សម្ព័ន្ធភាព​ចាក់ស្រេះ​រវាង​គ្រួសារ​អ្នក​កាន់​អំណាច និង​គ្រួសារ​អ្នក​ជំនួញ «អាច​បង្ក​ផល​ប៉ះពាល់​ប្រយោជន៍​ជាតិ​ធ្ងន់ធ្ងរ»

ក្នុង​ពេល​ប្រជាពលរដ្ឋ កំពុង​មាន​វិបត្តិ​សេដ្ឋកិច្ច ក្រុម​មន្ត្រី​កំពូលៗ បែរជា​កំពុង​សម្ញែង​ទ្រព្យសម្បត្តិ និង​ការរៀបចំ​ពិធី​មង្គលការ​កូន​ចៅ​របស់​ពួកគេ​ដោយ​ចំណាយ​លុយ​រាប់​សិប​ម៉ឺន​ដុល្លារ។ ក្រុម​អ្នក​រិះគន់ ព្រួយបារម្ភ​ថា ការ​ចងសម្ព័ន្ធភាព​គ្នា​ចាក់ស្រេះ​រវាង​គ្រួសារ​អ្នក​កាន់អំណាច​នយោបាយ និង​គ្រួសារ​អ្នកជំនួញ ដូចជា​ពិធី​រៀបការ​រវាង​កូនប្រុស​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន និង​ចៅស្រី​របស់​ឧកញ៉ា ឡាវ ម៉េងឃីន ព្រមទាំង​ពិធី​រៀបការ​ចៅ​ចំនួន ៣​នាក់​របស់​អតីតរដ្ឋមន្ត្រី​ក្រសួង​រៀបចំ​ដែនដី លោក ជា សុផារ៉ា ជាមួយ​គ្រួសារ​អ្នកជំនួញ និង​គ្រួសារ​អ្នកកាន់អំណាច​ផ្សេងទៀត នឹង​នាំ​ឲ្យ​មាន​ទំនាស់​ផលប្រយោជន៍​ធ្ងន់ធ្ងរ​ក្នុង​ប្រទេស។

ក្រុម​គ្រួសារ​ឥស្សរជន​នយោបាយ​របស់​គណបក្ស​អំណាច កំពុង​អួត​សម្ញែង​ទ្រព្យ សម្បត្តិ​ដាក់គ្នា​តាមរយៈ​ការរៀបចំ​ពិធី​មង្គលការ​កូនចៅ​ជំនាន់​ក្រោយ​របស់​ពួកគេ​ជាមួយ​គ្រួសារ​មន្ត្រី​កាន់អំណាច​នយោបាយ​កំពូលៗ​ដូចគ្នា និង​ជាមួយ​គ្រួសារ​អ្នកជំនួញ​លំដាប់​កំពូលៗ​ក្នុង​ប្រទេស។ នេះ​គឺជា​ការ​ចង​រឹត​បន្តឹង​សម្ព័ន្ធភាព​របស់​ពួកគេ​កាន់តែ​រឹងមាំ​បន្ថែម​ទៀត ដើម្បី​ផ្តល់​ផលប្រយោជន៍ និង​ការពារ​គ្នា​ទៅវិញទៅមក។

ពិធី​មង្គលការ​រវាង​កូនប្រុស​របស់​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ​លោក អូន ព័ន្ធមុនីរ័ត្ន ឈ្មោះ អូន ព័ន្ធមុនីរាជ និង​កូនស្រី​របស់​ឧកញ៉ា ឡាវ វ៉ាន់ រដ្ឋលេខាធិការ​ក្រសួង​សាធារណការ និង​ដឹកជញ្ជូន ឈ្មោះ ឡាវ ជៀជីន ដែល​ត្រូវជា​ចៅស្រី​ឧកញ៉ា ឡាវ ម៉េងឃីន និង​អ្នកស្រី ជឹង សុភាព ហៅ​យាយ ភូ កំពុង​លេចធ្លោ​ក្នុង​បណ្ដាញ​សង្គម។

លោក ឡាវ វ៉ាន់ បាន​បង្ហោះ​វីដេអូ​មង្គល​ការកូន​របស់​លោក​ជា​បន្តបន្ទាប់ អម​ជាមួយ​សារ​បង្ហាញ​ពី​មោទនភាព​ដែល​បាន​ផ្សា​សាច់ឈាម​ជាមួយ​គ្រួសារ​លោក អូន ព័ន្ធមុនីរ័ត្ន ដែល​ជា​មនុស្ស​មាន​ឥទ្ធិពល​បំផុត​នៅ​ក្បែរ​លោក ហ៊ុន សែន ។ ពិធី​មង្គលការ​ដែល​ជះ​លុយរាប់​សិប​ម៉ឺន​ដុល្លារ​នេះ រៀបចំ​រយៈពេល​ពីរ​ថ្ងៃ​ពី​ថ្ងៃ​ទី​២៥ ដល់ ២៦ វិច្ឆិកា នៅក្នុង​ភូមិគ្រឹះ​ដ៏​ធំ​ស្កឹមស្កៃ និង​ប្រណិត ព្រមទាំង​រៀបចំ​លម្អ​ដោយ​ផ្កា​ចម្រុះ​ពណ៌​ប្រៀប​ដូចជា​ឋានសួគ៌​នៅ​លើ​ដី។ ក្រុមគ្រួសារ​លោក ហ៊ុន សែន មន្ត្រី​កំពូលៗ​គ្រប់​ក្រសួង​ស្ថាប័ន និង​ពួក​អភិជន​ជា​ច្រើន​រូប សុទ្ធ​តែ​មាន​វត្តមាន​ក្នុង​ពិធី​មង្គលការ​នេះ​។ ភរិយា​របស់​លោក ហ៊ុន ម៉ាណែត គឺជា​អ្នក​ដឹក​ដៃ​កូនក្រមុំ​ដោយ​ផ្ទាល់។ អ្វី​ដែល​កាន់តែ​ចាប់អារម្មណ៍​ទៀត​នោះ ទាំង​កូនកំលោះ​កូនក្រមុំ និង​អ្នកចូលរួម សុទ្ធតែ​តុបតែង​ខ្លួន​លម្អ​ដោយ​គ្រឿង​អលង្ការ និង​សំលៀកបំពាក់​ដែល​មាន​តម្លៃ​រាប់​ម៉ឺន​ដុល្លារ។ គ្រាន់តែ​នាឡិកា​ដៃ​របស់​កូនកំលោះ ត្រូវ​បាន​គេ​ដឹង​ថា មាន​តម្លៃ​ជាង ១០​ម៉ឺន​ដុល្លារ។

ខណៈ​លោក អូន ព័ន្ធមុនីរ័ត្ន កំពុង​គ្រប់គ្រង​ក្រសួង​សេដ្ឋកិច្ច និង​ហិរញ្ញវត្ថុ​នេះ ភរិយា​របស់​លោក អ្នកស្រី អ៊ឹម ប៉ូលីកា គឺជា​អ្នកជំនួញ​ដ៏​ជោគជ័យ​ម្នាក់។ ពួកគេ​បាន​បញ្ជូន​កូនប្រុស គឺ​លោក អូន ព័ន្ធមុនីរាជ មក​រស់នៅ និង​រៀនសូត្រ​ក្នុង​ប្រទេស​អូស្ត្រាលី ក្នុង​ជីវភាព​ដ៏​ហ៊ឺហា។ កាលពី​ឆ្នាំ​២០១៤ អ្នកស្រី អ៊ឹម ប៉ូលីកា បាន​ចំណាយ​លុយ​២,១ លាន​ដុល្លារ​អូស្ត្រាលី​(​ស្មើនឹង​ប្រមាណ ១,៥ លាន​ដុល្លារ​អាមេរិក​) ទិញ​អាផាតមិន​មួយ​ក្នុង​តំបន់ វ័ន សេនត្រល ផាក (One Central Park) នៅ​ក្រុង​ស៊ីដនី (Sydney) ដើម្បី​ឲ្យ​កូនប្រុស​ស្នាក់នៅ។ លើស​ពី​នេះ អ្នកស្រី​ក៏​បង្កើត​មុខ​ជំនួញ​ជាច្រើន​ស្ទើរ​គ្រប់​វិស័យ រាប់​ចាប់តាំងពី​ភោជនីយដ្ឋាន ក្លឹប​កម្សាន្ត កសិកម្ម ទេសចរណ៍ ចំណីអាហារ និង​អចលនទ្រព្យ​ជាដើម ហើយ​មុខ​ជំនួញ​មួយចំនួន​មានឈ្មោះ​លោក អូន ព័ន្ធមុនីរាជ អាយុ​២៥​ឆ្នាំ ជា​អ្នកគ្រប់គ្រង​ទាំង​នៅ​កម្ពុជា និង​អូស្ត្រាលី។ ប៉ុណ្ណឹង​ហើយ​មិន​គ្រប់គ្រាន់​ទេ លោក អូន ព័ន្ធមុនីរ័ត្ន រួម​ទាំង​ប្រពន្ធ និង​កូន​របស់​លោក បាន​ដឹក​ដៃ​គ្នា​ទៅ​ទិញ​សញ្ជាតិ​ស៊ីប (Cyprus) ស្ងាត់ៗ ហើយ​ត្រូវ​បាន​កាសែត​អន្តរជាតិ​ចុះផ្សាយ​ល្បី​សុះសាយ​ម្តង​ហើយ កាលពី​ឆ្នាំ​២០១៩ ពាក់ព័ន្ធ​នឹង​បំណង​រត់​ចោលស្រុក​សន្តិភាព និង​យក​លុយ​មក​រក្សាទុក​នៅ​ក្រៅប្រទេស។

នៅ​ពេល​នេះ លោក អូន ព័ន្ធមុនីរ័ត្ន បាន​ក្លាយ​ជា​ដន្លងដងស្នែង​ជាមួយ​លោក ឡាវ វ៉ាន់ ដែល​ជា​គ្រួសារ​មួយ​មាន​ទាំង​អំណាច​នយោបាយ និង​គ្រប់គ្រង​សេដ្ឋកិច្ច​ខ្មែរ​មួយ​ផ្នែក​ធំ។ លោក​ឧកញ៉ា ឡាវ វ៉ាន់ ជា​ប្រធាន​ក្រុមការងារ​គណបក្ស​ប្រជាជន​កម្ពុជា​ប្រចាំ​តំបន់​មែលប៊ន (Melbourne) ប្រទេស​អូស្ត្រាលី និង​ជា​រដ្ឋលេខាធិការ​ក្រសួង​សាធារណការ និង​ដឹកជញ្ជូន។ ប្រពន្ធ​របស់​លោក គឺ​អ្នកស្រី ជឹង សុគន្ធាវី ជា​ម្ចាស់​ក្រុមហ៊ុន វ៉នម៉រ លីមីតធីត (ONE MORE Ltd.) ដែល​មាន​បុត្រ​សម្ព័ន្ធ​មួយ​គឺ​ក្រុមហ៊ុន អិនវីស៊ី ខុបភើរេសិន (NVC Cooperation) ផលិត​ទឹក​វីតាល់ ក្រុមហ៊ុន​ផលិត​មី​ជាតិ ភោជនីយដ្ឋាន និង​សហគ្រាស​ឱសថ​កម្ពុជា​។ ឪពុកម្ដាយ​របស់​ពួកគេ គឺ​ប្រធាន​ក្រុមប្រឹក្សាភិបាល​ក្រុមហ៊ុន​ភាពីមិច (Pheapimex group ) សមាជិក​ព្រឹទ្ធសភា​បក្ស​កាន់អំណាច លោក ឡាវ ម៉េងឃីន និង​អ្នកស្រី ជឹង សុភាព អនុប្រធាន​កាកបាទក្រហមកម្ពុជា និង​ជា​ដៃគូ​ជំនួញ​របស់​អ្នកស្រី ប៊ុន រ៉ានី ដែល​កេរ្តិ៍ឈ្មោះ​អាស្រូវ​រឿង​បំផ្លាញ​ធនធាន​ធម្មជាតិ និង​បណ្តេញ​អ្នកក្រ​យក​ដី ដូចជា​នៅ​តំបន់​បឹងកក់​ជាដើម។ លោក ឡាវ ម៉េងឃីន និង​អ្នកស្រី ជឹង សុភាព ក៏បាន​ចំណាយ​លុយ​ទិញ​សញ្ជាតិ​ស៊ីប​ដែរ។

លោក ឡាវ វ៉ាន់ មិន​ត្រឹមតែ​ពង្រីក​ឥទ្ធិពល​នយោបាយ​ឲ្យ​បក្ស​កាន់អំណាច​នៅ​អូស្ត្រាលី​ប៉ុណ្ណោះ​ទេ លោក និង​ភរិយា ក៏​កំពុង​ពង្រីក​មុខ​ជំនួញ​ដែរ។ កាល​ពី​ឆ្នាំ​២០១៥ អ្នកស្រី ជឹង សុគន្ធាវី បាន​ទិញ​ផ្ទះល្វែង​ប្រណីត ឬ​អាផាតមិន នៅ​ជាន់​ទី២៤ ក្នុង​ប្លុក​អគារ​ខ្ពស់ៗ (Tower) ផ្ដាច់មុខ​មួយ​នៅ​ទីក្រុង​មែលប៊ន​នេះ ក្នុង​តម្លៃ ៤​លាន​ដុល្លារ​អូស្ត្រាលី ឬ​ប្រហែល​ជិត ៣​លាន​ដុល្លារ​អាមេរិក ។ បន្ទាប់​មក ប្តី​ប្រពន្ធ​មួយគូ​នេះ បាន​បង្កើត​អាជីវកម្ម​នៅ​អូស្ត្រាលី​ចំនួន ២​កន្លែង រួមមាន ហាង​នំ មែលប៊ន (Melbourne bakery) ដែល​បាន​បើក​ដំណើរការ​តាំង​ពី​ខែ​ធ្នូ ឆ្នាំ​២០១៩ មក ដោយមាន​កូនស្រី​ឈ្មោះ​ឡាវ ជៀជីន (Lau Jai Zhen) ជា​អ្នកគ្រប់គ្រង។

ការ​រៀបចំ​ផ្សំផ្គុំ នាង ឡាវ ជៀជីន និង​លោក អូន ព័ន្ធមុនីរាជ នេះ ត្រូវ​បាន​គេ​មើល​ឃើញ​ថា អំណាច​នយោបាយ និង​មុខ​ជំនួញ​របស់​គ្រួសារ​លោក ឡាវ វ៉ាន់ និង​គ្រួសារ​លោក អូន ព័ន្ធមុនីរ័ត្ន នឹង​កាន់តែ​រីក​ធំ​បន្ថែម​ទៀត ដូច​ស្តែង​ឲ្យ​ឃើញ​មួយ​រយៈ​ពេល​ចុង​ក្រោយនេះ​ក្រុមហ៊ុន​គ្រួសារ​ទាំងពីរ​នេះ​ទទួល​បាន​ដី​សម្បទាន ជាច្រើន​កន្លែង​ពី​រដ្ឋាភិបាល​នៅក្នុង​តំបន់​ការពារ​បរិស្ថាន ដូចជា​នៅ ឧទ្យាន​ជាតិ​ព្រះសុរាម្រិត ឬ​ហៅថា ឧទ្យានជាតិ​គិរីរម្យ។

មិនមែន​តែ​ពីរ​ត្រកូល​នេះ​ទេ ត្រកូល​អ្នក​ជំនួញ និង​អ្នក​កាន់​អំណាច​ផ្សេងទៀត ក៏​រត់​រកគ្នា​ដែរ។ កាលពី​ថ្ងៃទី​២៩ វិច្ឆិកា អភិបាល​រាជធានី​ភ្នំពេញ លោក ឃួង ស្រេង បាន​រៀបចំ​ពិធី​មង្គលការ​កូន​ស្រី​របស់​លោក ឈ្មោះ ឃួង ស៊ីណាម៉ាលីន ជាមួយ​កូនប្រុស​របស់​រដ្ឋមន្ត្រី​ក្រសួង​បរិស្ថាន លោក អ៊ាង សុផល្លែត ឈ្មោះ អ៊ាង និតិភព ដេនីស ត្រូវជា​ចៅប្រុស​របស់​លោក ជា សុផារ៉ា។ មង្គលការ​នេះ ក៏​ចំណាយ​លុយ​ដ៏​សន្ធឹកសន្ធាប់​រៀបចំ​យ៉ាង​ល្អ​ប្រណិត មិន​ឲ្យ​ចាញ់​មង្គលការ​កូនចៅ​អ្នកធំ​ផ្សេង​ទៀត​ឡើយ។

កាលពី​ខែ​ធ្នូ ឆ្នាំ​២០២២ ចៅស្រី​លោក ជា សុផារ៉ា ម្នាក់​ទៀត និង​ត្រូវជា​កូនស្រី លោក អ៊ាង សុផល្លែត ដែរ​នោះ ឈ្មោះ អ៊ាង និធិជ្ជនី ដឺណេ បាន​រៀបការ​ជាមួយ​កូនប្រុស​រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ លោក ប៉ែន សំអាត ឈ្មោះ ប៉ែន សំអាត សុទ្ធចិត្ត​។ នៅ​មុន​នេះ ៥​ខែ លោក ជា សុផារ៉ា ក៏បាន​រៀបចំ​មង្គលការ​ចៅស្រី​របស់​លោក​ម្នាក់ទៀត ជាមួយ​កូនប្រុស​ថៅកែ​ក្រុមហ៊ុន​ជីបម៉ុង។

ដោយឡែក កាលពី​ខែ​មិថុនា ឆ្នាំ​២០២៣ ឧបនាយករដ្ឋមន្ត្រី និង​អតីត​អគ្គស្នងការ​នគរបាល​ជាតិ លោក នេត សាវឿន ក៏បាន​រៀបការ​កូនស្រី​របស់​លោក ជាមួយ​កូនប្រុស​អតីត​ឯកអគ្គរាជទូត​ខ្មែរ​ប្រចាំ​រដ្ឋធានី​វ៉ាស៊ីនតោន លោក ហែម ហេង។

ពិធី​មង្គលការ​កូនចៅ​អ្នកធំ​ទាំងនេះ ផ្ទុះ​ការចាប់អារម្មណ៍​ខ្លាំង និង​មាន​ការ​ជជែក​វែកញែក​ច្រើន​អំពី​របៀប​រស់នៅ​របស់​ក្រុម​អ្នក​មាន​អំណាច និង​ការ​ចងសម្ព័ន្ធភាព​គ្នា​ចាក់ស្រេះ​នៅក្នុង​ប្រទេស​មួយ​ដែល​ប្រជាជន​ម្នាក់ៗ​រក​ចំណូល​ប្រចាំឆ្នាំ​បាន​ក្រោម ២​ពាន់​ដុល្លារ។

អនុប្រធាន​គណបក្ស​ភ្លើងទៀន លោក សុន ឆ័យ មាន​ប្រសាសន៍​ថា ការ​សម្ញែង​ទ្រព្យ​សម្បតិ្ត​តាមរយៈ​ការរៀបចំ​មង្គល​ការកូន​ចៅ​របស់​ក្រុម​អ្នកកាន់អំណាច​នេះ ប្រសិនបើ​នៅ​ប្រទេស​ដែល​មាន​អង្គភាព​ប្រឆាំង​អំពើពុករលួយ និង​តុលាការ ឯករាជ្យ​នោះ លោក​ជឿ​ថា នឹង​មាន​ការស៊ើបអង្កេត​ទៅលើ​ប្រភព​ទ្រព្យសម្បត្តិ​របស់​ពួកគេ។ លោក​បន្ថែម​ថា បើ​ទោះ​បី​ជា​អ្នកមាន​លុយ និង​អ្នក​មាន​អំណាច ខំ​ចងសម្ព័ន្ធភាព ដើម្បី​ការពារ​ផលប្រយោជន៍​គ្នា​ក្តី ក៏​មិនអាច​ធានា​សុវត្ថិភាព​របស់​ពួកគេ បាន​យូរ​អង្វែង​ដែរ ប្រសិនបើ​ការគ្រប់គ្រង​ប្រទេស​មិនបាន​ល្អ​ត្រឹមត្រូវ ដែល​នាំ​ឲ្យ​ប្រជាពលរដ្ឋ​រង​ទុក្ខ​វេទនា​នោះ។

លោក សុន ឆ័យ៖ «ដូច​ខ្ញុំ បាន​ជម្រាប​ជូន​ខាងដើម វា​រឿង​ផលប្រយោជន៍​។ នៅពេល​គេ​មានទ្រព្យ​សម្បត្តិ​ច្រើន មានអំណាច ហើយ​អ្នក​មាន​អំណាច​ស្រុក​យើង ក៏​មាន​លុយ​កាក​ច្រើន​ដែរ អ្នក​រកស៊ី ក៏​លុយ​ច្រើន អ្នក​មាន​អំណាច ក៏​លុយ​ច្រើន ម្ល៉ោះ​ហើយ​កាលណា គេ​មានទ្រព្យ​សម្បត្តិ​ច្រើន គេ​មិន​ចង់​ឲ្យ​កូនចៅ​រៀបការ​ជាមួយ​អ្នក​ក្រីក្រ​ទេ គេ​ច្រើនតែ​ឲ្យ​កូនចៅ គេ​រៀបចំ​នៅក្នុង​វណ្ណៈ ឬ​កម្រិត​នៃ​សង្គម​របស់​ពួកគេ។ នេះ​ជា​របៀប​មួយ​ដែល​កើត​មាន នៅក្នុង​សង្គម​ថៃ ក៏​មាន​ដែរ ប៉ុន្តែ​ដូច​ខ្ញុំ​បាន​ជម្រាប​ហើយ​ជម្រាប​ទៀត​ថា ប្រសិន​ណា​ជា​យើង​គ្រប់គ្រង​ប្រទេស​ត្រឹមត្រូវ អំណាច​មន្ត្រី​មិនអាច​ពុករលួយ​បាន​ដូច​នៅ​កូរ៉េខាងត្បូង​ជាដើម ប្រហែលជា​ពួក​អ្នក​មានៗ មិន​ឲ្យ​កូនប្រុស​ស្រី ទៅ​រៀបការ ជាមួយ​មន្ត្រី​រដ្ឋាភិបាល​ទេ»។

មក​ទល់​ពេល​នេះ ការ​ចង​សម្ព័ន្ធមេត្រីភាព​រវាង​កូនចៅ​ជំនាន់​ក្រោយ​របស់​ឥស្សរជន​នយោបាយ​បក្ស​កាន់អំណាច និង​ក្រុម​អ្នកជំនួញ​លំដាប់​ជួរមុខ​នៅ​កម្ពុជា បាន​ធ្វើ​ឲ្យ​អំណាច​នយោបាយ និង​មុខ​ជំនួញ​របស់​ក្រុម​គ្រួសារ​ពួកគេ កាន់តែ​រីក​ធំធាត់​គ្មាន​ព្រំដែន។

អ្នកវិភាគ​នយោបាយ លោក គឹម សុខ យល់​ឃើញ​ថា ទំនាក់ទំនង​ចាក់ស្រេះ​រវាង​គ្រួសារ​អ្នក​នយោបាយ​កាន់អំណាច និង​អ្នកជំនួញ នឹង​ធ្វើ​ឲ្យ​ប៉ះពាល់​ផលប្រយោជន៍​ជាតិ និង​ប្រជាពលរដ្ឋ​ធ្ងន់ធ្ងរ ព្រោះ​មនុស្ស​មួយ​ក្តាប់​តូច​នេះ នឹង​ចាត់ចែង​សេដ្ឋកិច្ចជាតិ និង​ការដឹកនាំ​ប្រទេស​សម្រាប់​តែ​ក្រុម​គ្រួសារ​ពួកគេ។

