កត្តាដែលធ្វើសិស្សបាក់ឌុបជ្រើសរើសថ្នាក់សង្គមច្រើន «ដោយសារក្រសួងអប់រំខ្វះការណែនាំ»
2024.09.30
ពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង២០២៣ នៅរាជធានីភ្នំពេញ កាលពីថ្ងៃទី៩ ខែមករា ឆ្នាំ២០២៤។
រូប៖ ហ្វេសប៊ុកលោក ហង់ ជួនណារ៉ុន
មន្ត្រីសង្គមស៊ីវិលលើកឡើងថា មូលហេតុដែលយុវជនមួយចំនួនមិនសូវចាប់អារម្មណ៍សិក្សាផ្នែកវិទ្យាសាស្ត្រ ដោយសារតែមុខវិជ្ជានេះមានភាពស្មុគស្មាញច្រើនជាងមុនវិជ្ជាវិទ្យាសាស្ត្រសង្គម និងខ្វះការយកចិត្តទុកដាក់ពីក្រសួងអប់រំ។ ពួកគាត់បារម្ភថា នៅពេលដែលយុវជនចាប់យកមុខវិជ្ជាវិទ្យាសាស្ត្រសង្គមច្រើននឹងធ្វើឱ្យកម្ពុជាប្រឈមនឹងខ្វះខាតអ្នកជំនាញផ្នែកវិទ្យាសាស្ត្រ បច្ចេកវិទ្យា និងវិស្វករដើម្បីអភិវឌ្ឍន៍ប្រទេសជាតិ។
មន្ត្រីសង្គមស៊ីវិលជំរុញឱ្យក្រសួងអប់រំយកចិត្តទុកដាក់លើកកម្ពស់វិស័យអប់រំពីព្រោះរយៈពេលប៉ុន្មានឆ្នាំចុងក្រោយនេះ ការជ្រើសរើសមុខវិជ្ជាវិទ្យាសាស្ត្ររបស់សិស្សនៅតាមសាលារៀនមានការធ្លាក់ចុះគួរឱ្យកត់សម្គាល់ ដែលបញ្ហានេះអាចធ្វើឱ្យសេដ្ឋកិច្ចកម្ពុជាកាន់តែធ្លាក់ចុះដោយសារមិនមានធនធានដើម្បីផ្គត់ផ្គង់តម្រូវការទីផ្សារការងារ។
ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី ប្រាប់វិទ្យុអាស៊ីសេរីនៅថ្ងៃទី២៩ ខែកញ្ញា ដោយអ្នកស្រីកត់សម្គាល់ឃើញថា បច្ចុប្បន្ននេះសិស្សមួយចំនួនហាក់មិនសូវចាប់អារម្មណ៍ការសិក្សាលើមុខជំនាញបែបវិទ្យាសាស្ត្រទេ ដោយសារជីវភាពគ្រួសារក្រីក្រ ហើយរៀនចប់គ្មានការងារធ្វើសមរម្យ ខណៈវិស័យអប់រំក៏គ្មានគុណភាព។ អ្នកស្រីបន្តថា ប្រសិនបើបើគ្មានកំណែទម្រង់លើវិស័យអប់រំ កម្ពុជានឹងមិនអាចឆ្លើយតបតាមតម្រូវការការវិវឌ្ឍន៍ដ៏លឿនរបស់ពិភពលោកបានដែរ។
អ្នកស្រី អ៊ុក ឆាយ៉ាវី៖ «ចំពោះខ្ញុំអ្វីដែលក្រសួងអប់រំគួរតែផ្ដោតទៅលើវិស័យអប់រំដើម្បីឱ្យមានគុណភាពគួរតែយើងរៀបចំពីថ្នាក់ក្រោមទៅមុនដូចជាសាលាមធ្យមសិក្សា បឋមអ៊ីចឹងទៅប្រសិនបើពួកគាត់មានគ្រឹះ ពីខាងក្រោមរឹងមាំបានអីន័យពួកគាត់ឡើងទៅដល់ណាក៏អត់ភ័យខ្លាចដែរ»។
ការលើកឡើងរបស់ប្រធានសមាគម គ្រូបង្រៀនកម្ពុជាឯករាជ្យរូបនេះ ធ្វើឡើងគឺបន្ទាប់ពីរដ្ឋមន្ត្រីក្រសួងអប់រំយុវជន និងកីឡា លោក ហង់ ជួនណារ៉ុន កាលពីថ្ងៃទី២៧ ខែកញ្ញា បានធ្វើសន្និសីទសារព័ត៌មានស្ដីពីដំណើរការរៀបចំការប្រឡងសញ្ញាប័ត្រមធ្យមសិក្សាទុតិយភូមិសម័យប្រឡង០៨ តុលា ឆ្នាំ២០២៤។ លោក ហង់ ជួនណារ៉ុន ថ្លែងថា បច្ចុប្បន្នមានសិស្សជ្រើសរើសថ្នាក់វិទ្យាសាស្ត្រសង្គមប្រមាណ៧០ភាគរយ (៧០%) ច្រើនជាងថ្នាក់វិទ្យាសាស្ត្រដែលប្រមាណ៣០ភាគរយ (៣០% ) ខណៈដែលកន្លងទៅ មានសិស្សជ្រើសរើសយកថ្នាក់វិទ្យាសាស្ត្ររហូតដល់ទៅ៧០ភាគរយ ឯវិទ្យាសាស្ត្រសង្គមមានប្រមាណ៣០ភាគរយ ប៉ុណ្ណោះ។ លោក ហង់ ជួនណារ៉ុន បញ្ជាក់ថា បញ្ហានេះគឺដោយសារសិស្សានុសិស្សមួយចំនួនពុំមានចំណេះដឹងគ្រប់គ្រាន់ដើម្បីជ្រើសរើសយកថ្នាក់វិទ្យាសាស្ត្រ។
លោក ហង់ ជួនណារ៉ុន៖ «នៅលើមុខវិជ្ជាទាំងអស់នេះវាពិបាកប្រសិនបើមិនមែនមូលដ្ឋានគ្រឹះពីថ្នាក់ទី៧ទេ ហើយប្រសិនបើសិស្សហ្នឹងមិនមែនជាសិស្សពូកែទេប្រឡងអត់ជាប់ទេអ៊ីចឹងហើយបានទេសិស្សច្រើនណាស់គាត់ចង់យកថ្នាក់វិទ្យាសាស្ត្រសង្គមដោយសារតែគាត់ល្មមៗគាត់អាចប្រឡងជាប់។ ប៉ុន្តែយើងយល់ឃើញថា ទី២ទៀតការរៀនថ្នាក់វិទ្យាសាស្ត្រនេះក៏វាតម្រូវឱ្យមានសាលាត្រូវមានឧបករណ៍សម្ភារៈគ្រប់គ្រាន់ »។
ជុំវិញរឿងនេះ ប្រធានកម្មវិធីផ្នែកចងក្រង និងពង្រឹងសិទ្ធិអំណាចនៃបណ្ដាញយុវជនកម្ពុជា (CYN) លោក ម៉ើ ចាន់ដារ៉ា យល់ឃើញថា ស្ថាប័នអប់រំមិនគួរតែដាក់បន្ទុកទៅលើសិស្សនោះទេ ប៉ុន្តែគួរតែបង្កើតកម្មវិធីសិក្សាដើម្បីតម្រង់ទិសដល់ពួកគាត់ ដូចជាបង្កើតវគ្គបណ្ដុះបណ្ដាលជំនាញ សម្រាប់មុខជំនាញពាក់ព័ន្ធនឹងវិទ្យាសាស្ត្រ ឬបច្ចេកទេសជាដើម។ លោកបន្តថា នៅពេលដែលសិស្សប្រឡងមិនជាប់ក្រសួងអប់រំគួរតែរៀបចំគោលនយោបាយបណ្ដុះបណ្ដាលទៅលើមុខជំនាញផ្សេងៗដើម្បីពង្រឹងសមត្ថភាពរបស់ពួកគាត់បន្ថែមទៀត។
លោក ម៉ើ ចាន់ដារ៉ា៖ «ហើយយើងក៏ឃើញថា រដ្ឋាភិបាលរបស់យើងក៏បានធ្វើប្ដេជ្ញាលើកកម្ពស់ការអប់រំក្នុងន័យនេះគឺធ្វើម៉េចលើកកម្ពស់សិទ្ធិឱ្យចូលរៀនដល់ដោយឥតគិតថ្លៃពីថ្នាក់ទី១ ដល់ថ្នាក់ទី៩ដោយឥតគិតថ្លៃ។ ប៉ុន្តែយើងមើលឃើញថា បញ្ហានៃការអប់រំ គុណភាពនៃការអប់រំមិនបានឆ្លើយតបទៅហ្នឹងតម្រូវការជាក់ស្ដែងទៅនឹងប្រជាពលរដ្ឋ ទៅនឹងសិស្សានុសិស្សយើងនៅឡើយទេ។ ជាក់ស្ដែងយើងមើលឧទាហរណ៍ប្រឡងបាក់ឌុបថ្មីៗនេះ សិស្សដែលគាត់ធ្លាក់បាក់ឌុបយើងមិនមានទិន្នន័យច្បាស់លាស់ថា ពួកគាត់ទៅណា»។
ក្រសួងអប់រំយុវជន និងកីឡា ឱ្យដឹងថា ការប្រឡងសញ្ញាប័ត្រមធ្យមសិក្សាទុតិយភូមិនៅឆ្នាំ២០២៤នេះ មានបេក្ខជនចុះឈ្មោះប្រឡងសរុបជាង១៣ម៉ឺននាក់ (១៣៧.០៤០) ក្នុងនោះថ្នាក់វិទ្យាសាស្ត្រមានចំនួនជិត ៤ម៉ឺននាក់ (៣៩.៣៥៨) និងថ្នាក់វិទ្យាសាស្ត្រសង្គមមានជាង ៩ម៉ឺននាក់ (៩៧.៦៨២)។
មន្ត្រីសង្គមស៊ីវិលយល់ឃើញថា ដើម្បីជំរុញឱ្យយុវជនចាប់អារម្មណ៍លើមុខវិជ្ជាវិទ្យាសាស្ត្ររដ្ឋាភិបាលគួរតែធ្វើកំណែទម្រង់លើវិស័យអប់រំឡើងវិញ និងរៀបចំគោលនយោបាយកម្ចីសម្រាប់សិស្សានុសិស្ស ឬនិស្សិត ដើម្បីឱ្យពួកគាត់យកបន្តការសិក្សាស្រាវជ្រាវរបកគំហើញថ្មីៗឆ្លើយតបទៅនឹងសម័យកាលឌីជីថល និងតម្រូវការទីផ្សារការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
