នាវា​កងទ័ពជើងទឹក​អាមេរិក​ចាកចេញ​ពី​កំពង់ផែ​កម្ពុជា បន្ទាប់​ពី​បំពេញ​ទស្សនកិច្ច​​រយៈពេល ៥​ថ្ងៃ

បន្ទាប់ពី​ចូល​ចត និង​បំពេញ​ទស្សនកិច្ច​រយៈពេល ៥ថ្ងៃ ដោយ​បាន​ជួប​ពិភាក្សា​ការងារ​ជាមួយ​មន្ត្រី​ជាន់ខ្ពស់​កងទ័ពជើងទឹក និង​ថ្នាក់ដឹកនាំ​កម្ពុជា​មក ពេលនេះ​នាវាចម្បាំង​របស់​សហរដ្ឋអាមេរិក​ឈ្មោះ យូអេសអេស សាវាណាហ៍ (USS Savannah) ឬLCS 28 បាន​ចាកចេញ​ពី​កំពង់ផែ​កម្ពុជា​ហើយ។ អ្នកឃ្លាំមើល​នយោបាយ​អន្តរជាតិ លើកឡើង​ថា ដំណើរ​ទស្សនកិច្ច​របស់​កង​នាវា​ចម្បាំង​សហរដ្ឋអាមេរិក នៅ​កម្ពុជា គឺ​ផ្ដោត​សំខាន់​ទៅ​លើ​ទំនាក់ទំនង​ផ្នែក​សន្តិសុខ​យោធា​ក្នុង​តំបន់ ប៉ុន្តែ​មិន​អាច​ធ្វើ​ឱ្យ​កម្ពុជា​បែរខ្នង​ពី​ចិន​បាន​នោះ​ទេ។

នាវាចម្បាំង​របស់​សហរដ្ឋអាមេរិក​ឈ្មោះ យូអេសអេស សាវាណាហ៍ (USS Savannah) ឬLCS 28 បាន​ចាកចេញ​ពី​កំពង់ផែ​ស្វយ័ត​ក្នុង​ខេត្ត​ព្រះសីហនុ កាលពី​ថ្ងៃទី២០ ខែ​ធ្នូ ដោយ​បញ្ចប់​ទស្សនកិច្ច​លើកដំបូង​នៃ​នាវា​កងទ័ពជើងទឹក​សហរដ្ឋអាមេរិក នៅ​ក្នុង​រយៈពេល ៨ ឆ្នាំ​មក​នេះ ដោយ​មាន​មន្ត្រី​ជាន់ខ្ពស់​របស់​កងនាវិក​កម្ពុជា ជាច្រើន​រូប​បាន​ជូនដំណើរ។

មេបញ្ជាការ​ប្រចាំ​នៅ​បញ្ជា​ការដ្ឋាន​របស់​សហរដ្ឋអាមេរិក នៅ​តំបន់​ឥណ្ឌូ​ប៉ាស៊ីហ្វិក លោក​ឧត្ដមនាវី ស៊ែមញូល ផាផារ៉ូ (Samuel J. Paparo) បាន​ដើរ​ពិនិត្យ​មើល​នាវា នៅ​ក្នុង​កំពង់ផែ ក្នុង​អំឡុង​ពេល​ទស្សនកិច្ច​នៅ​ទីក្រុង​ភ្នំពេញ និង​នៅ​ក្រុង​ព្រះសីហនុ។

ស្ថានទូត​អាមេរិក​ប្រចាំ​កម្ពុជា ឱ្យ​ដឹង​នៅ​លើ​ទំព័រ​ហ្វេសប៊ុក(Facebook) កាលពី​ថ្ងៃទី២០ ខែ​ធ្នូ លោក ស៊ែមញូល ផាផារ៉ូ បាន​មានប្រសាសន៍ថា «ទស្សនកិច្ច​របស់​កងនាវិក​អាមេរិក​នេះ គឺជា​ព្រឹត្តិការណ៍​សំខាន់ នៅ​ក្នុង​ភាព​ជា​ដៃគូ​ដែល​លោក​អះអាង​ថា កំពុង​ចម្រើន​ឡើង​រវាង​សហរដ្ឋអាមេរិក និង​ប្រទេស​កម្ពុជា»។ ឧត្ដមនាវី​អាមេរិក​រូប​នេះ បន្ត​ថា «ភាព​ជា​ដៃគូ​នេះ​បាន​ចាប់ផ្ដើម​ឡើង កាលពី​ជិត ៧៥ ឆ្នាំមុន ហើយ​ជាមួយ​នឹង​ការ​ចាប់ផ្ដើម​នៃ​ទំនាក់ទំនង​នេះ បាន​បង្ហាញ​ឱ្យ​ឃើញ​ពី​ចំណង​មិត្តភាព​យូរអង្វែង រវាង​ប្រទេស​ទាំងពីរ នៅ​ក្នុង​ការ​បន្ត​ធ្វើការ​ជាមួយ​គ្នា ដើម្បី​ដោះស្រាយ​បញ្ហា​ប្រឈម​ទាំងឡាយ និង​លើកកម្ពស់​សន្តិសុខ និង​ស្ថិរភាព​ក្នុង​តំបន់»។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​ការពារជាតិ អ្នកស្រី ម៉ាលី សុជាតា ដើម្បី​សាកសួរ​បន្ថែម​ជុំវិញ​រឿង​នេះ​បាន​ទេ​នៅ​ថ្ងៃទី២១ ខែ​ធ្នូ។

ទាក់ទង​ទៅ​នឹង​រឿង​នេះ អ្នក​ជំនាញ​ខាង​វិទ្យាសាស្ត្រ​នយោបាយ លោក ឯម សុ​វណ្ណារ៉ា យល់ឃើញ​ថា វត្តមាន​កង​នាវា​របស់​សហរដ្ឋអាមេរិក​នៅ​កម្ពុជា គឺជា​សញ្ញា​ល្អ​មួយ នៃ​ការ​ចាប់ផ្ដើម​ស្ដារ​តុល្យភាព​ទំនាក់ទំនង​ការទូត​របស់​កម្ពុជា ជាមួយ​នឹង​ប្រទេស​មហាអំណាច​លោកសេរី និង​កុម្មុយនិស្ត។

លោក ឯម សុវណ្ណារ៉ា៖ «ការ​ស្ដារ​ហ្នឹង វា​ត្រូវការ​ពេលវេលា ទាមទារ​ការ​យល់គ្នា ការ​ព្រមព្រៀង​គ្នា​រៀបចំ​ធ្វើ​សមយុទ្ធ​យោធា ហើយ​និង​ការ​ឆ្លើយតប​របស់​កម្ពុជា ពាក់ព័ន្ធ​នឹង​ការ​បើក​លំហ​សិទ្ធិ​សេរីភាព លំហ​ប្រជាធិបតេយ្យ ដោះលែង​អ្នកទោស​មនសិការ រឿង​ហ្នឹង​គឺ​អាស្រ័យ​លើ​ភាគី​កម្ពុជា ជា​អ្នក​សម្រេច។ ប៉ុន្តែ​បើ​យើង​មើល​ពី​ស្ថានភាព​បច្ចុប្បន្ន ហាក់​មិន​មាន​ភាព​ធូរស្បើយ​ទេ។ ការ​ចាប់ចង​នៅតែ​មាន អ៊ីចឹង​ដូចជា​មិនទាន់​មាន​ទស្សន​វិជ្ជមាន​ទេ ជុំវិញ​ការ​ស្ដារ​ទំនាក់ទំនង​នេះ»។

នាវាចម្បាំង​សហរដ្ឋអាមេរិក ឈ្មោះ យូអេសអេស សាវាណាហ៍ (USS Savannah) ឬLCS 28 បាន​ចូល​ចត​នៅ​កំពង់ផែ​ទឹកជ្រៅ​ខេត្ត​ព្រះសីហនុ ដែល​នៅ​ក្បែរ​មូលដ្ឋាន​កងទ័ពជើងទឹក​រាម កាលពី​ថ្ងៃទី១៦ ខែ​ធ្នូ ដើម្បី​បំពេញ​ទស្សនកិច្ច​រយៈពេល ៥ថ្ងៃ គឺ​ចាប់ពី​ថ្ងៃទី១៦ ដល់​ថ្ងៃទី២០ ខែ​ធ្នូ។

ឧត្ដមនាវី​អាមេរិក លោក ស៊ែមញូល ផាផារ៉ូ បាន​ជួប​ជាមួយ​លោក​នាយករដ្ឋមន្ត្រី ហ៊ុន ម៉ាណែត ដោយ​បាន​ពិភាក្សា​លើ​ការ​ពង្រីក​កិច្ច​សហប្រតិបត្តិការ​លើ​វិស័យ​ការពារ​ជាតិ​ឱ្យ​កាន់តែ​ស៊ីជម្រៅ​រវាង កម្ពុជា និង​សហរដ្ឋអាមេរិក។ ក្រៅពី​មាន​ជំនួប​ជាមួយ​លោក ហ៊ុន ម៉ាណែត ហើយ​នោះ លោក ស៊ែមញូល ផាផារ៉ូ ក៏​បាន​ជួប​ពិភាក្សា​ការងារ​ជាមួយ​អគ្គ​មេបញ្ជាការ នៃ​កងយោធពលខេមរភូមិន្ទ លោក វង្ស ពិសេន ដោយ​លោក វង្ស ពិសេន បាន​ស្នើ​ឱ្យ​សហរដ្ឋអាមេរិក​ពិនិត្យ​លទ្ធភាព​រៀបចំ​សមយុទ្ធ​យោធា «ឆ្មាំ​អង្គរ» រវាង​កងទ័ព​កម្ពុជា និង​សហរដ្ឋអាមេរិក​ឡើងវិញ បន្ទាប់ពី​កម្ពុជា​បាន​លុបចោល​ដោយ​ខ្លួនឯង​រួចមក ហើយ​ងាក​ទៅ​ធ្វើ​សមយុទ្ធ​ជាមួយ​ចិន​វិញ​នោះ។

ជុំវិញ​រឿង​នេះ អ្នក​អត្ថាធិប្បាយ​នយោបាយ លោក គឹម សុខ សង្កេត​ឃើញ​ថា ដំណើរ​ទស្សនកិច្ច​របស់​កង​នាវាចម្បាំង​សហរដ្ឋអាមេរិក នៅ​កម្ពុជា​នេះ ផ្ដោត​សំខាន់​ទៅលើ​ទំនាក់ទំនង​ផ្នែក​សន្តិសុខ​យោធា​ក្នុង​តំបន់ ប៉ុន្តែ​មិន​អាច​ធ្វើ​ឱ្យ​កម្ពុជា​បែរខ្នង​ពី​ចិន​បាន​នោះ​ទេ ដោយសារ​មេដឹកនាំ​កម្ពុជា ត្រូវការ​ឥទ្ធិពល​ចិន​ជា​ចាំបាច់​ដើម្បី​ពង្រឹង​អំណាច​ផ្ទាល់ខ្លួន។

លោក គឹម សុខ៖ «ទោះបី​មាន​ទំនាក់ទំនង​ជាមួយ​យោធា​អាមេរិក ឃើញ​រូបភាព​ល្អូកល្អិន​បន្តិច នៅ​រយៈកាល​ចុងក្រោយ​នេះ​ក៏ដោយ គឺ​គ្រាន់តែ​ដើម្បី​ដោះ​សម្ពាធ​ខ្លួនឯង​ខ្លះ​ប៉ុណ្ណោះ។ ក៏ប៉ុន្តែ រដ្ឋាភិបាល​ត្រកូល​ហ៊ុន​ហ្នឹង ក៏​មិន​អាច​ងាក​ខ្លួន​ចេញពី​ចិន ដែល​ជា​មិត្ត​គ្រប់​យុទ្ធសាស្ត្រ​របស់​ខ្លួន​ដែរ។ ហេតុដូច្នេះ ក្ដី​សង្ឃឹម​ថា​ដោះលែង​អ្នកទោស​នយោបាយ​ខ្មែរ​នៅ​ពេលនេះ គឺ​មាន​មិន​ច្រើន​ទេ»។

នៅ​ក្នុង​សន្និសីទ​ព័ត៌មាន​កាលពី​ថ្ងៃទី១៨ ខែ​ធ្នូ លោក​ឧត្ដមនាវី​អាមេរិក ស៊ែមញូល ផាផារ៉ូ បាន​លើកឡើង​ថា «សហរដ្ឋអាមេរិក​កំពុង​ឃ្លាំមើល​ឥរិយាបថ​របស់​ទំនាក់ទំនង​នៃ​កងទ័ព​រំដោះ​ប្រជាជន​ចិន នៅ​មូលដ្ឋាន​ជើងទឹក​សមុទ្រ​រាម​របស់​កម្ពុជា ហើយ​លោក​សង្ឃឹម​ថា សហរដ្ឋអាមេរិក​នឹង​អាច​ចូល​ទៅ​ទស្សនកិច្ច​នៅ​មូលដ្ឋាន​មួយ​នេះ នៅ​ពេល​ខាង​មុខ ដើម្បី​កំណត់​ឱ្យ​កាន់តែ​ច្បាស់​ពី​សកម្មភាព​របស់​ចិន​នៅ​ទីនោះ»។

ទាក់ទង​នឹង​មូលដ្ឋាន​ទ័ព​ជើងទឹក​រាម​នេះ​ដែរ ប្រធាន​ព្រឹទ្ធសភា​លោក ហ៊ុន សែន បាន​សន្យា​ជាមួយ​ទីប្រឹក្សា​សន្តិសុខ​ជាតិ​ជប៉ុន​លោក អាគីបា តាខេអូ (Akiba Takeo) កាលពី​ថ្ងៃទី២០ ធ្នូ ថា កម្ពុជា​នឹង​អនុញ្ញាត​ឱ្យ​នាវា​ជប៉ុន​ចូល​ចត​មុនគេ​នៅ​កំពង់ផែ​រាម បន្ទាប់ពី​ការ​សាងសង់​រួចរាល់ ខណៈ​ជប៉ុន​ជា​ប្រទេស​សម្ព័ន្ធមិត្ត​ដ៏​សំខាន់​របស់​អាមេរិក​ក្នុង​តំបន់​អាស៊ី​ប៉ាស៊ីហ្វិក៕