លោក គឹម សុខ៖ «បាន​ប្រយោជន៍​តែ​ពួកគេ​មួយ​ក្រុម​តូច​ដែល​ដឹកនាំ​ប្រទេស​ហ្នឹង ព្រោះ​វា​ជា​ការ​ចង​កម្លាំង​ដែល​បង្កើត​បក្ខពួក និង​បង្កើត​អយុត្តិធម៌ ទី​១​។​ទី​២ ចង​កម្លាំង​លុយ​ដែល​រកស៊ី​នៅ​ក្រោម​ប្រព័ន្ធ​ខ្មៅ​ងងឹត មិន​រីក​ចម្រើន​ដល់​សេដ្ឋកិច្ច ទាំង​សេដ្ឋកិច្ចជាតិ ទាំង​សេដ្ឋកិច្ច​របស់​ប្រជាពលរដ្ឋ​ទេ ។​ទី​៣ បោក​បំភ័ន្ត​ប្រជាពលរដ្ឋ ជា​យុទ្ធសាស្ត្រ​នយោបាយ​ក្លែងក្លាយ​ដែល​បោក​ថា ពួកគេ ដឹក​នាំទៅ​រីកចម្រើន»។

ជុំវិញ​រឿង​នេះ វិទ្យុ​អាស៊ីសេរី មិនអាច​ទាក់ទង​សុំ​ការ​ឆ្លើយតប​ពី​ប្រធាន​អង្គភាព​អ្នកនាំពាក្យ​រដ្ឋាភិបាល លោក ប៉ែន បូណា បាន​ទេ ដោយ​ទូរស័ព្ទ​ចូល​ពុំ​មាន​អ្នក​ទទួល។

ការ​ផ្សា​សាច់​ផ្សា​ឈាម​កូនចៅ​ជំនាន់​ក្រោយ​របស់​ក្រុម​មន្ត្រី​កំពូលៗ​បក្ស​កាន់អំណាច និង​ក្រុម​អ្នកជំនួញ​នៅ​ពេល​នេះ គឺ​យក​តាម​លំនាំ​កូនចៅ​ជំនាន់​មុន​របស់​មន្ត្រី​បក្ស​កាន់អំណាច ជាពិសេស​គ្រួសារ​លោក ហ៊ុន សែន​។ ការរៀបចំ​មង្គលការ​និង​បង្អួត​សម្ញែង​ទ្រព្យសម្បត្តិ​ដាក់គ្នា​របស់​ត្រកូល​អភិបាលជន​នៅ​ពេល​នេះ ទំនងជា​ពួកគេ​ចង់​បង្ហាញ​ទៅ​ពលរដ្ឋ​ថា ការ​ដឹកនាំ​ប្រទេស​របស់​ពួកគេ រីកចម្រើន​។ តែ​ផ្ទុយទៅវិញ ស្ថានភាព​ពលរដ្ឋ​នៅ​ពេល​នេះ កំពុង​ជួប​វិបត្តិ​សេដ្ឋកិច្ច​ធ្ងន់ធ្ងរ ដោយ​ខ្លះ​គ្មាន​លុយ​សងបំណុល​ធនាគារ និង​បង់​រំ​លោះ​ផ្ទះ​ជាដើម ដែល​ធ្វើ​ឲ្យ​ពួក គេ​បាត់បង់​ទីជម្រក​។ អ្នកឃ្លាំមើល យល់ថា មានតែ​ក្រុម​មេដឹកនាំ​ផ្ដាច់ការ និង​ពុករលួយ​នៅក្នុង​ប្រទេស​ក្រីក្រ​ប៉ុណ្ណោះ ដែល​ចូលចិត្ត​អួត​សម្ញែង​ទ្រព្យសម្បត្តិ និង​ចងសម្ព័ន្ធភាព​គ្នា​ដើម្បី​ការពារ និង​ផ្តល់​ផលប្រយោជន៍​ទៅវិញទៅមក៕