គណបក្សជំនាន់ថ្មីស្នើនាយករដ្ឋមន្ត្រី ហ៊ុន ម៉ាណែត ឱ្យដោះលែងសកម្មជនកិច្ចព្រមព្រៀងក្រុងប៉ារីសក្នុងពេលបុណ្យភ្ជុំបិណ្ឌ
2024.10.01
(រូបថតឯកសារ) ថ្នាក់ដឹកនាំគណបក្សជំនាន់ថ្មី ជួបជុំគ្នានៅទីស្នាក់ការកណ្ដាល ក្នុងរាជធានីភ្នំពេញ កាលពីខែកក្កដា ឆ្នាំ២០២៤។
រូប៖ មន្ត្រីគណបក្សជំនាន់ថ្មីផ្ដល់ឱ្យ
គណបក្សជំនាន់ថ្មីបានចេញសេចក្ដីថ្លែងការណ៍មួយស្នើលោកនាយករដ្ឋមន្ត្រី ហ៊ុន ម៉ាណែត ឱ្យដោះលែងសកម្មជនកិច្ចព្រមព្រៀងក្រុងប៉ារីស ៤រូប ក្នុងពេលបុណ្យកាន់បិណ្ឌ ដើម្បីឱ្យពួកគាត់អាចបន្តការងារសង្គម និងផ្សព្វផ្សាយ ពីខ្លឹមសារកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ក្នុងបំណងបម្រើឧត្ដមប្រយោជន៍ជាតិ។
គណបក្សជំនាន់ថ្មីបានចាត់ទុក ការចាប់ខ្លួនសកម្មជនកិច្ចព្រមព្រៀងសន្តិភាពក្រុងប៉ារីស ៤រូប ដាក់ពន្ធនាគារ នឹងធ្វើឱ្យពួកគាត់បាត់ឱកាសអប់រំផ្សព្វផ្សាយបណ្ដុះពុទ្ធិដល់ពលរដ្ឋ អំពីខ្លឹមសារច្បាប់ និងកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១ ដែលជាគ្រឹះ នៃលទ្ធិប្រជាធិបតេយ្យសេរីពហុបក្ស ផ្សាភ្ជាប់នឹងការផ្សះផ្សាជាតិខ្មែរ។
អ្នកនាំពាក្យគណបក្សជំនាន់ថ្មី លោក នួន សុភ័ក្ដ្រ ប្រាប់វិទ្យុអាស៊ីសេរីនៅថ្ងៃទី៣០ កញ្ញាថា ជំហររបស់គណបក្ស និងអ្នកគាំទ្រទាំងអស់ ចង់ឱ្យប្រមុខរដ្ឋាភិបាល និងតុលាការទម្លាក់បទចោទប្រកាន់ លើក្រុមយុវជនទាំងនេះ ហើយដោះលែងឱ្យពួកគាត់មានសេរីភាពវិញ ដើម្បីឱ្យពួកគាត់បានជួបជុំក្រុមគ្រួសារធ្វើបុណ្យទាន។
លោកបន្ថែមថា កិច្ចការរបស់សកម្មជនសង្គមទាំងនោះផ្ដល់សារៈសំខាន់ក្នុងការលើកកម្ពស់ប្រជាធិបតេយ្យ ដែលរដ្ឋាភិបាលគួរតែផ្ដល់ឱកាសឱ្យពួកគាត់។
លោក នួន សុភ័ក្ដ្រ៖ «គណបក្សយល់ឃើញថាវាជាអត្ថប្រយោជន៍របស់ប្រជាពលរដ្ឋទូទៅ ព្រោះអីសកម្មជនកិច្ចព្រមព្រៀងលោកបានផ្ដល់ពុទ្ធិដ៏ល្អដល់ប្រជាពលរដ្ឋជាខ្លាំងលើច្បាប់ទម្លាប់ ព្រោះនៅក្នុងច្បាប់កិច្ចព្រមព្រៀងនេះបានបង្ហាញអ្វីដែលជាសារៈប្រយោជន៍ ថាលទ្ធិប្រជាធិបតេយ្យសេរីពហុបក្សបានដោយកិច្ចព្រមព្រៀងទីក្រុងប៉ារីស មិនមែនបានមកដោយបុគ្គលណាម្នាក់ទេ»។
កាលពីចុងកក្កដាកន្លងទៅ សមត្ថកិច្ចបានឃាត់ខ្លួនសកម្មជនកិច្ចព្រមព្រៀងក្រុងប៉ារីស ៤នាក់ រួមមានលោក ស្រ៊ុន ស្រ៊ន កញ្ញា ភឹង សោភា លោក សាន សិទ្ធិ និងលោក ចក់ ប៊ានមុន្នី នៅស្រុកវ៉ាវិន ខេត្តសៀមរាប ក្នុងពេលពួកគាត់កំពុងរៀបចំបង្រៀនពលរដ្ឋឱ្យយល់ដឹងអំពីសិទ្ធិសេរីភាពរបស់ខ្លួន។
ការឃាត់ខ្លួននេះធ្វើឡើង ដោយសារ លោក ស្រ៊ុន ស្រ៊ន បង្ហោះសារតាមបណ្ដាញសង្គមរិះគន់ តំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA)។
