លោក ហ៊ុន សែន រង​ការ​ចោទ​ថា ជា​មេ​ឧក្រិដ្ឋកម្ម​នយោបាយ

ដោយ សេក បណ្ឌិត
2022.01.29
Share on WhatsApp
Share on WhatsApp
លោក ហ៊ុន សែន រង​ការ​ចោទ​ថា ជា​មេ​ឧក្រិដ្ឋកម្ម​នយោបាយ លោក​នាយករដ្ឋមន្ត្រី​ ហ៊ុន សែន។
រូបពី​ហ្វេសប៊ុក ហ៊ុន សែន

អ្នកនយោបាយ​ជើងចាស់ និង​ជា​អតីតមន្ត្រី​ប៉ូលិស​ជាន់ខ្ពស់​ទម្លាយ​ថា លោក​នាយករដ្ឋមន្ត្រី ហ៊ុន សែន គឺជា​មេខ្លោង​ដែល​បង្កើត​ឲ្យ​មាន​ឧក្រិដ្ឋកម្ម​នយោបាយ ជាច្រើន​ដូចជា​ករណី​បាញ់សម្លាប់​អ្នក​នយោបាយ​ប្រឆាំង និង​អ្នក​រិះគន់។ អ្នកនយោបាយ​រូប​នេះ ក៏​ទម្លាយ​រឿង​មន្ត្រី​នគរបាល​ជាច្រើន​ទៀត ជាប់​ពាក់ព័ន្ធ​នឹង​អំពើ​លួច​ប្លន់ ជួញដូរ​គ្រឿងញៀន និង​ពុករលួយ​ជាដើម​។ មន្ត្រី​របស់​លោក ហ៊ុន សែន ឆ្លើយ​តប​ថា ពួកគាត់​មិន​ចាប់អារម្មណ៍​ចំពោះ​ការ​ចោទប្រកាន់​នេះ​ទេ។

មេដឹកនាំ​រដ្ឋាភិបាល​ឯកបក្ស​លោក ហ៊ុន សែន រង​ការ​ចោទប្រកាន់​ថា ជា​មេដឹកនាំ ដែល​មាន​បាតដៃ​ប្រឡាក់​ឈាម​ដោយ​មិន​ត្រឹមតែ​បញ្ជា​ឲ្យ​បាញ់ប្រហារ​និង​កាប់សម្លាប់​អ្នកនយោបាយ​ប្រឆាំង​និង​អ្នក​រិះគន់​លោក​ប៉ុណ្ណោះ​ទេ សូម្បីតែ​មន្ត្រី​ជំនិត​ខ្លួនឯង ក៏​បុរស​ខ្លាំង​រូប​នេះ ផ្តាច់​ជីវិត​ចោល​ដែរ ប្រសិនបើ​មិន​ស្តាប់​បង្គាប់ និង​ដឹង​រឿង​អាក្រក់ៗ​របស់​លោក​ច្រើន​ពេក។

ប្រធាន​គណបក្ស​ពលរដ្ឋ​ខ្មែរ លោក ងួន សឿរ រៀបរាប់​ក្នុង​វេទិកា​អ្នក​ស្តាប់​វិទ្យុ​អាស៊ីសេរី កាលពី​ថ្ងៃទី​២៥ ខែមករា ថា លោក ហ៊ុន សែន គឺជា​មេខ្លោង​ដែល​បង្កើត​ឲ្យ​មាន​ឧក្រិដ្ឋកម្ម​នយោបាយ​ជាច្រើន​នៅ​កម្ពុជា ដូចជា​ករណី​បាញ់សម្លាប់​មេទ័ព និង​ជា​មន្ត្រីជាន់ខ្ពស់​គណបក្ស​ហ៊្វុនស៊ិនប៉ិច (FUNCIPEC)​រាប់សិប​នាក់ រួមមាន​លោក ហូ សុខ លោក ចៅ សម្បត្តិ និង​លោក ក្រួច យឿម ជាដើម អំឡុង​ពេល​រដ្ឋប្រហារ​ថ្ងៃទី​៥-៦ កក្កដា ឆ្នាំ​១៩៩៧​។ លោក ងួន សឿរ អះអាង​ថា មូលហេតុ​ដែល​លោក​ដឹង​រឿងរ៉ាវ​ឧក្រិដ្ឋកម្ម​នយោបាយ​បែបនេះ ព្រោះ​លោក​ធ្លាប់​ធ្វើ​ជា​អគ្គនាយករង​នគរបាល​ជាតិ​កូតា​គណបក្ស​ហ៊្វុនស៊ិនប៉ិច​នៃ​រដ្ឋាភិបាល​ចម្រុះ​ដែល​បង្កើត​ឡើង​ក្រោយ​ការបោះឆ្នោត​រៀបចំ​ដោយ​អ៊ុនតាក់​កាលពី​ឆ្នាំ​១៩៩៣ មាន​ឋានៈ​ស្មើ​លោក ហុក ឡង់ឌី និង​ក្រោយមក​លោក បាន​ទទួល​យក​លុយ​ពី​លោក ហ៊ុន សែន ដើម្បី​បង្កើត​បក្សនយោបាយ​ចងសម្ព័ន្ធភាព​ជាមួយ​បក្ស​ប្រជាជន​កម្ពុជា​ទៀត​ផង។

