លោក​ស្រី សំ សុខា ​អតីត​​អ្នក​ជាប់​ឃុំ​ករណី​​គប់​ស្បែក​​ជើង​លើ​រូប​លោក ហ៊ុន សែន ស្នើ​លោកឱ្យ​ពិចារណា​កំហុស​របស់ខ្លួន​ឡើងវិញ​ថា ហេតុអ្វី​បាន​ជា​ពលរដ្ឋ​គប់​ស្បែក​ជើង​ដាក់​លោក​​

ដោយ យ៉ង ចាន់តារា
2022.05.17
Share on WhatsApp
Share on WhatsApp
លោក​ស្រី សំ សុខា ​អតីត​​អ្នក​ជាប់​ឃុំ​ករណី​​គប់​ស្បែក​​ជើង​លើ​រូប​លោក ហ៊ុន សែន ស្នើ​លោកឱ្យ​ពិចារណា​កំហុស​របស់ខ្លួន​ឡើងវិញ​ថា ហេតុអ្វី​បាន​ជា​ពលរដ្ឋ​គប់​ស្បែក​ជើង​ដាក់​លោក​​ ពលរដ្ឋខ្មែរ​​អ្នក​គាំទ្រ​​លោក ហ៊ុន សែន កំពុង​​ថត​​ហ្សែលហ្វីជា​មួយ​លោកនាយករដ្ឋមន្ត្រី ហ៊ុន សែន ខណៈពលរដ្ឋខ្មែរ​អាមេរិកកាំង​លោក អ៊ុក ទូច បាន​គប់ស្បែកជើង​​ទៅ​កាល​ពី​ថ្ងៃទី១១ ខែឧសភា ឆ្នាំ២០២២។
រូប៖ Photo Screenshot

អតីត​អ្នក​ជាប់​ឃុំ ​ព្រោះ​យក​ស្បែក​ជើង​គប់រូប​លោក​ ហ៊ុន​ សែន​ និង​រូប​លោក​ ហេង​ សំរិន​ គឺលោក​ស្រី សំ សុខា យល់ថា​​ ការ​គប់​ស្បែក​ជើង​ដាក់​លោក​ ហ៊ុន​ សែន​ គឺជា​សេរីភាពនៃ​​ការ​បញ្ចេញ​មតិ​។​ លោកស្រី​ក៏​ជំរុញ​ទៅ​លោក​ ហ៊ុន​ សែន​ ឲ្យ​គិត​ពី​កំហុស​របស់​ខ្លួន​ឡើង​វិញ​​ថា ហេតុអ្វីបានជា​ប្រជាពលរដ្គេខ្មែរអាមេរិកកាំងគប់ស្បែកជើងដាក់លោក​។

អតីត​អ្នក​ជាប់​ឃុំលោក​ស្រី សំ សុខា ​​ មន្ត្រី​បក្ស​ប្រឆាំង​​ និង​អ្នក​​ឃ្លាំមើល​ស្ថានការណ៍​នយោបាយ​​លើកឡើង​ថា​​ ការ​គប់ស្បែកជើងដាក់លោកនាយករដ្ឋមន្ត្រី ហ៊ុន សែន ជាទង្វើ​បង្ហាញ​ពី​ការ​មិន​ពេញចិត្ត​របស់​ពលរដ្ឋ​ចំពោះ​ការ​ដឹក​នាំ​ប្រទេស​របស់​លោក​​​។

លោក​ស្រី សំ សុខា ​​ដែលធ្លាប់​​ជាប់​ពន្ធនាគារ​ព្រោះ​គប់​ស្បែក​ទៅលើរូប​លោក​ ហ៊ុន​ សែន​ និង​លោក​ ហេង​​ សំរិន​ យល់​ថា​ ការ​គប់​ស្បែក​ជើង​ដាក់​លោក​ ហ៊ុន ​​សែន​ ​​ជា​រឿង​ធម្មតា​ដែល​កើត​ឡើង​លើ​មេដឹកនាំ​ប្រទេស។ លោកស្រីបន្តថា មេដឹកនាំ​ប្រទេស​ផ្សេងៗ ​ក៏​ត្រូវពលរដ្ឋ​បញ្ចេញ​កំហឹង​ដូច្នេះ​ដែរ​ ឬ​ខ្លាំង​ជាង​នេះផងក៏មាន។​ លោក​ស្រី​ស្នើ​ទៅ​លោក​ ហ៊ុន​ សែន​ ធ្វើ​ចិត្ត​ឲ្យ​ធ្ងន់​ ដោយកុំ​ប្រកាន់​ទៅលើប្រជាពលរដ្ឋដែល​​ប្រព្រឹត្តទង្វើ​បែប​នេះ​។ លោកស្រី​​បន្ត​ទៀតថា​  មេដឹកនាំ​ប្រទេស​ដូច​លោក ហ៊ុន សែន​ ទាល់តែ​ទទួល​ការ​រិះគន់​បែប​នេះ​ ទើប​ធ្វើ​ឲ្យ​លោកអាច​ពិចារណា​ពី​កំហុស​របស់​ខ្លួនឡើងវិញ​៖ «​ខ្ញុំ​គិត​ថា​ គាត់​ (លោក​ ហ៊ុន​ សែន)​ ​គួរ​​តែ​តាំង​ចិត្ត​ឲ្យ​ធ្ងន់​ជាង​ហ្នឹង​បន្តិច​ មិនមែន​ចិត្ត​ស្រាល​ខឹង​អី​ឡើង​ចាប់​ដាក់​គុកៗ​​ ​មិន​សួរ​នាំ​ពី​មូលហេតុ​ដើម​ទង​ដូច​ករណី​ខ្ញុំ​ចឹង​ ថា​​មូលហេតុ​អី​បាន​ជា​ខ្ញុំ​​​ធ្វើបែប​ហ្នឹង​អ៊ីចឹង។​ អ៊ីចឹង​ការ​បញ្ចេញ​មតិ​យោបល់​ ឬ​ក៏​អំពើ​ហិង្សា​ដល់​​​ថ្នាក់​បែប​ហ្នឹង​គាត់​គួរ​ពិចារណា​ថា​​ដើម​ហេតុ​មក​ពី​រឿង​អី​ មក​ពី​មូលហេតុ​អី​ហេតុ​អ្វី​បាន​ជា​មាន​ការ​មិន​ពេញ​ចិត្ត​»។

លោកស្រី សំ សុខា លើកឡើងដូច្នេះ ក្រោយពេលពលរដ្ឋ​ខ្មែរ​អាមេរិកកាំងម្នាក់ឈ្មោះ អ៊ុក ទូច បាន​យក​ស្បែកជើង​គប់​លោក ហ៊ុន សែន ក្នុង​ពេល​កំពុងជួប​អ្នកគាំទ្រ​នៅ​អាមេរិកកាលពីពេលថ្មីៗ នេះ។

លោកស្រី សំ សុខា ត្រូវបានតុលាការខេត្តកំពង់ស្ពឺកាត់ទោសឱ្យជាប់ពន្ធនាគារ ៤ឆ្នាំ ​កាល​ពីឆ្នាំ​២០១៨។​​ ស្ត្រី​មេម៉ាយ​ជា​កម្មករ​រោងចក្រ​រូបនេះ ត្រូវ​បាន​អាជ្ញាធរ​លោក ហ៊ុន សែន តាម​ចាប់ខ្លួន​ពី​ប្រទេស​ថៃ​ និងបញ្ជូនទៅកម្ពុជា កាលពីថ្ងៃទី៨ ខែកុម្ភៈ ឆ្នាំ២០១៨ ដោយសារតែ​យក​ស្បែកជើង​គប់​លើ​ស្លាក​គណបក្ស​ប្រជាជន​កម្ពុជា ​ដែល​មាន​រូបលោក ហ៊ុន សែន និង​លោក ហេង សំរិន កាលពីឆ្នាំ២០១៧។ ​លោកស្រី​ទើប​ទទួល​បាន​សេរីភាព​ឡើងវិញ​កាល​​ពី​ខែ​កុម្ភៈ ឆ្នាំ២០២២ នេះ ​​ក្រោយ​អនុវត្ត​ទោស​រួចរាល់នៅពន្ធនាគារ​​។​

ទាក់ទង​​រឿង​នេះ​​ ប្រធាន​ក្រុមប្រឹក្សា​ឃ្លាំមើល​កម្ពុជា​នៅ​ប្រទេស​ណ័រវ៉េ (Norway) លោក ម៉ែន ណាត និយាយ​លោក​ថា​ លោក​សរសើរ​ ចំពោះការ​ប្រើប្រាស់​សិទ្ធិ​បញ្ចេញ​មតិ​របស់​លោក​ស្រី​ សំ សុខា​ កាល​ពី​គប់​ស្បែក​​ដាក់​រូប​លោក​ ហ៊ុន​ សែន និង​ការ​លើកឡើង​របស់​លោកស្រី​នៅ​ពេល​នេះ​។​ លោក​យល់ថា​ ​​ប្រសិន​ពលរដ្ឋ​សាមញ្ញ​គប់​ស្បែក​ជើង​ដាក់​ពលរដ្ឋ​សាមញ្ញ​ដូច​គ្នា នោះគឺជា​រូប​ភាព​​អសីលធម៌​ ប៉ុន្តែ​បើ​ពលរដ្ឋ​គប់​ស្បែក​ដាក់​​អ្នក​ដឹកនាំ​ប្រទេស នោះ​គឺជា​សិទ្ធិ​បញ្ចេញ​មតិ​៖ «អ្នក​នយោបាយ​ដែល​​​ធ្វើ​រឿង​មិន​ត្រឹមត្រូវ​ប្រជាពលរដ្ឋ​គេ​អាច​​ខឹង​សម្បារ​​ សិទ្ធិ​បញ្ចេញ​មតិ​ហ្នឹង​ អ្នក​ខ្លះ​គេ​បញ្ចេញ​មតិ​​តាមរយៈ​ការ​​ធ្វើ​បាតុកម្ម​ដោយ​សន្ដិ​វិធី​ទៅ​ ខ្លះ​គេ​ធ្វើ​កូដកម្ម​ទៅ​អ្នក​ខ្លះ​គេ​​គ្នា​ខឹង​ក្រោធ​ទប់​មិន​បាន​គ្នា​យក​ប៉េងប៉ោះ ពងមាន់ ពង​ទា​គប់​អ្នក​ដឹកនាំ​អ៊ីចឹង​ទៅ​ ហើយ​គ្នា​មិន​ដឹង​រក​អី​មិន​ទាន់​គ្នា​យក​ស្បែក​ជើង​គប់​​អ៊ីចឹង​ទៅ​។ អ៊ីចឹង​ អ្នក​ដឹកនាំ​ប្រទេស​អត់មាន​អី​ត្រូវ​បន្ទោស​ប្រជាពលរដ្ឋ​ទេ​»។

ចំណែក​​មន្ត្រី​ជាន់​ខ្ពស់​គណបក្ស​សង្គ្រោះជាតិ​លោក​ ម៉ន​ ផល្លា​ ដែល​កំពុង​ភៀសខ្លួន​នៅ​ក្រៅ​ប្រទេស​ព្រោះ​ការ​ទុក្ខបុកម្នេញ​របស់​រដ្ឋាភិបាល​លោក​ ហ៊ុន សែន វិញ លោកយល់ថា រូបភាពនេះគ្មាន​កំហុស​នោះ​ទេ។​ លោក​បន្ត​ថា​ ក្រោយ​ទទួល​រង​ភាព​អាម៉ាស់​នេះ​​រួច​ហើយ​ លោក​ ហ៊ុន សែន ​គួរតែពិចារណា​ឡើង​វិញ​​ពី​កំហុស​ឆ្គង​ និងឈានដល់ការ​បើក​លំហ​សិទ្ធិ​សេរី​ភាព​​ និង​ប្រជាធិបតេយ្យ​​៖ «ការ​គប់​ស្បែក​ជើងថ្មីៗ​ នេះ​ដែល​រំលង​ក្បាល​លោក​ ហ៊ុន​ សែន នៅ​សហរដ្ឋអាមេរិក​នេះ​ ដូច​គ្នា​គឺ​ឆ្លុះ​បញ្ចាំង​ពី​ប្រជាជន​ខ្មែរ​មិន​សប្បាយ​ចិត្ត​ចំពោះ​ចរិត​ ដឹកនាំ​​របស់​លោក​ ហ៊ុន សែន​​​។ ដូច្នេះ​ គាត់​មិន​ដឹង​​​ធ្វើ​ម៉េច ធ្វើ​អ្វី​កើត​ ដូច្នេះ​គាត់​ត្រូវ​តែ​បញ្ចេញ​កំហឹង​​តាមរយៈ​ការ​គប់​ស្បែក​ជើង​នេះ»។

ទាក់ទង​ការ​លើកឡើងបែប​នេះ​ វិទ្យុ​អាស៊ីសេរី​មិន​អាច​សុំ​ប្រតិកម្មពី​ប្រធាន​អង្គភាព​អ្នកនាំពាក្យ​រដ្ឋាភិបាល​លោក​ ផៃ​ ស៊ីផាន និងអ្នកនាំពាក្យគណបក្សប្រជាជនកម្ពុជាលោក សុខ ឥសាន ​​បាន​ទេ​ នៅ​ថ្ងៃ​ទី​១៧​ ខែ​ឧសភា។​

ទោះ​យ៉ាងណា​ លោក​ ហ៊ុន​ សែន​ ​​ដែល​មិន​អាច​ប្រើប្រាស់​អំណាច​របស់​ខ្លួនដើម្បី ​ដាក់​ទោសទណ្ឌ​លោក​ អ៊ុក​ ទូច​ ត្បិត​លោក​ អ៊ុក​ ទូច មិន​មែន​រស់​នៅ​​លើ​ទឹក​ដី​កម្ពុជា​ បានប្រាប់​ទៅ​អាមេរិក​ថា បើអាមេរិកចាត់ទុកករណីនេះ គប់ស្បែកជើងនេះជាសិទ្ធិបញ្ចេញមតិ ករណីនេះនឹងកើតមាននៅកម្ពុជាលើបក្សប្រឆាំង៖ «បើ​សហរដ្ឋអាមេរិក​ចាត់​ទុក​ថា​ នេះ​​សិទ្ធិ​បញ្ចេញ​មតិ​ ឬ​ក៏​ជា​ហិង្សា​ ខ្ញុំ​ផ្ដាំ​ទៅ​ភាគី​អាមេរិក​ ខ្ញុំ​មិន​ប្រដៅ​អាមេរិក​ទេ អាមេរិក​ត្រូវ​គិត​ឲ្យ​ច្បាស់​លើ​ចំណុច​នេះ។​ បើសិន​អាមេរិក​ចាត់​ទុក​រឿង​នេះ ជា​សិទ្ធិ​បញ្ចេញ​មតិ​ ប្រហែល​​ជា​រឿង​នេះ​នឹង​​គ្រប់​ប្រទេស​ទាំង​អស់​ រាប់​ទាំង​កម្ពុជា​ អ៊ីចឹង​ ក្រុម​ដែល​ប្រឆាំង​ ហ៊ុន​ សែន​ ទាំង​ប៉ុន្មាន​​ត្រៀម​ត្រូវ​ក្បាល​នឹង​ស្បែក​ជើង​» 

លោកស្រី​ សំ សុខា​ ឲ្យ​វិទ្យុ​អាស៊ីសេរី​ដឹង​ថា​ ពេលនេះ​លោក​ស្រី​ ក៏​មានការ​ព្រួយបារម្ភពី​សុវត្ថិភាព​របស់​ខ្លួន​ដែរ​ ដោយ​​ខ្លាច​ត្រូវ​អាជ្ញាធរ​ ឬ​ក្រុម​ជ្រុល​និយម​ដែល​គាំទ្រ​លោក​ ហ៊ុន​ សែន​ ដែលមិនអាចទៅ​បញ្ចេញ​កំហឹង​ដាក់​លោក​ អ៊ុក ទូច បាន ប៉ុន្តែបែរ​​មក​ធ្វើ​បាប​លោកស្រី​ ដែលជា​អ្នក​ធ្លាប់​គប់ស្បែក​ជើង​លើ​រូបលោក ហ៊ុន សែន និង​លោក ហេង សំរិន​ ទៅវិញ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល