សវនាការ​ជុំ​ទី៨ ​របស់​មន្ត្រី​បក្ស​ប្រឆាំង​ តុលាការ​បង្ហាញ​ភស្តុតាង​​ខ្សែ​អាត់​សំឡេង​ និង​វីដេអូ​ឃ្លិប

ដោយ ថា ថៃ
2022.11.24
Share on WhatsApp
Share on WhatsApp
សវនាការ​ជុំ​ទី៨ ​របស់​មន្ត្រី​បក្ស​ប្រឆាំង​ តុលាការ​បង្ហាញ​ភស្តុតាង​​ខ្សែ​អាត់​សំឡេង​ និង​វីដេអូ​ឃ្លិប (រូបតំណាង) រូបសកម្មជនគណបក្សសង្គ្រោះជាតិ កំពុងជាប់ឃុំ ដែល​ឆ្នាំពន្ធនាគារ​ដឹក​តាម​រថយន្ត​យក​មក​ជំនុំជម្រះទោស នៅ​សាលាដំបូងរាជធានីភ្នំពេញ កាល​ពីថ្ងៃ​ទី២៧ ខែមករា ឆ្នាំ២០២២។
រូបពីពលរដ្ឋ

សាលាដំបូង​រាជ​ធានី​ភ្នំពេញ​ បន្ត​បើក​សវនាការ​ជំនុំជម្រះក្ដី​លើ​សំណុំ​រឿង​របស់​​សកម្មជន​និង​មន្ត្រី​គណបក្ស​ប្រឆាំង​ចំនួន ៣៩នាក់​នៅ​ព្រឹក​ថ្ងៃ​ទី២៤ វិច្ឆិកា​ ដោយ​បង្ហាញ​ភស្តុតាង​ជា​ខ្សែ​អាត់​សំឡេង​​​​​ទំនាក់​ទំនង​តាម​ទូរស័ព្ទ​ពី​គម្រោង​ធ្វើ​មាតុភូមិ​និវត្ត​របស់​អ្នក​ស្រី មួរ សុខហួរ អនុប្រធាន​គណបក្ស​សង្គ្រោះ​ជាតិ។ ប្រពន្ធ​ជន​ជាប់​ឃុំ​​មើល​ឃើញ​ថា ភស្តុតាង​ដែល​តុលាការ​បាន​បង្ហាញ​នោះ​មិន​អាច​ដាក់​បន្ទុក​លើ​ប្ដី​របស់​ខ្លួន​និង​សកម្មជន​គណបក្ស​ប្រឆាំង​ដទៃ​បាន​ឡើយ។

សវនាការ​លើក​ទី៨ នេះ ក៏​មិន​ខុស​ពី​លើក​មុនៗ ដែរ ដោយ​សមត្ថកិច្ច​បាន​នាំ​ជន​ជាប់​ឃុំ​ដែល​ជា​សកម្មជន​គណបក្ស​សង្គ្រោះ​ជាតិ​ចំនួន ៣នាក់ រួម​មាន​ លោក គង់ ម៉ាស់ លោក​ វឿង សំណាង​ និង​ លោក ខាន់ ប៊ុនផេង ចូល​ស្ដាប់​ក្នុង​បន្ទប់​សវនាការ។ សវនាការ​នេះ​ជា​ការ​បង្ហាញ​ភស្តុតាង​ដោយ​ប្រធាន​ក្រុម​ប្រឹក្សា​ជំនុំជម្រះ អ្នក​ស្រី អ៊ុក រ៉េត​គន្ធា បាន​បង្គាប់​ឱ្យ​ក្រឡាបញ្ជី​ចាក់​ខ្សែ​អាត់​សំឡេង​ឆ្លងឆ្លើយ​តាម​ទូរស័ព្ទ​រវាង​លោក ខាន់ ប៊ុនផេង និង​បុរស​ម្នាក់​ឈ្មោះ សុខ ឡេង និង​ចាក់​វីដេអូ​ឃ្លិប​របស់​អ្នក​ស្រី មួរ សុខ​ហួរ ដែល​បាន​បង្ហោះ​តាម​បណ្ដាញ​សង្គម​ហ្វេសប៊ុក​ថ្លែង​ពី​គម្រោង​ការ​វិល​ចូល​ស្រុក​កាល​ពី​ឆ្នាំ២០២០។

ប្រពន្ធ​លោក គង់ ម៉ាស់ គឺ​លោក​ស្រី កុល សាត​ដែល​បាន​ចូល​ស្ដាប់​ក្នុង​បន្ទប់​សវនាការ ថ្លែង​ថា ខ្សែអាត់​សំឡេង ដែល​តុលាការ​យក​មក​បង្ហាញ​នោះ​ គឺ​លោក​ ខាន់ ប៊ុន​ផេង មិន​បាន​និយាយ​ឆ្លើយ​ឆ្លង​អ្វី​ជា​មួយ​បុរស​ម្នាក់​ទៀត ដែល​មាន​ឈ្មោះ សុខ ឡេង នោះ​ទេ ដោយ​គ្រាន់​តែ​លោក​និយាយ​ថា អ្នក​​ឯង​មាន​ការ​អី​តែ​ប៉ុណ្ណោះ។ ចំណែក​ឯ​បុរស​ឈ្មោះ​សុខ ឡេង នោះ​វិញ បាន​និយាយ​ផង​សើច​ផង​តែ​ម្នាក់​ឯង​ប្រៀប​ដូច​ជា​មនុស្ស​វិកលចរិត។ លោក​ស្រី​មើល​ឃើញ​ថា ភស្តុតាង​នេះ​មិន​អាច​ដាក់​បន្ទុក​លើ​លោក ខាន់ ប៊ុន​ផេង បាន​ឡើយ៖

«គឺ​គេ​យក​សារ​សំឡេង​មក​ចាក់​នឹង​ប្ដី​ខ្ញុំ ក៏​គាត់​ច្រាន​ចោល​ដែរ​ ។​ហើយ​សម្រាប់​ព្រឹក​នេះ​រឿង​លោក​ ខាន់ ប៊ុនផេង គឺ​ចាក់​ហើយ​ចាក់​ទៀត​ ឡើង​បី​បួន​ដង​សំឡេង​​ដដែល​ វា​ពាក់​ព័ន្ធ​​នឹង​ម្នាក់​នឹង​និយាយ​តែ​ឯង។ អីចឹង​សម្រាប់​ខ្ញុំ តុលាការ​គួរ​ទម្លាក់​រាល់​ការ​ចោទ​​ប្រកាន់​ទាំង​អស់​នឹង​ដោះស្រាយ​លែង​ប្ដី​ពួក​នាង​ខ្ញុំ​ឱ្យ​គាត់​មាន​សេរីភាព​ឡើង​វិញ​។​ព្រោះ​អី​វា​ចូល​ជិត​២​ឆ្នាំ​ហើយ»

មេធាវី​ការពារ​ក្ដី​ឱ្យ​សកម្មជន​គណបក្ស​ប្រឆាំង លោក ឡោ ជុនធី ប្រាប់​វិទ្យុ​អាស៊ី​សេរី​ថា​​សវនាការ​​​លើក​នេះ មិន​មាន​ការ​សួរ​ដេញដោល​លើ​ជន​ជាប់​ឃុំ​នោះ​ទេ ដោយ​គ្រាន់​តែ​តុលាការ ចាក់​ខ្សែ​អាត់​សំឡេង​​ចំនួន​៤​សំឡេង​និង​វីដេអូ​ឃ្លិប​មួយ។ លោក​បញ្ជាក់​ថា សវនាការ​ខាង​ថ្ងៃ​មុខ​លោក​នឹង​ធ្វើ​ការ​សន្និដ្ឋាន​​ទៅ​តាម​ភាព​ជាក់​ស្ដែង​ដែល​តុលាការ​យក​មក​បង្ហាញ​នៅ​ពេល​នេះ៖ «គេ​ចាក់​តែ​សំឡេង​ទេ ហើយ​ពិបាក​ស្ដាប់​ដែរ​សំឡេង​ហ្នឹង សំឡេង​គ្រលរៗ សំឡេង​អីចឹង ប៉ុន្តែ​គេ​មាន​កំណត់​នេះ​របស់​គេ​បាទ។ អត់​អី​ទេ​ការ​បង្ហាញ​ភស្តុតាង​វា​តែ​ប៉ុណ្ណឹង ហើយ​នៅ​ពេល​ដែល​យើង​ធ្វើ​សេចក្ដី​សន្និដ្ឋាន​អា​ហ្នឹង​យើង​ធ្វើ​ទៅ​តាម​ហ្នឹង​ទៅ​បាទ»

អាជ្ញាធរ​រដ្ឋាភិបាល​ក្រុង​ភ្នំពេញ បាន​ចាប់​ខ្លួន​លោក គង់ ម៉ាស់ នៅ​ភ្នំពេញ និង​ចាប់​ខ្លួន​លោក ខាន់ ប៊ុន​ផេង នៅ​ខេត្ត​បាត់ដំបង ក្នុង​ថ្ងៃ​តែ​មួយ កាល​ពី​ថ្ងៃ​ទី៣១ ខែធ្នូ ឆ្នាំ២០២០ ហើយ បញ្ជូន​ទៅ​ឃុំខ្លួន​នៅ​ពន្ធនាគារ​ព្រៃស ក្រោម​បទ​ចោទ "រួមគំនិត​ក្បត់"។ លោក គង់ ម៉ាស់ ដែល​កំពុង​ជាប់ពន្ធនាគារ​ពីរ​ដង​ទាំង​លើក​នេះ គឺ​ជា​សមាជិក​ក្រុមការងារ​គណបក្ស​សង្គ្រោះ​ជាតិ​ប្រឆាំង​ខេត្តស្វាយរៀង ចំណែក​លោក ខាន់ ប៊ុន​ផេង គឺជា​អតីត​ចៅសង្កាត់​ជាប់ឆ្នោត​របស់​គណបក្ស​សង្គ្រោះ​ជាតិ​នៅ​សង្កាត់​ព្រែក​ព្រះ​ស្ដេច ខេត្ត​បាត់ដំបង​។ រីឯ​លោក វឿង សំណាង ត្រូវ​បាន​អាជ្ញាធរ​ថៃ​ចាប់​ខ្លួន​បញ្ជូន​មក​ឱ្យ​អាជ្ញាធរ​កម្ពុជា​កាល​ពី​ថ្ងៃ​ទី៩ ខែតុលា ឆ្នាំ២០២១ ។

សំណុំ​រឿង​នេះ​ស្ថិត​ក្រោម​ការ​តាម​ឃ្លាំមើល​ពី​មន្ត្រី​អង្គការ​សហប្រជាជាតិ មន្ត្រី​ស្ថានទូត​ប្រទេស​សេរី​លោក​ខាង​លិច​មួយ​ចំនួន និង​តំណាង​អង្គការ​សង្គម​ស៊ីវិល​នានា។ ចំណែក​នៅ​ខាង​ក្រៅ​តុលាការ​វិញ​​មាន​ការ​ដាក់​ពង្រាយ​សមត្ថកិច្ច​ជាង ២០នាក់​ការពារ​សន្តិសុខ​នៅ​ជុំវិញ​បរិវេណ​តុលាការ។ សាលាដំបូង​រាជ​ធានី​ភ្នំពេញ​នឹង​បន្ត​បើក​សវនាការ​ជំនុំ​ជម្រះ​ក្ដីក្ដាំ​សំណុំ​រឿង​នេះ​ទៀត នៅ​ថ្ងៃទី៨ខែ​ធ្នូ ដែល​ជា​​សវនាការ​ស្ដាប់​សេចក្ដី​សន្និដ្ឋាន​បញ្ចប់​លើ​អង្គសេចក្ដី។

ជុំ​វិញ​រឿង​នេះ ប្រធាន​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា នៅ​តែ​មើល​ឃើញ​ថា សកម្មជន​គណបក្ស​ប្រឆាំង​ទាំង​នោះ​គ្មាន​កំហុស​ដូច​ការ​ប្រកាន់​របស់​តុលាការ​ឡើយ។ លោក​បន្ត​ថា សំណុំ​​រឿង​នេះ​ជា​រឿង​នយោបាយ ហើយ​ប្រសិន​បើ​តុលាការ​នៅ​តែ​បន្ត​រឿង​ក្ដីក្ដាំ​បែប​នេះ ដូច្នេះ​រូបភាព​នៃ​សវនាការ​វា​គ្រាន់​តែ​ជា​ការ​ធ្វើ​ឡើង ដើម្បី​បង្គ្រប់​កិច្ច​តែ​ប៉ុណ្ណោះ។ តែ​យ៉ាង​ណា​លោក​បញ្ជាក់​ថា ការ​ធ្វើ​បែប​នេះ​នឹង​មិន​បាន​ផល​ចំណេញ​អ្វី​ដល់​ប្រទេស​ជាតិ​ឡើយ​ ផ្ទុយ​ទៅ​វិញ​វា​កាន់​តែ​បង្ហាញ​ឱ្យ​ឃើញ​​​ពី​ភាព​កម្សោយ​នៃ​ប្រព័ន្ធ​តុលាការ​ទៅ​វិញ​ទេ៖

«ឱ្យ​អ្នក​នយោបាយ​ទាំង​អស់​ហ្នឹង​ងាក​ទៅ​ដោះស្រាយ​ផ្សះផ្សា​បញ្ហា​នយោបាយ​ទាំង​អស់​នឹង​ឡើង​វិញ​ទៅ​ កុំ​ឱ្យ​ប្រើប្រាស់​យន្តការ​តុលាការ​ហ្នឹង​ដើម្បី​ធ្វើ​ការ​​កាត់​សេចក្ដី​ផ្ដន្ទាទោស​អី​ទៅ​លើ​អ្នក​នយោបាយ​ទាំង​អស់​នឹង។​ ហើយ​​យើង​ថា​រូប​ភាព​ទាំង​អស់​ហ្នឹង​មិន​មែន​ទើប​តែ​កើត​មាន​លើក​ទី​មួយ​ទេ​​នៅ​ប្រទេស​កម្ពុជា​ គឺ​ថា​អ្នក​នយោបាយ​ដែល​ជាប់​ទោស​ជាប់​ទណ្ឌ​ហ្នឹង​គឺ​មាន​ច្រើន​លើក​ច្រើន​សារ​មក​ហើយ​។​តាំង​ពី​ក្រោយ​បោះ​ឆ្នោត​ឆ្នាំ​១៩៩៣​មក​យើង​ហើយ មិន​ដែល​មាន​ការ​​ដោះស្រាយ​តាម​ផ្លូវ​តុលាការ​នឹង​ចប់​សព្វគ្រប់​ជ្រុងជ្រោយ​ទេ គឺ​មាន​តែ​​ការ​ផ្សះផ្សា​ខាង​នយោបាយ​ហើយ​ចាប់​ផ្ដើម​​ធ្វើ​ការ​ដោះលែង​អ្នក​ដែល​ជាប់​ទោស​នឹង​ទៅ​វិញ​​អីចឹង​ទៅ»

សំណុំ​រឿង​នេះ​មាន​សកម្មជន និង​ថ្នាក់​ដឹក​នាំ​គណបក្ស​សង្គ្រោះ​ជាតិ​ទាំង​អស់ ៣៩នាក់ ក្នុង​នោះ​រួម​មាន​លោក សម រង្សី អ្នកស្រី មូរ សុខហួរ ​លោក អេង ឆៃអ៊ាង និង​មួយ​មនុស្ស​មួយ​ចំនួន​ទៀត ដែល​ពួកគេ​កំពុង​ភៀស​ខ្លួន​នៅ​ក្រៅ​ប្រទេស។ តុលាការ​បាន​ចោទ​ប្រកាន់​ពួកគេ​ពី​បទ​រួម​គំនិត​ក្បត់​ពាក់ព័ន្ធ​នឹង​គម្រោង​ការ​​វិល​ចូល​ស្រុក​របស់​ អ្នកស្រី មូរ សុខ​ហួរ និង​ថ្នាក់​ដឹក​នាំ​គណបក្ស​ប្រឆាំង​ ដើម្បី​ចូល​ទៅ​តតាំង​ក្ដី​នៅ​ចំពោះ​មុខ​តុលាការ​កាល​ពី​ឆ្នាំ២០២០។

ថ្មីៗ​នេះ​ប្រធានាធិបតី​អាមេរិក​លោក​ ចូ បៃឌិន (Joseph R. Biden) បាន​ថ្លែង​សារ​ដ៏​កម្រ​ទល់​មុខ​លោក ហ៊ុន សែន ស្នើ​ឱ្យ​កម្ពុជា​ស្ដារ​ប្រជាធិបតេយ្យ និង​ដោះ​លែង​អ្នកទោស​នយោបាយ​ឱ្យ​មាន​សេរីភាព​វិញ​នៅ​មុន​ការ​បោះឆ្នោត​ឆ្នាំ២០២៣៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
អ្នកឃ្លាំមើល​ថា គណបក្ស​ប្រជាជនកម្ពុជា​ពុំបាន​ប្រកាន់​ជំហរគោលនយោបាយ​បរទេស​ឯករាជ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។