សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
2024.09.29
ប្រធានព្រឹទ្ធសភា លោក ហ៊ុន សែន (ឆ្វេង) និងនាយករដ្ឋមន្ត្រី ហ៊ុន ម៉ាណែត ចូលរួមកិច្ចប្រជុំនៅទីស្នាក់ការគណបក្ស កាលពីថ្ងៃទី២៥ កញ្ញា ២០២៤។
រូប៖ ហ្វេសប៊ុកលោក ហ៊ុន សែន
អ្នកប្រើប្រាស់បណ្ដាញសង្គមមួយចំនួនបញ្ចេញមតិរិះគន់ប្រធានព្រឹទ្ធសភា លោក ហ៊ុន សែន និងជាឪនាយករដ្ឋមន្ត្រី ដែលនៅតែបន្តបញ្ចេញសារ បែបហិង្សានិយមទាំងផ្លូវសម្ងាត់ និងជាចំហក៏មាន ឲ្យកំចាត់ ឬកម្ទេច នូវក្រុមពលរដ្ឋ យុវជន និងក្រុមអ្នកនយោបាយជំទាស់ទាំងក្នុង និងក្រៅប្រទេស ទោះបីជាលោកអស់តួនាទីជានាយករដ្ឋមន្តីហើយក៏ដោយ។
ពួកគេយល់ឃើញថា សារសំឡេងរបស់លោក ហ៊ុន សែន ទាំងនោះ អាចជាភស្តុតាងគ្រប់គ្រាន់ ក្នុងការដាក់ពាក្យបណ្ដឹងទៅកាន់តុលាការព្រហ្មទណ្ឌអន្តរជាតិ (ICC) ដើម្បីតុលាការអន្តរជាតិមួយនេះចាត់វិធានតាមផ្លូវច្បាប់លើលោក ហ៊ុន សែន។
ក្រោយពីផ្ទេរតំណែងនាយករដ្ឋមន្ត្រីទៅឲ្យកូន លោក ហ៊ុន សែន មិនបានបន្ធូរដៃ ក្នុង ការគំរាមកំហែង និងប្រើនូវយុទ្ធសាស្ត្រផ្សេងៗទៀត តាមកំចាត់ កម្ទេច ដល់ឫសគល់ នៃក្រុមអ្នកនយោបាយជំទាស់ បើទោះបីជាក្រុមនេះភៀសខ្លួនចេញក្រៅប្រទេស ហើយទទួលបានសិទ្ធិជាជនភៀសខ្លួនការពារដោយអង្គការសហប្រជាជាតិទទួលបន្ទុកជនភៀសខ្លួន (UNHCR) ក៏ដោយ។
ម្ចាស់គណនីហ្វេសប៊ុកមួយ ដែលដាក់ឈ្មោះថា ឈិន រ៉ាជូ (Chin Rachou) បានបញ្ចេញទស្សនៈ ជុំវិញបញ្ហានេះថា៖ «មួយថ្ងៃទៅមួយថ្ងៃអត់គិតជួយជាតិទេ គិតតែពីសម្លាប់ជាតិសាសន៍របស់ខ្លួន អាចង្រៃប្រចាំត្រកូល..»។
ការបញ្ចេញមតិបែបនេះ លោកមិនបានបង្ហាញចំឈ្មោះអ្នកណាទេ តែគាត់ទំនងជាចង់ឌឺដងឲ្យលោក ហ៊ុន សែន។
រីឯម្ចាស់គណនីហ្វេសប៊ុកមួយផ្សេងទៀត ដាក់ឈ្មោះថា ឆាយ ឆរីសា (Chhay Chorisa) គាត់បានសរសេរបញ្ចេញមតិហាក់ឆ្លើយឆ្លងនឹងរឿងសារគំរាមរបស់ លោក ហ៊ុន សែន នេះដែរថា៖ «ខ្មែរដែលបក្សកាន់អំណាច តាមចាប់ តាមធ្វើបាប ចងកម្មចងពារ សុទ្ធតែជាមនុស្សល្អ....!! ហ៊ានលះបង់ កម្លាំងកាយចិត្ត ថវិកា ប្ដូរទាំងជីវិត ដើម្បីប្រទេសជាតិ នឹងឲ្យមានយុត្តិធម៌ ក្នុងសង្គមខ្មែរ អ្នកនៅក្នុងcpp បើអ្នកមិនមែនជាវៀតណាមទេ (យួន) ពិតជាយល់។
ការបញ្ចេញមតិទាំងនេះ បន្ទាប់ពីអាស៊ីសេរី ទទួលបានសារសំឡេងបែកធ្លាយនៅថ្ងៃទី២៤ កញ្ញារបស់អតីតនាយករដ្ឋមន្ត្រី ហ៊ុន សែន បានបញ្ជាឱ្យក្រុមការងារពិសេសរបស់ខ្លួន តាមចាប់សកម្មជនបក្សប្រឆាំងមួយរួប ដែលកំពុងភៀសខ្លួននៅប្រទេសថៃយកមកកម្ពុជាវិញ ឱ្យខាងតែបាន ទោះជាក្នុងតម្លៃណាក៏ដោយ ត្រូវចាប់មកទាំងរស់ ឬស្លាប់ក៏ដោយ។
ទោះយ៉ាងណាក្តី មកដល់ម៉ោងផ្សាយនេះ គេមិនទាន់ឃើញ លោក ហ៊ុន សែន ចេញមុខមកបកស្រាយជាសាធារណៈជុំវិញរឿងសារសំឡេងគំរាមកំហែង ដែលបែកធ្លាយចុងក្រោយនេះថាយ៉ាងណានៅឡើយទេ។ រដ្ឋាភិបាល និងបក្សប្រជាជនក៏មិនទាន់ឆ្លើយតបរឿងនេះដែរ។
ទោះយ៉ាងណា ករណីបែបនេះ មិនមែនជាលើកទី១ទេ ដែលរដ្ឋាភិបាលត្រកូលហ៊ុន បញ្ជូនក្រុមការងារសម្ងាត់របស់ខ្លួន ទៅសហការជាមួយអាជ្ញាធរថៃ ដើម្បីចាប់ខ្លួនសកម្មជនបក្សប្រឆាំងឬអ្នករិះគន់ បញ្ជូនទៅកម្ពុជាវិញ។ មនុស្សដែលត្រូវលោក ហ៊ុន សែន បញ្ជាឱ្យចាប់ខ្លួនកន្លងមក ពីប្រទេសថៃបញ្ជូនទៅកម្ពុជាវិញ រួមមាន អ្នកស្រី សម សុខា ដែលយកស្បែកជើងគប់លើផ្ទាំងរូបថតរបស់លោក និងមនុស្សពីរនាក់ទៀត គឺលោក វឿង សំណាង និងលោក វឿន វាសនា ហៅក្រញូងព្រៃឡង់ជាដើម។
ជុំវិញរឿងនេះដែរ ម្ចាស់គណនីហ្វេសប៊ុក ដែលដាក់ ឈ្មោះថា វិថីជីវិតបានបញ្ចេញទស្សនៈថា «បើជាមួយខ្មែរគ្នាឯងអ៊ីចឹង សាហាវឃោរឃៅ ងាប់រស់ណាស់ តែបើជាមួយវៀតណាមវិញ (យួនវិញ) មិនហ៊ានទេ ខ្លាចគេឡើងរួញ...»។
ចំណែកម្ចាស់គណនីហ្វេសប៊ុកមួយផ្សេងទៀត ដាក់ឈ្មោះ ថា ឃឹម សំអឿន គាត់បានពោលយ៉ាងខ្លីបែបកម្មផលទៅវិញថា៖ «សាងបាបកម្មធ្ងន់ណាស់សែនអើយ...»។
រីឯនៅលើបណ្ដាញសង្គម យូធូប (Youtube) ឯណោះវិញ!!
ម្ចាស់គណនីមួយ ឈ្មោះថា តា សាញ់ (tarsanh) បានពោលចំអកដោយមិនចំឈ្មោះថា៖ «ចុះចេញពីតំណែងហើយនៅតាមធ្វើទុក្ខគេទៀត...តានេះ...! អាក្រក់ណាស់...»។
ចំណែក ម្ចាស់គណនីយូធូប មួយទៀត ឈ្មោះថា ចៃ កំសាន្ត គាត់បានសរសេរថា៖ «ខ្លាំងមែន នៅក្រៅស្រុកហើយ នៅមានលទ្ធភាពចាប់មនុស្សបានទៀត សិស្សពូទីន ថ្លើមមិនចាញ់ពូទីនទេ...»
ដោយឡែកម្ចាស់គណនីយូធូប ដែលដាក់ឈ្មោះថា វីស៊ីជីជី (vcgg6498) គាំទ្រឲ្យរួមគ្នាប្រមូលឯកសារដាក់ពាក្យប្តឹង លោក ហ៊ុន សែន ទៅតុលាការព្រហ្មទណ្ឌអន្តរជាតិ (ICC)។
ម្ចាស់គណនីយូធូបរូបនេះ បានសរសេរថា៖ «មានសារសំឡេងជាភស្តុតាងអ៊ីចឹងហើយ គួរតែដាក់ពាក្យបណ្ដឹងទៅតុលាការព្រហ្មទណ្ឌអន្តរជាតិឱ្យចុះអន្តរាគមន៍ចាប់ជនគំរាមកំហែង»។
ដោយឡែកម្ចាស់គណនីយូធូប មួយទៀត ឈ្មោះថា បួយ ទីណា (BouyTyna) គាត់បានសរសេរចំអកឲ្យរដ្ឋាភិបាលបច្ចុប្បន្នដោយដាក់ជាសំណួរថា៖ «ម្លប់សន្តិភាពយ៉ាងម៉េច? បើថ្នាក់ដឹកនាំនិងប្រជាជនភ័យខ្លាចរាល់តែថ្ងៃយ៉ាងហ្នឹង...»?
ដោយឡែកអ្នកប្រើប្រាស់បណ្ដាញសង្គមជាច្រើនផ្សេងទៀតក៏បានបញ្ចេញមតិ យល់ឃើញប្រហាក់ប្រហែលគ្នានេះដែរ ដោយខ្លះ បន់ស្រន់ សូមឲ្យលោក ផន ផាន់ណា និងក្រុមគ្រួសារ មានសេចក្តីសុខបានរួចផុតពីគ្រោះ រួចផុតពីទុក្ខព្រួយដែលតិរច្ឆានតាមប្រមាញ់យ៉ាងដូច្នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
នយោបាយ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង