សង្គមស៊ីវិលថា តួលេខជួញដូរស្ត្រីខ្មែរបង្ខំឱ្យរៀបការនៅប្រទេសចិនកើនឡើងក្នុងរយៈពេល៩ខែឆ្នាំ២០២៤
2024.10.31
ក្រុមគ្រួសាររបស់អ្នកនារីរងគ្រោះចាញ់បោករៀបការទៅប្រទេសចិន យំឱបគ្នានៅពេលដែលកូនស្រីរបស់គាត់ត្រូវជួយសង្គ្រោះឱ្យវិលត្រឡប់មកស្រុកកំណើតជួបជុំគ្រួសារវិញ។
រូប៖ សមាគមអាដហុក
សង្គមស៊ីវិលរកឃើញថា ក្នុងរយៈពេល ៩ខែឆ្នាំ២០២៤នេះ ចំនួនស្ត្រីខ្មែរដែលរងគ្រោះដោយអំពើជួញដូរមនុស្ស ត្រូវគេបង្ខំឱ្យរៀបការនៅក្នុងប្រទេសចិន មានការកើនឡើងខ្ពស់ជាងករណីជួញដូរមនុស្សផ្សេងៗទៀត។
សង្គមស៊ីវិលបានស្នើឱ្យរដ្ឋាភិបាល គួរតែត្រួតពិនិត្យឡើងវិញទៅលើមន្ត្រីខ្លះពាក់ព័ន្ធនឹងការរៀបចំឯកសារផ្លូវច្បាប់ ដែលបង្កភាពងាយស្រួលក្នុងការនាំស្ត្រីខ្មែរទាំងនោះចេញទៅក្រៅប្រទេស។
ក្រុមអង្គការក្រៅរដ្ឋាភិបាលបង្ហាញការព្រួយបារម្ភថា ចំនួនស្ត្រីខ្មែរដែលរងគ្រោះដោយអំពើជួញដូរនេះ នឹងបន្តកើនឡើងថែមទៀត ប្រសិនបើរដ្ឋាភិបាលគ្មានវិធីទប់ស្កាត់ឱ្យមានប្រសិទ្ធភាពទេនោះ។
ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា បានប្រាប់វិទ្យុអាស៊ីសេរី នៅថ្ងៃទី៣០ ខែតុលា ថា តាមរបាយការណ៍ដែលអង្គការរបស់លោកទទួលបានបង្ហាញថា អំពើជួញដូរស្ត្រីខ្មែរ យកទៅរៀបការដោយបង្ខំនៅប្រទេសចិន គឺមានតួលេខខ្ពស់ជាងករណីជួញដូរមនុស្សផ្សេងទៀត ។
លោក នី សុខា បញ្ជាក់ថា ការកើនឡើងនេះ គឺធ្វើឱ្យមានក្តីបារម្ភចំពោះការប៉ះពាល់ដល់កិត្តិយសនិងតម្លៃនៃប្រទេសខ្មែរផង និងដល់ជីវិតនិងជីវភាពជនរងគ្រោះយ៉ាងខ្លាំងផង។
លោក នី សុខា៖ «យើងពិតជាបារម្ភអំពីការជះឥទ្ធិពលមិនល្អដល់តម្លៃនៃប្រទេសរបស់យើង ហើយទី២ទៀតវានឹងធ្វើឱ្យប៉ះពាល់ទៅដល់អនាគតរបស់ជនរងគ្រោះផ្ទាល់។ នៅពេលដែលជនរងគ្រោះត្រឡប់មកពីប្រទេសចិនវិញ អ្នកខ្លះក្លាយជាជនបាត់សតិ អ្នកខ្លះមានវិបត្តិផ្លូវចិត្តធ្ងន់ធ្ងរ ហើយអ្នកខ្លះទៀតត្រូវបានអ្នកជិតខាងរើសអើង។ ដូច្នេះវាប៉ះពាល់ទៅដល់អនាគត និងជីវភាពរស់នៅរបស់ពួកគាត់ទៅថ្ងៃអនាគតវែងឆ្ងាយទៀត»។
របាយការណ៍របស់សមាគមការពារសិទ្ធិមនុស្សអាដហុក (ADHOC) បង្ហាញថា រយៈពេល៩ខែឆ្នាំ២០២៤ គេបានអន្តរាគមន៍និងជួយសង្គ្រោះជនរងគ្រោះដោយអំពើជួញដូរមនុស្សនៅប្រទេសចិនចំនួន ២៥ករណី។ ក្នុងចំណោមស្ត្រីរងគ្រោះទាំងអស់ ២៩នាក់ គឺមាន២៨នាក់ បានរងគ្រោះដោយអំពើបង្ខំឱ្យរៀបការនៅប្រទេសចិន។
ក៏ប៉ុន្តែមន្ត្រីរដ្ឋាភិបាលមិនយល់ស្របចំពោះរបាយការណ៍របស់អង្គការក្រៅរដ្ឋាភិបាលជុំវិញតួលេខ នៃអំពើជួញដូរស្ត្រីខ្មែរ នៅប្រទេសចិននេះទាំងស្រុងទេ។
អនុប្រធានអចិន្ត្រៃយ៍គណៈកម្មាធិការប្រយុទ្ធប្រឆាំងការជួញដូរមនុស្ស នៃក្រសួងមហាផ្ទៃ អ្នកស្រី ជូ ប៊ុនអេង មានប្រសាសន៍ប្រាប់អាស៊ីសេរីនៅថ្ងៃទី៣០ ខែតុលា ថា កន្លងមកអ្នកស្រីធ្លាប់បានជួបពិភាក្សាជាមួយសមត្ថកិច្ចចិន។ កាលនោះសមត្ថកិច្ចចិនបដិសេធថា មិនមានករណីជួញដូរស្ត្រីខ្មែរឱ្យរៀបការនៅប្រទេសចិនទេ គឺមានតែស្ត្រីខ្មែរ បានស្ម័គ្រចិត្តទៅរៀបការនិងព្រមធ្វើលិខិតអាពាហ៍ពិពាហ៍ជាមួយបុរសជនជាតិចិនដោយខ្លួនឯង។
អ្នកស្រី ជូ ប៊ុន អេង បញ្ជាក់ទៀតថា តាមការកត់សំគាល់ បណ្ដឹងជុំវិញករណីជួញដូរមនុស្សនិងបង្ខំឱ្យរៀបការជាមួយបុរសជនជាតិចិន ភាគច្រើនតែងកើតឡើងនៅពេលដែលស្រ្តីខ្មែរទាំងនោះ មានជម្លោះជាមួយក្រុមគ្រួសារចិន។ ទោះជាយ៉ាងណា អ្នកស្រីថា អាជ្ញាធរខ្មែរនៅតែបន្តស៊ើបអង្កេតជុំវិញករណីនេះ។
អ្នកស្រី ជូ ប៊ុនអេង៖ «បើទៅប្រទេសគេមានបញ្ហា ហេតុដូចម្តេចនៅតែនាំគ្នាទៅទៀត? ។ ឥឡូវនេះតួនាទីរបស់រដ្ឋាភិបាល បានក្លាយទៅជាអ្នកដឹកជញ្ជូនជនរងគ្រោះទាំងនោះត្រឡប់មកស្រុកវិញ។ បានន័យថា ពេលដែលពួកគាត់នាំគ្នាទៅស្រុកគេគឺធ្វើដោយអាថ៌កំបាំង តែដល់ពេលមានបញ្ហាគឺឱ្យរដ្ឋាភិបាលទៅយកត្រឡប់មកវិញ។ នៅពេលយកមកដល់ប្រទេសមិនបានប៉ុន្មានផង ក៏នាំគ្នាទៅស្រុកគេទៀត។ យើងមិនបដិសេធហើយក៏មិនបោះបង់ចោលការងារជួយជនរងគ្រោះដែរ ទាំងការងារបង្ការទប់ស្កាត់ ដែលការងារនេះ ជាការងារសង្គ្រោះ ឬក៏ពេលខ្លះពួកជនរងគ្រោះបានត្រឡប់មកវិញដោយខ្លួនឯងក៏មាន»។
បែបនេះក្តី ប្រធានផ្នែកប្រឆាំងការជួញដូរមនុស្សនិងទេសន្តរប្រវេសន៍នៃអង្គការសង់ត្រាល់(CENTRAL) លោក ឌី ថេហូយ៉ា បញ្ជាក់ថាបើពិនិត្យតែលើរបាយការណ៍ជួញដូរមនុស្សនៅប្រទេសចិនមួយមុខ ឃើញថា អំពើជួញដូរបង្ខំស្ត្រីខ្មែរឱ្យរៀបការមានតួលេខប្រហែលពី៩០ទៅ៩៥% ក្នុងចំណោមករណីជួញដូរមនុស្សផ្សេងៗទៀត។
លោក ឌី ថេហូយ៉ា៖ «ភាគច្រើនខ្ញុំអាចវាយតម្លៃ ពី៩០ រហូតទៅដល់ជាង៩០ភាគរយនៃស្រ្តីខ្មែរដែលធ្វើដំណើរទៅប្រទេសចិន គឺទៅរៀបការជាមួយបុរសចិន។ បើប្រៀបធៀបតែករណីទៅប្រទេសចិនតែមួយមុខ គឺមានស្រ្តីខ្មែរច្រើន ដែលគេនាំទៅប្រទេសចិន ដើម្បីតែយកទៅរៀបការដោយបង្ខំតែម្ដង»។
អង្គការCENTRAL ឱ្យដឹងទៀតថា បច្ចុប្បន្នសកម្មភាពជួញដូរមនុស្សពីកម្ពុជាទៅប្រទេសចិន មានបីប្រភេទ គឺរូបភាពជួញដូរទៅបំរើផ្លូវភេទ រូបភាពជួញដូរយកទៅបង្ខំឱ្យរៀបការនិងរូបភាពជួញដូរកម្លាំងពលកម្ម។
របាយការណ៍គណៈកម្មាធិការប្រយុទ្ធប្រឆាំង ការជួញដូរមនុស្ស នៃក្រសួងមហាផ្ទៃ ឱ្យដឹងថា ក្នុងរយៈពេល ៧ខែ ឆ្នាំ២០២៤ សមត្ថកិច្ចបានជួយសង្គ្រោះជនរងគ្រោះ ពីអំពើជួញដូរមនុស្សទាំងនៅក្នុងស្រុកនិងក្រៅប្រទេសចំនួន ៣១២នាក់។ ក្នុងនោះដែរសមត្ថកិច្ច ក៏បានជួយសង្គ្រោះជនរងគ្រោះដែលគេបង្ខំឱ្យរៀបការខុសពីឆន្ទៈចំនួន ៩៣នាក់។ ជាមួយគ្នានេះសមត្ថកិច្ចកម្ពុជា ក៏បានចាប់ខ្លួនជនសង្ស័យក្នុងអំពើជួញដូរមនុស្សចំនួន ១៣៤នាក់ ក្នុងនោះមានជនជាតិចិនចំនួន៤នាក់។
កាលពីពាក់កណ្ដាលខែកក្កដា ឆ្នាំ២០២៤ ក្រសួងការបរទេសអាមេរិកធ្លាប់ចេញរបាយការណ៍ចាត់ទុកថា រដ្ឋាភិបាលកម្ពុជាមិនបានបំពេញតាមស្តង់ដារ នៃកិច្ចខិតខំប្រឹងប្រែងក្នុងការលុបបំបាត់អំពើជួញដូរមនុស្សទេ ដោយសារតែអំពើពុករលួយ របស់មន្ត្រីជាន់ខ្ពស់មួយចំនួនក្នុងជួររដ្ឋាភិបាល ហើយរដ្ឋាភិបាលមិនបានដាក់ទោស ទើបផ្ដល់ឱកាសឱ្យអំពើឧក្រិដ្ឋកម្មជួញដូរមនុស្សនៅតែរីករាលដាលនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
