របស់ប្រជាពលរដ្ឋមែន ពេលនេះលោក ហ៊ុន សែន ប្រកាសស្ដារលទ្ធិប្រជាធិបតេយ្យហើយ ពីព្រោះប្រជាពលរដ្ឋខ្មែរខ្វល់ខ្លាំងណាស់។ សព្វថ្ងៃ អត់ប្រជាធិបតេយ្យ ធ្វើឱ្យប្រជាពលរដ្ឋរស់នៅមិនបានសុខនោះទេ ហើយទឹកដីជាតិកម្ពុជាក៏ប្រឈមនឹងគ្រោះមហន្តរាយដែរ»។
ថ្វីបើបានប្រកាសដកកម្ពុជាចេញពីគម្រោង CLV ក្ដី លោក ហ៊ុន សែន បាននិយាយថា លោកនឹងមិនដោះលែងអ្នក ដែលត្រូវបានចាប់ខ្លួននោះទេ។ ក្នុងសារឆ្លើយតបទៅកាន់អ្នកប្រើហ្វេសប៊ុក ដែលសុំឱ្យលោកដោះលែងអ្នកជាប់ឃុំទាំងនោះ លោក ហ៊ុន សែន បានចោទថា ពួកគេឆ្លងបន្ទាត់ក្រហមទៅការផ្ដួលរំលំផ្ដួលរំលំរដ្ឋាភិបាលក្រោមលេស CLV។
អង្គការលីកាដូរកឃើញថា មានមនុស្សយ៉ាងតិច ១០០នាក់ ត្រូវបានចាប់ខ្លួន ក្នុងនោះជាង ៦០នាក់ ត្រូវបានចោទប្រកាន់ និងឃុំខ្លួនជាបណ្ដោះអាសន្នពាក់ព័ន្ធនឹងរឿង CLV នេះ។ អ្នកជាប់ឃុំទាំងនោះមានអាយុចន្លោះពី ១៦ឆ្នាំ ដល់ ៧០ឆ្នាំ ហើយពួកគេភាគច្រើនរងការចោទប្រកាន់ពីបទរួមគំនិតក្បត់ និងញុះញង់។
ក្រុមអ្នកនិយមប្រជាធិបតេយ្យអះអាងថា ទោះជាលោក ហ៊ុន សែន ប្រកាសដកកម្ពុជាចេញពី CLV ក៏ដោយ ក៏ពួកគេនៅតែបន្តគម្រោងធ្វើបាតុកម្ម ឬសកម្មភាពនានា ប្រឆាំងនឹងរដ្ឋាភិបាលត្រកូលហ៊ុនដដែល ដើម្បីទាមទារឱ្យមានការដោះលែងអ្នកជាប់ឃុំមនសិការទាំងឡាយ ព្រមទាំងទាមទារឱ្យរដ្ឋាភិបាលស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
នយោបាយ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង