លោក រ៉ុង ឈុន បដិសេធតួនាទីប្រធានគណបក្សកម្លាំងជាតិ ក្រោយក្រសួងមហាផ្ទៃព្រមាន
2023.11.12
លោក រ៉ុង ឈុន ថ្លែងនៅក្នុងសមាជគណបក្សកម្លាំងជាតិ នាខេត្តកំពង់ធំ នៅថ្ងៃទី១២ វិច្ឆិកា ២០២៣។
រូប៖ ពលរដ្ឋផ្តល់ឱ្យ
បើទោះបីជាអង្គសមាជបានបោះឆ្នោតឱ្យលោក រ៉ុង ឈុន ធ្វើជាប្រធានដើម្បីដឹកនាំគណបក្សកម្លាំងជាតិក្ដី ប៉ុន្តែលោក រ៉ុង ឈុន បានបដិសេធមិនយកតួនាទីនេះឡើយ ក្រោយមានការព្រមានពីក្រសួងមហាផ្ទៃ ។ អ្នកតាមដាននយោបាយលើកឡើងថា ការសម្រេចចិត្តរបស់លោក រ៉ុង ឈុន បែបនេះ គឺជាការធ្វើនយោបាយដែលមានភាពវ័យឆ្លាត និងចេះបត់បែន។
ពិធីសមាជលើកដំបូងរបស់គណបក្សកម្លាំងជាតិ ដែលធ្វើឡើងនៅភូមិក្រចាប់ ក្រុងស្ទឹងសែន ខេត្តកំពង់ធំ នៅថ្ងៃទី១២ ខែវិច្ឆិកា មានអ្នកចូលរួមប្រមាណ ១.៥០០នាក់ ដែលភាគច្រើននៃអ្នកចូលរួមទាំងនេះ គឺជាសមាជិកក្រុមប្រឹក្សាឃុំ សង្កាត់របស់គណបក្សភ្លើងទៀន។
ក្រៅពីអនុម័តលក្ខន្តិកៈរបស់គណបក្សដែលមាន១០ជំពូក ចែកជា ៥៧មាត្រា រួច អង្គសមាជនៃគណបក្សកម្លាំងជាតិ ក៏បានបោះឆ្នោតជ្រើសតាំងថ្នាក់ដឹកនាំគណបក្សផងដែរ។ ថ្នាក់ដឹកនាំដែលអង្គសមាជសម្រេចជ្រើសតាំងទាំងនោះរួមមាន គណៈកម្មការនាយករបស់គណបក្ស គណៈកម្មការអចិន្ត្រៃយ៍ គណៈកម្មការប្រតិបត្តិ និងគណៈកម្មការវិន័យ។ បន្ថែមពីនេះ អង្គសមាជក៏បានកំណត់ទិសដៅ ការងារឆ្ពោះទៅចូលរួមការបោះឆ្នោតព្រឹទ្ធសភា និងការបោះឆ្នោតជ្រើសតាំងក្រុមប្រឹក្សា ខេត្តក្រុង ស្រុកខណ្ឌក្នុងឆ្នាំ២០២៤ ផងដែរ។
បើទោះបីជាអង្គសមាជសម្រេចបោះឆ្នោតជ្រើសតាំងលោក រ៉ុង ឈុន ជាថ្នាក់ដឹកនាំកំពូលគណបក្សយ៉ាងណាក្ដី ប៉ុន្តែអតីតអនុប្រធានគណបក្សភ្លើងទៀន ដែលទើបលាលែងពីតំណែងរូបនេះ សម្រេចបដិសេធទទួលយកតំណែងជាប្រធានគណបក្សកម្លាំងជាតិនេះ។
លោក រ៉ុង ឈុន ប្រាប់វិទ្យុអាស៊ីសេរីថា ការថយក្រោយមួយជំហាននេះ គឺធ្វើឡើងដើម្បីធានាពីដំណើរការគណបក្សកម្លាំងជាតិ ចួលរួមប្រកួតប្រជែងនយោបាយនៅពេលខាងមុខ។
លោក រ៉ុង ឈុន៖ «ដោយសារតែខ្ញុំមិនចង់ឱ្យមានផលប៉ះពាល់ដល់គណបក្សដែលយើងខិតខំបង្កើតហើយ បែរជាយើងបាត់ទៅវិញ អាហ្នឹងវាជាបញ្ហាមួយដ៏ធ្ងន់ធ្ងរ ដូច្នេះខ្ញុំសុំថយក្រោយមួយជំហានដើម្បីរក្សាបក្សបន្តដំណើរទៅមុខ មានន័យថាបន្តពីគណបក្សភ្លើងទៀន ឆ្ពោះទៅគោលដៅដែលពលរដ្ឋចង់បានទាំងអស់គ្នា»។
ទោះជាយ៉ាងណាលោកអះអាងថា ការព្រមានរបស់ក្រសួងមហាផ្ទៃ មិនឱ្យលោកចូលរួមជីវភាពនយោបាយជាមួយនឹងគណបក្សកម្លាំងជាតិ ឆ្លុះបញ្ចាំងពីភាពភ័យខ្លាចឥទ្ធិពលរបស់គណបក្សកម្លាំងជាតិ ក្នុងការចូលរួមប្រកួតប្រជែងនយោបាយ។
លោក រ៉ុង ឈុន៖ «ក្នុងនាមខ្ញុំជាទីប្រឹក្សាគណបក្ស ថ្វីត្បិតតែគ្មានសិទ្ធិបោះឆ្នោត តែខ្ញុំមានសិទ្ធិសម្របសម្រួលធ្វើម៉េចគំនិតដែលខ្ញុំដាក់ទៅហ្នឹង ស្វែងរកការគាំទ្រ ដើម្បីបម្រើប្រជាពលរដ្ឋទាំងអស់គ្នា»។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សកាន់អំណាច លោក សុខ ឥសាន ដើម្បីបកស្រាយជុំវិញរឿងនេះបានឡើយនៅថ្ងៃទី១២ ខែវិច្ឆិកា។
បន្ទាប់ពីបានសម្រាក១៥នាទី ដោយសារការបដិសេធរបស់លោក រ៉ុង ឈុន អង្គសមាជបានសម្រេចជ្រើសតាំងអតីតមន្ត្រីជាន់ខ្ពស់គណបក្សភ្លើងទៀន គឺលោក ស៊ុន ចន្ធី ជាប្រធានគណបក្ស និង អតីតប្រធានសហជីពសេរីកម្ពុជា នៃព្រះរាជាណាចក្រកម្ពុជា និងអតីតសមាជិកគណៈកម្មការនាយកគណបក្សភ្លើងទៀន ជា មុនី ឱ្យធ្វើជាអនុប្រធានវិញ។
ដោយឡែកនៅក្នុងអង្គសមាជលើកដំបូងរបស់គណបក្សកម្លាំងជាតិនេះ ក៏មានវត្តមានតំណាងគណបក្សភ្លើងទៀន លោក គង់ ម៉ូនីកា ចូលរួមផងដែរ។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី យល់ឃើញថា ការសម្រេចចិត្តរបស់លោក រ៉ុង ឈុន គឺជាការសម្រេចចិត្តបែបវ័យឆ្លាត។ លោកបន្ថែមថា បើទោះបីជាលោក រ៉ុង ឈុន មិនមានតួនាទីជាប្រធានគណបក្សក្ដី ប៉ុន្តែលោក រ៉ុង ឈុន នៅតែមានឥទ្ធិពលរៀបចំយុទ្ធសាស្ត្ររកអ្នកគាំទ្រឲ្យគណបក្សកម្លាំងជាតិនៅពីក្រោយឆាក។
លោក សេង វណ្ណលី៖ «ហើយអ្នកគាំទ្រគណបក្សកម្លាំងជាតិពីភ្លើងទៀនដឹងច្បាស់អំពីសក្ដានុពលរបស់លោក រ៉ុង ឈុន អ៊ីចឹងកន្លងទៅយើងមើលមហិច្ឆតារបស់លោក រ៉ុង ឈុន មិនមែនដើម្បីធ្វើជាប្រធានបក្សអីទេ ប៉ុន្តែដើម្បីធ្វើម៉េចបង្រួបបង្រួមកម្លាំងប្រជាធិបតេយ្យ ដើម្បីកុំឱ្យបែកខ្ញែកតែប៉ុណ្ណោះ»។
ដោយឡែក អ្នកវិភាគនយោបាយចាស់វស្សា លោកបណ្ឌិត ឡៅ ម៉ុងហៃ យល់ឃើញថា វត្តមានគណបក្សកម្លាំងជាតិ គឺជាកត្តាជំរុញមួយផ្នែកទៀត ដើម្បីលើកកម្ពស់លទ្ធិប្រជាធិបតេយ្យ។ លោកបន្ថែមថា ដើម្បីអាចទទួលបានការគាំទ្រពីប្រជាពលរដ្ឋកាន់តែច្រើន គណបក្សនេះគួររៀនពីបទពិសោធបរាជ័យ និងជោគជ័យឱ្យបានច្រើនពីគណបក្សប្រឆាំង។
បណ្ឌិត ឡៅ ម៉ុងហៃ៖ «រឿងនិន្នាការ និងទំនោរហ្នឹងវាប្រែប្រួល ខ្លះក៏កើតទៅ ខ្លះក៏រលាយទៅ បក្សខ្លះក៏គេហាមឃាត់ទៅ តាមចិត្តគេហូរហែអ៊ីចឹងទៅ ហើយនយោបាយក៏ចេះតែរេអ៊ីចឹងទៅ ជួនកាលបង្កើតបក្សខ្លួនឯងទៅ ជួនកាលក៏រួបរួមជាមួយគេទៅ ដូច្នេះមិនឆ្ងល់អ្វីនោះទេ ចំពោះការនិយាយថា នាំឱ្យបំបែកសំឡេង ប៉ុន្តែគេ ហើយជាពិសេសខ្ញុំ ហើយអ្នកផ្សេងៗទៀតក៏ប្រហែលគិតអ៊ីចឹងដែរ ការបង្កើតបក្សគឺជាសិទ្ធិនយោបាយរបស់បុគ្គលគ្រប់រូប និងខ្មែរម្នាក់ៗ»។
គណបក្សកម្លាំងជាតិ ត្រូវបានបង្កើតឡើងដោយអតីតមន្ត្រីជាន់ខ្ពស់គណបក្សភ្លើងទៀន បន្ទាប់ពី គ.ជ.ប រារាំង មិនឲ្យបក្សភ្លើងទៀន ចូលរួមការបោះឆ្នោត។ ទោះជាយ៉ាងណា មន្ត្រីជាន់ខ្ពស់គណបក្ស ភ្លើងទៀនមួយចំនួនទៀត ក៏ងាកទៅចងសម្ពន្ធភាពជាមួយគណបក្សក្រៅរដ្ឋាភិបាលចំនួន៣ទៀត។ ដោយឡែក លោក រ៉ុង ឈុន ដែលចង់ទៅដឹកនាំគណបក្សកម្លាំងជាតិនោះ ត្រូវបានអាក់ខានវិញ ដោយសារតែក្រសួងមហាផ្ទៃ រួមទាំងក្រសួងយុត្តិធម៌ផង បានគំរាមកំហែងជាបន្តបន្ទាប់ ក្រោមហេតុផលថា លោក រ៉ុង ឈុន មិនទាន់មាននីតិសម្បទាគ្រប់គ្រាន់ក្នុងការធ្វើនយោបាយឡើយ ដោយសារពាក់ព័ន្ធនឹងសំណុំរឿងដែលលោកចុះទៅការពារប្រជាពលរដ្ឋខ្មែរនៅខេត្តត្បូងឃ្មុំ ដែលអះអាងថា វៀតណាម បានរំលោភយកដីស្រែចម្ការរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- ក្រុមសង្គមស៊ីវិលប្រាប់អ្នករាយការណ៍ពិសេស UNថា រដ្ឋាភិបាលថ្មី មិនទាន់កែលម្អស្ថានភាពសិទ្ធិមនុស្ស និងប្រជាធិបតេយ្យទេ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
អត្ថបទពេញនិយម
នយោបាយ
- ពលរដ្ឋនៅសង្កាត់ព្រែកជ្រៃ ព្រំដែនកម្ពុជា-វៀតណាមព្រួយបារម្ភពីការបាត់បង់ទឹកដីទៅវៀតណាម
- អាជ្ញាធរខេត្តបន្ទាយមានជ័យចាប់ខ្លួនពលរដ្ឋ ៤នាក់ រួមទាំងប្រពន្ធ និងកូនរបស់លោក កង សារ៉ន
- ក្រុមស្ត្រីភៀសខ្លួនតស៊ូមតិតាមបណ្ដាញសង្គម
- សកម្មជនភៀសខ្លួននៅម៉ាឡេស៊ី ថា ប៉ូលិសប៉ុនប៉ងចាប់ខ្លួនពួកគាត់ តាមសំណើរបស់អាជ្ញាធរខ្មែរ
- តើការដឹកនាំរបស់នាយករដ្ឋមន្ត្រីកម្ពុជា និងថៃ ដូចឬខុសដូចម្ដេចខ្លះ ក្នុងរយៈពេល៣ខែនេះ?