អតីតមន្ត្រី​ប៉ូលិស​ជាន់ខ្ពស់​ដែល​កំពុង​រស់នៅ​ប្រទេស​បារាំង​រូប​នេះ បញ្ជាក់​ថា នៅ​ថ្ងៃទី​៧ កក្កដា ឆ្នាំ​១៩៩៧ កងកម្លាំង​ស្មោះត្រង់​នឹង​លោក ហ៊ុន សែន បាន​ចាប់ខ្លួន​លោក ហូ សុខ ជា​រដ្ឋលេខាធិការ​ក្រសួងមហាផ្ទៃ កូតា​គណបក្ស​ហ៊្វុនស៊ិនប៉ិច នៅក្នុង​ទីក្រុង​ភ្នំពេញ និង​នាំទៅ​ឃុំខ្លួន​ហើយ​បាញ់សម្លាប់​នៅក្នុង​ការិយាល័យ​របស់​ឧត្ដមសេនីយ៍ ម៉ា ឈឿន ដែល​ស្ថិត​ក្នុង​ក្រសួងមហាផ្ទៃ​។ លោក​ថា ការប្រហារជីវិត​លោក ហូ សុខ និង​មន្ត្រី​គណបក្ស​ហ៊្វុនស៊ិនប៉ិច​ជាច្រើន​នាក់​ទៀត ដែល​បាន​ទម្លាក់​អាវុធ ឬ​គ្មាន​អាវុធ​នៅក្នុង​ដៃ ឬ​ខណៈ​ស្ថិត​ក្រោម​ការ​ឃុំខ្លួន គឺជា​ការ​រំលោភ​ច្បាប់​សង្គ្រាម និង​ជា​ឧក្រិដ្ឋកម្ម​សង្គ្រាម៖ «អ្នក​ចាប់ មាន ម៉ៅ ដារ៉ា ជា​នគរបាល​ក្រសួង​មហាផ្ទៃ​ជំនាញ​ព្រហ្មទណ្ឌ ឈ្មោះ លេខ តុង ឈ្មោះ ចាន់ គឹមនី ឈ្មោះ ដោក ផល្លា និង​ឈ្មោះ ជាតិ ផាន់នី គឺ​អ្នក​ទាំងអស់​នេះ ជា​អ្នក​ចាប់​ហើយ​យក​លោក ហូ សុខ មក​ក្រសួង​មហាផ្ទៃ ដើម្បី​សួរចម្លើយ។ អ្នក​សួរចម្លើយ មាន​ដូចជា ឈ្មោះ រស់ គង់ ជា​អ្នកជំនាញ​ខាង​ស៊ើបការ និង​ឈ្មោះ កែ សុផាន់ ជំនាញ​ខាង​ព្រហ្មទណ្ឌ​កម្រិត​ធ្ងន់​។ ពួក​នេះ​កំពុង​សួរចម្លើយ​គាត់​នៅ​ក្រសួង​មហាផ្ទៃ ហើយ​មាន​ឡាន​មួយ​ចូល​មក​ស្លៀកពាក់​ប៉ារ៉ា ហើយ​មក​ដល់​ស្រែក​ថា លោក ហុក ឡង់ឌី ចង់​ជួប​លោក ហូ សុខ។ ពួកគេ​បាន​រុញ​ទ្វារ​របស់​លោក ម៉ា ឈឿន ចូល​ហើយ​ពួក​ហ្នឹង បាន​បាញ់​លោក លោក ហូ សុខ ៣​គ្រាប់​ស្លាប់​នៅ​នឹង​កន្លែង»

លោក ងួន សឿរ អះអាង​ថា ជន​ដៃដល់​ដែល​បាញ់​សម្លាប់​លោក ហូ សុខ នេះ គឺជា​កូនចៅ​របស់​លោក ហុក ឡង់ឌី មាន​គ្នា​៤​នាក់ ជា​ទាហាន​វៀតណាមៈ៖ «គ្នា​វា​៤​នាក់ មាន​ម្នាក់​បើកឡាន​ឲ្យ​លោក ហុក ឡង់ឌី ហើយ​ម្នាក់ទៀត​ឈ្មោះ ង្វៀន យ៉ាងថាញ់ អាហ្នឹង​អ្នក​បាញ់​ផ្ទាល់ ហើយ​អាហ្នឹង វា​ជា​ចោរ​ផង វា​ធ្វើការ​ឲ្យ​ប៉ូលិស​ផង។ អ្នកណា​ជា​អ្នក​ឲ្យ​កាំភ្លើង​វា គឺ​លោក យឹម សារុំ ជា​អនុប្រធាន​ចារកម្ម និង​ជា​កូនចៅ​របស់​លោក ហេង ហាក់។ ដូច្នេះ​ក្នុង​រឿង​នេះ បើ​យើង​ចង់​ដឹង​ការ​ពិត អត់​មានអី​ពិបាក​ទេ ហៅ​តែ​លោក យឹម សារុំ មក​សួរ ហើយ​អាង្វៀន​យ៉ាង់ថា​ញ់ មក​សួរ គឺ​វា​ចប់​រឿង​ហើយ»

លោក ងួន សឿរ បន្ថែម​ថា ក្រោយ​ឃាតកម្ម​នេះ សហរដ្ឋមន្ត្រី​ក្រសួង​មហាផ្ទៃ លោក ស ខេង និង​លោក យូ ហុកគ្រី បាន​បង្កើត​ក្រុម​ស៊ើបអង្កេត​មួយ និង​សម្រេច​បញ្ឈរជើង​ឧត្តមសេនីយ៍​នគរបាល​បី​រូប​គឺ​លោក ម៉ា ឈឿន លោក ថន អ៊ិម និង​លោក ថោង លឹម ដែល​ជាប់​សង្ស័យ​មាន​ចំណែក​ទទួលខុសត្រូវ​ក្នុង​ឃាតកម្ម​លោក ហូ សុខ។ ប៉ុន្តែ​ក្រោយ​ពី​ត្រូវ​បាន​ព្យួរការងារ ដើម្បី​បើកផ្លូវ​ឱ្យ​មាន​ការស៊ើបអង្កេត​បាន​ប្រមាណ​២​ខែ ស្រាប់តែ​លោកនាយក​រដ្ឋមន្ត្រី ហ៊ុន សែន បាន​បញ្ជា​ឲ្យ​អ្នក​ទាំង​បី​ចូល​ធ្វើ​ការ​ធម្មតា​ឡើងវិញ បន្ទាប់​ពី​មាន​សំណើ​របស់​លោក ហុក ឡង់ឌី។

ទាក់ទង​នឹង​ឃាតកម្ម​លោក ហូ សុខ នេះ វិទ្យុ​អាស៊ីសេរី មិន​អាច​ទាក់​សុំ​ការ​បំភ្លឺ​ពី​លោក ម៉ា ឈឿន ដែល​បច្ចុប្បន្ន​ជា​តំណាងរាស្ត្រ​របស់​គណបក្ស​ប្រជាជន​កម្ពុជា​នៅ​មណ្ឌល​កំពង់ចាម​បានទេ ដោយ​ទូរស័ព្ទ​ចូល​ពុំ​មាន​អ្នកទទួល​។ ចំណែក​លោក ហុក ឡង់ឌី ដែល​ជា​មនុស្ស​សំខាន់​ក្នុង​រឿង​ឃាតកម្ម​នេះ លោក​ក៏​បាន​ស្លាប់​ក្នុង​គ្រោះថ្នាក់​ធ្លាក់​ឧទ្ធម្ភាគចក្រ កាលពី​ថ្ងៃទី​៩ វិច្ឆិកា ឆ្នាំ​២០០៨ នៅក្នុង​ខេត្ត​ស្វាយរៀង។

ទោះជា​យ៉ាងណា អតីត​អគ្គនាយករង​នគរបាល​ជាតិ យល់​ថា ការ​ស្លាប់​របស់​លោក ហុក ឡង់ឌី គឺជា​ការ​ដាក់​គ្រាប់បែក​បំផ្ទុះ​ឧទ្ធម្ភាគចក្រ​ដែល​រៀបចំ​ផែនការ​ដោយ​លោក ហ៊ុន សែន ដើម្បី​បំបិទមាត់ និង​កុំ​ឲ្យ​មាន​រឿង​ដល់​ខ្លួន ព្រោះ​លោក ហុក ឡង់ឌី ជាប់​ពាក់ព័ន្ធ​នឹង​អំពើ​ឃាតកម្ម​ជាច្រើន​ទៀត ដូចជា ឃាតកម្ម​លើ​មេដឹកនាំ​សហជីព​ដ៏​ល្បី គឺ​លោក ជា វិជ្ជា ផង​ដែរ​។ ក្រៅ​ពី​នេះ លោក​អះអាង​ថា លោក ហុក ឡង់ឌី ក៏​ជា​មនុស្ស​ក្បាលរឹង​មិន​សូវ​ស្តាប់​បង្គាប់ ទើប​លោក ហ៊ុន សែន បញ្ជា​ឲ្យ​គេ​សម្លាប់​ដូច​ករណី​អតីត​ទាហាន​ខ្មែរក្រហម លោក ផុន ភាព៖ «លោក ហ៊ុន សែន ប្រើ​មនុស្ស​ចង់​ឲ្យ​មនុស្ស​តាម​គាត់ មួយរយ​ភាគរយ​។ របស់​ហ្នឹង​ស បើ​គាត់​ថា​ខ្មៅ គឺ​ខ្មៅ ក្រហម គឺ​ក្រហម ។ ហេតុ​អី​បាន ជា​លោក ហ៊ុន សែន ចូលចិត្ត​លោក ហុក ឡង់ឌី? លោក ហុក ឡង់ឌី មាន​ទ្រឹស្ដី​មួយ គាត់​ច្រើនតែ​និយាយប្រាប់​ខ្ញុំ​ថា មនុស្ស​ស្លាប់ វា​អត់​ចេះ​តវ៉ា​ទេ បាន​សេចក្តី​ថា អ្នកណា​មិន​ស្រួល គឺ​គាត់​សម្លាប់​ហើយ​។ ប៉ុន្តែ​មនុស្ស​ដែល​គាត់​សម្លាប់ បើ​គេ​ស៊ើបអង្កេត​ទៅ វា​អាច​ពាក់ព័ន្ធ​ដល់​លោក ហុក ឡង់ឌី ដូចជា​ការ​សម្លាប់​លោក ជា វិជ្ជា ដូច្នេះ​បើ​រក​ឃើញ​លោក ហុក ឡង់ឌី នៅ​ពី​ក្រោយ​ខ្នង គឺ​លោក​អាច​ឆ្លើយ​ដាក់​ថា លោក ហ៊ុន សែន ជា​អ្នកបញ្ជា​ឲ្យ​គាត់​។ ដូច្នេះ​ត្រូវ សម្លាប់ ហុក ឡង់ឌី មួយ​ចោល​ទៅ កុំ​ឲ្យ​វា​ទើសទាល់»

ការ​លើកឡើង​របស់​លោក ងួន សឿរ នេះ គឺ​ស៊ីសង្វាក់​គ្នា​ជាមួយនឹង​ការ​លើកឡើង​របស់​លោក សម រង្ស៊ី ប្រធាន​ស្តីទី​គណបក្ស​ស​ង្រោះ​ជាតិ​ដែល​ធ្លាប់​ចោទ​ថា លោក ហ៊ុន សែន បាន​លួច​ធ្វើឃាត​លោក ហុក ឡង់ឌី តាមរយៈ​ការ​ដាក់​គ្រាប់បែក​ឲ្យ​ផ្ទុះ​លើ​ឧទ្ធម្ភាគចក្រ​នៅ​ពេល​នោះ។ ប៉ុន្តែ​កូនប្រុស​បង្កើត​របស់​លោក ហុក ឡងឌី គឺ​លោក ឌី វិជ្ជា បាន​អះអាង​ថា ការ​ស្លាប់​របស់​ឪពុក​លោក​ក្នុង​ឧបទ្ទវហេតុ​ធ្លាក់​ឧទ្ធម្ភាគចក្រ គឺ​ដោយសារ​កត្តា​អាកាសធាតុ មិន​ដូច​ការចោទប្រកាន់​នោះ​ទេ និង​ថែមទាំង​ប្តឹង​លោក សម រង្ស៊ី ទៅ​តុលាការ​ទៀត​ផង។ បច្ចុប្បន្ន​នេះ លោក ឌី វិជ្ជា គឺជា​អគ្គ​ស្នងការ​រង​នគរបាល​ជាតិ និង​ត្រូវជា​កូន​ប្រសារ​របស់​លោក ហ៊ុន សែន​។ វិទ្យុ​អាស៊ីសេរី មិនអាច​សុំ​ការ​ឆ្លើយតប​ពី​លោក ឌី វិជ្ជា បានទេ ដោយ​ទូរស័ព្ទ​ចូល​ច្រើនដង​តែ​ពុំ​មាន​អ្នក​ទទួល។

ចំពោះ​ការ​ចោទប្រកាន់​របស់​លោក ងួន សឿរ ថា លោក ហុក ឡង់ឌី ជា​មេ​ឃាតក​បាញ់សម្លាប់​លោក ជា វិជ្ជា នោះ ក៏​ហាក់ដូចជា​ស្របគ្នា​នឹង​ការ​បកអាក្រាត​របស់​អតីត​ស្នងការ​នគរបាល​ក្រុង​ភ្នំពេញ លោក ហេង ពៅ កន្លងមក​ដែរ។ លោក ងួន សឿរ បន្ថែម​ថា អំពើ​ឃាតកម្ម​នយោបាយ​ជាច្រើន​ទៀត​រាប់ទាំង​ករណី​បណ្ឌិត កែម ឡី និង​សកម្មជន​នយោបាយ អ្នក​រិះគន់​និង​បុគ្គល​ល្បីៗ សុទ្ធ​តែ​ជា​បញ្ជា​របស់​លោក ហ៊ុន សែន ព្រោះ​អ្នក​ទាំងនេះ បាន​ធ្វើ​សកម្មភាព​រំខាន​ដល់​ការ​កាន់អំណាច​របស់​លោក៖ «នៅ​ស្រុក​ខ្មែរ នរណា​ហ៊ាន​សម្លាប់​នរណា​ម្នាក់​ហើយ​គ្មាន ការ​យល់ព្រម​ពី​លោក ហ៊ុន សែន ធ្វើ​ទៅ​កើត​ទេ​? ដូច្នេះ​កន្លែង​នេះ​កុំ​ឆ្ងល់​។ នៅ​ស្រុក​ខ្មែរ​ធ្វើ​អី​ទៅ​បាន​ទាល់តែ​មាន​ការ​អនុញ្ញាត​ពី ហ៊ុន សែន បើ​មិន​អ៊ីចឹង​ទេ អ្នកឯង​អត់​បាន​សុខ​ទេ អ្នកឯង​ដាច់​ក្បាល​ហើយ»

ទាក់ទង​នឹង​ការចោទប្រកាន់​នេះ វិទ្យុ​អាស៊ីសេរី មិន​អាច​សុំ​ការ​ឆ្លើយ​តប​ពី​អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ និង​អ្នកនាំពាក្យ​អគ្គស្នងការដ្ឋាន​នគរ​បាល​ជាតិ លោក ឆាយ គឹមខឿន បានទេ​។ ប៉ុន្តែ​ប្រធាន​អង្គភាព​អ្នកនាំពាក្យ​រដ្ឋាភិបាល លោក ផៃ ស៊ីផាន សុំ​មិន​បកស្រាយ​រឿង​នេះ​ទេ ព្រោះ​លោក មិនបាន​យកចិត្តទុកដាក់​ចំពោះ​ការ​លើកឡើង​របស់​លោក ងួន សឿរ៖ «​យើង​អត់​ឈឺក្បាល​ទេ​។ ខ្ញុំ​អត់​ឈឺក្បាល​។​ខ្ញុំ​អត់​យកចិត្តទុកដាក់ ដូច្នេះ​ដែល​យក​ចិត្តទុកដាក់​ជាង​គេ​គឺ​វិទ្យុ​អាស៊ីសេរី»

ជាមួយគ្នា​នេះ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ក៏​សុំ​មិន​បកស្រាយ​អ្វី​ដែរ ក្រោម​ហេតុផល​ថា លោក​មិនដែល​ស្គាល់​លោក ងួន សឿរ នោះ​ទេ៖ «គាត់​មិន​និយាយ គាត់​ទើប​មក​និយាយ​ពេល​នេះ យក​ជា​ការ​មិន​បាន​ទេ ។ ដូច្នេះ​ខ្ញុំ​យល់ថា ការ​និយាយ​នេះ សុទ្ធតែ​ជា​ការ​មួលបង្កាច់​មិន​អាច​ទទួល​យក​បាន»

ក្រៅពី​លើកឡើង​រឿងរ៉ាវ​ឧក្រិដ្ឋកម្ម​នយោបាយ​ដែល​មាន​លោក ហ៊ុន សែន ជា​មេខ្លោង​នោះ លោក ងួន សឿរ ក៏​បកអាក្រាត​រឿង​មន្ត្រី​នគរបាល​ជាច្រើន​ទៀត ដែល​ជាប់​ពាក់ព័ន្ធ​នឹង​អំពើ​លួច​ប្លន់ ជួញដូរ​គ្រឿងញៀន និង​ពុករលួយ​ផង​ដែរ។ អ្នកនយោបាយ​ដែល​ធ្លាប់​មាន​សម្ព័ន្ធភាព​ជាមួយ​លោក ហ៊ុន សែន រូប​នេះ លើកឡើង​ថា កាល​លោក​នៅ​កាន់​តួនាទី​ជា​អគ្គនាយករង​នគរបាល​ជាតិ លោក ធ្លាប់​ចាប់ខ្លួន​កូនៗ​របស់​អតីតរដ្ឋមន្ត្រី​ក្រសួង​ប្រៃសណីយ៍ និង​ទូរគមនាគមន៍ លោក រស់ ឈុន គឺ​ឈ្មោះ រស់ ទី និង​រស់ តាំង ដែល​ប្លន់​ឡាន​របស់​អ៊ុនតាក់​រាប់​សិប​គ្រឿង។ ក្រៅ​ពី​នេះ លោក ងួន សឿរ ចោទ​លោក ជួន ណារិន្ទ ដែល​បច្ចុប្បន្ន​ត្រូវ​បាន​ដំឡើង​តួនាទី​ជា​ស្នងការ​នគរបាល​ខេត្ត​ព្រះសីហនុ​ថា ធ្លាប់​មាន​ប្រវត្តិ​ធ្លាប់​ធ្វើជា​ចោរ​លួច​ប្លន់​ម៉ូតូ៖ «ក្រៅពី​ហ្នឹង អាចោរ​លួច​ប្លន់​ម៉ូតូ​ជាង​១០​នាក់ គឺ​សុទ្ធតែ​ពួក ប៉ូលិស ក្នុង​ក្រុម​ហ្នឹង​មាន ជួន ណារិន្ទ ហើយ​គាត់​ជា​ប្រធាន​ផ្នែក​ខាង​ចោរកម្ម នៅ​ទី​ក្រុងភ្នំពេញ ប៉ុន្តែ​មិន​ចាប់ចោរ បែរជា​មក​ធ្វើ​ចោរ​ខ្លួនឯង​ទៅវិញ​កាល​នោះ»

ជុំវិញ​រឿង​នេះ ស្នងការ​នគរបាល​ខេត្ត​ព្រះសីហនុ លោក ជួន ណារិន្ទ ថ្លែង​យ៉ាង​ខ្លី​ថា លោក មិន​ចាប់​អារម្មណ៍​នឹង​ការ​ចោទ​ប្រកាន់​នេះ​ទេ ព្រោះ​ប្រសិនបើ​លោក​ជាប់​ពាក់ព័ន្ធ​បទល្មើស​ដូច​ការ​ចោទ​មែន គឺ​ថ្នាក់ដឹកនាំ​មិន​អាច​ចាត់​តាំង​ឲ្យ​លោក​កាន់​ការងារ​មន្ត្រី​នគរបាល​ជំនាញ​នោះ​ទេ៖ «សូម​អធ្យាស្រ័យ ឲ្យ​អ្នកចោទ​ប្រកាន់​ហ្នឹង សុំ​ឲ្យ​មានមុខ​នៅ​ប្រទេស​កម្ពុជា​មក ហើយ​បង្ហាញ​ភស្តុតាង​មក ហើយ​យើង​នឹង​តតាំង​ជាមួយគ្នា​ការងារ​នេះ ជាពិសេស​ខ្ញុំ​មាន​ថ្នាក់​ដឹកនាំ​របស់ខ្ញុំ​គ្រប់​លំដាប់​ថ្នាក់​។ ខ្ញុំ​អត់​ត្រូវ​ការ​យក​ពេលវេលា​ខ្ជះខ្ជាយ​ជាមួយ​ភាសា​ហ្នឹង​ទេ។ ខ្ញុំ​អត់​យក​ភាសា​នេះ​មក​ចាប់អារម្មណ៍​ទេ ព្រោះ​ខ្ញុំ​ត្រូវ​ការពារ​សុវត្ថិភាព​ជូន​ប្រជាពលរដ្ឋ​ពីមួយ​ថ្ងៃ​ទៅ​មួយ​ថ្ងៃ អត់​មាន​ពេល​យក​អាហ្នឹង​មក​គិត​ទេ»

ទោះជា​យ៉ាងណា អ្នកវិភាគ​នយោបាយ​នៅ​ប្រទេស​ហ្វាំងឡង់ (Finland)​លោក គឹម សុខ ថ្លែង​ថា នៅ​ពេល​ដែល​ក្រុម​មន្ត្រី​របស់​លោក ហ៊ុន សែន ឆ្លើយ​ថា ពួកគាត់​មិន​ចាប់អារម្មណ៍​ចំពោះ​រឿង​អយុត្តិធម៌​សង្គម និង​ការចោទប្រកាន់​រឿង​បទល្មើស​ធ្ងន់ធ្ងរ​បែបនេះ គឺជា​ការ​គេចវេស​ពី​ការទទួលខុសត្រូវ និង​មិន​ខ្វាយខ្វល់​សេចក្តី​សុខ​របស់​ប្រជាពលរដ្ឋ ឬ​យុត្តិធម៌​របស់​ជនរងគ្រោះ​។ លោក​សង្កត់ធ្ងន់​ថា ករណី​ឃាតកម្ម​លើ លើ​ឥស្សរជន​សង្គម​និង​នយោបាយ​ល្បីៗ​ជាច្រើន​នាក់ រួម​ទាំង​លោក ហូ សុខ ជាដើម គឺជា​ឧក្រិដ្ឋកម្ម​មួយ​ធ្ងន់ធ្ងរ រំលោភ​ទាំង​ច្បាប់​ជាតិ និង​ច្បាប់​អន្តរជាតិ ដែល​ភាគី​ពាក់ព័ន្ធ​រួម​ទាំង​លោក ងួន សឿរ គួរតែ​ប្តឹង​លោក ហ៊ុន សែន និង​មន្ត្រី​របស់​លោក​ទៅ​តុលាការ​ឧក្រិដ្ឋកម្ម​អន្តរជាតិ (ICC) ដើម្បី​នាំ​ជនល្មើស​មក​ផ្ដន្ទាទោស៖ «ប្រសិនបើ​លោក ហ៊ុន សែន មិនអាច​វែកមុខ​រក​ឃាតក​បានទេ​។ ឧទាហរណ៍ ឃាតក​សម្លាប់​លោក កែម ឡី ឃាតក​សម្លាប់​លោក ជា វិជ្ជា ឃាតក​សម្លាប់​ព្រះអង្គ សុំ ប៊ុនធឿន ឃាតក​សម្លាប់​លោក ឈុត វុទ្ធី ជាដើម។ ប្រសិនបើ​មិនអាច​វែកមុខ​រក​ឃាតក​ពិត​បាន​ទេ មហាជន សហគមន៍​អន្តរជាតិ នៅតែ​សង្ស័យ​អំពី​ការ​ពាក់ព័ន្ធ​របស់​លោក ហ៊ុន សែន ដដែល ពីព្រោះ​គ្មាន​មូលហេតុ​អ្វី​រក​មិនឃើញ​មុខ​ឃាតក​ម្នាក់​ទាល់តែសោះ នៅ​ពេល​ដែល​លោក ហ៊ុន សែន តែងតែ​អះអាង​ថា អ្នកណា​ចង់​ធ្វើ​អ្វី​ចេញពី​កន្លែង​ណា ពាក់ព័ន្ធ​ជាមួយ​អ្នកណា គឺ​គាត់​ដឹង​ទាំងអស់​នោះ»

ដោយឡែក​នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO)​លោក អំ សំអាត វិញ លោក​មាន​ប្រសាសន៍​ថា ការ​លើកឡើង​របស់​លោក ងួន សឿរ គ្រាន់តែ​ជា​សម្តី​របស់​អ្នក​នយោបាយ​មួយ​រូប។លោក បន្ត​ថា ករណី​ឃាតកម្ម​មួយចំនួន បាន​កន្លង​ផុត​ទៅ​យូរហើយ ប៉ុន្តែ​ប្រសិនបើ​លោក ងួន សឿរ ដឹង​ច្បាស់ និង​មាន​ភស្តុតាង​គ្រប់គ្រាន់ គួរតែ​ចេញមុខ​ប្តឹង ដើម្បី​ស្វែងរក​យុត្តិធម៌​សម្រាប់​ជនរងគ្រោះ៖ «ការ​លើក​ឡើង​នេះ​វា​ជា​រឿង​មួយ ប៉ុន្តែ​សំខាន់​ថា​តើ​ការស៊ើបអង្កេត ហើយនឹង​ការ​ហ៊ាន​ធ្វើ​សាក្សី​របស់​លោក ងួន សឿរ ទៅលើ​ករណី​ទាំង​អស់ហ្នឹង​យ៉ាងម៉េច អាហ្នឹង​ជា​រឿង​សំខាន់​។ តាម​ពិត​ទៅ ករណី​ណា​ក៏​ដូច​ករណី​ណា​ដែរ បើសិន​ជា​មាន​ករណី​ឧក្រិដ្ឋកម្ម ឬ​ករណី​ឃាតកម្ម​អី​កើតឡើង វា​ត្រូវតែ​មានការ​ស៊ើប អង្កេត​ស្វែងរក​យុត្តិធម៌​និង​ស្វែងរក​ការពិត​អ៊ីចឹង​ហើយ»

អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់​ចេញ​របាយការណ៍​មួយ​មាន​ចំណង​ជើង​ថា លោក ហ៊ុន សែន ដំឡើង​បុណ្យ​សក្តិ និង​ផ្តល់​រង្វាន់​ដល់​ពួក​ឃាតក។ របាយការណ៍​នោះ បាន​លាតត្រដាង​ថា ក្រោម​ការគ្រប់គ្រង​ដោយ​ហិង្សា និង​ផ្ដាច់ការ​របស់​លោក ហ៊ុន សែន បាន​បង្កើត​ឲ្យ​មានការ​សម្លាប់ និង​ការរំលោភ​សិទ្ធិមនុស្ស​ធ្ងន់ធ្ងរ​រាប់មិនអស់ ដែល​បាន​ប្រព្រឹត្ត​ទៅ​ដោយ​ពុំ​មាន​ទោសទណ្ឌ​។ អង្គការ​យូមែន រ៉ៃត៍ វ៉ច្ឆ រកឃើញ​ថា ចាប់តាំងពី​មាន​កិច្ចព្រមព្រៀង​ទីក្រុង​ប៉ារីស៍​ឆ្នាំ​១៩៩១​មក មាន​ករណី​ឃាតកម្ម​ធំៗ​ជាច្រើន​លើ​ពួក​អ្នកនយោបាយ និង​សកម្មជន​នយោបាយ​ប្រឆាំង ពួក​អ្នកកាសែត អ្នក​រិះគន់ និង​មនុស្ស​ដទៃទៀត​។ ករណី​ឃាតកម្ម​ទាំងនោះ មាន​ជាប់​ពាក់ព័ន្ធ​នឹង​មន្ត្រីជាន់ខ្ពស់​នៃ​រដ្ឋាភិបាល​កម្ពុជា និង​យោធា នគរបាល កងរាជអាវុធហត្ថ និង​បុគ្គលិក​ចារកម្ម​ជាដើម​។ អង្គការ​យូមែន រ៉ៃត៍ វ៉ច្ឆ បន្ត​ថា ជំនួស​ដល់​ការ​ផ្តន្ទាទោស​ពួក​មន្ត្រី​ដែល​ទទួលខុសត្រូវ​ក្នុង​ការ​សម្លាប់ និង​ការរំលោភ​ធ្ងន់ធ្ងរ​ដទៃទៀត នាយករដ្ឋមន្ត្រី ហ៊ុន សែន បាន​ដំឡើង​បុណ្យ​សក្តិ និង​ផ្តល់​រង្វាន់​ដល់​ពួកគេ​ទៅវិញ។

គណបក្ស​ប្រឆាំង និង​អ្នក​ឃ្លាំមើល លើកឡើង​ថា ដោយសារតែ​លោក ហ៊ុន សែន គឺជា​មេខ្លោង​នៃ​អំពើ​ឧក្រិដ្ឋកម្ម​ជាច្រើន​នេះ​ហើយ ទើប​លោក​ប្រើ​គ្រប់​វិធី​ដើម្បី​ក្រាញ់​អំណាច និង​កំពុង​រៀបចំ​ផែនការ​ផ្ទេរអំណាច​បន្ត​ឲ្យ​កូនប្រុស​ច្បង​របស់​លោក គឺ​លោក ហ៊ុន ម៉ាណែត ដើម្បី​ជួយ​ធានា​និទ្ទណ្ឌភាព​សម្រាប់​គាត់​ពេល​បាត់​អំណាច។ បើ​មិន​ដូច្នេះ​ទេ លោក ហ៊ុន សែន នឹង​ប្រឈមមុខ​តុលាការ​ឯករាជ្យ​ណាមួយ កាត់ទោស​ពី​បទ​ឧក្រិដ្ឋ​យ៉ាងច្រើន ដែល​គាត់​បាន​ប្រព្រឹត្ត​ក្នុង​រយៈពេល​កាន់​អំណាច​៣៦ ឆ្នាំ​មក​ដល់​ថ្ងៃ​នេះ។

លោក ងួន សឿរ វិញ អះអាង​ថា ដើម្បី​ឲ្យ​តុលាការ​ឧក្រិដ្ឋកម្ម​អន្តរជាតិ អាច​នាំ​ខ្លួន​លោក ហ៊ុន សែន ទៅ​កាត់​ទោស​បាន លុះត្រា​ពលរដ្ឋ​ខ្មែរ​រួម​សាមគ្គី​គ្នា ហើយ​ឈប់​ទទួល​ស្គាល់​លោក ហ៊ុន សែន ថា​ជា​នាយករដ្ឋមន្ត្រី​ស្រប​ច្បាប់៕

រឿង​ដែល​គេ​អាន​​ច្រើន​បំផុត
RFA
ទស្សន​ជុំវិញ​ពលរដ្ឋ​ខ្មែរ​អាមេរិកកាំង​យក​ស្បែកជើង​គប់​លោក ហ៊ុន សែន ក្នុង​ពេល​ជួប​អ្នកគាំទ្រ​នៅ​អាមេរិក
រឿង​ដែល​គេ​អាន​​ច្រើន​បំផុត
នយោបាយ
ទស្សន​ជុំវិញ​ពលរដ្ឋ​ខ្មែរ​អាមេរិកកាំង​យក​ស្បែកជើង​គប់​លោក ហ៊ុន សែន ក្នុង​ពេល​ជួប​អ្នកគាំទ្រ​នៅ​អាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល