សកម្មជន​ជន​បក្ស​ភ្លើង​ទៀន រួម​គ្នា​ផលិត​ចម្រៀង​ជំរុញ​ពលរដ្ឋ​ទៅ​បោះឆ្នោត​ជូន​គណបក្ស​ភ្លើង​ទៀន

ដោយ ជាតិ ចំណាន
2022.05.20
Share on WhatsApp
Share on WhatsApp
សកម្មជន​ជន​បក្ស​ភ្លើង​ទៀន រួម​គ្នា​ផលិត​ចម្រៀង​ជំរុញ​ពលរដ្ឋ​ទៅ​បោះឆ្នោត​ជូន​គណបក្ស​ភ្លើង​ទៀន ស្លាកសញ្ញាគណបក្សភ្លើងទៀន
រូប៖ ហ្វេសប៊ុកគណបក្សភ្លើងទៀន

អ្នកគាំទ្រ និងសកម្មជន​ជន​បក្ស​ភ្លើង​ទៀន​មួយ​ចំនួន បាន​ស្ម័គ្រ​ចិត្ត​រួម​គ្នា​ផលិត​ចម្រៀង​ដែល​មាន​ខ្លឹមសារ​ជំរុញ​ទៅ​ពលរដ្ឋ​ឲ្យ​បោះ​ឆ្នោត និង​ផ្សព្វផ្សាយ​ពី​គោល​នយោបាយ​បក្ស​របស់​គណបក្ស​ភ្លើង​ទៀន។ សកម្មភាព​របស់​សកម្មជន​បក្ស​ភ្លើង​ទៀន ដែល​កើត​ចេញ​ពី​ទឹកចិត្ត​នេះ​ត្បិត​មិន​គ្មាន​លុយ​ច្រើន​សម្រាប់​ចំណាយ​លើ​ថ្លៃ​ផលិត​ផល ប៉ុន្តែ​បទ​ចម្រៀង​ទាំង​នេះ បាន​ត្រដាង​ការ​ពិត ដែល​កើត​ក្នុង​សង្គម​ខ្មែរ និង​ជា​ផ្ដល់​សារ​រំលឹក​ទៅ​ម្ចាស់​ឆ្នោត​ឲ្យ​ប្ដូរ​មេ​ឃុំ​បម្រើ​បក្ស ដាក់​មេ​ឃុំ​បម្រើ​រាស្ត្រ។

អូន​លែង​ជឿ​ហើយ​ជន​ផ្ដាច់ការ​ពាក់​ស្លាក់​ទេវតា ចិត្ត​ជា​ទេវទត្ត។ នេះ​ជា​អត្ថន័យ​ក្នុង​បទ​ចម្រៀង​របស់​ក្រុម​អ្នក​ចម្រៀង​គាំទ្រ​គណបក្ស​ភ្លើង​ទៀន។ ការ​រៀបចំ​ផលិត​ចម្រៀង​ទាំង​នេះ​ធ្វើ​យ៉ាង​សាមញ្ញ​ត្រឹម​អ្នក​ចម្រៀង​ពីរ​នាក់​ជា​ស្ត្រី​ច្រៀង​ផង​ធ្វើ​កាយវិការ​ផង​នៅ​ក្នុង​បន្ទប់​ស្ទីឌីយោ តូច​មួយ។

អ្នកគាំទ្រ​គណបក្ស​ភ្លើង​ទៀន លោកស្រី ញ៉ែម វ៉ាត ដែល​ចូលរួម​ច្រៀង​គាំទ្រ​គណបក្ស​ភ្លើង​ទៀន​ យល់​ថា ចម្រៀង​នេះ​ជា​ការ​បញ្ចេញ​មតិ​យោបល់​ជួយ​ជាតិ និង​ជំរុញ​ទៅ​ពលរដ្ឋ​ឲ្យ​ស្គាល់​ពី​គណបក្ស​ភ្លើង​ទៀន។ ទោះ​យ៉ាង​ណា​ក្ដី លោកស្រី​ឲ្យ​ដឹង​ទៀត​ថា ក៏​មាន​អាជ្ញាធរ​ខ្លះ​ចោទ​ប្រកាន់​ថា ការ​ច្រៀង​របស់​លោកស្រី ជា​ការ​ញុះញង់ និង​បង្ក​ភាព​វឹកវរ​ក្នុង​សង្គម​ទៅ​វិញ ប៉ុន្តែ​លោកស្រី​ថា មិន​រារែក​ចិត្ត​ក្នុង​ការ​បន្ត​ច្រៀង​ឡើយ«ខ្ញុំ​បាន​ចេញ​ចម្រៀង​អ៊ីចឹង ប្រជាពលរដ្ឋ​ដែល​ថា ចូលចិត្ត​ភ្លើង​ទៀន​ហ្នឹង គេ​បាន​ស្ដាប់​ឮ។ គេ​ថា ម៉េច​បាន​បញ្ចេញ​យោបល់​អ៊ីចឹង អត់​ខ្លាច​ទេ អត់​រក​ផ្លូវ​រត់ ខ្ញុំ​ថា តាម​ដំណើរ​ទៅ ខ្ញុំ​បាន​ចេញ​ប៉ុណ្ណឹង​ក៏​ខ្ញុំ​សប្បាយ​ចិត្ត ខ្ញុំ​អត់​មាន​ជួយ​អី​បាន​ខ្ញុំ​ជា​ស្ត្រី បាន​ជួយ​ប៉ុណ្ណឹង​ចេញ​ចម្រៀង​អ៊ីចឹង ទៅ​ឲ្យ​ប្រជាជន​ទាំង​អស់​គេ ចូល​ចិត្ត​ភ្លើង​ទៀន​គេ បាន​ស្ដាប់​គឺ​ឲ្យ​គេ​ចូល​ចិត្ត​ដូច​ខ្ញុំ​ដែរ»

អ្នក​ចម្រៀង​គាំទ្រ​គណបក្ស​ភ្លើង​ទៀន មិនមែន​ជា​ចម្រៀង​អាជីព​ទេ ប៉ុន្តែ​សំឡេង​មិន​ចាញ់​អ្នក​ចម្រៀង​អាជីព​ឡើយ។ ពួកគេ​ទើប​តែ​ចាប់​ផ្ដើម​ចេញ​ចម្រៀង កាល​ពី​ពេល​ថ្មីៗ នេះ គឺ​ដំណាល​គ្នា​ដែល​គណបក្ស​ភ្លើង​ទៀន​ធ្វើ​សមាជ​សម្រេច​ចូលរួម​ការបោះឆ្នោត​កាល​ពី​ថ្ងៃ​ទី១៥ ខែ​ឧសភា ខាងមុខ។ អ្នក​ចម្រៀង​ត្រកូល ញ៉ែម ទាំង​ពីរ​នាក់ ដែល​វ័យ​ជាង ៥០ប្លាយ​នេះ គឺ​ជា​បងប្អូន​បង្កើត​នឹង​គ្នា និង​មាន​ចិត្ត​គំនិត​ដូច​គ្នា គឺជា​ពលរដ្ឋ​ដែល​គាំទ្រ​គណបក្ស​ភ្លើង​ទៀន។

អ្នក​ចម្រៀង​ម្នាក់​ទៀត​ លោកស្រី ញ៉ែម បុប្ផា ប្រាប់​វិទ្យុ​អាស៊ី​សេរី​ថា លោក​ស្រី​ពេញ​ចិត្ត​ក្នុង​ការ​ចូលរួម​ច្រៀង​ចម្រៀង​ទាំង​នេះ ទោះ​ត្រូវ​គេ​គំរាម ឬ​ត្រូវ​រត់​ចោល​ស្រុក ព្រោះ​ការ​ច្រៀង​គាំទ្រ​ គណបក្ស​ភ្លើង​ទៀន​ក្ដី។ លោក​ស្រី​បន្ត​ថា អ្វី​ដែល​លោក​ស្រី​ចង់​បាន​គឺ ចង់​ពលរដ្ឋ​ដែល​មាន​សិទ្ធិ​បោះ​ឆ្នោត ទៅ​បោះ​ឆ្នោត​ទាំង​អស់​គ្នា ហើយ​ឲ្យ​ពលរដ្ឋ​ដឹង​ថា ការ​បោះ​ឆ្នោត​ឲ្យ​គណបក្ស​ភ្លើង​ទៀន នឹង​ធ្វើ​ឲ្យ​មាន​ការ​ផ្លាស់ប្ដូរ​ជា​វិជ្ជមាន«មក​ពី​ខ្ញុំ​ស្រលាញ់​ហើយ​ខ្ញុំ​ចង់​ឲ្យ​ប្រជាពលរដ្ឋ​បាន​ដឹង​បាន​យល់​អំពី​គោលការណ៍​បក្ស​ភ្លើង​ទៀន​ហ្នឹង ហើយ​យើង​ច្រៀង​ពី​គោលការណ៍​ហ្នឹង​ទៅ​ដើម្បី​ឲ្យ​ប្រជាជន​បាន​យល់​និង​បាន​ចូលរួម​បោះ​ឆ្នោត​ទាំង​អស់​គ្នា ខ្ញុំ​ចង់​ឲ្យ​ពលរដ្ឋ​ទៅ​បោះឆ្នោត​ដើម្បី​ឲ្យ​មាន​លទ្ធិ​ប្រជាធិបតេយ្យ​ពិត​ប្រាកដ ខ្ញុំ​ចង់​ឲ្យ​មាន​ការ​ផ្លាស់ប្ដូរ​មួយ ដើម្បី​ឲ្យ​ប្រជាជន​មាន​សិទ្ធិ​បញ្ចេញ​មតិ​ដែល​ខ្លួន​ចង់​បាន»

សកម្មជន​គណបក្ស​ភ្លើង​ទៀន​ប្រចាំ​ខេត្ត​ព្រះសីហនុ​ លោក ម៉ៃ ហុងស្រៀង ដែល​ចូលរួម​ស្ម័គ្រចិត្ត​តែ​ង​និពន្ធ​ចម្រៀង​ប្រាប់​ថា លោក​បាន​​តែង​និពន្ធ​ចម្រៀង​មួយ​ចំនួន បង្ហាញ​ពី​តួនាទី​របស់​គណបក្ស​ភ្លើង​ទៀន។ លោក​បន្ត​ថា ការ​តែង​និពន្ធ​ចម្រៀង​នេះ គឺ​កើត​ចេញ​ពី​ចិត្ត និង​តាម​ការ​មើល​ឃើញ​ពី​ទិដ្ឋភាព​សង្គម​ជាក់ស្ដែង៖ «យើង​ចង់​និយាយ​ថា ភ្លើង​ទៀន​មាន​តួនាទី​ធ្វើ​អី នៅ​ក្នុង​កិច្ចការ​នយោបាយ បម្រើ​សង្គម​ជាតិ​ទៅ​តាម​ទិដ្ឋភាព​ជាក់ស្ដែង​រាល់​ថ្ងៃ​ហ្នឹង​ក្រោយ​ជាប់​ឆ្នោត​ជាប់​អ៊ីចឹង​ទៅ​ណា»

មេដឹកនាំ​គណបក្ស​ភ្លើង​ទៀន​​លើកឡើង​ថា​ បទ​ចម្រៀង​ទាំង​នេះ មិនមែន​ត្រឹមតែ​រាំ​គ្រវី​គូថ​នោះ​​ទេ​ ប៉ុន្តែ​ មាន​អត្ថន័យ​គ្រប់គ្រាន់​សម្រាប់​ផ្សព្វផ្សាយ​ពី​គោល​នយោបាយ​របស់​គណបក្ស។

ទាក់ទង​ករណី​សកម្មជន​ជន​បក្ស​ភ្លើង​ទៀន​រួម​គ្នា​ផលិត​ចម្រៀង​ផ្សព្វផ្សាយ​គោលនយោបាយ​បក្ស​ភ្លើង​ទៀន​នេះ​ដែរ អនុប្រធាន និង​ជា​អ្នក​នាំ​ពាក្យ​គណបក្ស​ភ្លើង​ទៀន លោក ថាច់ សេដ្ឋា ឲ្យ​ដឹង​ថា បទ​ចម្រៀង​ទាំង​នេះ​គឺ កើត​ចេញ​ពី​ទឹកចិត្ត​របស់​អ្នក​គាំទ្រ​គណបក្ស​ភ្លើង​ទៀន ទាំង​ការ​និពន្ធ ការ​ច្រៀង កាត់​ត និង​បង្ហោះ​តាម​បណ្ដាញ​សង្គម​ហ្វេសប៊ុក។ លោក​សង្ឃឹម​ថា​ សារ​នយោបាយ​គណបក្ស​ភ្លើង​ទៀន​ទាំង ៧ចំណុច នឹង​ជ្រួតជ្រាប​បន្ថែម​ទៀត​ដល់​មូលដ្ឋាន​តាម​រយៈ​បទ​ចម្រៀង​ទាំង​នោះ។ លោក ថាច់ សេដ្ឋា សង្កេត​ឃើញ​ថា ការ​ចូលរួម​បោះឆ្នោត​អាណត្តិ​នេះ​ខុស​ប្លែក​ពី​អាណត្តិ​មុនៗ គឺ​អ្នក​គាំទ្រ ឬ​សកម្មជន​ចេញ​បាន​ធ្វើ​សកម្មភាព​ច្រើន ដើម្បី​ជួយ​បក្ស«អ៊ីចឹង​យើង​ឃើញ​ថា ការ​លះបង់​ពួក​គាត់​ខុស​ពី​ធម្មតា ហើយ​បទ​ចម្រៀង​អ៊ីចឹង​ដែរ យើង​មិន​បាន​ដាក់​ផែនការ​សម្រាប់​ជា​បទ​ចម្រៀង ប៉ុន្តែ ពួក​គាត់​គិតគូរ​ដល់​ការ​បោះ​ឆ្នោត​អ៊ីចឹង ត្រូវ​តែ​មាន​បទ​ចម្រៀង​ក៏​សរសេរ​ធ្វើ​ខ្លួន​គាត់ លុយ​ខ្លួន​គាត់​ច្រៀង​ខ្លួន​គាត់​បាន​ហូរហែ​អ៊ីចឹង​ទៅ អ៊ីចឹង​ខាងលើ​ក៏​ជ្រើសរើស​អ្នក​ណា​អាច​យក​បាន​យើង​ចាក់​ច្រៀង​ក្នុង​ពេល​ហែ​ឃោសនា​អ៊ីចឹង​ទៅ»

មកដល់ពេលនេះ អ្នកគាំទ្រ និង​សកម្មជន​ជន​បក្ស​ភ្លើង​ទៀន​បាន​រួម​គ្នា​ផលិត​ចម្រៀង​ជំរុញ​ទៅ​ពលរដ្ឋ​ឲ្យ​បោះ​ឆ្នោត​បាន​ជិត ១០បទ​ហើយ។ ពួក​គេ​នៅ​តែ​បន្ត​ផលិត​ចម្រៀង​បន្ត​ទៀត ក្នុង​យុទ្ធនាការ​ឃោសនា​រក​សំឡេង​ឆ្នោត និង​ការ​បោះ​ឆ្នោត​នា​ពេល​ខាង​មុខ។

គណបក្ស​ភ្លើង​ទៀន ដែល​បាន​ដាក់​បេក្ខជន​ឈរ​ឈ្មោះ​បោះ​ឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់​ស្ទើរ​ទូទាំង​ប្រទេស​ជាង ១.៦០០ឃុំ​សង្កាត់ នឹង​ចូលរួម​ការប្រកួតប្រជែង​ការបោះឆ្នោត​ថ្នាក់ក្រោម​ជាតិ​ថ្ងៃ​ទី៥ ខែមិថុនា​ខាង​មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល