ពលរដ្ឋខ្មែរនៅកូរ៉េខាងត្បូង និងអឺរ៉ុបគ្រោងធ្វើបាតុកម្មទាមទារស្ដារប្រជាធិបតេយ្យ និងគោរពកិច្ចព្រមព្រៀង២៣តុលា
2020.01.30
ទិដ្ឋភាពមហាបាតុកម្មភ្លើងទៀនរបស់គណបក្សសង្គ្រោះជាតិ ដែលធ្វើឡើងនៅទីក្រុងក្វាងជូ (Qwangju) ប្រទេសកូរ៉េខាងត្បូង នៅថ្ងៃទី២០ ខែមេសា ឆ្នាំ២០១៩។
RFA/Jeevita
ពលរដ្ឋខ្មែរប្រទេសកូរ៉េខាងត្បូង និងនៅអឺរ៉ុបក្នុងគ្រោងធ្វើបាតុកម្មទាមទារឱ្យរបបក្រុងភ្នំពេញងាកមកស្ដារប្រជាធិបតេយ្យ និងគោរពកិច្ចព្រមព្រៀងសន្តិភាពទីក្រុងប៉ារីស។
ក្នុងសេចក្ដីជូនដំណឹងពីការធ្វើបាតុកម្មរបស់ពលរដ្ឋខ្មែររស់នៅប្រទេសកូរ៉េខាងត្បូងឱ្យដឹងថា បាតុកម្មនោះនឹងធ្វើនៅថ្ងៃអាទិត្យ ទី២ ខែកុម្ភៈ នៅទីលានជុងកាក់ (Junghak) ក្នុងតំបន់បូស៊ីងកាក់(Bosinggak) ក្រុងសេអ៊ូល (Seoul)។
តំណាងបាតុករម្នាក់លោក មាស ពិសាល បានបង្ហោះឃ្លីបវីដេអូរៀបរាប់ថា បាតុកម្មនេះ គឺធ្វើឡើងស្របពេល ដែលលោក ហ៊ុន សែន គ្រោងនឹងទៅចូលរួមកិច្ចប្រជុំមួយនៅទីក្រុងសេអ៊ូល ពីថ្ងៃទី២ ដល់ថ្ងៃទី៤ ខែ កុម្ភៈ ខាងមុខ។ លោកថា នេះជាពេលវេលាដែលពលរដ្ឋខ្មែរនៅប្រទេសកូរ៉េចេញមុខតវ៉ាប្រឆាំងនឹងការដឹកនាំរបស់លោក ហ៊ុន សែន ដែលរឹតត្បិតសិទ្ធិសេរីភាពពលរដ្ឋ៖ «អ៊ីចឹងនៅពេល ដែលជនកៀបសង្កត់សិទ្ធីសេរីភាពរបស់ពលរដ្ឋមកដល់កូរ៉េ អ៊ីចឹងពេលនេះហើយជាពេលដែលយើងត្រូវបញ្ចេញមតិ ជាពេលដែលយើងត្រូវតវ៉ា នៅក្នុងប្រទេសដែលគេអនុញ្ញាតឱ្យយើងធ្វើ។ ស្រុកខ្មែរគេមិនឱ្យធ្វើអ៊ីចឹង មានតែធ្វើនៅកូរ៉េ។ ដូច្នេះសូមអញ្ជើញបងប្អូន ដែលរស់នៅប្រទេសកូរ៉េខាងត្បូង ជាស្ត្រីរៀបការស្វាមីកូរ៉េក្ដី ជាពលករពលការិនីក្ដី ជានិស្សិតក្ដី ដែលស្រឡាញ់លទ្ធិប្រជាធិបតេយ្យ ចង់ឱ្យមានការផ្លាស់ប្ដូរ ហើយស្អប់ជនផ្ដាច់ការ ស្អប់អំពើផ្ដាច់ការ ចង់ប្រឆាំងនឹងជនផ្ដាច់ការ សូមអញ្ជើញមកចូលរួមឱ្យបានច្រើន»។
នៅក្នុងសេចក្ដីជូនដំណឹងពីបាតុកម្មដដែល បញ្ជាក់ថា ពួកគេនឹងដើរហែក្បួនទាមទារ ៥ចំណុចពីលោក ហ៊ុន សែន ដែលរួមមាន ការស្ដារប្រជាធិបតេយ្យកម្ពុជាឡើងវិញ ស្របតាមកិច្ចព្រមព្រៀងសន្តិភាពទីក្រុងប៉ារីស ទម្លាក់បទចោទលោក លោក កឹម សុខា ផ្ដល់សិទ្ធិធ្វើនយោបាយដល់ពលរដ្ឋខ្មែរគ្រប់រូប គោរពតាមការស្នើរបស់គណៈកម្មការអឺរ៉ុប និងម្ចាស់ជំនួយ និងលុបចោលគម្រោងផ្ដល់ដី៤០ហិកតារ ទៅឱ្យពលរដ្ឋវៀតណាមដែលចូលមករស់នៅកម្ពុជាដោយខុសច្បាប់។
ចំណែកតំណាងសហគមន៍ខ្មែរនៅតំបន់អឺរ៉ុបលោក ថៃ មករា ឱ្យដឹងថា ក្រុមរបស់លោកនឹងជួបជុំគ្នាធ្វើបាតុកម្មនៅខាងមុខអគារនាយកដ្ឋានកិច្ចការបរទេសរបស់គណៈកម្មការអឺរ៉ុប ដែលមានមូលដ្ឋាននៅទីក្រុងប្រ៊ុចសែល (Bruxelles) ប្រទេសបែលហ្ស៊ិក (Belgique) នៅថ្ងៃទី៥ ខែកុម្ភៈ ដោយចាប់ផ្ដើមពីម៉ោង១១ ដល់ម៉ោង ១រសៀល ក្នុងគោលបំណងសង្គ្រោះសិទ្ធិមនុស្សនៅកម្ពុជា៖ «ដើម្បីបញ្ជាក់ប្រាប់គេបន្ថែមទៀតពីទង្វើជាបន្តបន្ទាប់របស់លោក ហ៊ុន សែន ដែលមិនចេះបន្ថយដៃសោះ ហើយនៅតែបង្កើននូវសកម្មភាពនៃការកៀបសង្កត់ និងធ្វើឱ្យប្រជាធិបតេយ្យនៅកម្ពុជាកាន់តែរលប់ រលាយទៅហ្នឹងជាគោលបំណងរបស់យើង»។
លោក ថៃ មករា អះអាងថា ការធ្វើបាតុកម្មពេលនេះគឺនៅមុនពេលដែលគណៈកម្មការអឺរ៉ុបគ្រោងនឹងចេញសេចក្ដីសម្រេចពីការព្យួរប្រព័ន្ធអនុគ្រោះពន្ធ EBA ពីកម្ពុជា នៅថ្ងៃទី១២ ខែកុម្ភៈខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
នយោបាយ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- កម្ពុជា និងចិនប្ដេជ្ញាបន្តរឹតចំណងមិត្តភាពដើម្បីកសាងជោគវាសនាប្រទេសជាតិរួមគ្នា
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- លោក រ៉ុង ឈុន ស្នើតុលាការឱ្យទម្លាក់ការចោទប្រកាន់ និងអនុញ្ញាតឱ្យលោកធ្វើនយោបាយពេញលេញឡើងវិញ