ចិនប្ដេជ្ញាផ្ដល់ប្រាក់កម្ចីលើវិស័យដឹកជញ្ជូនកម្ពុជា ខណៈហេដ្ឋារចនាសម្ពន្ធមួយចំនួនរងការរិះគន់គ្មានគុណភាព និងអភិបាលកិច្ចល្អ
2024.09.12
ឧបនាយករដ្ឋមន្ត្រី លោក ស៊ុន ចាន់ថុល ថ្លែងក្នុងពិធិបើកពិព័រណ៍អន្តរជាតិចិនលើកទី២៤ សម្រាប់ការវិនិយោគ និងពាណិជ្ជកម្ម នៅប្រទេសចិន កាលពីថ្ងៃទី៨ កញ្ញា ២០២៤។
រូប៖ ហ្វេសប៊ុកលោក ស៊ុន ចាន់ថុល
ប្រទេសចិនកុម្មុយនិស្តប្ដេជ្ញាផ្ដល់ជំនួយបច្ចេកទេសលើការកសាងវិស័យដឹកជញ្ជូននៅកម្ពុជា។ អ្នកជំនាញកិច្ចការអន្តរជាតិ និងមន្ត្រីបក្សប្រឆាំងព្រួយបារម្ភថា កម្ពុជាអាចនឹងធ្លាក់ក្នុងអន្ទាក់បំណុលចិនវ័ណ្ឌក ខណៈប្រព័ន្ធហេដ្ឋារចនាសម្ពន្ធដែលសាងសង់ដោយក្រុមហ៊ុនចិនមួយចំនួនគ្មានគុណភាព និងជំរុញឱ្យកម្ពុជាទទួលបានអភិបាលកិច្ចល្អនៅឡើយ។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី កត់សម្គាល់ថា នារយៈពេលចុងក្រោយនេះ រាល់ជំនួបរវាងក្រុមមន្ត្រីខ្ពស់រដ្ឋាភិបាលកម្ពុជា និងចិន ភាគីកម្ពុជាតែងស្នើសុំកញ្ចប់លុយកម្ចីថ្មីៗបន្ថែមពីចិន ដើម្បីជំរុញការកសាងផ្លូវថ្នល់ និងស្ពាន ដែលលោកសង្ស័យថា រដ្ឋាភិបាលកម្ពុជាទំនងកំពុងមានបញ្ហាផ្នែកហិរញ្ញវត្ថុ។ ទោះជាយ៉ាងណា លោកថា លុយដែលខ្ចីពីចិនភាគច្រើនយកមកធ្វើផ្លូវថ្នល់ និងស្ពាន គឺរដ្ឋាភិបាលកម្ពុជាមិនទាន់គ្រប់គ្រងឱ្យមានតម្លាភាព និងគណនេយ្យភាពនៅឡើយ។
លោក សេង វណ្ណលី៖ «កិច្ចសហប្រតិបត្តិការសេដ្ឋកិច្ច និងការវិនិយោគ កម្ចីជាដើមហ្នឹងក្រោយៗមកនេះ ខ្ញុំគិតថា ប្រហែលជារដ្ឋាភិបាលមានបញ្ហាពាក់ព័ន្ធការចំណាយ ដើម្បីធ្វើម៉េចធានានិរន្តរភាព សេដ្ឋកិច្ចឱ្យដំណើរការទៅមុខ ជាពិសេស ដើម្បីការពារពីប្រតិកម្មអវិជ្ជមានពីប្រជាពលរដ្ឋ មជ្ឈដ្ឋានទូទៅដែលគេមើលឃើញថា ការអភិវឌ្ឍនេះវាអត់មានចីរភាពការគ្រប់គ្រងបំណុល ដូចជាគ្រប់គ្រងការវិនិយោគហ្នឹងអត់សូវមានតម្លាភាព និងគណនេយ្យភាព។ អ៊ីចឹងរដ្ឋាភិបាលព្យាយាមធ្វើម៉េច បង្កើតឱ្យមានការអភិវឌ្ឍក្នុងវិស័យហេដ្ឋារចនាសម្ពន្ធរូបវន្ត ដូចជា អគារផ្សេងៗ ដើម្បីឱ្យមើលឃើញរូបភាពពីខាងក្រៅជាការអភិវឌ្ឍពិតប្រាកដ។ ប៉ុន្តែ យើងដឹងហើយថា មានការរិះគន់សូម្បីប្រជាពលរដ្ឋក្នុងស្រុក សាមញ្ញទូទៅអាចមើលឃើញពីកង្វះនៃការគ្រប់គ្រងប្រកបតម្លាភាព និងគណនេយ្យភាព»។
រដ្ឋាភិបាលកម្ពុជាអះអាងថា ប្រព័ន្ធហេដ្ឋារចនាសម្ពន្ធនៅកម្ពុជាដែលកើតចេញពីកិច្ចសហប្រតិបត្តិការកម្ពុជា-ចិន បានហុចផលជាវិជ្ជមានលើវិស័យដឹកជញ្ជូន។ ការអះអាងនេះ ធ្វើឡើងក្នុងជំនួបរវាងអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល ជាមួយរដ្ឋមន្ត្រីនៃក្រសួងដឹកជញ្ជូនចិនកាលពីថ្ងៃទី០៩ ខែកញ្ញា។ ចំណែក ភាគីចិនសន្យាថា នឹងបន្តផ្ដល់ប្រាក់កម្ចី បច្ចេកទេសបណ្ដុះបណ្ដាលធនធានមនុស្សកម្ពុជា និងជំរុញវិនិយោគិនចិនមកវិនិយោគលើវិស័យដឹកជញ្ជូន ផ្លូវទឹក ផ្លូវសមុទ្រ កំពង់ផែ និងពហុមធ្យោបាយដឹកជញ្ជូននៅកម្ពុជាបន្ថែមទៀត។
វិទ្យុអាស៊ីសេរីមិនអាចទាក់ទង លោក ស៊ុន ចាន់ថុល ដើម្បីបញ្ជាក់បន្ថែមជុំវិញរឿងនេះបានទេនៅថ្ងៃទី១១ ខែកញ្ញា។
អតីតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្ទ្រ មានប្រសាសន៍ថា ស្ថានភាពរដ្ឋាភិបាលកម្ពុជាបច្ចុប្បន្នដែលបន្តខ្ចីប្រាក់ពីបរទេស ជាពិសេសពីរដ្ឋាភិបាលចិនយកមកកសាងប្រទេសនោះ គឺជាឱកាសរបស់ក្រុមមន្ត្រីគ្រាក់មួយចំនួនប្រព័ន្ធអំពើពុករលួយ កិបកេងកម្ចីបរទេស ធ្វើជាប្រយោជន៍ផ្ទាល់ខ្លួន ដោយសារតែរដ្ឋាភិបាលបច្ចុប្បន្នគ្មានក្រុមមន្ត្រីគណបក្សប្រឆាំង និងស្ថាប័នឯករាជ្យត្រួតពិនិត្យការចាយវាយ និងគ្រប់គ្រងប្រាក់កម្ចីបរទេស។
លោក ម៉ែន សុថាវរិន្ទ្រ៖ «អ៊ីចឹង ខ្ញុំមើលទៅគ្រួសារ លោក ហ៊ុន សែន ដែលនៅពីក្រោយហ្នឹងគាត់មិនបាច់ទៅរកចិនវែងឆ្ងាយទេ គឺមានតែជជែកគ្នាកុំឱ្យគាត់រឹងទទឹងដល់ណាទៀត កម្ចីធ្ងន់ធ្ងរមែនទែនខ្ចីគេវាច្រើនជ្រុលពេកហើយ។ ចិនឱ្យខ្ចីប៉ុន្តែ អត់មានចំណេញអីដល់ខ្មែរសោះ ក្រុមហ៊ុនចិនអ្នកធ្វើ អ្នកជំនាញចិនមកធ្វើ កម្មករចិនមកធ្វើ កម្មករខ្មែរតិចតួចណាស់ មិនបាន ១០ភាគរយផង គឺអត់មានចំណេញខ្មែរទេ គឺចំណេញចិនទាំងអស់ ការងារទៅអត់រួចទេ មានការកេងប្រវ័ញ្ចច្រើនណាស់ អ៊ីចឹងបានផ្លូវធ្វើទាំងប៉ុន្មានអត់មានបានជោគជ័យទេ»។
គិតត្រឹមត្រីមាសទី១ ក្នុងឆ្នាំ២០២៤ កម្ពុជាជំពាក់បំណុលបរទេសជាង ១១ពាន់លានដុល្លារ ក្នុងនោះកម្ពុជាជំពាក់មិត្តដែកថែបចិនច្រើនជាងគេ គឺជាង ៤០%។ ក្រសួងសេដ្ឋកិច្ច និងហិរញ្ញវត្ថុ ព្យាករណ៍ថា នៅដំណាច់ឆ្នាំ២០២៤នេះ កម្ពុជាអាចកើនបំណុលជំពាក់បរទេសរហូតជាង ១២ពាន់លានដុល្លារដោយសារតម្រូវការអភិវឌ្ឍច្រើនដូចជាប្រព័ន្ធហេដ្ឋារចនាសម្ពន្ធ ប្រព័ន្ធធារាសាស្ត្រ និងសាងសង់ស្ពានជាដើម។
ក្រុមអ្នកឃ្លាំមើល និងមន្ត្រីបក្សប្រឆាំងយល់ថា ពលរដ្ឋកម្ពុជាអាចនឹងពិបាកក្នុងការទទួលផលប្រយោជន៍ពិតប្រាកដពីវិស័យដឹកជញ្ជូន ដោយសារតែគម្រោងសាងសង់ផ្លូវថ្នល់ និងស្ពានភាគច្រើន គឺរដ្ឋាភិបាលដាក់ឱ្យដេញថ្លៃ និងត្រួតពិនិត្យការសាងសង់តែជាមួយក្រុមបក្ខពួក និងក្រុមហ៊ុនរដ្ឋអំណាចចិន ដោយពុំអនុញ្ញាតឱ្យមានការវាយតម្លៃផលប៉ះពាល់ និងគុណភាពពីខាងភាគីនៃស្ថាប័នឯករាជ្យណាមួយនោះទេ។ មួយវិញទៀត អ្នកឃ្លាំមើលរិះគន់ថា គម្រោងផ្ដល់ប្រាក់កម្ចីពីចិនដែលធ្វើផ្លូវថ្នល់ និងស្ពានឆ្លងកាត់ទន្លេមេគង្គនាពេលកន្លងមកជាដើម គឺជាយុទ្ធសាស្ត្ររបស់ចិនដែលពង្រីកសេដ្ឋកិច្ចតាមរយៈគំនិតផ្ដួចផ្ដើមខ្សែក្រវាត់ និងផ្លូវ (BRI) និងសម្រួលការងាយស្រួលដឹកធនធានធម្មជាតិចេញពីកម្ពុជា ដូចជា រ៉ែ ត្បូង ឈើប្រណិត និងថ្មម៉ាបជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