គណបក្សជំនាន់ថ្មីបានហៅ សកម្មភាពរបស់ក្រុមយុវជនទាំងនោះ ចូលរួមកិច្ចការងារសង្គម បំពេញភារកិច្ចជាពលរដ្ឋសកម្ម ស្របតាមរដ្ឋធម្មនុញ្ញ រួមចំណែកបណ្ដុះបណ្ដាលធនធានយុវជន និងពលរដ្ឋឱ្យយល់ដឹងពីសិទ្ធិមនុស្ស តថភាពសង្គម និងខ្លឹមច្បាប់ជាដើម។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះពីអ្នកនាំពាក្យនាយករដ្ឋមន្ត្រី លោក មាស សុភណ្ឌ បាននៅឡើយទេ នៅថ្ងៃទី៣០ កញ្ញា។ រីឯអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ក៏មិនទាន់អាចទាក់ទងសុំការបំភ្លឺបានដែរ នៅថ្ងៃដដែលនេះ។
កន្លងទៅប្រធានព្រឹទ្ធសភា លោក ហ៊ុន សែន ព្រមានចាត់វិធានការច្បាប់ចំពោះអ្នកណារិះគន់តំបន់អភិវឌ្ឍន៍ត្រីកោណ (កម្ពុជា ឡាវ និងវៀតណាម)។ លោកថ្លែងទាំងកំហឹងថា លោកជាអ្នកបញ្ជាឱ្យសមត្ថកិច្ចខេត្តសៀមរាបចាប់ខ្លួន ក្រុមសកម្មជនកិច្ចព្រមព្រៀងសន្តិភាពទីក្រុងប៉ារីស ។
ទាក់ទងរឿងនេះ ជនជាតិដើមភាគតិចកួយម្នាក់នៅខេត្តស្ទឹងត្រែង ដែលទទួលបានការបណ្ដុះបណ្ដាលពី សកម្មជនកិច្ចព្រមព្រៀងសន្តិភាពទីក្រុងប៉ារីស គឺលោក ថាន់ វ៉ន សង្កេតឃើញថា រដ្ឋាភិបាលហាក់មានចេតនា លាក់បាំងមិនចង់ឱ្យពលរដ្ឋយល់ដឹងអំពីខ្លឹមសារកិច្ចព្រមព្រៀងសន្តិភាពក្រុងប៉ារីស និងមានពេលខ្លះទៀត និយាយបន្សាបកិច្ចព្រមព្រៀងនេះ។
លោកថា ពលរដ្ឋបានយល់ដឹងច្រើន ពេលដែលបានស្ដាប់លោក ស៊្រុន ស៊្រន ពន្យល់ពីខ្លឹមសារកិច្ចព្រមព្រៀងក្រុងប៉ារីសដែលជាគន្លឹះបង្រួបបង្រួមជាតិ ការពារទឹកដី ដែលរងការឈ្លានពានពីប្រទេសជិតខាង ៖
លោក ថាន់ វ៉ន៖ «សំណាងហើយបានពួកក្មេងៗ ស្រ៊ុន ស្រ៊ន បង្ហាញនោះ ដើម្បីកុំឱ្យប្រជាជនល្ងឹតល្ងង់ខ្លៅ ក្រែងលោថ្ងៃណាមួយអាចតវ៉ាបានពីររឿងអតីត ដែលគេយកដីយើងនោះ ព្រោះសព្វថ្ងៃគេមិនទាន់ឈប់ទេ រឹតតែរំកិលថែមជាងអាណត្តិមុនៗ ទៀត»។
ជុំវិញរឿងនេះ នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត យល់ថា ក្រុមយុវជនទាំងអស់ ដែលរដ្ឋាភិបាលបានចាប់ខ្លួនកន្លងទៅ ពាក់ព័ន្ធនឹង តំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) គួរតែដោះលែងឱ្យពួកគាត់មានសេរីភាពវិញ ខណៈដែលរដ្ឋាភិបាលបានសម្រេចដកខ្លួនចេញពីគម្រោងនេះហើយ៖
លោក អំ សំអាត៖ «បញ្ហាទាំងអស់នេះ យើងឃើញថា ហាក់ដូចជាសេរីភាព នៃការសម្ដែងពីទុក្ខកង្វល់របស់ពួកគាត់ផ្សេងៗ ហើយយុវជនមួយចំនួន ក៏កំពុងស្ថិតនៅក្នុងការសិក្សានៅឡើយ អនាគតនៅវែងឆ្ងាយ ត្រូវបន្តការសិក្សាតទៅទៀត។ អ៊ីចឹង ចំណុចហ្នឹងតុលាការគួរតែពិនិត្យ និងពិចារណាដោះលែងឱ្យពួកគាត់មានសេរីភាពវិញ»។
កន្លងទៅសកម្មជនកិច្ចព្រមព្រៀងសន្តិភាពក្រុងប៉ារីស លោក ស្រ៊ុន ស្រ៊ន តែងតែអំពាវនាវឱ្យអ្នកនយោបាយចាប់ដៃគ្នាបង្រួបបង្រួមជាតិឡើងវិញ អនុវត្តកិច្ចព្រមព្រៀងនេះឱ្យបានពេញលេញ ដែលលោកចាត់ទុកថា ជានាវាដឹកនាំកម្ពុជាឱ្យមានប្រជាធិបតេយ្យពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
នយោបាយ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង