ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ
2025.01.08
លោក លិម គិមយ៉ា អតីតសមាជិកសភាគណបក្សសង្គ្រោះជាតិ ដែលត្រូវបានឃាតកបាញ់សម្លាប់នៅទីក្រុងបាងកក ប្រទេសថៃ កាលពីល្ងាចថ្ងៃទី៧ ខែមករា ឆ្នាំ២០២៥។
រូប៖ AFP
សមត្ថកិច្ចបានចាប់ខ្លួន ឃាតកបាញ់សម្លាប់ លោក លិម គិមយ៉ា អតីតតំណាងរាស្ត្រគណបក្សសង្គ្រោះជាតិ នៅទីក្រុងបាងកក ហើយ នៅថ្ងៃទី៨ មករានេះ។
សេចក្ដីប្រកាសព័ត៌មានរបស់ស្នងការដ្ឋាននគរបាលជាតិចុះផ្សាយថា ជនសង្ស័យឈ្មោះ អេកាឡាក់ ផែណយ (Ekkalak Phaenoi) ឈ្មោះហៅក្រៅ ពលបាល អឹម (Sergeant M) ត្រូវបានចាប់ខ្លួន នៅស្រុកមោងរ្សី ខេត្តបាត់ដំបង។ប្រភពដដែលបន្តថា សមត្ថកិច្ចនឹងបញ្ជូនជនសង្ស័យរូបនេះ ប្រគល់ឱ្យអាជ្ញាធរថៃវិញ តាមសំណើរបស់ថៃ ក្រោយពេលបញ្ចប់នីតិវិធីនៅកម្ពុជា។
ប៉ូលិសស៊ើបអង្កេតរបស់ថៃបង្ហាញថា ឃាតកជាអតីតទាហានជើងទឹកថៃ ប្រកបរបររត់ម៉ូតូឌុប គេចខ្លួនឆ្លងដែនមកកម្ពុជា តាមភូមិខៅឌីន (Khao Din) ក្នុងខេត្តស្រះកែវ (SaKeo) ដោយមានរថយន្តភីកអាប់ (Pickup) មករង់ចាំទទួល ហើយបើករត់គេចពីប៉ុស្តិ៍ ត្រួតពិនិត្យ នៅវេលាម៉ោង ១២ និង៤០នាទីយប់។
អតីតសមាជិកសភាគណបក្សសង្គ្រោះជាតិ ដែលតែងតែរិះគន់រដ្ឋាភិបាលត្រកូល ហ៊ុន គឺលោក លិម គិមយ៉ា ត្រូវបានឃាតកបាញ់សម្លាប់ នៅទីក្រុងបាងកកប្រទេសថៃ កាលពីថ្ងៃទី ៧មករា។
សមត្ថកិច្ចថៃបង្ហាញថា បន្ទាប់ពីកើតហេតុ ជនសង្ស័យម្នាក់ទៀត បានចាកចេញពីប្រទេសថៃភ្លាមៗ ដោយក្រុមហ៊ុនអាកាសចរណ៍ ស្កាយ អង្គរ អ៊ែរឡាញ (Sky Angkor Airlines) ទៅរាជធានីភ្នំពេញ នៅម៉ោង ៩យប់ កាលពីថ្ងៃទី៧ ខែមករា។
ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ថ្លែងថា ឃាតកម្មនេះ មិនជាប់ពាក់ព័ន្ធនឹងមេដឹកនាំកម្ពុជាឡើយ៕
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
អត្ថបទពេញនិយម
នយោបាយ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី
- តុលាការបារាំង បានសាកសួរភរិយាលោក លិម គិមយ៉ា អំពីករណីឃាតកម្មលើលោក លិម គិមយ៉ា