មន្ត្រីបក្សប្រឆាំងថា លោក ហ៊ុន ម៉ាណែត គួរធ្វើនយោបាយផ្សះផ្សាជាតិ មុនស្នើឱ្យពលរដ្ឋសាមគ្គីគ្នា
2024.06.21
លោកនាយករដ្ឋមន្ត្រី ហ៊ុន ម៉ាណែត ថ្លែងនៅក្នុងកម្មវិធីនៅប្រទេសសិង្ហបុរី កាលពីថ្ងៃទី១៩ មិថុនា ២០២៤។
រូប៖ ហ្វេសប៊ុកលោក ហ៊ុន ម៉ាណែត
មន្ត្រីគណបក្សប្រឆាំងលើកឡើងថា លោកនាយករដ្ឋមន្ត្រី ហ៊ុន ម៉ាណែត គួរធ្វើនយោបាយផ្សះផ្សាជាតិ តាមរយៈការបើកលំហប្រជាធិបតេយ្យ ដើម្បីបង្ហាញសាមគ្គីភាពជាតិ ជាជាងស្នើឱ្យពលរដ្ឋសាមគ្គីគ្នាតែមាត់។ ការលើកឡើងនេះ ក្រោយពីលោក ហ៊ុន ម៉ាណែត ប្រកាសសាជាថ្មីម្ដងទៀតឱ្យប្រជាពលរដ្ឋត្រូវមានសាមគ្គីភាព ដើម្បីរក្សាសន្តិភាព។
មន្ត្រីជាន់ខ្ពស់គណបក្សសង្គ្រោះជាតិលើកឡើងថា ដរាបណាលោកនាយករដ្ឋមន្ត្រី ហ៊ុន ម៉ាណែត មិនបើកឱ្យមានការប្រកួតប្រជែងនយោបាយដោយយុត្តិធម៌ និងដោះលែងអ្នកទោសមនសិការទេ នោះការប្រកាសឱ្យប្រជាពលរដ្ឋត្រូវមានសាមគ្គីភាព គឺគ្រាន់តែជាការនិយាយឱ្យផុតតែពីមាត់ប៉ុណ្ណោះ។
មន្ត្រីគណបក្សសង្គ្រោះជាតិ លោក ម៉ែន សុថាវរិន្ទ្រ ប្រាប់វិទ្យុអាស៊ីសេរីនៅថ្ងៃទី២០ ខែ មិថុនា ថា លោក ហ៊ុន ម៉ាណែត គួរដោះលែងសកម្មជននយោបាយ និងសកម្មជនការពារសិទ្ធិមនុស្ស ដើម្បីបង្ហាញការផ្សះផ្សាជាតិ ជាជាងស្នើឱ្យប្រជាពលរដ្ឋមានសាមគ្គីភាព តែបន្តធ្វើទុក្ខបុកម្នេញទៅលើអ្នកដែលមាននិន្នាការផ្ទុយពីរដ្ឋាភិបាល។ លោកបន្តថា ដើម្បីធ្វើឱ្យមានសាមគ្គីភាពពិតប្រាកដ លោក ហ៊ុន ម៉ាណែត ក៏គួរបើកលំហប្រជាធិបតេយ្យ តាមរយៈការប្រកួតប្រជែងនយោបាយដោយយុត្តិធម៌ដែរ។
លោក ម៉ែន សុថាវរិន្ទ្រ៖ «រឿងកន្លងផុតហើយពីដើម យើងចាត់ថាចោលទៅ ប៉ុន្តែចាប់ពីនេះទៅយើងរួបរួមគ្នាជាធ្លុងមួយ រៀបចំប្រព័ន្ធតុលាការពិតប្រាកដ កាត់ទោសអ្នកណាធ្វើខុសអី ហើយយើងកុំគិតសងសឹកគ្នាទៅវិញទៅមក ដាច់ខាតកុំឱ្យមានរឿងនេះឱ្យសោះ អ៊ីចឹងនរណាមួយជាសាក្សី អ៊ីចឹងគឺខ្មែរយើងនឹងបានចម្រើនលូតលាស់ហើយ ហើយយើងបានទាំង អ៊ី.ប៊ី.អេ (EBA) បានទាំង ជី.អេស.ភី (GSP) យើងចង់បានតែអ៊ីចឹង ហើយពួកគាត់បើចាញ់ក៏មិនចាញ់ដាច់ ឈ្នះក៏មិនឈ្នះដាច់ហើយរៀបចំ ហើយយើងអាចធ្វើរដ្ឋាភិបាលចម្រុះបាន»។
ការលើកឡើងបែបនេះ ធ្វើឡើងក្រោយពីលោក ហ៊ុន ម៉ាណែត ប្រកាសស្នើឱ្យប្រជាពលរដ្ឋមានសាមគ្គីភាព និងចិត្តតែមួយ ដើម្បីរក្សាសន្តិភាព ដែលលោកអះអាងថា បានមកពីពលីកម្មរបស់ឪពុកលោក។ លោក ហ៊ុន ម៉ាណែត បានថ្លែងបែបនេះក្នុងពិធីប្រារព្ធខួបលើកទី៤៧ ទិវាដំណើរឆ្ពោះទៅរកការតស៊ូរំដោះជាតិ នៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាថ្ងៃទី២០ ខែមិថុនា។
លោក ហ៊ុន ម៉ាណែត៖ «ការនេះហើយដែលបានបង្ហាញថាសន្តិភាពមានតម្លៃជាទីបំផុត ការបំផ្លាញសន្តិភាពមិនពិបាកទេ តែការបង្កើតសន្តិភាពគឺពិបាកណាស់ ពុំនោះសោតរាប់តំណមនុស្សក៏ពុំអាចបង្កើតសន្តិភាពបានដែរ អាស្រ័យហេតុនេះ យើងត្រូវសាមគ្គីគ្នា រួមចិត្តតែមួយដើម្បីថែរក្សាសន្តិភាព ដែលបានដោយលំបាកបំផុត ឱ្យបានគង់វង្សថិតថេរ មិនឱ្យអានុភាពណាបំផ្លាញបានឡើយ ទោះបីជាក្នុងតម្លៃណាក៏ដោយ»។
ទោះជាយ៉ាងណាក៏ដោយ អ្នកវិភាគនយោបាយមួយចំនួនលើកឡើងថា សន្តិភាពនៅកម្ពុជាមិនមែនជាសន្តិភាពវិជ្ជមាននោះទេ ប្រសិនបើគណបក្សកាន់អំណាចនៅតែបន្តប្រើប្រាស់ប្រព័ន្ធតុលាការ ធ្វើទុក្ខបុកម្នេញអ្នកដែលមាននិន្នាការមិនស្របនឹងរដ្ឋាភិបាល។ ជាក់ស្ដែង ក្រៅពីបន្តចោទប្រកាន់ និងឃុំខ្លួនសកម្មជននយោបាយ និងអ្នកការពារសិទ្ធិមនុស្ស ដាក់ពន្ធនាគារហើយនោះ ថ្មីៗនេះ គណបក្សកាន់អំណាចដែលមានលោក ហ៊ុន សែន ជាឪពុករបស់លោកនាយករដ្ឋមន្ត្រី ហ៊ុន ម៉ាណែត ជាប្រធានគណបក្សនោះ នៅតែប្រកាសកម្ចាត់មន្ត្រីគណបក្សប្រឆាំង ដែលមិនព្រមចុះចូលរួមជីវភាពនយោបាយជាមួយគណបក្សប្រជាជនកម្ពុជា។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី សាទរចំពោះការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ដែលចង់ឱ្យមានសាមគ្គីភាព។ ទោះជាយ៉ាងណា លោកយល់ថា ដើម្បីទទួលបានសាមគ្គីភាពជាតិខ្មែរពិតប្រាកដ អ្នកនយោបាយ ជាពិសេសអ្នកកាន់អំណាចគួរបង្ហាញគំរូភាពយោគយល់ អធ្យាស្រ័យឱ្យគ្នា និងស្រលាញ់គ្នាទៅវិញទៅមក។ លោកបន្តថា អ្នកនយោបាយ ជាពិសេសអ្នកកាន់អំណាច គួរចាប់ផ្ដើមបង្កើតវប្បធម៌សន្ទនាគ្នាឡើងវិញ ជាជាងបន្តធ្វើនយោបាយលាបពណ៌គ្នាទៅវិញទៅមក។
លោក សេង វណ្ណលី៖ «ការលើកឡើងនេះវាមិនអាចចេញជាការបានទេ បើសិនជាភាពជាក់ស្ដែងវានៅតែបន្តកើតមាន យើងឃើញករណីបន្តធ្វើទុក្ខបុកម្នេញទៅលើប្រជាពលរដ្ឋខ្លួនឯង ពិសេសប្រជាពលរដ្ឋដែលអាជ្ញាធរមើលឃើញថា សកម្មភាពរបស់ប្រជាពលរដ្ឋនេះមានភាពផ្ទុយពីរដ្ឋាភិបាល យើងឃើញមានការប្រើប្រាស់ប្រព័ន្ធតុលាការ ជាឧបករណ៍ដើម្បីកម្ចាត់ កម្ទេច ទៅលើអ្នកដែលមានគំនិតផ្ទុយហ្នឹងច្រើន»។
អ្នកវិភាគនយោបាយលើកឡើងថា ដើម្បីលើកកម្ពស់ជីវភាពប្រជាពលរដ្ឋ តាមរយៈការទទួលបានប្រព័ន្ធអនុគ្រោះពន្ធផ្សេងៗ ពីបណ្ដាប្រទេសនាំមុខលទ្ធិប្រជាធិបតេយ្យ លោក ហ៊ុន ម៉ាណែត គួរចាប់ផ្ដើមផ្សះផ្សាជាតិឡើងវិញរវាងអ្នកនយោបាយ ជាជាងបន្តចាត់ទុកអ្នកមាននិន្នាការផ្ទុយពីរដ្ឋាភិបាលជាសត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
នយោបាយ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- អ្នកប្រើប្រាស់បណ្ដាញសង្គមថា គ្រួសារ ហ៊ុន សែន ជាគ្រួសារនាំគ្រោះដល់ប្រទេសជាតិ
- គណបក្សកម្លាំងជាតិ នឹងធ្វើសមាជវិសាមញ្ញ នៅថ្ងៃទី១៥ ខែកញ្ញា